|شعر اوجاغی|

▫️قارغیمیش‌لار شهرین باغرینا آلمیشدی حاصار، بوردا قار، اوردا یاغیش، هارداسا یول یورغونو وار. بو یاغیشسیز شهرین یاز بولودوندان اله‌نیر، بیزه تهمت، بیزه قارغیش، بیزه نیفرت، بیزه عار! دایناسورتک کسیلیبدیر کؤکوموز اورماندان، قالماییبدیر بو ساواشلاردا نه یولداش، نه‌ده یار. خیاوانلارداکی اینسانلارا یوخلوق ساریلیب، خیاوانلاردا وئریب قول-قولا یالقیزلیق‌لار. بو قارانلیق گئجه‌لرده ییخیلان هر شاعیر، ال آتارسا قلمه بیر نئچه‌ خط سانجی‌ دوغار. گاه اؤپور، گاه‌ دؤشه‌ییر بئینیمه داش یومروغونو، اوتاغیمدا اوتوران بوْزکراواتلی جاناوار. جاناوار بایراغی آغدان چئویرر قاپ-قارایا، جاناوار هرگون اؤزون تپ-تزه بیر رنگه بویار. و آنام سانجی‌لار ایچره دولانار کردیمیزی، اکدیگی غؤنچه‌لری گؤزیاشی‌ ایله سووارار. شهرین دال بوجاغیندا دیل آچان شاعیر اوچون، آچیلیبدیر یئنه دوستاق، قورولوبدور یئنه دار. خیاوان‌لاردا گزیب هرکسی گؤرجک دئییرم: آمان آللاه، نییه اینسانلارا بنزیر بو داوار؟! باری سن گل منی آل باغرینا، من-من، آناجان! گؤزلریم کور، آیاغیم شل، قولاغیم کاردیر، کار. حسرتیک بیر نئچه ایلدیر شیرینه، قیرمیزیا، باغلاری دوستاغا سالمیش سویوق اللرله دووار. یولونو سال بو قارانلیق ائوه، کندین‌له گتیر، بیر قوجاقلیق قیزیل آلمایلا بیر آز قیرمیزی نار! #آتیلا_حاجیزاده @SheirOcagi