እግዚአብሔርን ማወቅ

አማኑኤል ተስፋ በታጣ ሰዓት ከጎናችን የሚቆም ነው፡፡   እግዚአብሔርም ደግሞ ተናገረኝ እንዲህም አለኝ። ይህ ሕዝብ በቀስታ የሚሄደውን የሰሊሆምን ውኃ ጠልቶአልና፥ ረአሶንንና የሮሜልዩንም ልጅ ወዶአልና ስለዚህ፥ እነሆ፥ እግዚአብሔር ብርቱና ብዙ የሆነውን የወንዝ ውኃ፥ የአሦርን ንጉሥና ክብሩን ሁሉ፥ ያመጣባቸዋል፤ መስኖውንም ሁሉ ሞልቶ ይወጣል፥ በዳሩም ሁሉ ላይ ይፈስሳል፤ እየጐረፈም ወደ ይሁዳ ይገባል፤ እያጥለቀለቀም ያልፋል፥ እስከ አንገትም ይደርሳል፤ አማኑኤል ሆይ፥ የክንፉ መዘርጋት የአገርህን ስፋት ትሞላለች ( ኢሳ 8 ÷ 5 - 8 ) ።   ማብራሪያ እግዚአብሔር ተናገረኝ እንዲህም አለኝ የሚለው ነቢዩ ኢሳይያስ ነው፡፡ ረአሶን የሶርያ ንጉሥ ነው፡፡ የሮሜልዩ ልጅ የተባለው ደግሞ የእስራኤል ንጉሥ ነው፡፡ በዚህ ሰዓት እስራኤል ለሁለት የተከፈለችበት ጊዜ ነው፡፡ ኢትዮጵያ ለሁለት ከቅርብ ዓመታት በፊት ኢትዮጵያና ኤርትራ ተብላ እንደተከፈለች እስራኤልም እንዲሁ እስራኤልና ይሁዳ ተብላ ለሁለት ተከፍላ ነበር፡፡ እስራኤል ሰሜናዊው ክፍል ሲሆን ይሁዳ ደቡባዊው ክፍል ነው፡፡ ለሁለትም ከተከፈሉ በኋላ ብዙ ጊዜ ውጊያ አድርገዋል፡፡ ኢትዮጵያና ኤርትራ ከተከፈሉ በኋላ እንደ ተዋጉት፡፡ የይሁዳ ንጉሥና ሕዝቡ በምንጭ ውኃ ( በሰሊሆም ምንጭ ውኃ ) የተመሰለውን እግዚአብሔርን ትተው በእስራኤልና በሶርያ ንጉሥ ተስፋ አድርገው ነበር፡፡ በእስራኤልና በሶርይ ንጉሥ ቢታመኑም ሁለቱም ነገሥታት ሊቋቋሙት የማይችሉትን ሌላ የአሦርን ንጉሠ ነገሥት እንደሚያመጣባቸው እግዚአብሔር ተናገረ፡፡ አመጣጡ ደግሞ ወንዝ ሞልቶ ዳርቻን ሁሉ በሚያጥለቀልቅና እየጎረፈ ሲመጣ ያገኘውን በመጠራረግ ሁሉን ነገር ከመሸፈን አልፎ ሙላቱ እስከ አንገት በሚደርስ መልኩ ነው፡፡ ንጉሠ ነገሥቱ አደጋ ለመጣል በዚህ መልኩ ቢመጣም  እግዚአብሔር ግን ለይሁዳ ሕዝብ መልሶ እንደሚራራ ሲነግረን ኢሳይያስ እንዲህ ይላል፡፡ አማኑኤል ሆይ፥ የክንፉ መዘርጋት የአገርህን ስፋት ትሞላለች። አማኑኤል ማለት እግዚአብሔር ከኛ ጋር ማለት ነው፡፡ ኢሳይያስ የይሁዳ ሕዝብ እንዲጠፉ እግዚአብሔር ዝም እንደማይልና በጭንቃቸውም ሰዓት ተመልሶ ተስፋ እንደሚሆናቸው ይገልጻል፡፡ እነርሱ እግዚአብሔርን ተስፋ ማድረግ ትተው ሳሉ እርሱ ግን  ዶሮ ጫጩቶቿን በክንፎቿ ሰውራ እንደምትጠብቅ ምድሪቱንም  በተዘረጉት ክንፎቹ ከዳር እስከ ዳር እንደሚሸፍን ያስታውቃቸዋል፡፡ አማኑኤል አምላካችን የጭንቅ ቀን ደራሻችን ነው፡፡ ዙሪያው ጨለማ ሲሆንብን ፡- አለሁ የሚለን አጽናኛችን ነው፡፡ ድቅድቅ ጨለማ ሆኖ ምንም ብርሃን የሚባል በሌለበት ሰዓት ብርሃን ሆኖ ለሕይወታችን ተስፋ የሚፈነጥቅልን ነው፡፡ አንድ ሰው በውኃ ውስጥ ቢገባና ውኃው እስከ አንገቱ ደርሶ ስናይ እንደሚያስጨንቅ በሕይወታችን ነገሮች ልክ እንደዚህ ሆነው ቢታዩንም አማኑኤል አለልን፡፡ እስከ አንገታችን ይሸፍኑን እንጂ አያሰምጡንም፡፡ ነገሮቻችን የቱንም ያህል ጣራ ቢነኩ በአማኑኤል አምላካችን ጣቶች ሲዳሰሱ ይሟሽሻሉ፤ ይከስማሉም፡፡ እየበረረ በማምለጡ ማንም ስለማይደርስበትና እንኳን ሊያዝ ያየቱ ሁሉ ነፍሳቸውን ለማዳን መንገድ ስለሚለቁለት ሽምጥ በመጋለቡ በሬው የእነርሱ ስለ መሆኑ ተስፋቸውን እንጠፍጥፈው እርማቸውን ሰዎች ቢያወጡም ለአማኑኤል ግን ልክ እንደዚህ ተስፋችንን ያንጠፈጠፍንበት ነገር ሁሉ ቀላል ነው፡፡ ነገሩንም የሚገለበጥ አምላክ ነው፡፡ ክፉ ይመጣል ብንባል አንፍራ፡፡ ያመንነው አማኑኤል አምላካችን ክንፎቹን ዘርግቶ የሚሰውረን አምላክ ነው፡፡ ልክ በራስ እንደሚጠለቅ የራስ ቁር (ሄልሜት) ክንፎቹን የሚያስጠልቀን ነው፡፡ ጌታችን ኢየሱስ ክርስቶስ አማኑኤል ሆኖ የመጣው የሰው ዘር በምድር ላይ ኃጢአቱ በዝቶ የሚያድነው አጥቶ ተስፋ በቆረጠበት ሰዓት ነው፡፡ ምንም በሌለበት ምድረ በዳ የጥም ቃጠሎ በበዛበት አማኑኤል ተስፋ የሚሆን አምላክ ነው፡፡ ምድረ በዳውን፡- ለምለም ሁን ቢለው የሚሆን ፣ ባዶ ሸለቆውን በውኃ ጢም እንዲል የሚያደርግ ነው፡፡ ምድረ በዳችንን ገነት በማድረግ ሸለቆአችንንም በውኃ የሚሞላ ነው፡፡ ምንም ለሌላት ምስኪን ድሀ ባልቴት ( አሮጊት) አማኑኤል ሙላቷ ነው፡፡ እርሱ የድሆችም መመኪያ ነው፡፡ አማኑኤል ሁሉ ነገራችን ነው፡፡ የአገራችንን ዳርቻዎች ሁሉ በክንፎቹ የሚጋርድ አምላክ ነው፡፡ ስብሐት ለከ አማኑኤል አምላኪየ ኵሎ ጊዜ፡፡ ፈጣሪዬ አማኑኤል ሆይ ላንተ ሁልጊዜ ምስጋና ይገባል፡፡ ✍ ዘማሪ ዲያቆን ንጉሤ ጥላሁን ( ወንጌል ሰባኪ ) በተጨማሪም የንድፍና የኮምፒዩተር ባለሙያ ▶️ ስብከቶቼንና መዝሙሮቼን በዩቱቤ ቻናል  ማግኘት ትችላላችሁ https://youtube.com/channel/UC5CXetEDzzsnMHbPAT-b_0w ▶️ ቴሌግራም ቻናል https://t.me/EMaweq ▶️ ፌስቡክ fb.me/yeglie