بيت العافية 🇩🇿

لي مهتمين بالاكل الصحي والمنتجات الطبيعية والحياة البسيطة وميزانية قليلة ننصحكم بمدينة عين الدفلى أو البليدة أو المدية أو شلف في الصيف كنا رايحين في إجازة لجيجل، وبالخطأ في الطريق السيار، بدل ما ندخلو على بجاية لقينا رواحنا رايحين على سطيف وميلة 😂 وهنا صراتلي حاجة خلاتني ننتبه أكثر لنعمة منطقتنا… ملي دخلنا سطيف، يا سبحان الله! السخانة والصهد، والأراضي في بزاف المناطق كانت صفراء وقاحلة، والمنظر خلاّني نحمد ربي على ولايتي ❤️ رغم أن ولايتي في السنوات الأخيرة عانت من الجفاف والسخانة في الصيف، وقلة الأمطار في الشتاء — ما عدا السنة الماضية الحمد لله — إلا أنها تبقى ولاية فلاحية بامتياز 🌿 شوية غابات، مزارع، وبحاير على طول واد الشلف اللي يمر من وسط الولاية، وخضر وفواكه بأسعار في المتناول، وحتى المنتجات الطبيعية تلقاها بكثرة: البيض، اللحوم، الحبوب… والأسواق الأسبوعية، تاع الرجال ولا تاع النساء، معمرة بالخيرات. المهم… ولايتي ما تعجبنيش 🫣😂 لكن كي خرجت منها وشفت بعيني، عرفت قيمة النعمة اللي رانا عايشين فيها. وواش الفايدة من هاد المنشور كامل؟ 🤔 البارح كي حطيتلكم منشور على عولة الزيتون والرمان ، قلتلكم باللي عندنا متوفرة وبسعر مناسب ابتداءا من 60دج للكيلو. كاين اللي ما صدقنيش 😅 بصح الأسعار والمواسم تختلف من ولاية لولاية، واللي متوفر ورخيص عندنا ممكن يكون غالي أو نادر في منطقة أخرى. لهذا العولة تبدأ من حاجة بسيطة: نعرفو واش عندنا، ونعرفو وقتاش يجي موسمو، ونستغلو وفرة منطقتنا بدل ما نستناو حتى يغلَى كل شيء. 🌿 ودرك السؤال: شكون اللي عرف ولايتي واش هي؟ 👀🫣