ပြည်သူ့အတွက် ဟစ်တိုင်သတင်းစုံ ဂျာနယ်

တနင်္သာရီတိုင်းဒေသကြီး ဝန်ကြီးချုပ် မြိတ်မြို့နယ် ကျွဲကူးကျေးရွာပြည်သူများအား ကျေးရွာမြေငှားဂရန် ပေးအပ် မြိတ်၊ ဇူလိုင် ၂၆ တနင်္သာရီတိုင်းဒေသကြီး ဝန်ကြီးချုပ် ဦးဇော်နိုင်ဦးသည် ဇူလိုင် ၂၆ ရက် နံနက်ပိုင်းက မြိတ်မြို့ ပုလဲရတနာခန်းမ၌ ကျင်းပသည့် နိုင်ငံတော်အစိုးရ၏ ရက်(၁၀၀)စီမံချက်ဖြင့် ဆောင်ရွက်သော မြိတ်မြို့နယ် ကျွဲကူးကျေးရွာပြည်သူများအား ကျေးရွာမြေငှားဂရန် ပေးအပ်ပွဲသို့ တိုင်းဒေသကြီး ဝန်ကြီးများ၊ ဌာနဆိုင်ရာတာဝန်ရှိသူများနှင့်အတူ တက်ရောက်ခဲ့သည်။ ဝန်ကြီးချုပ်က မြေငှားဂရန်ရရှိခြင်းသည် ကျေးရွာနေပြည်သူများ၏ ပိုင်ဆိုင်မှုအခွင့်အရေးကို ပိုမိုခိုင်မာစေပြီး လူမှုစီးပွားဘဝဖွံ့ဖြိုးတိုးတက်ရေးအတွက် အထောက်အကူပြုမည်ဖြစ်ကြောင်း၊ ဂရန်ရရှိသူများအနေဖြင့် သတ်မှတ်စည်းကမ်းများကို လိုက်နာကာ မြေယာကို သတ်မှတ်ရည်ရွယ်ချက်အတိုင်း အသုံးပြုရန် တိုက်တွန်းပြောကြားခဲ့သည်။ ထို့နောက် တိုင်းဒေသကြီးအစိုးရအဖွဲ့ အတွင်းရေးမှူး ဦးတိုးဝင်းက ကျေးရွာမြေငှားဂရန်ဆောင်ရွက်ပေးမှုကို ရှင်းလင်းတင်ပြခဲ့ပြီး၊ ဝန်ကြီးချုပ်နှင့် တာဝန်ရှိသူများက ရက်(၁၀၀)စီမံချက်ဖြင့် ဆောင်ရွက်ပြီးစီးသည့် ကျေးရွာမြေငှားဂရန်များကို ကျွဲကူးကျေးရွာပြည်သူများထံ ပေးအပ်ခဲ့သည်။ ဒေသခံများကိုယ်စား ပြည်သူတစ်ဦးက ကျေးဇူးတင်စကား ပြန်လည်ပြောကြားခဲ့ပြီး အခမ်းအနားအပြီးတွင် ဝန်ကြီးချုပ်က ဒေသခံများနှင့် ရင်းရင်းနှီးနှီးတွေ့ဆုံခဲ့ကြောင်း သိရသည်။