|شعر اوجاغی|

▫️داریخماقدا الیمیز یوخ ایدی، آما آرامیزداکی مسافه‌ده مین الیمیز وار ایدی. سلام اولسون دوغرودان داریخدیغیم سنه، سلام اولسون منه، داریخدیغیم اوچون! #محمود_درویش #شعر_اوجاغی @SheurOcagi

▫️حۆزونلو آیریلیق حئکایه‌سی حۆزونلو بیر آیریلیق یاشادیم، ایچریسینده حۆزون اولمایان، ایچ بورخمایان بیر آیریلیق وارمی‌دیر، بیلمیرم، آما- «آیریلیق» کلمه‌سینین یازیلیشی، اوخونوشو بئله حۆزونلو. «آللاه کیمسه‌نین باشینا گتیرمه‌سین!» تمنّاسینین ان چوخ یاراشدیغی یئرلردن بیریسی. بیر آرایا گلمیش، بوتون اولموش، وارلیغی وارلیغینیزین بیر پارچاسی اولموش شئیلردن قوپماق و آرتیق اسکیسی کیمی بیر آرادا اولونا بیلمه‌یه‌جک دوروملارا وئریلن آددیر «آیریلیق». آلیشماق، قبول‌لنمک و ده یاشامینیزدا اونونلا ایلگیلی زامان‌لار، آلان‌لار یاراتماق، البت چتین ده اولسا، آرتیق بو آشاما*دان سونرا آیریلماق، بوتون بو آلیشمالاردان داها چتین بیر حالا گلیر. آلیشقانلیق‌لاریمیزدان واز کئچمک بیر یانا، اونلارسیز یاشانتیمیزین بیر یانی همیشه اکسیک قالار. «آیریلیق» کلمه‌سینی و بو کلمه‌نین باشا گلدیگینده داددیردیغی دویغونو یاشاماق، ایشده واز کئچه بیلمه‌دیگیمیز بوتون او آلیشقانلیق‌لاریمیزین سون آندا بیزه داددیردیغی ان بؤیوک دادسیزلیق‌دیر. هله ده بو آیریلیق، یوخلوغونو گؤروب جۆجرمه‌سی اوچون اللرینیزله باسدیردیغینیز تورپاقدان -گؤره‌سن نه زامان گؤزلرینی آچاجاق، اۆزومه گۆله‌جک، سورغولاریما سسسیزجه سۆزولوب هر یئل اسنده خیشیلتی چیخاریب ایسته‌دیگیم جاوابلاری منه فیسیلدایاجاق- دئیه گؤزله‌دیگینیز بیر بیتکی‌یسه، امینم بو داها دا بیر آیریلیق اولور... #مهمت_دوه‌جی * مرحله #شعر_اوجاغی @SheirOcagi

دیالوق ▫️- سونوندا اؤله‌جه‌یم‌سه، نییه هر شئیی اوره‌ییمه سالاراق، اؤزومو اؤلومه وئریم؟! 🎬 Bicycle Thieves 1948 ایتالیا #ویتوریو_دسیکا #شعر_اوجاغی @SheirOcagi

▫️نئیله‌یک؟ آلینمادی! دئدین کی «آیریلاق، هر شئیی اونوداق!» خاطیره‌لر دیندی، اوخوندو واراق-واراق. سینه‌می داغلادی، بیزیمچون آغلادی ایتن سئوگیمیز. شیرین-شکر بیر ناغیل ایدی؛ سیندی، داغیلدی. گؤروش یئری داریخیر یئنه، سئوگیم گؤزلَر سنی دؤنه-دؤنه. ال چکمیر یاخامدان، هئچ زامان بو هیجران، یاندیریر منی گوله-گوله. اومیدلر بو گون ده یاشار هله. غریبه دونیادیر، بیر اوجو سئودادیر. آرزولار یاندی، دؤندو کوله، آیریلاق ایندی گوله-گوله! نئیله‌یک، آلینمادی. کوسوب بو دونیادان، گل ایندی تک قالاق، او کئچمیش سئوگینی سنین‌له اونوداق! نئیله‌یک، بیر یئرده او اؤتن گونلردن قالیب ایزیمیز. اوزاق دوشن گونلره بیر آندا دئیک الویداع! بیر ده چتین گئرییه دؤنه. خاطیره‌لر دوشه‌جک یادا، سنسیز دونیادا، سنی سئون اورک گؤزلر یئنه. #اسماعیل_داداشوو #شعر_اوجاغی @SheirOcagi

‍ ▫️من دلی‌یم. حیسّ ائدیرم، هر اؤتن گون ایتیریرم یادداشیمی، اونودورام. اونودورام قوهومومو، قارداشیمی، سوْیودورام سئودیگیمی، سئوَنیمی، گؤزله‌میرم گلَنیمی، گئدَنیمی. من دلی‌یم. سیزه هئچ نه وئرمه‌میشم، سیزدن هئچ نه ایسته‌میرم. من سوفره‌مده اوتورانا «قارداش» دئییب گئدن کیمی پیسله‌میرم، اونا گؤره من دلی‌یم. یاخشی گونده جان-جان دئییب دار گونونده یوخ اولمورام. من همیشه من اولورام، آز اولمورام، چوخ اولمورام، اونا گؤره من دلی‌یم. من دلی‌یم، سیز عاغیللی. یا من اولدوم، یا دا کی سیز، اولانمادیق بیز عاغیللی. باجاریرسان دؤز، عاغیللی! منه نه وار، من دلی‌یم! یالان-دولان دونیانیزدا، دوغرولارین دلیسی‌یم. #صدام_لاچین #شعر_اوجاغی @SheirOcagi

▫️هه، سنه احتیاجیم وار، چونکی سن، بیر بولودون رنگی حاقّیندا دانیشا بیله‌جه‌ییم تک اینسانسان. #ولادیمیر_ناباکوو #شعر_اوجاغی @SheirOcagi

دیالوق ▫️- بوتون یازیلمیش و دئییلمیش غملی جومله‌لرین آراسیندا ان اۆزوجوسو بودور: جۆرأتیم اولمادی. 🎬 The Lavender Hill Mob 1951 #چارلز_کریچتون #شعر_اوجاغی @SheirOcagi

▫️درین زامان من سنین سؽنیرلی گؤوده‌ن ایله، منی سوْنسوز قوجاقلامانی دیله‌دیم. - یۇخوم سنین‌له قیشین قوللاری آراسیندا دئوریله‌رک، دؤنه‌رک تامام‌لانسین، ایچیمده قوزئیین قوشلاری سوسسون- ایسته‌دیم. قیشی و قیشین قلبیمده آغیرلاشان مئیوه‌سینی، چیی دوشموش، سوْیوموش، دوْنموش بیر دیلی خاطیرلاماق اوچون، منی سئحیرله‌ین او کیمیانین بوشلوغوندا دوروب یالواردیم: منی بو سیاه بوشلوغون ایچینه بوراخما! درین بیر زامان ایسته‌دیم سندن، آما- منه اونو وئرمه! نه قیشا، نه یایا اویغون‌دور قلبیم. چاتلات آرامیزداکی دوْنموش دیلی! یوْخلوغونون سببینی آنلادا بیلمه‌دیم اؤزومه، یوخلوغون نه واخت‌دیر قارلی بیر تپه کیمی‌دیر ایچیمده‌. آیاغا قالخ، یاخینلاش، دیلینی دؤندر آغزیندا، دئ کی: من اونون‌لا دنیزین دؤیدویو دیلسیز داشلار اوستونده سوسموشدوم! #بیرهان_کسکین #شعر_اوجاغی @SheirOcagi

▫️نی کیمی هر دم کی بزمِ وصلینی یاد ائیله‌رم، تا نفس واردیر قورو جسمیمده، فریاد ائیله‌رم. روزِ هجران‌دیر، سئوین ای مرغِ روحوم، کیم بو گون، بو قفسدن من سنی البتّه آزاد ائیله‌رم! وهم ائدیب تا سالمایا سن ماها مهرین هیچ کیم، کیمه یئتسم ظلم و جؤوروندن اونا داد ائیله‌رم. قان یاشیم قیلماز وفا، گریان گؤزوم اسرافینا، بونجا کیم، هر دم جگر قانیندان امداد ائیله‌رم. اینجیمه هر نئجه کیم، اغیار بیداد ائیله‌سه! یار جؤوریچون، کؤنول بیدادا مُنقاد ائیله‌رم. بیلمیشم بولمان وصالین، لیک بیر اومّید ایله، گاه-گاه اؤز خاطرِ ناشادیمی شاد ائیله‌رم. لوحِ عالمدن یودوم اشک ایله «مجنون» آدینی، ای «فضولی»! من دخی عالمده بیر آد ائیله‌رم. #حکیم‌_ملا‌محمد‌_فضولی #شعر_اوجاغی @SheirOcagi

▫️سنین اوچون بورایا بعضی شئیلر قویورام.‌ یول بویونجا یادیندا اولسون! لازیم اولارسا، آچیب اوخویارسان، اولمازسا دا اولسون، بیر ضرری یوخ، بورادا قالسین! بورایا بیر جومله قویدوم. بوراخ آجیمیزی بیری‌لری دۇیسون.‌ هم ذاتاً شعر نییه وار؟ دونیانین آجیسینی باشقالاری دا دۇیسون، آجی میخلانیب بیر قلبده قالماسین، اورتادا قالسین.‌ بلکه بیری الینه آلیب اوخشار، بیری آلنیندان اؤپر، بیر آز اونودارسان. بورایا طبیعتی قویدوم، آغاجلاری، سویو، چؤلو، داغی. اونلار بیزیم قارداشیمیز، چوخ جانین سیخیلارسا آرادا اونلارلا دانیشارسان. بورایا کیچیک، سئوینجلی گونش‌لر قویدوم. گونلریمیز قارانلیق‌دیر، چوخ سوْیویور بعضی آخشاملار، قیزیشارسان. بورایا بیر اینانج، بیر عیناد قویدوم. بلکه اونوتدون، تکرار باخ! او عیناد نه‌یسه، سن اوسان. بورایا یولون یوْخوشونو قویدوم، یوْخوشو بیلدیگیم اوچون. زورلانیرسا نفسین، اونوتما: جییَر اؤزونو ان چابوک دۆزَلدن اورقان‌دیر، واللا، باخ، یادیندا قالسین! بورایا اومیدلی گونلر قویدوم. ایندیلیک اوزاق کیمی گؤرونور، آما کیم بیلیر؟ بیر آزدان اۇزانیب توخونارسان. بورایا بیر آینا قویدوم، آرادا اؤنونه کئچ، باخ! سن شاهانه بیر اوخوجوسان. ایش ساعاتلاریندا بللی ائتمه‌دن شعر اوخویارسان. نه‌ اولاجاق کی؟ بوراخ پاترون‌لار سنی قووسون! بورادا بیر توتام صبیر وار، اؤزومونکیندن قوپارتدیم بیر پارچا (منده چوخ بوْل‌دور)، لازیم اولدوقجا «یا صبیر، یا صبیر»، توخونارسان. بورادا گؤزل چایلار وار، بو آرالار سنین اوچون چوخ اؤنملی‌دیر، بیتکی چایلاری، قیش چایلاری، شربت‌لر، کومپوت‌لار. دم‌لرسن، مقصد معده‌نه دوستلوق اولسون! بورایا یوتیوب'دان موزیک‌لر... قویدوم. آما موزیک قونوسوندا سن مندن داها یاخشیسان، اییله‌ییب تاپیرسان. بورایا بیر «سیٖلکیٖنتی‌اوتو» قویدوم. قیرخ درد بیر آرادا... قیرخینا بیردن دوا اولسون. #بیرهان_کسکین #شعر_اوجاغی @SheirOcagi

▫️سیلنمه‌میشم. دئیَردیم گئدرسن، سیله‌رم سنی، هله ده کؤنلومدن سیلَنمه‌میشم. ایندی «گل -دئییرم- بیر نفس کیمی»، سندن غئیریسینه دیلَنمه‌میشم. دئیردیم سیله‌رم گؤزومدن سنی، آتارام دیلیمدن، سؤزومدن سنی. آخی آتانمیرام اؤزومدن سنی! سنسیز اینان هله گۆلَنمه‌میشم. گل، داها یولونو گؤزله‌ینمیرم، سنسیز بو دونیانی ایزله‌ینمیرم نئیله‌ییم، سئوگیمی گیزله‌ینمیرم، سنسیز حیات نه‌دیر بیلنمه‌میشم. «کؤنول»ام، انتظار صبریمی آلیب، حسرتین یاراسی سینه‌مده قالیب. اجل نئچه کره قاپیمی چالیب، اۆزونو گؤرمه‌دن اؤلَنمه‌میشم. #فاطمه_عبدی_کؤنول @SheirOcagi

دیالوق ▫️- بعضی اینسانلار بیر ایش گؤرورلر، اونلاری سئوه بیلمیرسن داها، آما سئودیگین زامان‌لار اوچون چوخ داریخیرسان. 🎬 legend 2015 بریتانیا #برایان_هالگلند #شعر_اوجاغی @SheirOcagi

▫️منه داریخاندا منه داریخاندا بیر ماهنی اوخو، ایچینده بیر قاطار دوماندا ایتسین! سیسلی جاملاریندا بیر اؤپوش ایزی، منله یولداش اولوب غوربته گئتسین! منه داریخاندا دفتریمی آچ! شئعیرلر ایچینده تاپارسان منی. اوردا یازیم کیمی سن‌له یاشادیم اورداکی کلمه‌لر تانیییر سنی. منه داریخاندا ساچینی اوخشا! یانیندا اولسایدیم بئله ائلردیم. آلنینی مؤهور تک آلنیما قویوب گؤزل گؤزلرینه باخیب گولردیم. منه داریخاندا پالتاریمی گئی! اوزاقدان اوزاغا اییینی توتوم. سنی قوجاقلاسین خاطیره‌لریم، سنین قوجاغیندا دردی اونودوم. سنه کیم داریخیب، آینادان باخان؟! آخی کیم گله‌جک توْزونو سیلسین؟ آغلایا-آغلایا نه‌دیر گولورسن؟ سنه یالقیزلیغیم قوربان کسیلسین! #حمید_عیوضی @SheirOcagi

▫️نئیله‌دینیز، نه قاتدینیز صاف سۆده؟ تئز چۆرودو چییه‌¹سی ده، اؤزو ده. یوخا چیخدی قایماغین گول قوْخوسو، یوخا چیخدی پرینج آشی، چیل یارما، یوخا چیخدی دادلی پئندیر؛ آختارما! دۆیه‌²لری گؤروم آللاه کسمه‌سین! قاتیلمادی کلَکه‌³سی، کسمه‌سی. واختسیز گلدی ایچی‌یارا مئیوه‌لر، آغولاندی یئییجی یئرین داماری، دانیشیرام اوره‌ییمه دامانی. #آغا_لاچینلی ¹- بیشمه‌میش سودون اوزو- خاما ²- مال، گامیش... بالاسی ³- یئنی دوغموش حیوانین آغوز سۆدونون بیشمیشی #شعر_اوجاغی @SheirOcagi

دیالوق ▫️- دونیا خارابا قالیب، هئچ کسه گووَنمک اولمور. + بلکه ده سیزلر کیمسه‌یه گووَنمیرسینیز دئیه دونیا خارابا قالیب. 🎬 Raya and The Last Dragon 2021 آمریکا #شعر_اوجاغی @SheirOcagi

▫️«آبشئرون» تویلارینین بیر عنعنه‌سی ده چوخ اوره‌ییمه یاتیر و اؤرنک گؤتورمه‌لی‌دیر. قوناقلار اوّلجه بیر باشقا چادیردا یئییب-ایچیر، سونرا کئچیرلر دیگر چادیردا موسیقی دینله‌مه‌یه. ایکی یئمه‌یی بیر-بیرینه قاتمیرلار، روا گؤرمورلر کی، قارین قیداسینین های-کویو معنویّت قیداسینا خلل گتیرسین. #حاجی‌بابا_حسین‌اوو ون خاطیره‌لریندن #شعر_اوجاغی @SheirOcagi

▫️آناسیز، آتاسیز کؤورک اوره‌ییم، یتیم‌لر ائوینده کدر بسله‌ییر. اؤزوم‌تک آدیم دا باتیب دئیه‌سن، هرکس بیر آد ایلا منی سسله‌ییر. باخیرلار اۆزومه بۇز باخیش ایله، بیلمیرلر یاشیمدان چوخدو نیسگیلیم. یئدیگیم، ایچدیگیم زهردی منه، مینّت‌لی چؤره‌یه قیسادی دیلیم. بیلمیرم کئچمیشی، گله‌جه‌ییمی؛ هئچ دئین اولماییر هارالییام من. ائله بیل ازلدن کۇپوْنوم یانیب، فله‌یین الیندن یارالیرام من. گؤزلریم تیکیلیب یوللارا، ولی- كئشکه بیر نفر ده یوْخلویا منی! یا دا کی بیریسی توتا الیمدن، گؤستره: بو قادین دوغوبدور سنی! بو یئره گوناهسیز سۆرگون اولموشام، عدالت بایراغی اسمه‌دی بیزه. غم ایله اورکده گول بسله‌میشم، سیز آللاه گیرمه‌یین بو کردیمیزه! گلندن ،گئدندن سوروشورام من: نئیه بس طالعیم بئله قارادی؟ یازیمی یازاندان گیلئی‌لنیرم، جهنّم وارسا، اوف، بورا هارادی؟! #حسن_عمیدفر_توفارقان #شعر_اوجاغی @SheirOcagi

▫️نه سنی سئوه‌جم، نه باشقاسینی. آیریلیب گئده‌جم سندن خبرسیز، نه سنی سئوه‌جم، نه باشقاسینی. من داوام ائده‌جم یولوما سنسیز، نه سنی سئوه‌جم، نه باشقاسینی. گؤمه‌جم قلبیمه سئوگینی درین، چوخ اولدو قلبیمه دردین، هم سرین. بیر قرام قالماییب آرتیق دیَرین، نه سنی سئوه‌جم، نه باشقاسینی. سوْیاجام الیم‌له قلبین یاراسین، اؤزونه سئوینجلی گونلر آراسین! آلیب آپاریبسان عشقین پاراسین، نه سنی سئوه‌جم، نه باشقاسینی. گئجه‌نی سئچه‌جم همدم اؤزومه، بیر گولوش ساچاجام هردن اۆزومه، معطّل قالارسان منده دؤزومه، نه سنی سئوه‌جم، نه باشقاسینی. آرتیق یولونا دا چیخمایاجاغام، یالانچی گؤزونه باخمایاجاغام، سئوگیمی یئرلره آتمایاجاغام، نه سنی سئوه‌جم، نه باشقاسینی. #پروین_عظیم‌اووا #شعر_اوجاغی @SheirOcagi

▫️هئی باسدیریریق، باسدیریریق، باسدیریریق کئچمیش گونلرین آرخاسیندان گئدن اومیدلری. هئی بورج آلیریق، بورج آلیریق، بورج آلیریق صاباحیمیزدان اومید. 📚 فتح‌نامه‌ی کلات #بهرام_بیضایی #شعر_اوجاغی @SheirOcagi