🍂 ዲነል ኢስላም 🕌

#ብረትን_ያለሰለሰ_ጌታ_ነው_ያለሽ አንዳንድ ጊዜ ሁኔታዎች እንደ ብረት የጠነከሩና የፊጥኝ ያሰሩን ይመስልናል!! መውጫ ያጣህለት ውስብስብ ችግር፣ ወይም መቼም የማይከፈት የመሰለህ የተቆለፍብህ በር፣ ወይም ደግሞ እንደ ተራራ ልብህ ላይ የተጫነ ከባድ ሀዘን... «وَأَلَنَّا لَهُ الْحَدِيدَ» «ብረትንም ለእርሱ አለዘብንለት።» ብረት እኛ ከምናውቃቸው ነገሮች ሁሉ በጣም ጠንካራው ነው፤ ነገር ግን በአላህ ችሎታና እዝነት ፈቃድ በዳውድ (ዐለይሂ ሰላም) እጅ ላይ እንደ ሊጥ ለሰለሰ። ያውም ያለ እሳትና ያለ አንዳች ልፋት.. በአላህ ትዕዛዝ ብቻ! የአንተ አምላክ ያ የዳውድ አምላክ ነው፤ ብረትን ማለስለስ የቻለው ጌታ፣ በአይን ጥቅሻ ውስጥ ላንተ የጨከኑብህን ልቦች ሊያለሰልስልህ፣ የከበዱህን መንገዶች ሊያቀላልህ፣ ፍርሃትህን በሰላም፣ ሀዘንህንም በደስታ ሊቀይርልህ ሙሉ ችሎታ አለው። ሁኔታዎች አንተ ላይ ስለጠነከሩ ብዙ አትጨነቅ.. ምክንያቱም ሁሉን አድራጊው ጌታ እጅግ ሩህሩህ ነው፤ ብረትን ያለሰለሰው ጌታ ምንም ነገር አያቅተውም። አላህ ጉዳይህን ከተረከበው.. ምንም አይነት የክብደትና የድካም ስሜት ሳይሰማህ ወደ ፈለግከው ግብ እንድትደርስ ምክንያቶችን ያለሰልስልሃል፣ ልቦችን ያስገዛልሃል፣ መንገዶችንም ያመቻችልሃል። ወደ ችግሩ ጥንካሬ አትመልከት፤ ይልቁኑ የምትለምነውን ጌታ ኃይልና እርግጠኝነት ተመልከት። ያንን ጠንካራ ብረት በባሪያው እጅ ላይ ለዛባና ለስላሳ ያደረገው ጌታ፣ ምኞቶችህን በእጆችህ መካከል የሚጨበጡ እውነታዎች ሊያደርጋቸው እንደሚችል እመን። ብረት ለዳውድ መለስለሱ ከጦርነት መቅሰፍት የሚጠብቁ ጋሻዎችን እንዲሰራበት አስቻለው። በተመሳሳይ መልኩ፣ ልብ በአላህ እውቀት ሲለሰልስ፣ ከዱንያ መገለባበጥና ከፈተናዎች እሳት የሚጠብቁትን የትዕግስትና የእምነት ጋሻዎችን ይሰራል። በመንገድህ ላይ ያለው ማንኛውም ጠንካራ ነገር ሁሉ፣ ለመልስለስ የአላህን የገርነት እስትንፋስ የሚጠብቅ "ብረት" ነው። ከቁሳቁሱ ጥንካሬ ጋር አትጋጭ፤ ይልቁኑ መሰናክሎች እንዴት እንደሚቀልጡ እና ነገሮች ሁሉ በፍቅርና በለስላሳነት እንዴት እንደሚገዙልህ ለማየት፣ እይታህን ምክንያቶች ኹሉ ፈጣሪ ወደ ኾነው አላህ አተኩር። አላህ ያንተን ሁኔታ ለመቀየር ግርግር ወይም የሚታዩ ተአምራትን አያስፈልገውም፤ እሱ ልቦችንና ሁኔታዎችን በማይታይ ረቂቅ እዝነቱ ይቀይራል፣ አንተም ሳታውቀው ያ የማይቻል የመሰለው ነገር በእጆችህ መካከል ቀላልና የተገራ ሆኖ ታገኘዋለህ። «وَاللَّهُ يَقُولُ الْحَقَّ وَهُوَ يَهْدِي السَّبِيلَ» «አላህም እውነቱን ይናገራል፡፡ እርሱም ትክክለኛውን መንገድ ይመራል፡፡» የከበደንን ኹሉ ያንሳልና ♥