🇸🇦ሐምዱ ቋንጤ🇵🇸

💎 አስገራሚው የትዳር ጉዞ💎 ከኻዲም ሚስትነት…… እስከ ነብይ ልዕልትነት    ዘይድ ኢብኑ ሓሪሳ በልጅነቱ ነበር ከእናቱ ተነጥቆ በመካ ገበያ በባርነት የተሸጠው። አላህ ለወሰነለት ቦታ ሊደርስ በባርነት የገዛችው አንጋፋዋ ሰሓብይ ኡሙል ሙእሚኒን ኸዲጃ ቢንት ሑወይሊድ ነበረች።   ኸድጃም ለረሱልﷺ በጉዳያቸው ላይ እንዲቆምና እንዲኻድማቸው ብላ በስጦታ መልክ አበረከተችላቸው።    በዚህ መልኩ ወደ ረሱልﷺ እጅ የደረሰው ዘይድ ነብዩﷺ በጣም ያቀርቡት፣ ይወዱትና ያከብሩት ነበር። በዚሁ ውዴታቸው ከባርነት ነፃ አውጥተው ነፃነቱን አወጁለት።    ዘይድ በረሱልﷺ እጅ ነፃ ከተባለ በኋላ ረሱልﷺ ሌላም ስጦታ ሊያበረክቱለት አሰቡ።    ወደ አክስታቸው አሚማ ቤት በማቅናት: «አክስቴ ሆይ ልጅሽ ዘይነብን ለማጨት ነው የመጣሁት» አሏት። የዘይነብ እናት በደስታ ጩቤ ልትረግጥ ደረሰች [ረሱልﷺ ልጇን የሚያጯት ለራሳቸው መስሏት]። አስከትለው «ዘይነብ የፈለኳት ግን ለራሴ አይደለም: ይልቁንስ ኻዲሜ ለነበረው ለዘይድ ነው» አሏት።   የረሱልﷺ አክስት አሚማ ወደ ልጇ በመሄድ: "ልጄ ሆይ! የአላህ መልእክተኛﷺ ሊያጩሽ መጥተዋል" አለቻት። ዘይነብም በሰማችው ነገር ደስታዋን መቆጣጠር አቃታት [ረሱልﷺ የፈለጓት ለራሳቸው መስሏት]። አሚማ አስከትላ "ረሱልﷺ ያጩሽ ግን ለራሳቸው ሳይሆን ባሪያቸው ለነበረው ለዘይድ ነው" አለቻት።    ታላቋ ሰሓብይ ዘይነብ ቢንት ጀሕሽ ቀጥታ ወደ ረሱልﷺ በመሄድ;    "አንቱ የአላህ ነብይ ሆይ! እውነት ዘይድን ለእኔ ወደውልኛልን?? እኔ እንደሆንኩ ለራሴ አልወደውም፤ እርሶ ከወደዱልኝ ግን አገባዋለሁ" አለቻቸው። ረሱልﷺ :  «እንዴታ! እኔማ ወድጄልሻለሁ» አሏት። ቀጥታ ኒካሕ ታሰረላቸውና ዘይድና ዘይነብ ተጋቡ።    ሆኖም ግን የአላህ ውሳኔ ሆነና የዘይድና የዘይነብ ጋብቻ ብዙም መቆየት አልቻለም። በሁለታቸው አለመግባባት ጭቅጭቅ በዛ። ዘይድ ዘይነብን ፈትቶ እንዲለያዩ እንደሚፈልግ ለረሱልﷺ በተደጋጋሚ ቢነግራቸውም: እሳቸው ግን «አላህን ፈርተህ ሰብር አድርገህ ያዛት» እያሉ ይመክሩታል። በመጨረሻም ምንም ሳይስማሙ ቀርተው በሰላማዊ ፍቺ ተለያዩ። 📍በዚህ ጊዜ ነበር ተኣምሩ የተከሰተው፦ 📖{…فَلَمَّا قَضَى زَيْدٌ مِنْهَا وَطَرًا زَوَّجْنَاكَهَا ْ…}   {…ዘይድም ከእሷ ጉዳዩ በጨረሰ (በፈታት) ጊዜ እሷ ለአንተ ዳርንህ…}    ብሎ አላህ ከሰባት ሰማያት በላይ ቁርኣኑን አወረደው። በዚህም ዘይነብ ቢንት ጀሕሽ የረሱልﷺ ባለቤት ሆና አረፈችው። ዘይነብ ቢንት ጀሕሽ ፍላጎቷ ያልነበረ ቢሆንም እንኳ ረሱልﷺ የወደዱላት ወዳ ትዕዛዛቸው በመቀበሏ ዱንያ ላይ ያገኘቻቸው ሦሥት ታላላቅ ስኬቶች 🥇ኛው, የረሱልﷺ ባለቤት ለመሆን በቃች 🥈ኛው, የምእመናን እናት ለመሆን በቃች 🥉ኛው, ለማንም ባልሆነለት መልኩ ኒካሕ ያሰረላት አባቷ ወይም አጎቷ ወይም ሌላ ሰው ሳይሆን; ከሰባት ሰማያት በላይ ያለው አላህ ሱብሀነሁ ወተዓላ ነው ከታሪኩ የምንማረው ትልቁ ነገር;    አንድ ሰው ምንም እንኳ ስሜቱን ቢቃረንበትም የረሱልﷺ ትዕዛዝ ሁል ጊዜ ተፈፃሚ ማድረግ አለበት። ምክንያቱም፦    የዱንያም ይሁን የአኼራ ስኬት የሚገኘው የረሱልﷺ ትዕዛዝ በመከተል ብቻና ብቻ ነው።     /ከሸይኽ ዐብዱል ገንይ ሙሓደራ/