Каардынацыйная Рада

27 кастрычніка дэлегацыя Каардынацыйнай Рады сустрэлася з Прэзідэнткай Кангрэса мясцовых і рэгіянальных уладаў Рады Еўропы Гун Мары Хелгесен і Беліндай Готардзі — дакладчыцай па дэмакратычнай Беларусі. У цэнтры абмеркавання былі сур’ёзныя выклікі, з якімі сёння сутыкаюцца беларусы як унутры краіны, так і ў выгнанні. Дэлегацыя праінфармавала Прэзідэнтку і дакладчыцу пра працяг палітычнага пераследу і транснацыянальных рэпрэсій з боку рэжыму, крытычную сітуацыю з палітычнымі зняволенымі, а таксама пра неабходнасць падтрымкі грамадзян Беларусі, якія пражываюць за мяжой. Асобна падкрэслілі патрэбу мінімізаваць наступствы транснацыянальных рэпрэсій рэжыму Лукашэнкі супраць беларусаў у краінах Рады Еўропы — у прыватнасці, немагчымасць атрымаць ці абмяняць пашпарты праз амбасады і консульствы, а таксама атрымаць неабходныя даведкі і пасведчанні. Менавіта таму важнае значэнне мае падрыхтоўка даклада «Роля мясцовых і рэгіянальных уладаў у падтрымцы беларускіх дэмакратычных сіл і грамадзянскай супольнасці ў выгнанні», якую зараз вядзе дакладчыца Кангрэса ў супрацы і каардынацыі з дэлегацыяй КР. Прыняццё даклада плануецца падчас сесіі Кангрэса ў сакавіку 2027 года. Бакі абмеркавалі важнасць уключэння ў даклад тэм, звязаных з імплементацыяй Люксембургскіх пагадненняў на мясцовым узроўні ў краінах-сябрах Рады Европы, а таксама забеспячэннем доступу да мясцовых сацыяльных праграм падтрымкі былых палітвязняў і іншых рэпрэсаваных беларусаў. Дэлегацыя адзначыла, што гэтыя пытанні таксама паслядоўна падымаюцца падчас двухбаковых сустрэч з нацыянальнымі дэлегацыямі. Удзельнікі падкрэслілі важнасць салідарнасці на мясцовым і рэгіянальным узроўні, акцэнтаваўшы ўвагу на неабходнасці абмену паспяховымі практыкамі краін, якія прымаюць беларусаў, і іх далейшым распаўсюдзе. Таксама абмеркавалі важнасць працягу супрацы па развіцці патэнцыялу беларусаў для будучай Беларусі. Дэлегацыя падзякавала Кангрэсу за правядзенне варкшопа «Лідары перамен» і вебінараў для беларусаў, якія бачаць сваю будучыню ў мясцовым самакіраванні ў Новай Беларусі, а таксама паінфармавала пра камунікацыю з нацыянальнымі дэлегацыямі па арганізацыі адукацыйных візітаў у мясцовыя адміністрацыі краін Рады Европы. Акрамя таго, Прэзідэнтка і дэлегацыя абмеркавалі пытанні актыўнага ўключэння прадстаўнікоў Беларусі ў дзейнасць Кангрэса — у прыватнасці, забеспячэнне ўдзелу членаў дэлегацыі ў будучых місіях па назіранні за мясцовымі і рэгіянальнымі выбарамі, а таксама працяг супрацоўніцтва, у тым ліку беларускіх экспертаў і экспертаў Кангрэса, з мэтай распрацоўкі дарожнай мапы па далучэнні будучай дэмакратычнай Беларусі да Еўрапейскай хартыі мясцовага самакіравання.