እግዚአብሔርን ማወቅ

ጴጥሮስ ወጳውሎስ ( ጴጥሮስና ጳውሎስ ) ::   ቅዱስ ጳውሎስ ፡፡ ሳውል(ጳውሎስ) ግን የጌታን ደቀ መዛሙርት እንዲገድላቸው ገና እየዛተ.. ወንዶችንም ሴቶችንም.. እያሰረ ወደ ኢየሩሳሌም ያመጣቸው ዘንድ በደማስቆ ላሉት ምኵራቦች ደብዳቤ ..ለመነ። ሲሄድም ወደ ደማስቆ በቀረበ ጊዜ ድንገት በእርሱ ዙሪያ ከሰማይ ብርሃን አንጸባረቀ፤በምድርም ላይ ወድቆ ሳለ፡- ሳውል ሳውል፥ ስለ ምን ታሳድደኛለህ? የሚለውን ድምፅ ሰማ።ጌታ ሆይ፥ ማን ነህ? አለው። እሱም፡- አንተ የምታሳድደኝ እኔ ኢየሱስ ነኝ፤ የመውጊያውን ብረት ብትቃወም ለአንተ ይብስብሃል አለው።እየተንቀጠቀጠና እየተደነቀ፡- ጌታ ሆይ፥ ምን አደርግ ዘንድ ትወዳለህ? አለው። ጌታም፡- ተነሥተህ ወደ ከተማ ግባና ታደርገው ዘንድ የሚያስፈልግህን ይነግሩሃል አለው።…ሳውልም ከምድር ተነሣ፥ አይኖቹም በተከፈቱ ጊዜ ምንም አላየም፤ እጁንም ይዘው እየመሩ ወደ ደማስቆ አገቡት። ሳያይም ሦስት ቀን ኖረ፤ አልበላምም አልጠጣምም ፡፡ ..ሐናንያ የሚሉት ..ደቀ መዝሙር ነበረ፥ ጌታም በራእይ፡- ሐናንያ ሆይ፥ ..ሳውል የሚሉትን ..ሰው ፈልግ.. አለው። ሐናንያም መልሶ፡- ጌታ ሆይ፥ ..በቅዱሳንህ ላይ ስንት ክፉ እንዳደረገ ስለዚህ ሰው ..ሰምቼአለሁ፤ ..ስምህን የሚጠሩትን ሁሉ ለማሰር ..ሥልጣን አለው አለ። ጌታም፡- ..ስሜን ይሸከም ዘንድ ለእኔ የተመረጠ ዕቃ ነውና ሂድ፤ ..ሐናንያም ሄዶ ወደ ቤቱ ገባ፥ እጁንም ጭኖበት፡- ..ሳውል ሆይ፥ ጌታ፥ በ.. መንገድ የታየህ ኢየሱስ ነው፥ ደግሞ ..ላከኝ አለ። ወዲያውም እንደ ቅርፊት ያለ ከዓይኑ ወደቀ፥ ያን ጊዜም ደግሞ አየ፤ ተነሥቶም ተጠመቀ፥ ወዲያውም ስለ ኢየሱስ ክርስቶስ እርሱ የእግዚአብሔር ልጅ እንደ ሆነ ..ሰበከ። የሰሙትም ሁሉ ተገረሙና፡- ይህ በኢየሩሳሌም ይህን ስም የሚጠሩትን ያጠፋ አይደለምን? ስለዚህስ ታስረው ወደ ካህናት አለቆች ይወስዳቸው ዘንድ ወደዚህ አልመጣምን? አሉ። ሳውል ግን እየበረታ ሄደ፤ .. አይሁድ ሊገድሉት ተማከሩ፤ ሳውል ግን አሳባቸውን አወቀ። ይገድሉትም ዘንድ በሌሊትና በቀን የከተማይቱን በር ሁሉ ይጠቀብቁ ነበር፤ ደቀ መዛሙርት ግን በሌሊት ወስደው በቅጥር ላይ አሳልፈው በቅርጫት አወረዱት። ሳውልም ወደ ኢየሩሳሌም በደረሰ ጊዜ ከደቀ መዛሙርት ጋር ይተባበር ዘንድ ሞከረ፤ ሁሉም ደቀ መዝሙር እንደ ሆነ ስላላመኑ ፈሩት። በርናባስ ግን ወስዶ ወደ ሐዋርያት አገባውና ጌታን በመንገድ እንዴት እንዳየውና እንደ ተናገረው ..በኢየሱስ ስም ደፍሮ እንዴት እንደ ነገረ ተረከላቸው ( የሐዋ 9፥1-27) ።   ማብራሪያ ቅዱስ ጳውሎስ የቀድሞ ስሙ ሳውል ነበር፡፡ እንደ ጴጥሮስ ከ12ቱ ሐዋርያነት አንዱ አልነበረም፡፡ የጌታ ደቀ መዛሙርትን ማለት ከአይሁድ እምነት ወደ ክርስትና የተመለሱትን ወደ እስር ቤት እንዲገቡ የሚያደርግ ነበር ( የሐዋ 8 ፥ 3 )፡፡ ሰማዕቱ ቅዱስ እስጢፋኖስ በድንጋይ ተወግሮ ሲገደል የተስማማ ሰው ነበር (የሐዋ 7 ፥ 58 - 60 ፤ 22 ፥ 20 )፡፡ ይህን ሁሉ የሚያደርገው ክርስትና እንዳይስፋፋና እንዲጠፋ በመፈለግ ነው፡፡ እንደ ለመደው በጌታችን በኢየሱስ ክርስቶስ ያመኑትን አይሁድ እንዲታሰሩ ወደ ደማስቆ ሲሄድ ያልጠበቀው ክስተት ተከሰተ፡፡ ታላቅ ብርሃን በራ፡፡ ሳውል ( ጳውሎስ ) መሬት ላይ ወደቀ፡፡ እስከ አሁን ሲያሳድድ፡- ስለምን ታሳድደኛለህ? የሚል አላጋጠመውም ነበር ፡፡ አሁን ግን፡- ሳውል ብሎ ስሙን ጠርቶ፡- ስለምን ታሳድደኛለህ? የሚል ጠያቂ ተገኘ፡፡ ስለምን ታሳድደኛለህ? ባዩ ሳውልን ግን መሬት ላይ ጥሎት ነበር፡፡ መሬት ላይ የወደቀው ሳውል ከአቅሙ በላይ የሆነ ኃያል ስለመጣበት ጌታ ብሎ ጠርቶ፡- ጌታ ሆይ አንተ ማን ነህ? አለ፡፡ የማይጋፋው ባላጋራ ሆነበት፡፡ የሚያሳድደው ክርስቲያኖችን ቢሆንም (በዚህ ሰዓት ስማቸው ደቀመዛሙርት ነበር የሚባሉት) እነርሱን ማሳደድ ክርስቶስን ማሳደድ ስለሆነ ፡- ማን ነህ ብሎ ለጠየቀው ጥያቄ፡- የምታሳድደኝ እኔ ኢየሱስ ነኝ፤…ይብስብሀልም አለው፡፡ የተንቀጠቀጠውና የተገረመው ሳውል ሊያሸንፈው ያልቻለውን መሬት ላይ የጣለውን ፡- ጌታ ሆይ በማለት ጠርቶ፡- ምን አደርግ ዘንድ ትወድዳለህ ? ብሎ ጠየቀ፡፡ ኢየሱስ ክርስቶስም ሊያደርግ የሚገባውን ነገር ነገረው፡፡ ጌታችን ኢየሱስ ሐናንያን ፡- ሄደህ ለሳውል ጸልይለት ሲለው በጣም ነበር የፈራው ፡፡ ሳውል በአሳዳጅነቱ ይታወቅ ነበር፡፡ ሳውል አምኖ ተጠመቀ፤ አይኖቹም ተከፈቱ ፡፡ ስለ ክርስቶስ አዳኝነት መስበክ ጀመረ ፡፡ መስበኩን ያዩ ሰዎች ሊያሳስራቸው የመጣ እንጂ እውነት አልመሰላቸውም ነበር፡፡ ያላመኑት አይሁድ ደግሞ ሲሰብክ ሲሰሙ ሊገድሉት ፈለጉ፡፡ ከተማይቱ ዙሪያዋን ቅጥር ነበራትና በበሩ ሲወጣ ሊገድሉት  አስበው በሩ ላይ ይጠብቁት ነበር፡፡ እርሱ ግን በቅጠሩ ላይ በዘዴ ዘሎ በመውረድ አመለጠ፡፡    ቅዱስ ጴጥሮስ ፡፡ ጴጥሮስም ከቤት ውጭ በአጥሩ ግቢ ተቀምጦ ነበር፤ አንዲት ገረድም ወደ እርሱ ቀርባ። አንተ ደግሞ ከገሊላው ከኢየሱስ ጋር ነበርህ አለችው።እርሱ ግን፡- የምትዪውን አላውቀውም ብሎ በሁሉ ፊት ካደ። ወደ በሩም ሲወጣ ሌላይቱ አየችውና በዚያ ላሉት፡- ይህ ደግሞ ከናዝሬቱ ከኢየሱስ ጋር ነበረ አለች። ዳግመኛም ሲምል። ሰውየውን አላውቀውም ብሎ ካደ። ጥቂትም ቈይተው በዚያ ቆመው የነበሩ ቀርበው ጴጥሮስን፡- አነጋገርህ ይገልጥሃልና በእውነት አንተ ደግሞ ከእነርሱ ወገን ነህ አሉት። በዚያን ጊዜ፡- ሰውየውን አላውቀውም ብሎ ሊራገምና ሊምል ጀመረ። ወዲያውም ዶሮ ጮኸ። ጴጥሮስም፡-ዶሮ ሳይጮኽ ሦስት ጊዜ ትክደኛለህ ያለው የኢየሱስ ቃል ትዝ አለው፤ ወደ ውጭም ወጥቶ መራራ ልቅሶ አለቀሰ ( ማቴ 26 ÷ 69 - 75 ) ፡፡   ማብራሪያ ቅዱስ ጴጥሮስ ችኩል ባሕሪ የነበረው ሲሆን ጌታችን ኢየሱስን፡- አላውቀውም ብሎ ክዶም ነበር፡፡ በመንፈሳዊ ሕይወቱ ሲበረታ ግን ወንጌልን ደፍሮ የሰበከ ነበር፡፡ የጳውሎስም ሆነ የጴጥሮስ ታሪክ ሰፊ ነው፡፡ በቤተ ክርስቲያን ታሪክ ጴጥሮስ፡- እንደ ጌታዬ አትስቀሉኝ በማለት ቁልቁል ተሰቅሎ፣ ጳውሎስ ደግሞ በሰይፍ ተቀልቶ እንደ ሞቱ ይነገራል፡፡ የሁለቱም መታሰቢያ በዓል ሐምሌ 5 ቀን ነው፡፡ ከሰማዕታት ጽናትን እንማራለን፡፡ እነርሱ ላመኑት ለክርስቶስ ለነፍሳቸው ሳይቀር አልሳሱም፡፡ መውደቅ መነሣት ያለ ነው፡፡ ለምሳሌ ጴጥሮስ ክዶ ነበር፡፡ ነገር ግን ከውድቀታችን ተምረን የሞተልንን ጌታችን ኢየሱስ ክርስቶስን እስከ ሕይወታችን ፍጻሜ  ድረስ መከተል ይገባናል፡፡ ጌታችን ኢየሱስ ክርስቶስ ደግ አምላክ ነው፡፡ የካደውን ጴጥሮስን አሳዳጁን ጳውሎስንም ይቅር ብሎ እንዲያገለግሉት ያደረገ አምላክ ነው፡፡ ደካሞች ናችሁ ብሎ እኛንም አይተወንም፡፡  እንደ ጴጥሮስና ጳውሎስ እግዚአብሔር መጽናትን ያድለን፡፡ ወስብሐት ለእግዚአብሔር፡፡ አሜን! ✍ ዘማሪ ዲያቆን ንጉሤ ጥላሁን ( ሰባኬ ወንጌል ) በተጨማሪም የንድፍና የኮምፒዩተር ባለሙያ ▶️ ስብከቶቼንና መዝሙሮቼን በዩቱቤ ቻናል  ማግኘት ትችላላችሁ https://youtube.com/channel/UC5CXetEDzzsnMHbPAT-b_0w ▶️ ቴሌግራም ቻናል https://t.me/EMaweq ▶️ ፌስቡክ fb.me/yeglie