Hawassa University

ከቤተሰብ ተለይቶ በዩኒቨርሲቲ ውስጥ የሚደረግ ቆይታ በራሱ አዲስ የህይወት ልምምድ በመሆኑ ተግዳሮት እንደሚኖረው የጠቆሙት ወ/ሮ ምህረት፣ የተለያዩ ዉስጣዊና ዉጫዊ ጫናዎችን ተቋቁመው ውጤታማ ለመሆን መዘጋጀት እንዳለባቸው አሳስበዋል። በዕለቱ መርሐግብር ላይ “የወደፊት ህይወትን ማቀድ እና በከፍተኛ ትምህርት ተቋም የውጤታማነት ሚስጥር “ በሚል ርዕስ የህይወት ክህሎት ስልጠና የዘረፉ ባለሙያ በሆኑት በአቶ ሽመልስ ገበየሁ የተሰጠ ሲሆን፣ ከሁሉም ኮሌጆች እና ቴክኖሎጂ ኢንስቲትዩት ከየባቹ ከፍተኛ ውጤት ላስመዘገቡ ሴት ተማሪዎች የማበረታቻ እውቅና ተሰጥቷቸዋል። ሀዋሳ ዩኒቨርሲቲ ሁሌም ለልህቀት!

በ2019 ዓ/ም የትምህርት ዘመን ዩኒቨርሲቲውን ለተቀላቀሉ አዲስ ገቢ ተማሪዎች አቀባበል እና የህይወት ክህሎት ስልጠና ተካሄደ:: ***//*** 08/02/2019 ዓ/ም የሀዋሳ ዩኒቨርሲቲ የሴቶችና ማህበራዊ ጉዳዮች አካቶ ትግበራ ሥራ አስፈፃሚ በ2019 ዓ/ም የትምህርት ዘመን ዩኒቨርሲቲውን ለተቀላቀሉ አዲስ ገቢ ተማሪዎች የአቀባበል ያደረገበትና የግቢ ቆይታቸውን ስኬታማ በሚያደርጉ ክህሎቶች ላይ የህይወት ተሞክሮ የቀረበበት የስልጠና ፕሮግራም ጥቅምት 6/2019 ዓ ም ተካሂዷል። የሀዋሳ ዩኒቨርሲቲ አስተዳደርና ልማት ም/ፕሬዚደንትና የመድረኩ የክብር እንግዳ የነበሩት ዶ/ር ሳሙኤል ጂሎ በፕሮግራሙ መክፈቻ ላይ ተገኝተው ባስተላለፉት መልዕክት ተማሪዎች በዘንድሮ የትምህርት ዘመን የሀዋሳ ዩኒቨርሲቲን ምርጫቸው አድርገው በመምጣታቸው የዩኒቨርሲቲው ማህበረሰብ ደስ መሰኘቱን በመግለጽ፤ በግቢ ቆይታቸው ሁሉ ጠንክረው ስኬታማ ሆነው ለመውጣት የመቻቻልና የአብሮነት እሴትን ማስጠበቅ እንዳለባቸው አስታውቀዋል። ም/ፕሬዚደንቱ አክለው የሚሰጣቸው የህይወት ክህሎት ስልጠና እንዲሁም በተከታይነት የሚሰጡ ሌሎች ስልጠናዎችም ቢሆኑ ወደ ዩኒቨርሲቲው የመጡበትን ዋነኛ ዓላማ የሆነውን ትምህርታቸውን በስኬት ለማጠናቀቅ የሚያግዝ በመሆኑ በምን አይነት ሁኔታ መዘናጋት እንደሌለባቸው አሳስበዋል። የሴቶችና ማህ/ጉ/አ/ትግበራ ሥራ አስፈፃሚ ወ/ሮ ምህረት ገነነ በበኩላቸው ተማሪዎች በዩኒቨርሲቲ ቆይታቸው ስኬታማ እንዲሆኑ ከሚረዷቸው ነገሮች መካከል ጊዜያቸውን በአግባቡ መጠቀም እንዲሁም አሉታዊ ከሆነ የአቻ ግፊት ራሳቸውን መጠበቅ ዋነኞቹ መሆናቸዉን ገልጸው፣ ዩኒቨርሲቲ መግባት መጀመሪያ እንጂ መጨረሻ ስላልሆነ ተማሪዎች በቆይታቸው ውጤታማና መልካም ዜጋ መሆን እንዳለባቸው ተናግረዋል። ከቤተሰብ ተለይቶ በዩኒቨርሲቲ ውስጥ የሚደረግ ቆይታ በ

የተፈጥሮና ቀመር ሳይንስ ኮሌጅ ከአሜርካው ኩባንያ ጋር በትብብር ለመስራት የመግባብያ ሰነድ ተፈራረመ። *//** ጥቅምት 7/2019 ዓ/ም በሀዋሳ ዩኒቨርሲቲ የተፈጥሮና ቀመር ሳይንስ ኮሌጅ የሒሳብ ትምህርት ክፍል በተግባራዊ የሒሳብ የምርምር ስራ እና የሰው-ሰራሽ አስተውሎት አጠቃቀም ላይ እያካሄደ ያለውን ስልጠና ተቋማዊ ቀጣይነት ለማረጋገጥ የሚያስችል የመግባብያ ሰነድ በአሜሪካ አትላንታ ከሚገኘው MFON OKPOK CONSULTING LIMITED LIABILITY COMPANY (MOC-LLC) ጋር የተፈራረመ ሲሆን በፊርማው ስነስርዓት ላይ ካምፓኒው ለትምህርት ክፍሉ የሰርቨር ኮምፒውተር ድጋፍ አድርጓል። የተፈጥሮና ቀመር ሳይንስ ኮሌጅ ዲን ዶ/ር ዙፉን በደዊ የሒሳብ ትምህርትን በተሻለ መንገድ ለመረዳት የሚያግዙ እና ከምርምር ስራዎች ጋር ቀጥተኛ ግንኙነት ያላቸው ሶፍትዌሮች የተካተቱበት እና በአንድ ግዜ 700 የሚደርሱ ተማሪዎችን ማስተናገድ የሚችሉ ትልልቅ አቅም ያላቸው 2 ሰርቨሮች በድጋፍ መልክ መገኘታቸውን በመግለጽ ከተቋሙ ጋር ያለውን ግንኙነት በዘላቂነት ለማስቀጠል በርካታ ማዕቀፎችን የያዘ የመግባብያ ሰነድ መፈራረማቸውን ተናግረዋል። የሒሳብ ትምህርት ክፍል ኃላፊው ዶ/ር ደመላሽ ሞላልኝ በበኩላቸው በስልጠናው ሂደት የሒሳብ ትምህርት እንዴት በህክምና፣ በግብርና እና ሌሎች ዘርፎች ላይ በምርምር ረገድ አስተዋጽኦ ሊያበረክት ይችላል በሚለው ንድፈ ሀሳብ ላይ በቂ ግንዛቤ እየተሰጠ እንደሚገኝ ጠቁመው በድጋፍ የተሰጡት ሰርቨሮች ስልጠናውን ወደ ተግባር ለመቀየር ከፍተኛ አቅም እንደሚሆኑ ገልጸዋል። ዶ/ር ደመላሽ አክለውም የመግባብያ ሰነድ መፈረሙን ተከትሎ ስልጠናዎች በተከታታይ እንደሚሰጡ እና ከ4 ወር በኃላ ሌላ ዙር ስልጠና እና ድጋፍ እንደሚኖር ተናግረዋል። ሀዋሳ ዩኒቨርሲቲ ሁሌም ለልህቀት!

በጉብኝቱ ወቅት የሴት ተማሪዎች የኢንተርኔት ማዕከል፣ ቤተ-መጽሐፍ፣ የ-SRH ክሊኒክ፣ የኤድስ መረጃ ማዕከል (AIDS Resource Center)፣ የወንዶች ማዕከል፣ የህፃናት ማቆያ ማዕከል እና የ“ሀዋሳ ትንሹ ኢትዮጵያ” ባህላዊ ቤት ምረቃና ሌሎች የአገልግሎት መስጫ ማዕከላት የተጎበኙ ለጎብኚዎቹ አስፈላጊዉ ገለጻ ቀርቦባቸዋል። ሀዋሳ ዩኒቨርሲቲ ሁሌም ለልህቀት!

የዩኒቨርሲቲዉ የስራ ኃላፊዎች በሴቶችና ማህበራዊ ጉዳዮች ዙሪያ አካቶ ትግበራ ዙሪያ የተሰሩ አዳዲስ እና የማስፋፊያ ስራዎችን ጎበኙ። ***\\*** 07/02/2019 ዓ/ም የሀዋሳ ዩኒቨርሲቲ ሴቶችና ማህበራዊ ጉዳዮች አካቶ ትግበራ ስራ አስፈጻሚ የተማሪዎች እና ሰራተኞችን የትምህርት እና የስራ ከባቢ ምቹ ለማድረግ እየሰራ የሚገኛቸው ስራዎች አካል የሆኑ የ”ዜሮ ፕላን” እና ሌሎች ፕሮጀክቶችን ለዩኒቨርሲቲው የኮሌጅ ዲኖች፣ ዳይሬክተሮች እና ማኔጂንግ ዳይሬክተሮች አስጎብኝቷል። የሀዋሳ ዩኒቨርሲቲ አስተዳደርና ልማት ም/ፕሬዚደንት ዶ/ር ሳሙኤል ጂሎ በመርሃ ግብሩ ላይ ተገኝተው ባስተላለፉት መልዕክት፣ ሀዋሳ ዩኒቨርሲቲን ተመራጭ ከሚያደርጉት ዋንኛ ምክንያቶች መካከል በየኮሌጁ ለሴት ተማሪዎች እና ሰራተኞች የሚሰጡ የተቀናጁ አገልግሎቶች እንዲሁም ለተማሪዎች የተፈጠሩ ምቹ የመማር ማስተማር ከባቢዎች ተጠቃሽ መሆናቸውን ጠቅሰው በዚህ ረገድ ባለፉት አመታት በስራ አስፈጻሚው አማካኝነት ምሳሌ የሚሆኑ ስራዎች መሰራታቸውን ገልጸዋል። ም/ፕሬዝዳንቱ ተማሪዎች የሚገጥሟቸውን ተግዳሮቶች ማስወገድ ለተማሪዎች ሁለንተናዊ ውጤታማነትን የሚያረጋግጥ በመሆኑ ሁሉም ባለድርሻ አካላት በቅንጅት ሊሰሩ እንደሚገባ ዶ/ር ሳሙኤል ጨምረው ተናግረዋል። የሴቶችና ማህበራዊ ጉዳዮች አካቶ ትግበራ ስራ አስፈጻሚ ወ/ሮ ምህረት ገነነ በበኩላቸው፣ በዘርፉ እየተሰሩ ያሉ አዳዲስ እና ማስፋፊያ የተደረገላቸዉ የተለያዩ አገልግሎት መስጫ ማዕከላት ላይ በዩኒቨርሲቲዉ የስራ ሃላፊዎች ጉብኝቱ መደረጉን ጠቁመው፤ በሴቶች ላይ የሚደርሱ ተጋላጭነቶችን ወደ ዜሮ ለማድረስ በማሰብ “አንበሲት ዜሮ ፕላን እና ጀግኒት ዜሮ ፕላን” ተቀርጸው እየተተገበሩ እንደሚገኙ ተናግረዋል።

በጉብኝቱ ወቅት የሴት ተማሪዎች የኢንተርኔት ማዕከል፣ ቤተ-መጽሐፍ፣ የ-SRH ክሊኒክ፣ የኤድስ መረጃ ማዕከል (AIDS Resource Center)፣ የወንዶች ማዕከል፣ የህፃናት ማቆያ ማዕከል እና የ“ሀዋሳ ትንሹ ኢትዮጵያ” ባህላዊ ቤት ምረቃና ሌሎች የአገልግሎት መስጫ ማዕከላት የተጎበኙ ለጎብኚዎቹ አስፈላጊዉ ገለጻ ቀርቦባቸዋል። ሀዋሳ ዩኒቨርሲቲ ሁሌም ለልህቀት!

ለአዲስ ገቢ ተማሪዎች የህይወት ክህሎት ስልጠና ተሰጠ በሀዋሳ ዩኒቨርሲቲ ትምህርት ኮሌጅ የሳይኮሎጂ ት/ክፍል አማካኝነት ለአዲስ ተማሪዎች በዩኒቨርሲቲ ሕይወታቸው የሚገጥሟቸው አጠቃላይ ተግዳሮቶች እና የመፍትሔ ሀሳቦች ላይ ያተኮረ የሕይወት ክህሎት ስልጠና ተሰጥቷል። የት/ክፍሉ ኃላፊ ወ/ሮ ማህሎት አሸናፊ ስልጠናውን መስጠት ለምን እንዳስፈለገ ሲያብራሩ ተማሪዎቹ ከተለያየ የሀገራችን ክልሎችና ማህበረሰብ በተለያየ ባህል ውስጥ አልፈው የሚመጡ እንደመሆኑ የራሳቸው የሆነ አዲስ ፈተናን የሚጋፈጡበት ክህሎት ቢኖራቸውም በዩኒቨርሲቲ የሚኖራቸው ህይወት ከቤተሰቦቻቸው ተለይተው የሚያሳልፉትና ልዩ ባህሪ ያለው በመሆኑ አስፈላጊው መረዳትና ዝግጁነት እንዲኖራቸው መሆኑን ተናግረዋል። ስልጠናውን ከሰጡት የሳይኮሎጂ ት/ክፍል መምህራንና ተመራማሪዎች መካከል አንዱ የሆኑት ዶ/ር ሃብተማርያም ካሳ የስልጠናው ይዘት ሳይንሳዊ የሆኑ የትምህርት አጠናን ስነ-ዘዴዎች ቀርበው በሰፊው የተብራሩበት፣ በኃላ የተማሪዎች የዓላማ ግልጸኝነትና የአዕምሮ ዝግጁነት ምን መምሰል እንዳለበት የተገለጸበት እና የአቻ ግፊትን መቋቋም የሚያስችል መፍትሔ የተገለጸበት መሆኑን ተናግረዋል። ዶ/ር ሃብታማርያም አክለውም ተማሪዎች ከእነርሱ ጋር የሚስማማውን የጥናት መንገድ መርጠው እንዲጠቀሙ እንዲሁም ከፈተና እና የፈተና ወቅት ጋር ተያይዞ የሚከሰት ከልክ ያለፈ ጭንቀትን መቋቋምና ማስወገድ የሚቻልበት ማህበራዊ እና ተግባቦታዊ ክህሎትን ማሳደግ እንዲችሉ ከስልጠና ባሻገር ቀጣይነት ያለው ድጋፍ እንደሚደረግላቸውም ገልጸዋል። ሀዋሳ ዩኒቨርሲቲ ሁሌም ለልህቀት!

የተፈጥሮና ቀመር ሳይንስ ኮሌጅ ማሽን ለርኒንግን እና ሰው ሰራሽ አስተውሎትን (AI) ያማከለ አህጉር አቀፍ የሴሚናርና የተግባር ስልጠና አካሄደ። 6/2/2019 ዓ/ም በሀዋሳ ዩኒቨርሲቲ የተፈጥሮና ቀመር ሳይንስ ኮሌጅ ከሂሳብ ትምህርት ክፍል ጋር በመተባበር “ማሽን ለርኒንግ፣ ሰው ሰራሽ አስተውሎት እና ተግባራዊ ዘርፈ ብዙ ምርምር” (Machine learning, AI driven and applied interdisciplinary research with practice on hand activities) በሚል ርዕስ ለኮሌጁ የአካዳሚክ ሰራተኞች አህጉር አቀፍ ሴሚናርና ስልጠና አካሂዷል። የተፈጥሮና ቀመር ሳይንስ ኮሌጅ ዲን ዶ/ር ዙፋን በደዊ እንደተናገሩት በአሜሪካን አገር በመምህርነት፣ በምርምር እና በከፍተኛ ትምህርት አቅም ግንባታ፣ በኢንዱስትሪና የምህንድስና ትምህርት ዘርፍ የ22 ዓመታት የካበተ ልምድ ባላቸው ዶ/ር ኦክፖክ ሙፎን (Dr. Okpok Mfon) አማካኝነት ስልጠናው እየተሰጠ መሆኑን ገልጸው፣ ይህንን ልምድና ክህሎት ወደ ሀገራችን በማሸጋገር የዘመናችን የቴክኖሎጂ ግኝት የሆነውን የሰው ሰራሽ አስተውሎት በመጠቀም የሒሳብ ትምህርትን ወደ ተግባራዊ የምርምር ስራ ለማስገባት እንደሚሰራ ገልጸዋል። በኮሌጁ የሒሳብ ትምህርት ክፍል ኃላፊ የሆኑት ዶ/ር ደመላሽ ሞላልኝ በበኩላቸው ከ16 ሳምንታት በፊት በዶ/ር ኦክፖክ ሙፎን አማካኝነት በበይነ-መረብ (online) ስልጠናው ሲሰጥ የቆየ መሆኑን አስታውሰው፣ በዛሬው ዕለት ደግሞ በአካል በመገኘት ሒሳብን ወደ ተግባራዊ የምርምር ስራ በመቀየር ዓለም የደረሰበትን የምርምርና የፈጠራ ደረጃ ለማድረስ በሰው ሰራሽ አስተውሎት እና በማሽን ለርኒንግ ቴክኖሎጂዎች ላይ በቂ ግንዛቤ የሚያስጨብጥ ስልጠና እየተሰጠ እንደሚገኝ ተናግረዋል። ሀዋሳ ዩኒቨርሲቲ ሁሌም ለልህቀት!

ፕሮጀክቱ ‘Animal health mentoring framework’ የተሰኘውን ማዕቀፍ ወደ ተግባር በማስገባት የተማሪዎችን የክሊኒካል ክህሎት በህክምናው አሰጣጥ ሂደት ከሚገጥሙ ሁኔታዎች (Cases) ጋር አቀናጅቶ ለማሳደግ እየሰራ እንደሚገኝና ይህንኑ ውጤታማ ለማድረግ ከስልጠናው በመቀጠል በአስተማሪዎቻቸው አማካኝነት ምዘና እንደሚያደርግ የገለጹት ደግሞ በብሩክ ኢትዮጵያ የሀዋሳ ዩኒቨርሲቲ ፕሮጀክት አስተባባሪው አቶ ትንሳኤ ከበደ ናቸው። ሀዋሳ ዩኒቨርሲቲ ሁሌም ለልህቀት!

የእንስሳት ሕክምና ተማሪዎችን የክሊኒካል እውቀትና ክህሎት የሚያሳድግ ተግባራዊ ስልጠና እየተሰጠ ነው። *//* ጥቅምት 6/2019 ዓ/ም በሀዋሳ ዩኒቨርሲቲ የተፈጥሮና ቀመር ሳይንስ ኮሌጅ የእንስሳት ሕክምና ፋካሊቲ ከብሩክ ኢትዮጵያ ጋር በመተባበር ያዘጋጀውና ጥቅምት 5-7/2019 ዓ.ም እንዲሁም ጥቅምት 9-11/2019 ዓ/ም በሁለት ዙሮች የ4ኛ እና 5ኛ አመት ተማሪዎችን የክሊኒካል እውቀት እና ክህሎት ተግባራዊ በሆነ የትምህርት አሰጣጥ በመደገፍ ውጤታማ እንደሚያደርጋቸው የተገለጸ ስልጠና መካሄድ ጀምሯል። የተፈጥሮና ቀመር ሳይንስ ኮሌጅ ዲን ዶ/ር ዙፉን በደዊ በስልጠናው መክፈቻ ላይ ተገኝተው እንደተናገሩት «ብሩክ ኢትዮጵያ» ላለፉት 3 ዓመታት ከኮሌጁ ጋር በመተባበር የተማሪዎችን የክሊኒካል እውቀትና ክህሎት የሚያሳድግ ተግባራዊ ስልጠና በመስጠት ተጨባጭ ለውጥ የተመዘገበበትን ውጤታማ ስራ መስራቱን ጠቁመው፤ ከስልጠና ባለፈም ተቋሙ ለእንስሳት ሕክምና ፋካሊቲ ሆስፒታል፣ ቤተ-ሙከራ እና ቤተ-መጽሐፍት ተገቢውን ድጋፍ እያደረገ መሆኑን ገልጸዋል። የእንስሳት ሕክምና ፋካሊቲ ዲን ዶ/ር ይፉት ደምባርጋ በበኩላቸው ለ4ኛ እና 5ኛ ዓመት ተማሪዎች የሚሰጠው ይህ ስልጠና በህክምና አገልግሎት አሰጣጥ ዋነኛ መርህ በሆነው ርህራሄ የተሞላበት የእንስሳት ክብካቤ እና ህክምና አሰጣጥ ጥላ ስር ሆኖ ተማሪዎች በክፍል ውስጥ የተማሩት እና በንባብ ያገኙትን እውቀት በማዋሃድ በተግባር ላይ የተመሰረተ ክህሎት እንዲጨብጡ የሚያስችል ነው ብለዋል።

ሀዋሳ ዩኒቨርሲቲ ከኖርዌይ መንግስት ጋር በትብብር የሚያከናዉናቸዉን የትብብር  የምርምር ፕሮጀክቶች  የግምገማ መርሃ-ግብር ተካሄደ *\\* 06/02/2019 ዓ/ም የሀዋሳ ዩኒቨርሲቲ ምርምርና የትብብር ም/ፕሬዚዳንት ጽ/ቤት ስር የሚገኘው የትብብር ፕሮጀክቶች ማስተባበሪያ ዳይሬክቶሬት በኖርዌይ መንግስት ድጋፍ በሚደረግለት የICP-V ፕሮጀክት ስር በሚከናወኑ የተጠናቀቁና በሂደት ላይ ባሉ መካከለኛ ደረጃ የምርምር ፕሮጀክቶች ላይ ያተኮረ የሁለት ቀናት የምክክር ወርክሾፕ አዘጋጅቷል፡፡ የሀዋሳ ዩኒቨርሲቲ ምርምርና ትብብር ም/ ፕሬዝ ዳንት ዶ/ር ታፈሰ ማቴዎስ በዕለቱ ባደረጉት የመክፈቻ ንግግር ዩኒቨርሲቲው በ2019 ዓ/ም ውስጥ ሁለት ታሪካዊና ወሳኝ ምዕራፎች እንደሚጠብቁት ጠቁመው ይኸውም የዩኒቨርሲቲያችን የ50ኛ ዓመት የወርቅ ኢዮቤልዩ በዓል አከባበር እና ወደ ራስ-ገዝነት ለመሸጋገር የሚያከናውነው የመጨረሻ ሂደት ዝግጅት መሆኑን ገልጸዋል። በተጨማሪም በኖርዌይ ኤምባሲ ድጋፍ የሚካሄደው የICP-V ፕሮጀክት ባለፉት 30 ዓመታት ከ200 ለሚበልጡ ተማሪዎች እና ተመራማሪዎች የከፍተኛ ትምህርት ዕድል ያመቻቸ ውጤታማ አጋር መሆኑን የጠቀሱት ዶ/ር ታፈሰ፣ የዛሬው የመካከለኛ ደረጃ ምርምር ስራዎች ግምገማም የዚሁ ስኬታማ ትብብር አካል ነው ብለዋል። የትብብር ፕሮጀክቶች ማስተባበሪያ ዳይሬክተር ዶ/ር ሽመልስ ንጋቱ በበኩላቸው፣ የምርምር ሥራዎች በመንግሥት በጀትና እንደ ICP-V ባሉ አጋር የትብብር ፕሮጀክቶች አማካኝነት የሚከናወኑ መሆናቸውን በመግለጽ ዩኒቨርሲቲው የምርምር ስራዎቹን ቁጥርና ደረጃ ለማሳደግ ተጨማሪ የትብብር ስራዎችን በቀጣይነት እንደሚሰራ ተናግረዋል። ዶ/ር ሽመልስ አክለውም በዕለቱ የቀረቡ የተጠናቀቁ የምርምር ሥራዎች ለሕትመትና ለፖሊሲ ግብአዓትነት እንዲበቁ፤ በሂደት ላይ ያሉት ደግሞ የተሰጣቸውን አስተያየት መሠረት አድርገው ውጤታማ እንዲሆኑ የድጋፍና ክትትል ስራው ተጠናክሮ ይቀጥላል ብለዋል። በመርሃ-ግብር ላይ በአጠቃላይ 42 የምርምር ሥራዎች የቀረቡ ሲሆን፤ ከነዚህም መካከል 16ቱ ሙሉ በሙሉ የተጠናቀቁ፣ 26ቱ ደግሞ በሂደት ላይ ያሉ መሆናቸው ተገልጿል። ሀዋሳ ዩኒቨርሲቲ ሁሌም ለልህቀት!

በሁለቱ ተቋማት መካከል የሚደረገው አብሮ የመስራትና የመግባቢያ ሰነድ የመፈራረም ሂደት የዳበረ የአንትሮፖሎጂ ልምድና እውቀትን ወደ ተቋማችን በማምጣት የምርምር አቅምንና ጥራትን ወደ ላቀ ደረጃ እንደሚያሸጋግረው የትምህርት ክፍል ኃላፊው ጠቁመዋል። የአንትሮፖሎጂ ምርምር በአብዛኛው በመስክ ስራ ላይ የተመሰረተ እንደመሆኑ መጠን በመስክ ቆይታ ወቅት የስራ ባልደረቦች፣ የቤተሰብ አባላትና ጓደኞች የሚያበረክቱት አስተዋጽኦ ከፍተኛ መሆኑን የገለጹት የአንትሮፖሎጂ ትምህርት ክፍል መምህርና ተመራማሪ ዶ/ር መለሰ ማዳ በመሆኑም በምርምር ሂደቱ ውስጥ እነዚህ አካላት የሚያደርጉትን ድጋፍና ድርሻ በአግባቡ መጥቀስና እውቅና መስጠት ይገባል ብልዋል። ሀዋሳ ዩኒቨርሲቲ ሁሌም ለልህቀት!

የማህበራዊ ሳይንስና ስነ-ሰብ ኮሌጅ ህዝባዊ ገለፃ (Public Lecture) አካሄደ። *//* ጥቅምት 4/2019 ዓ.ም በሀዋሳ ዩኒቨርሲቲ የማህበራዊ ሳይንስና ስነ-ሰብ ኮሌጅ የአንትሮፖሎጂ ትምህርት ክፍል “Accompanied Fieldwork: From anecdotes to epistemological contributions” በሚል ርዕስ የተዘጋጀው እና ከጀርመኑ ፍሮቤኒየስ ኢንስቲትዩት በመጡት ዶ/ር ሶፊያ ቱቦቪል (Dr. Sophia Thubauville) አማካኝነት በመስክ ምርምር ወቅት የሚገኙ ልምዶችና ግላዊ ትረካዎች ለሰፊው የአንትሮፖሌጂ እውቀት ክምችት የሚያበረክቱትን አስተዋጽኦ በተመለከተ ሰፊ ማብራሪያ የተሰጠበት ህዝባዊ ገለጻ በአፍሪካ ህብረት አዳራሽ ተካሂዷል። መድረኩን በንግግር የከፈቱት የኮሌጁ ዲን ፕ/ር ዘለቀ አርፍጮ መድረኩ በኮሌጁ እና በጀርመኑ ፍራንክፈርት ዩኒቨርሲቲ ፍሮቤኒየስ ኢንስቲትዩት (Frobenius Institute, University of Frankfurt) መካከል የሚደረገውን ዘላቂ የትምህርትና የምርምር ትብብር ለማጠናከር ትልቅ ሚና የሚጫወት መሆኑን ገልጸዋል። ዲኑ አክለውም እየተሰጠ ከሚገኘው ህዝባዊ ገለጻ ባሻገር በሁለቱ ተቋማት መካከል የሚፈረመው የመግባቢያ ሰነድ በጋራ ምርምር ለመስራት፣ የመምህራንና የተማሪዎች ልውውጥ እንዲሁም በአንትሮፖሎጂ የዶክትሬት ዲግሪ (PhD) ፕሮግራም ትግበራ ላይ በትብብር ለመስራት ያለመ መሆኑን ተናግረዋል። በኮሌጁ የአንትሮፖሎጂ ትምህርት ክፍል ኃላፊ መምህር ቤዛ ትዛዙ በበኩላቸው በህዝባዊ ገለጻው ላይ የአንትሮፖሎጂ ምርምር በሚካሄድበት ወቅት ከተመራማሪው በተጨማሪ አብረው የሚሄዱ ሰዎች በሜቶዶሎጂ፣ በንድፈ-ሀሳብና በምርምር ስነ-ምግባር ላይ የሚኖራቸው ድርሻ በዝርዝር እንደሚቀርብ ገልጸዋል።

ሀዋሳ ዩኒቨርሲቲ ለአዲስ ገቢ ተማሪዎቹ ደማቅ አቀባበል እያደረገ ነው። *//* ጥቅምት 3/2019 ዓ/ም ሀዋሳ ዩኒቨርሲቲ በ2019 የትምህርት ዘመን በትምህርት ሚኒስቴር በተከናወነው ምደባ መሰረት በአጠቃላይ ከ5000 በላይ የሚሆኑ ዩኒቨርሲቲውን መርጠው የመጡ አዳዲስ ተማሪዎችን ጥቅምት 3/201ዓ.ም ደማቅ አቀባበል ያደረገ ሲሆን በዚሁ መርሃ-ግብር ላይ የዩኒቨርሲቲው ከፍተኛ ኃላፊዎች፣ የዩኒቨርሲቲው ማህበረሰብ አባላት፣ ተማሪዎች እና የተማሪ ወላጆች ተገኝተዋል። የሀዋሳ ዩኒቨርሲቲ ፕሬዚደንት ዶ/ር ችሮታው አየለ የእንኳን ደህና መጣችሁ መልዕክት ሲያስተላልፉ እንደገለፁት ዩኒቨርሲቲው ባለፉት 50 ዓመታት በርካታ ተማሪዎችንና ተመራማሪዎችን በማፍራት በሀገርና በዓለም አቀፍ ደረጃ ትልቅ ተጽዕኖ መፍጠር የቻለ ተቋም መሆኑን ጠቅሰው ይህንኑ ስኬቱን በማስመልከት 50ኛ አመት የወርቅ እዮቤልዩ በአል ለማክበር ዝግጅት እየተደረገ ይገኛል ብለዋል። ዶ/ር ችሮታው አክለውም በየዓመቱ ዩኒቨርሲቲውን መርጠው የሚመጡ ተማሪዎች ቁጥር እየጨመረ የመጣው ሀዋሳ ሰላማዊና ሰው ተቀባይ ከተማ በመሆኗ እንዲሁም አስተማማኝ የመማር ማስተማር ሂደትና ምቹ የግቢ ሁኔታ ስላለው እንደሆነ አብራርተው ተማሪዎች ያለምንም ጭንቀት ትምህርታቸው ላይ ትኩረት አድርገው እንዲሰሩ አሳስበዋል። የተማሪዎች አገልግሎት ምክትል ዲን የሆኑት አቶ አስማማው ደምሴ በበኩላቸው በዚህ አመት በዋናው ግቢ ብቻ አራት ሺህ (4,000) የሚደርሱ አዳዲስ ተማሪዎች መመደባቸውን ጠቁመው ተማሪዎችን ለመቀበልና ስኬታማ የትምህርት ጊዜ እንዲኖራቸው ለማስቻል በዲሲፕሊን፣ በካውንስሊንግ እና በመዝናኛ ዘርፎች ሰፊ ዝግጅት መደረጉን ተናግረዋል።