|شعر اوجاغی|

▫️دومان دومان طبیعتی قیسقانیر بیزه، گؤزه گؤرونمه‌ییر نه دره، نه داغ. اوزاق بیر سفره گئدن سۆروجو، یقین کی بو گئجه چؤلده قالاجاق. داغلار بو دومان‌لا مئهیر گؤندریب، بیلیب کی سویوغا دؤزمز پؤهره‌لر. سئحیرلی دومانی گئیینیب قیزلار، گؤزه گؤرونمه‌دن گؤروشه گلر. قارغاییب چیسکینه، چنه، دومانا، اووچولار الی‌بوش گئری دؤنه‌جک. مئشه‌نین عطرینی ییغیب قوینونا، بو دومان آرانا پای ائندیره‌جک. #توفیق_یوسف #شعر_اوجاغی @SheirOcagi

‍ ▫️من اؤلن گون من اؤلن گون بیر کولک اسه‌جک کوچه‌لرده و یئلله‌ده‌جک ایپدن آسیلی، قورویان ساری چیچکلی بیر اوشاق پالتارینی ماتم بایراغی‌ تک دالغالاناجاق اوشاق پالتاری من اؤلن گون... #واقیف_صمداوغلو #شعر_اوجاغی @SheirOcagi

▫️قاندال‌ و زنجیر، کؤله‌لیگین ان آز قورخونج اولان سیمگه‌لری‌دیر. اساس زنجیرلرین کؤکو قانیمیز، عائیله‌‌میز و وطنیمیزده‌دیر. بو زنجیرلر ایستک‌لریمیز و احتیاجلاریمیزین ایچینده گیزلی‌دیر، وارلیغیمیزا هؤرولوب. #مئی_زیادة #شعر_اوجاغی @SheirOcagi

▫️کی بس قاییتدی کی، چوخ داریخمیشام، من هئچ نه دئمه‌دیم، سوسدوم ائله‌جه. وار آخی اورکدن سوسماغیم منیم. سوساندا یوخودان غفیل آییلدیم، گؤردوم یئرینده‌دیر آنام، وطنیم، روحومدان آزاددیر آنا وطنیم. سونرا یاریم ساعات گوزگویه باخدیم- گؤروم نه‌ییم یوخدور، گؤروم نه‌ییم وار. گؤتوروب بو گونو کئچمیشه ووردوم، گؤردوم کی بیر خوشبخت گله‌جه‌ییم وار. شاعیرم، حئسابدا یاخشی دئییلم، هئچ دقیق بیلمیرم نئچَنجی ایلم. منیم بیر دوستوم وار شهَر آدیندا، بیر ده سئوگیلیم وار یئری بوردادیر، بیر ده اوندان قاباق آنام اوردادیر. دوستومون، آنامین، یاریمین یئرین- بیلندن بیلیرم وطن هاردادیر. بیرجه آتام یوخدور... یوخ ائ، او دا وار، بیر آز خاطیره‌دیر، بیر آز مزاردیر. آتامین قبرینین اوستونه گئتدیم، نه گؤرسم یاخشی‌دیر؟ دونیا قورتاردی ایلاهی، دوغمامی چوخ گؤرمه منه گؤرسن، گوناهیمی چوخ گؤر، ایلاهی! منی قیرانلاری سنین خطرینه نئجه باغیشلادیم باخ گؤر، ایلاهی! سن منیم اؤزومو یاخشی بیلیرسن نه گرک هر شئیی گتیریم دیله؟! منی سندن یاخشی کیم اوخویاجاق؟! منیم حیکمتیمی کیم بیله بیلر؟! منیم شعیرلریم دوعادیر ائله. #رشاد_ناغی_مصطفی

▫️بیر گون سن آنلایاجاقسان کی، نه اولورسا اولسون، بو حیاتدا یاشاماغا دیَر. اوندا اولان گؤزللیک‌لره گؤره، سئومه‌یه و سئویلمه‌یه گؤره. 📚 رئیل‌لر اوزرینده اوزانمیش آدام #رؤوشن_عبدالله‌اوغلو #شعر_اوجاغی @SheirOcagi

▫️قبول اولوناجاق بیر دوعام اولسایدی، سنه یاخین اولماغی ایستردیم تانریدان. #غسان_کنفانی #شعر_اوجاغی @SheirOcagi

▫️آنا نییه بئله تلسدین کی؟ بو قوجالماق هاردان چیخدی؟ کیمسه خطرینه‌می دَیدی؟ کیمسه قلبینی‌می سیخدی؟ یامان تأثیر ائدیر منه قوجالیغی حیسّ ائتمه‌یین، قارا ساچلار آراسیندا آغ ساچلاری گیزلَتمه‌یین! یانیندایام، دؤزوملو اول! سن کی مندن گوج آلیرسان. من هله بؤیومه‌میشم، بس سن نییه قوجالیرسان؟ گیلئی‌لنمه قیریش‌لاردان! سنه یاراشیر بئله ده. بیشیردیگین یئمک‌لرین، دادی یاخشی‌دیر هله ده. حئییف کی، چوخ چاره‌سیزیک، مغلوب اولوروق زامانا! یاشادیغین هر گون اوچون، سنه مینّتدارام، آنا! #رشاد_ناغی_مصطفی #شعر_اوجاغی @SheirOcagi

▫️بیر چیچه‌یی سئویرسن، بوراخ وار اولسون! سئومک صاحیب اولماق‌لا ایلگیلی دئییلدیر، سئومک دیَر وئرمک‌له ایلگیلی‌دیر. #اوشو #شعر_اوجاغی @SheirOcagi

▫️دوشمن‌لریمی سئوه‌جه‌یم، چونکی سن اونلاردانسان. #ابن‌زیدون #شعر_اوجاغی @SheirOcagi

▫️گلنده مجلیسه مئی الده لاله شکلینده، نگاریم آی‌تک اولور، من‌سه هاله شکلینده. اورک قانیم‌لا یازیب سؤنمه‌ین محبّتیمی، نگاره سؤیله‌ییرم اودلو ناله شکلینده. وفالی کؤنلونه بیر یول تاپان زامان شعریم، گؤزونده نم گؤرورم، اینجی، ژاله شکلینده. من عاشقم، بئله‌یم من، هر عاشقانه سؤزوم، جوشوب آخیر اوره‌ییمدن شلاله شکلینده. سئوین، سئوین کی، «سلیمان»! الینده سئوگیلینین- او قان اولان اوره‌یین‌دیر پیاله شکلینده! #سلیمان_رستم #شعر_اوجاغی @SheirOcagi

▫️هئچ واخت، آنلاشیلماق اوچون چیغیرمایین! سیزی آنلایان سوکوتونوزون سسینی داها یاخشی ائشیدر. #جبران_خلیل_جبران #شعر_اوجاغی @SheirOcagi

▫️...حیات‌لا غوغالاردا گلیب چاتدیم بو کؤورک، بو اللری دونیادان اۆزولو یاشا- قبر ائوینین بیرجه آددیملیغینا. نئچه ایللر بوندان اوّل اینانمازدیم کی، بو قدر یاشایا بیله‌رم. «سن سایدیغینی سای» ائله بیل دونن ایدی، الیمده چانتا مکتبه گئتدیگیم. دونندن بیر آز دا بری‌یدی بیر گؤزله: «یامان خوشوما گلیرسن» دئدیگیم. بیر اختیار قوجا بئلی بوکولموش حالدا عصاسینین کؤمه‌یی‌یله یاواش-یاواش یول گئدیردی. جاوانلار اونا ساتاشیردی: «بابا، یئرده نه آختاریرسان بئله!؟» اختیار قوجا ائله بئلی بوکولو جاواب وئردی:«گنجلیگیمی. ایندیجه الیمدن دوشدو.» چوخ حئییف‌لر کی، عؤمرومون پاییزی تئز گلدی! هر اؤتن گون، بوداغیندا قورخا-قورخا اسن پاییز یارپاغینا دؤندریر منی. نئیله‌مک؟! مین ایللردی، یازیقلار اولسون کی، بو دؤوران بئله‌دی! گلن گئدیر، گئدن قاییتمیر. بو، فله‌یین چرخی ایله باغلی ایش‌دی، بنده‌‌نین الینده دئییل. دونیامین غوروب چاغیندا گئری دؤنه‌رک اؤتوب-کئچن‌لره باخاندا، علاجیم هئچ نه‌یه قالمیر، تأسّوف یاغمورونا دوشورم. تزه‌دن نه اولاسی‌دی کی؟! منیم بو حالیمی، یاشادیغیم دردلری یاشایان‌لار بیلر. اۇلولار دئییبلر: اینسان ایکی شئیین قدرینی ایتیرندن سونرا بیلیر- ساغلاملیغین و جاوانلیغین... 📚عؤمرومون پاییزی #توفیق_یوسف #شعر_اوجاغی @SheirOcagi

▫️منیم سؤزومو تئز-تئز کسین! چونکی سیزینله دانیشاندا اوره‌ییمده اولان هر شئیی دئمک ایسته‌میرم. 📚 قومارباز #فئودور_داستایئوسکی #شعر_اوجاغی @SheirOcagi

▫️آللاه، سندن اؤترو چوخ داریخمیشام، یئتیم اولمامیشدیم هله بئله من. آخی یئتیم‌لرین یییه‌سی سنسن، آتاسی اؤلَنین بیری ائله من. دوستومون الیندن عصا دوزلدن، هئچ واخت ییخیلمایان آدام منم، من. قبرینین اوستوندن گلن سس-کۆیدن قورخما، قوربان اولوم، آتام... منم، من. قورخما، قوربان اولوم، دوستوم وار منیم! سنه دالدالانیب چیخدیغیم آغاج قیریلدی، ییخیلدیم اوره‌یی اوسته. بیر چیینیم بوش قالدی، بیر چیینیم دولو کسدیم آغاجلارلا سلام-ساغ‌اولو دالاشدیم باکینین کوله‌یی اوسته. گؤتوروب اوغلومون اویونجاق‌لارین سن من‌له اوینایان کیمی اوینادیم. اوندا من سن اولدوم، اوغلوم من اولدو، تاپانجا اوینادیق، گمی اوینادیق. منیم اویونجاغیم دوشدو الیمدن، دئدین کی: «عئیبی یوخ، غفلتاً اولدو.» اوندا من سن اولدوم، اوغلوم من اولدو. قورخما، تک دئییلم، آتام، آی آتام! نه قدر یئریم وار چیخیب گئتمه‌یه! «تبریز» شهریم وار چیخیب گئتمه‌یه. #رشاد_ناغی_مصطفی #شعر_اوجاغی @SheirOcagi

▫️بیر اینسان دال‌بادال ایکی گوندن آرتیق خوشبخت‌دیرسه، دئمک کی باشقالاری اوندان بیر شئیلر گیزله‌دیرلر. 📚 خوشبختلیک و بؤیوک اهمیّت‌لی دیگر کیچیک شئیلر #Haim_Shapira #شعر_اوجاغی @SheirOcagi

▫️کؤنلوم دیلیمه دارغین، دیلیم کؤنلومه. کؤنلوم دویغولارینی آنلاتمادیغی اوچون سینیرلنیرکن دیلیمه، دیلیم آنلادا بلمه‌یه‌جه‌یی شئی‌لری دوشوندویو اوچون سینیرلنیر کؤنلومه. #مولانا #شعر_اوجاغی @SheirOcagi

▫️ساچینا اویموش خیالیم چونکی عنبربو کیمی. اول سببدن اینجه‌لیب قدّیم اولوبدور مو کیمی. اولا کی، تمثالیما بیر باخا شهلاگؤزلولر، ای مصوِّر، چک منیم تصویریمی ابرو کیمی! هاندا+ کیم، بیر گردنِ سیمین و گول‌ اندام اولا، بیلمه‌رم کیم نه ائدیم، مندن قاچارلار قو کیمی. اؤز خوشوم‌لا من اسیرِ غمزه اولمازدیم، ولی- سئحره سالدی اول خومار گؤزلر منی جادو کیمی. «واقف»ام، یوخدور منه چاهِ زنَخداندان نجات، گؤستریر احوالیمی آیدین اۆزون گۆزگو کیمی. #ملاپناه_واقف #شعر_اوجاغی @SheirOcagi

▫️یوخوما گیرمیشدین یئنه بو گئجه، باخمادین اوزومه، سن اؤتوب کئچدین. منیم حسرت دولو بو گؤزلریمه، سن کدر چیله‌دین، درد-غم چیله‌دین. یوخوما گیرمیشدین یئنه بو گئجه، مغرور قالا کیمی دینمزدین یئنه. قلبیمده بیر آتش یاندی گیزلیجه، معصوم باخیشلاریم دیکیلدی سنه. دالغاسیز ساحیل‌لر سنسیز داریخیر، لال دنیز اولموشام، جوشقون ایکن سن. سنی خیالیمدا یاشاتماق اوچون، ابدی یوخویا دالاجاغام من. #الهامه_عباس_یوسف‌قیزی #شعر_اوجاغی @SheirOcagi

▫️یانلاریندا اوتوروب گؤز یاشی تؤکوب هله ده گوجلو ساییلدیغیمیز بیریلری اولمالی‌دیر حیاتیمیزدا! #مگان_دیواین #شعر_اوجاغی @SheirOcagi

▫️مذهبی توپلوم‌لار -عادی توپلوم‌لارا باخاندا- عدالتسیزلیک قارشیسیندا داها چوخ‌ صبیرلی اولورلار. اونلار -آللاه اوبیری دونیادا انتقام‌لارینی آلاجاق- دئیه اینانیرلار، بئله‌لیکله اؤز حاقلارینی آلماغا چوخ دا چالیشمیرلار‌. بعضی حوکومت‌لرین، میلّتی مذهبی‌لشدیرمه‌یه چوخلو چالیشماقلارینین ندنی بودور.  #الکساندر_الکساندروفسکی #شعر_اوجاغی @SheirOcagi