ပြည်သူ့အတွက် ဟစ်တိုင်သတင်းစုံ ဂျာနယ်

ပြည်ခိုင်ဖြိုးပါတီက ထူးချွန်ကျောင်းသား ၂,၇၈၀ ဦးအား ပညာရည်ချွန်ဆုများ ချီးမြှင့် နေပြည်တော်၊ အောက်တိုဘာ ၁၁ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ၏ ၂၀၂၅-၂၀၂၆ ပညာသင်နှစ် ပညာရည်ချွန်ဆုချီးမြှင့်ပွဲနှင့် ၂၀၂၆-၂၀၂၇ ပညာသင်နှစ် ပညာသင်ထောက်ပံ့ကြေး၊ ကျောင်းသုံးဗလာစာအုပ်များ ပေးအပ်ပွဲကို အောက်တိုဘာ ၁၀ ရက် နံနက် ၉ နာရီခွဲတွင် နေပြည်တော်ရှိ ပါတီဌာနချုပ် ညီလာခံခန်းမ၌ ကျင်းပခဲ့သည်။ အခမ်းအနားသို့ ပါတီဥက္ကဋ္ဌ ဦးခင်ရီနှင့် ဇနီး ဒေါ်ခင်မေစိုး၊ ဒုတိယဥက္ကဋ္ဌများဖြစ်သည့် ဦးမြတ်ဟိန်း၊ ဦးသောင်းအေးနှင့် ပါတီဗဟိုအကြီးအကဲများ၊ တာဝန်ရှိသူများ၊ ကျောင်းသားကျောင်းသူများနှင့် မိသားစုဝင်များ တက်ရောက်ခဲ့ကြသည်။ ပါတီဥက္ကဋ္ဌ ဦးခင်ရီက ကျောင်းသားကျောင်းသူများအနေဖြင့် ခေတ်မီနည်းပညာများကို အမီလိုက်နိုင်သည့် အသိပညာရှင်၊ အတတ်ပညာရှင်များဖြစ်လာစေရန် ကြိုးစားကြရန်နှင့် လွဲမှားသောအယူအဆများ၊ လောင်းကစားနှင့် စာရိတ္တပျက်ပြားစေမည့် အပျော်အပါးများကို ရှောင်ရှားကြရန် တိုက်တွန်းပြောကြားခဲ့သည်။ ၂၀၂၅-၂၀၂၆ ပညာသင်နှစ် တက္ကသိုလ်ဝင်တန်းတွင် ဂုဏ်ထူးရရှိသူများနှင့် ရိုးရိုးအောင်မြင်သူများအပါအဝင် ကျောင်းသားကျောင်းသူ စုစုပေါင်း ၂,၇၈၀ ဦးအား ပညာရည်ချွန်ဆုများ ချီးမြှင့်ခဲ့ပြီး ၂၀၂၆-၂၀၂၇ ပညာသင်နှစ်အတွက် မူလတန်းမှ တက္ကသိုလ်အဆင့်အထိ ကျောင်းသားကျောင်းသူ ၁၈၇ ဦးအား ပညာသင်ထောက်ပံ့ကြေးနှင့် ကျောင်းသုံးဗလာစာအုပ်များ ပေးအပ်ခဲ့ကြောင်း သိရသည်။ #SittNaing