Maktabus Suffah Ⓡ

*☆ تدریب و تربیت کے چند روشن نقوش ☆* الحمدللہ رب العالمین! اللہ تعالیٰ کے فضل و کرم سے ششماہی تعطیلات کے موقع پر لوناواڑہ سے ہم تین طلبہ کو دار المکاتب، کاپودرا، انکلیشور، گجرات میں مکتب تدریب کے لیے حاضری کا موقع نصیب ہوا۔ یہ سفر ہمارے لیے سیکھنے اور مکتب کے نظام کو قریب سے سمجھنے کا ایک مفید موقع ثابت ہوا۔ دار المکاتب کاپودرا میں تدریب کا نظام نہایت منظم اور مفید ہے۔ یہاں تدریب کا یہ نظام پورے سال باقاعدہ جاری رہتا ہے۔ مختلف علاقوں اور صوبوں سے آنے والے مکتب کے اساتذہ کو تدریس، بچوں کی تعلیمی تربیت اور مکتب کے دیگر امور کے سلسلے میں عملی رہنمائی دی جاتی ہے۔ ہمارے لیے یہ بات خاص طور پر قابلِ استفادہ رہی کہ ہم لوناواڑہ سے تین طلبہ سیکھنے کی غرض سے آئے تھے، جبکہ ہمارے ساتھ تدریب میں شریک بیشتر حضرات اپنے اپنے مکاتب میں باقاعدہ تدریسی خدمت انجام دے رہے تھے۔ اس طرح ہمیں تجربہ کار اساتذہ کے ساتھ بیٹھنے اور ان کے تجربات سے استفادہ کرنے کا موقع ملا۔ تدریب کے دوران ہمیں خاص طور پر بچوں کو پڑھانے کے طریقے، سبق سمجھانے کے انداز اور بچوں کی ذہنی اور نفسیاتی استعداد کو ملحوظ رکھنے کے مختلف پہلوؤں سے واقف کرایا گیا۔ ساتھ ہی اس بات پر بھی توجہ دلائی گئی کہ مکتب میں تعلیم کے ساتھ بچوں کی دینی و اخلاقی تربیت بھی ضروری ہے۔ بچے کے اندر دین کی محبت، عبادات کی رغبت اور اچھے اخلاق پیدا کرنا بھی مکتب کی ذمہ داری کا حصہ ہے۔ تدریب میں عملی مشق، مذاکرہ اور اساتذۂ کرام کی رہنمائی سے ہمیں تدریس کے کئی مفید طریقے سیکھنے کا موقع ملا۔ ان باتوں سے مکتبی خدمت کی اہمیت کا احساس مزید بڑھا اور یہ سمجھنے میں مدد ملی کہ بچوں کو دینی تعلیم دینے کے لیے مناسب طریقۂ تدریس اور تربیت بھی ضروری ہے۔ کاپودرا میں قیام کے دوران رہائش، اور طعام دیگر انتظامات بھی الحمدللہ اچھے رہے۔ اساتذۂ کرام اور ذمہ دار حضرات نے ہمارے ساتھ محبت، شفقت اور خندہ پیشانی سے معاملہ کیا۔ ان کی حسنِ سلوک اور اپنائیت ہمارے لیے اس سفر کی ایک خوشگوار یاد ہے۔ اس موقع پر ہم بالخصوص حضرت مولانا بلال صاحب گودھرا کے تہہ دل سے شکر گزار ہیں، جنہوں نے ہماری رہنمائی فرمائی اور ہمیں کاپودرا بھیج کر اس مفید تدریبی سفر کا موقع فراہم کیا۔ اللہ تعالیٰ انہیں بہترین جزائے خیر عطا فرمائے۔ ہم اللہ تعالیٰ کا شکر ادا کرتے ہیں کہ اس تدریبی سفر کے ذریعے ہمیں مکتب کی تدریس اور بچوں کی تربیت کے سلسلے میں بہت سی مفید باتیں سیکھنے کا موقع فراہم ہوا ۔ دعا ہے کہ اللہ تعالیٰ ہمیں ان باتوں کو اپنے مکاتب میں عملی طور پر برتنے اور بچوں کی دینی و اخلاقی تربیت کا حق ادا کرنے کی توفیق عطا فرمائے۔ اللہ تعالیٰ دار المکاتب کاپودرا کے اس تدریبی نظام کو مزید ترقی عطا فرمائے، تمام اساتذۂ کرام اور ذمہ داران کی محنتوں کو قبول فرمائے اور ان کے علم و عمل میں برکت عطا فرمائے۔ آمین یا رب العالمین۔ احمد بن مولانا افتخار صاحب ندوی دربھنگوی متعلم: دارالعلوم مدرسہ عربیہ تعلیم المسلمین، لوناواڑہ، مہی ساگر، گجرات (الہند) https://whatsapp.com/channel/0029VaAXunpBlHpVz1X9nJ2s