ፍሬ ሃይማኖት

በስመ አብ ወወልድ ወመንፈስ ቅዱስ ፩                     አምላክ አሜን!!!           ✝️ ሐዋርያው ቅዱስ ታዴዎስ ✝️ በደረጀ እሸቴ(ወልደ ሥላሴ)      በየዓመቱ ሐምሌ 2 ቀን  በቅድስት ቤተ ክርስቲያናችን የታላቁ ሐዋርያ የቅዱስ ታዴዎስ ዓመታዊ ክብረ በዓል ይከበራል።ይህ ሐዋርያ ከአስራ ሁለቱ የጌታ ደቀ መዛሙርት መካከል አንዱ ሲሆን አገረ ስብከቱም ከኢየሩሳሌም ከተማ  150ኪ.ሜ ርቀት ላይ በምትገኘው  ሶርያ ነው።       ቅዱስ ጴጥሮስ ለሐዋርያት እንደ አባት የሚታይ በመሆኑ ታዴዎስን ወደ አገረ ስብከቱ ለማድረስ አብሮት ተጉዞ ነበር።በከተማዋ አጠገብ ሲደርሱም አንድ ሽማግሌ ሲያርሱ አገኟቸውና ቅዱስ ጴጥሮስ ጠጋ ብሎ "እባክዎ የምንበላው ነገር ይስጡን?" በማለት ጠየቃቸው።ሽማግሌውም ደግ ስለነበሩ "ከቤቴ እስካመጣላችሁ ድረስ በሬዎቼን ጠብቁልኝ" ብለው ወደ መንደር ገቡ።        ሁለቱ ሐዋርያት የገበሬውን ደግነት ተመልክተው ታዴዎስ ጠምዶ ሲያርስ ቅዱስ ጴጥሮስ መዝራት ጀመረ።       እኒያ ገበሬም ከቤታቸው ምግቡን ይዘውላቸው ሲመለሱ የተዘራው እህል በአንድ ቀን በቅሎ አሽቶ ጠበቃቸው።ይህን ታላቅ ተአምር የተመለከቱት ገበሬም ባዩት ነገር ሁሉ እየተደነቁ ሁለቱን ሐዋርያት "እናንተ ከሰማይ የወረዳችሁ አማልክት ናችሁን?"ብለው ጠየቋቸው።እነርሱም የመጡበትን አገርና ምክንያት አስረዷቸው።ወንጌልንም ሰበኩላቸው።       ገበሬው በአድናቆት እሸቱን ታቅፈው ለሚስታቸው ሊያሳዩ ወደ ቤት ሮጡ።የከተማው ሰዎችም ነገሩ ገርሟቸው ከበቧቸው።እርሳቸውም ያዩትን እና የሰሙትን ሁሉ ተረኩላቸው።        ከዚህ በኋላ ቅዱስ ጴጥሮስ ወደ ኢየሩሳሌም ተመለሠ።የከተማው መኳንንትም ነገሩን በሰሙ ጊዜ "ይህ ከአሥራ ሁለቱ አስማተኞች ወገን ሳይሆን አይቀርምና ወደ ከተማችን እንዳይገባ ምን እናድርግ?" ተባባሉ።       ከመካከላቸው አንዱ "እነዚህ አስራ ሁለቱ አስማተኞች ዝሙትን ይጸየፋሉና ዘማዊት ሴትን በከተማችን በር  እናቁም"ብሎ ስለመከራቸው በከተማቸው መግቢያ በር ላይ የታወቀች ዘማዊት ሴትን ራቁቷን አድርገው አቆሟት።      ሐዋርያው ቅዱስ ታዴዎስ ገጠር ገጠሩን ሲያስተምር ውሎ ወደ ማታ ወደ ከተማ ሲመጣ ያችን ዘማዊት ሴት በከተማው በር ቆማ አያት።የምታደርገው ድርጊት  ሁሉ የሚያሰጠይፍ ነበርና ያን ጊዜ ወደ ልዑል እግዚአብሔር ጸለየ።በዚህ ሰዓት ወደ አየር ወጥታ ተንጠለጠለች።የአገሩም ሰዎች በሚያዩት ነገር እስኪገረሙ ድረስ ትጮህ ነበር።እርሱም ወደ ከተማ ገብቶ ወንጌልን መስበኩን ቀጠለ።ያችንም ሴት ከተንጠለጠለችበት አውርዶ አሳምኖ በማጥመቅ በቤቷ የክርስቲያኖችን ጉባዔ መስርቷል።      በከተማዋ ውስጥ እያስተማረ ለአያሌ ቀናት ሰነበተ።አንድ ቀን "ባዕለ ጸጋ መንግስተ ሰማያት ከሚገባ ግመል በመርፌ ቀዳዳ ብታልፍ ይቀላል።" እያለ ሲያስተምር አንድ ባዕለ ጸጋ ሰማና በአጠገቡ ወደ ሚያልፉት ነጋድያን እያመለከተ "እስኪ የተናገርከውን አድርገህ አሳየኝ" በማለት ጠየቀው።      ሐዋርያው ታዴዎስም አንድ ብረት አንጣሪ ክርስቲያን ወዳጅ ነበረውና መርፌ ሠርቶ እንዲያመጣለት ላከበት።ያም ወዳጁ የጠቀመው መስሎት ቀዳዳውን አስፍቶ ሰጠው።ታዴዎስ ግን  ቀዳዳው እንደሌላው መርፌ እንዲሆን አስደርጎ ስመ እግዚአብሔርንም ጠርቶ "ላመነ ሁሉ ይቻላል" ነውና ግመሏን በመርፌው ቀዳዳ አሾልኮ አሳየው።በዚህም የተነሳ በዙርያው የነበሩት ሁሉ በትምሕርቱ አመኑ።         ሐዋርያው ቅዱስ ታዴዎስ ከሶርያ በኋላ በፐርሺያ አውራጃዎች ሲያስተምር ቆይቶ ሐምሌ ሁለት ቀን በሰማዕትነት አርፏል። የቅዱስ ታዴዎስ በረከት በሁላችንም ላይ ይደርብን።አሜን። ምንጭ፦"ቤተ ክርስቲያንህን ዕወቅ" መጽሐፍ።       ወስብሃት ለእግዚአብሔር       ወለ ወላዲቱ ድንግል       ወለ መስቀሉ ክቡር።        አሜን።