|شعر اوجاغی|

▫️اوزاقلاشماق بعضاً آجیماسیزلیق دئییل، اؤزونه آجیماق‌دیر. #اف_آلبین #شعر_اوجاغی @SheirOcagi

▫️ساپاند داشی اریدیم، اریدیم دردیندن، سسم، صورتم، قلبیمده یورد سالان یوردا غوربتم، ایتن غئیرتم «قاچقین» کلمه‌سینده. گئرییه دؤنمه‌یه ایزیم یوخ، وطن! سئوگینین دیلی یوخ، دیل سوْیوغویام ائله یانمیشام کی، کۆل سوْیوغویام اوْدوم، کؤزوم یوخ، وطن! دردیمی دیلده داشییان دئییلم، بیرآز ناشی‌یام بو هاوالاردا. «قاراجا چوبان»ین ساپاند داشی‌یام، آتیلدیم غوربت چؤللره، وطن! #یافث_تورک‌سس #شعر_اوجاغی @SheirOcagi

▫️سئوگیلی‌م! من ایندی... سئوگیلیم! من ایندی بؤیوک بیر شهرده سنی دۆشونمکده‌یم، الیمده آچیق ماوی بیر قلم، جئبیمده ایکی پاکات سیقارا، حیاتیمیز کئچیر گؤزلریمین اؤنوندن: چیخیب گئتمه‌لریمیز، سو ایچمه‌لریمیز، اؤپوشدوکلریمیز، آغلارام یادیما دوشدوکجه گولوشدوکلریمیز. چیچکلر، چیچکلر، سو وئردیم بو صاباح چیچکلره او گۆلون اۆزو گۆلمور سنسیز. او کؤکلَنسین دئیه، پنجره‌ده سویا قویدوغوم «دوه‌دابانی¹»، تام حوزونلو بو گونلرده. گۆر و جوشغون بیر گون ایشیغی دادانمیش پنجره‌یه. ماسادا تاباقلار نشه‌سیز، کوریدور اؽسسیز، حامامدا حووله‌لر یالنیز، مطبخ دئسن...، اکمک قوتوسو بوش، وانتیلاتور² نفس‌سیز، خالی‌لار توْزلو، گئیسی‌لریم دولابدا، اوردا-بوردا. «مئمو»نون اویونجاق سبدی یوخودا، ماوی گئجه لامپاسی هوس‌سیز. قاپی دئییر کی «آچین منی، قاپادین منی!» پرده‌لر دری دَییشدیرن ایلانلار کیمی، رادیو دئسن، سسسیز؛ چارپایا، صندلی‌لردن چکینیر، کیچیک اوتاق، قارانلیق و اؽسسیز. هر شئی سنی گؤزله‌ییر، هر شئی گلمه‌نی، ایچری گیرمه‌نی، سنین الینین دَیمه‌سینی، گؤزونون توخونماسینی. و هر شئی تکرارلاییر، سنی نه قدر سئودیییمی... #جمال_ثریا ¹- گئنیش یارپاقلی دکوراتیو بیر بیتکی ²- هاوا دَییشن آلت - تهویه آلتی #شعر_اوجاغی @SheirOcagi

دیالوق ▫️-کئشکه بو قدر سئومه‌سه‌یدیم سنی! 🎬 Casablanca 1943 آمریکا #مایکل_کورتیز #شعر_اوجاغی @SheirOcagi

▫️نه وارلی‌یا بورج‌لو اول، نه یوخسول‌دان آلاجاق‌لی! #آتا_آنالار_سؤزو @SheirOcagi "سیز ده بیر اونودولموش آتا-آنا سؤزونو آرتیرین👇"

▫️گؤرن بو عشقده کؤنلوم صفا گؤرر، گؤرمز، بو دردِ عشقینه بیر گون دوا گؤرر، گؤرمز؟ سیتم‌دی گؤردویو دائیم بو بیوفا یاردان، نهایت، آللاه، او گولدن وفا گؤرر، گؤرمز؟! چکیر بو آیریلیغین مؤحنتین، غمین، ظولمون، بیر آغ گون عاشیقه جانان روا گؤرر، گؤرمز؟ منم دؤزن بو قدر درده، غئیری بیر کیمسه- قاچار، دالینجا دا باخماز؛ جفا گؤرر، گؤرمز. دوشندن عشقه، گئجه‌م-گوندوزوم بیلینمیر هئچ، چتین زمانه بو جۆر مبتلا گؤرر، گؤرمز. قرینه‌لردی فلک دؤور ائدیر؛ گؤرن، یا رب، فضاده بختی منیم تک قرا گؤرر؟! گؤرمز. بو «یاسین»ین اوره‌یین درده کؤک‌له‌ین دلبر، روا هوا او نَوادن سوا گؤرر، گؤرمز. #یاسین_خلیل #شعر_اوجاغی @SheirOcagi

دیالوق ▫️- پولون نه فایداسی وار، سئودیکلرین اوچون خرجلَنمه‌سه؟ 🎬 Tick,Tick... Boom 2021 آمریکا #لین_منوئل_میراندا #شعر_اوجاغی @SheirOcagi

▫️اینسان حدّیندن آرتیق آجی چکسه، دورومو کومئدیایا یاخینلاشار، ان اۆزوجو شئیلره ده گوله بیلر. #ماساجی_ایشیکاوا #شعر_اوجاغی @SheirOcagi

▫️بیلن بیلیر، کؤنول باریم- لذّت‌لی‌دیر بولاق کیمی. سؤز سینه‌دن قووّت آلیر، بالا یاتان قوجاق کیمی. نه دردیمه قالانیم وار، نه یادینا سالانیم وار. دهره-بالتا چالانیم وار، قۇرویورام بوداق کیمی. دردیم حدسیز، درمانیم یوخ، مرامیم وار، فرمانیم یوخ. صاباحیما گومانیم یوخ، یاشاییرام قوناق کیمی. بیر وظیفه توتوب هره، یارایان یوخ خئیره-شره. گؤزلریمیز گؤره-گؤره، اودلانیریق اوجاق کیمی. هانسی باغا گئتسم بارا، باغبان منی چکیر دارا. عؤمور بوْیو سارساق‌لارا، آلدانمیشیق اوشاق کیمی. #راسیم_کریملی #شعر_اوجاغی @SheirOcagi

▫️هر شئیدن چوخ، بوتون روحومو گؤزلریمه قویا بیلیب سونسوزادک، اؤلَنه‌ قدر سنه باخماق ایستردیم. #آلبر_کامو‌ «ماریا کاسارس»ا #شعر_اوجاغی @SheirOcagi

▫️عاشیق اولدوغون زامان، دورنا و بالیق‌اودان قوشلارین دیلی‌یله دانیشیرسان، گؤی‌اۆزون فرقلی‌ اولور، چایلار اوچون رقص ائدیرسن، ایستک‌له شعر اوخویورسان، خوش‌رنگسن، گؤزل طبیعتین بیر گوشه‌سی کیمی. سئوینجلی‌سن، هردن تانرینین دوداغی‌یلا گولومسه‌ییرسن. #رسول_ادهمی #شعر_اوجاغی ترجومه @SheirOcagi

▫️هر گون یانیندان کئچرکن اعتناسیزلیغیمیزلا اؤزوموز ده بیلمه‌دن نئچه جانی اؤلومه ترک ائدیریک بلکه ده. 📚 اونودولموش سطیرلر #شعر_اوجاغی @SheirOcagi

عاشورا ادبیاتی ▫️یا شاه کربلا، نه روا بونجا غم سنه دردِ دمادم و الم دم‌به‌دم سنه؟! ائی دردپرورِ المِ کربلا، حسین، وئی کربلا بلالرینه مبتلا، حسین! غم پاره-پاره باغرینی یاندیردی داغ ایله، ائی لاله‌ی حدیقه‌ی آلِ عبا، حسین! تیغِ جفا ایله بدنین اولدو چاک-چاک، ائی بوستانِ سبزه‌ی تیغِ جفا، حسین! یاخدی ووجودونو غمِ ظلمت‌سرای دهر، ائی شمعِ بزمِ بارگهِ کبریا، حسین! دؤورِ فلک ایچیردی سنه کاسه-کاسه قان، ائی تشنه‌ی حرارتِ برقِ بلا، حسین! یاد ائت «فضولی»، آلِ عبا حالین، ائیله آه! کیم، برقِ آه ایلن یاخیلیر خرمنِ گناه. #حکیم‌_ملا‌محمد‌_فضولی #شعر_اوجاغی @SheirOcagi

▫️اوغورلار آرزولا، جانا! کی سندن آیریلیرام، زیارت عزمی ایلن من وطندن آیریلیرام‌. همیشه حوسنون اولوب گولشَنیم، گولوم، چیچه‌ییم، بلالی بولبولونم من، چمندن آیریلیرام. سنین‌له عؤمر ائده‌لی هر گونوم بهاره دؤنوب، گؤر، ایندی بسله‌دیگیم یاسمندن آیریلیرام. اگر کی قیسمت اولار، «حاجی» کربلایی گلر، دور ایندی، گل یولا سال، چونکی سندن آیریلیرام. #حاجی‌بابا_حسین‌اوو #شعر_اوجاغی @SheirOcagi

▫️یولون سونونا قدر گلیرم سنین‌له، هئچ نه سوروشمورام، اصلا! سنین‌له باشلانغیج هارادیر، سون هارا؟! #عباس_معروفی #شعر_اوجاغی @SheirOcagi

▫️جهنّم موقدّس کیتابلاردا دئییلدیگی کیمی اوْدلو، آلوولو بیر یئر دئییلدیر. جهنّم اینسان قلبینده سئوگینین بیتدیگی یئردیر. #فئودور_داستایئوسکی #شعر_اوجاغی @SheirOcagi

▫️تله‌سیک بو ظولمه راضی‌لاشان گؤردو بیر منم تله‌سیک. سیتم وئریب منی یاندیردی بیر صنم، تله‌سیک. گؤرونجه جان قاپیسین تای‌باتای آچیق، ییغیشیب- تؤکولدو اوستومه دسته‌یله درد-الم، تله‌سیک. من ایندی-ایندی توتوردوم محبّتین یولونو، اؤزوم ده گؤزله‌مه‌دن قویدو غم قدم، تله‌سیک. سئوینجیمین باشی باتسین، کدر گلر-گلمز- ییغیشدیریب گئدیب آرتیق کؤچون، تلم-تله‌سیک! باغیشلا «یاسین»ی، ای مرحمتلیم، ایستَکلیم، نه یازدی بیلمه‌دی حاقّیندا کۆت قلم، تله‌سیک! #یاسین_خلیل #شعر_اوجاغی @SheirOcagi

▫️بعضاً بالاجا بیر شئی و یا اؤنَمسیز بیر اولای سبب اولور، آدام حیاتینین بوتون دردلرینی بیردن آغلاییر. #هاروکی_موراکامی #شعر_اوجاغی @SheirOcagi

▫️سئودالی شاعیر، شعرینی قوشاندان سونرا، اونا حسرت و قیسقانجلیق‌لا باخیب اؤزو-اؤزونه دئییر: «نییه بو کلمه‌لر بو قدر سئوگیلی‌یه یاخین‌دیر، آما من دئییلم؟!» #رضا_براهنی #شعر_اوجاغی ترجومه @SheirOcagi

▫️مین یاشاسین! دونیا مردلر دونیاسی‌دیر، ارن‌لری مین یاشاسین! سینه‌سینی توفان‌لارا- گرن‌لری مین یاشاسین! نه گؤزل‌دیر داغ غورورو! بولاق کیمی گؤزلر دورو. اینسان‌لارا حیات نورو- وئرن‌لری مین یاشاسین! اؤز آدی وار ائل یانیندا، یاخشینین دا، یامانین دا. هر بیر کسی اؤز دونوندا- گؤرن‌لری مین یاشاسین! ائل تانینار چؤره‌یی‌یله، تورپاق گولو، چیچه‌یی‌یله. نبضی خالقین اوره‌یی‌یله- ووران‌لاری مین یاشاسین! کؤنول گولر بئشیگینده، اؤز ائوینده، ائشیگینده. حقیقتین کئشیگینده- دوران‌لاری مین یاشاسین! #راسیم_کریملی #شعر_اوجاغی @SheirOcagi