Kiçik və Orta Biznesin İnkişafı Agentliyi - KOBİA

Sumqayıt Sənaye Parkının yeni rezidenti xüsusi texnika və nəqliyyat vasitələri istehsal edəcək ◼️"RAM İndustries" MMC-yə İqtisadiyyat Nazirliyinin tabeliyində İqtisadi Zonaların İnkişafı Agentliyinin idarəçiliyində olan Sumqayıt Sənaye Parkının rezidenti statusu verilib. ◼️İnvestisiya dəyəri 44,9 milyon manat olan xüsusi texnika və nəqliyyat vasitələrinin istehsalı və yığımı layihəsi çərçivəsində 200-dən çox daimi iş yerinin yaradılması nəzərdə tutulur.

Tranzit daşımalarda eTIR sisteminin tətbiqinə başlanıb ◼️Azərbaycan, Türkmənistan və Özbəkistan arasındakı tranzit daşımalarda eTIR sisteminin tətbiqinə başlanıb. ◼️Dövlət Gömrük Komitəsinin məlumatına əsasən, Azərbaycandan şərqə doğru hərəkət edən televizor və musiqi avadanlıqları yükü Xəzər dənizi üzərindən “Türkmənbaşı” limanına çatdırılıb, daha sonra isə “Farap” sərhəd-keçid məntəqəsi vasitəsilə Özbəkistana daxil olunub. Bu əməliyyat vahid prosedur çərçivəsində Azərbaycan, Türkmənistan və Özbəkistanı birləşdirən ilk eTIR daşınmasıdır. ◼️Qərb istiqamətində isə Türkmənistandan pambıq, şirə, su və qənnadı məmulatları daşıyan dörd yük avtomobili “Türkmənbaşı” limanında gömrük rəsmiləşdirilməsini tamamladıqdan sonra bərə ilə Xəzər dənizini keçərək Beynəlxalq Dəniz Ticarət Limanına çatıb. ◼️Sistemin tətbiq edilməsində Azərbaycan, Türkmənistan və Özbəkistanın gömrük orqanları, BMT-nin Avropa üzrə İqtisadi Komissiyası (UNECE), Beynəlxalq Avtomobil Nəqliyyatı İttifaqının (IRU) və onun üzv təşkilatları ABADA, THADA və AIRCUZ arasındakı əməkdaşlıq mühüm rol oynayıb. ◼️Beynəlxalq Avtomobil Nəqliyyatı İttifaqının (IRU) dəstəyi ilə həyata keçirilən layihə gömrük məlumatlarının real vaxt rejimində elektron qaydada mübadiləsinə, kağız sənədləşmənin həcminin azalmasına, risklərin minimuma endirilməsinə, gömrük prosedurlarının sürətləndirilməsinə, xərclərin azaldılmasına, əməliyyatların və ticarətin sadələşdirilməsinə imkanlar yaradır. ◼️Eyni zamanda, eTIR sisteminin tətbiqi Orta Dəhlizin cəlbediciliyinin yüksəlməsi, bu marşrut vasitəsilə yükdaşımaların həcminin artması baxımından da əhəmiyyət daşıyır.

KOB klaster şirkətləri sahibkarlar üçün yeni əməkdaşlıq imkanları yaradır “KOB klaster şəhadətnaməsi” almış "Frutena", "Naturaoil" və "Healthtech Solutions" KOB klaster şirkətləri artıq müxtəlif sahələrdə fəaliyyət göstərən 20-dən çox mikro, kiçik və orta sahibkarlıq subyektini ətrafında birləşdirib. KOB klaster şirkətlərinə yeni iştirakçıların cəlb edilməsi istiqamətində işlər davam etdirilir. Alma və nar məhsullarının, plastmaslar və onlardan hazırlanan xammal məmulatlarının, müxtəlif növ qablaşdırma məhsullarının istehsalı və keyfiyyətə nəzarət laborotoriya xidmətləri sahəsində fəaliyyət göstərən ixtisaslaşmış KOB subyektləri KOB klasterinin iştirakçısı olmaq üçün müvafiq KOB klaster şirkətinə, həmçinin əlaqələndirmə dəstəyi üçün Kiçik və Orta Biznesin İnkişafı Agentliyinə (KOBİA) müraciət edə bilərlər. Müraciətlər KOBİA-nın info@smb.gov.az elektron poçt ünvanı və ya rəsmi internet səhifəsi vasitəsilə qəbul edilir. Ətraflı - https://smbgovaz.short.gy/m61jVn

İpəkçilik sahəsi üzrə yeni dövlət standartı qəbul edilib ◼️Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin tabeliyində olan Azərbaycan Standartlaşdırma İnstitutu (AZSTAND) tərəfindən ipəkçilik sahəsi üzrə yeni AZS 998:2026 “Sənaye qrenası. Texniki şərtlər” dövlət standartı qəbul edilib. ◼️Yeni standart ipəkçilik sahəsi üzrə istehsal prosesində vahid texniki tələblərin müəyyən edilməsinə, yüksək keyfiyyətli və sağlam ipəkqurdunun sənaye qrenasının istehsalının təmin olunmasına, məhsulun bioloji göstəricilərinin sabit saxlanılmasına, istehlakçılara təqdim olunan məhsulun etibarlılığının artırılmasına xidmət edir. ◼️Standart qrenanın keyfiyyət göstəricilərinin obyektiv qiymətləndirilməsi, məhsuldarlığın yüksəldilməsi, genetik resursların qorunması və damazlıq işinin səmərəliliyinin artırılması baxımından mühüm əhəmiyyət kəsb edir. ◼️Sözügedən dövlət standartı layihəsi AZSTAND tərəfindən Azərbaycan Respublikası Kənd Təsərrüfatı Nazirliyinin Heyvandarlıq və Balıqçılıq Elmi Tədqiqat İnstitutunun bazasında təsis edilmiş “Heyvandarlıq, quşçuluq, arıçılıq, balıqçılıq, baramaçılıq və yemçilik sahəsi”nin standartlaşdırılması üzrə Texniki Komitənin (AZSTAND/TK 24) təqdimatı əsasında qəbul olunaraq Standartlaşdırma üzrə normativ sənədlərin Dövlət Fonduna daxil edilib.

Məqsədimiz “NooshCard”ı ölkə üzrə şirkətlər üçün standart həllə çevirməkdir – MÜSAHİBƏ Son illərdə şirkətlərdə əməkdaşların sosial təminat paketləri və gündəlik xərclərin idarə olunması sahəsində rəqəmsal həllərə maraq sürətlə artır. Bu istiqamətdə innovativ təşəbbüslərdən biri də şirkətlərin yemək xərclərini daha şəffaf, çevik və idarəolunan formaya gətirməyi hədəfləyən “NooshCard” platformasıdır. Layihə korporativ yemək xərclərinin rəqəmsal idarə olunmasını təmin etməklə həm şirkətlər üçün maliyyə nəzarətini gücləndirir, həm də əməkdaşlara daha geniş seçim imkanı yaradır. İnnovativ yanaşmasına görə “NooshCard” MMC rəsmi olaraq startap şəhadətnaməsi də əldə edib. Layihəyə Kiçik və Orta Biznesin İnkişafı Agentliyi (KOBİA) tərəfindən startap şəhadətnaməsi verilib. Ətraflı - https://azertag.az/xeber/meqsedimiz_nooshcardi_olke_uzre_sirketler_uchun_standart_helle_chevirmekdir___musahibe-4339037

Sahibkarların müraciətləri dinlənilib Kiçik və Orta Biznesin İnkişafı Agentliyinin (KOBİA) təşkilatçılığı ilə regionlarda fəaliyyət göstərən sahibkarlarla görüşlər davam edir. Növbəti onlayn qəbulda Agentliyin İdarə Heyətinin sədr müavini Rüfət Atakişiyev Qəbələ və İsmayıllı rayonlarından olan sahibkarların müvafiq rayonlarda aqroturizm biznesinin yaradılmasına, poliqrafiya, ictimai iaşə və kənd təsərrüfatı məhsullarının emalı sahələrində fəaliyyətin genişləndirilməsinə maliyyə dəstəyi, uşaqlar üçün düşərgələrin təşkili layihəsinin tanıdılmasına və sərgilərdə iştiraka dəstək kimi məsələlərə dair müraciətlərini dinləyib, suallarını cavablandırıb. Qəbul zamanı KOB subyektlərinə dövlətin mövcud dəstək alətləri, o cümlədən Agentliyin dəstək mexanizmləri barədə məlumat verilib, onların təklifləri dinlənilib.

“KOB könüllüləri” proqramına maraq artmaqda davam edir Kiçik və Orta Biznesin İnkişafı Agentliyi (KOBİA) ölkədə könüllü fəaliyyətinin inkişafına, gənclərin əmək fəaliyyətinə başlayana qədər praktiki bilik və bacarıqlarının inkişafına dəstək olmaqda davam edir. Bu məqsədlə KOBİA-da həyata keçirilən “KOB könüllüləri” proqramına maraq böyükdür. 2026-cı ilin yanvar-iyun aylarında proqrama qoşulmaq üçün Agentliyə 725 müraciət daxil olub. Agentliyin könüllü ehtiyacına və növbəlilik prinsipinə uyğun olaraq artıq 66 gənc KOBİA-da könüllü proqramına cəlb olunub. Onlar əsasən Agentlikdə, eləcə də Bakı, Gəncə, Yevlax və Xaçmaz KOB evlərində könüllü fəaliyyətinə cəlb olunublar. Digər müraciətlər isə il ərzində Agentliyin könüllü ehtiyacı çərçivəsində dəyərləndiriləcəkdir. Ətraflı - https://smbgovaz.short.gy/Cds5jv

Biznes tərəfdaşlığı proqramı çərçivəsində təlimlər keçirilir Kiçik və Orta Biznesin İnkişafı Agentliyi (KOBİA) və Almaniyanın Beynəlxalq Əməkdaşlıq Cəmiyyətinin (GIZ) birgə tərəfdaşlığı ilə həyata keçirilən “Almaniya ilə biznes tərəfdaşlığı” proqramı (“Partnering in Business with Germany”) çərçivəsində təlimlər keçirilir. Alman ekspertlərinin keçirdiyi təlimlərdə yerli sahibkar və menecerlərə beynəlxalq iqtisadi kooperasiya, yaşıl iqtisadiyyatın biznesin inkişafında rolu, Almaniya müəssisələri ilə işgüzar əlaqələrin qurulması barədə məlumat verilir, onları maraqlandıran suallar cavablandırılır. Növbəti mərhələdə iştirakçılar Almaniyanın Drezden və Berlin şəhərlərinə səfər edəcəklər. Səfər çərçivəsində onlar Biznesin İnkişafı Mərkəzində və qabaqcıl alman şirkətlərində təlim və təcrübə keçəcək, B2B görüşlərdə iştirak edəcəklər. Proqramı uğurla başa vuran iştirakçılara beynəlxalq sertifikat təqdim ediləcəkdir. Ətraflı - https://smbgovaz.short.gy/3pZJwS

Vergi güzəştləri ilə böyüyən startaplar: “BillKill” və “OnWay” Azərbaycanda təqdim olunan “Startap” şəhadətnaməsi və onun verdiyi vergi güzəştləri yeni yaranan texnoloji bizneslərin ilkin mərhələdəki maliyyə yükünü azaltmağa xidmət edir. Bu mexanizmdən yararlanan yerli layihələr fərqli sektorlarda ənənəvi idarəetmə və xidmət proseslərini rəqəmsallaşdıraraq işlərin sürətlənməsinə öz töhfəsini verir. “vergiler.az” bu imkanlardan faydalanan iki fərqli layihənin — binaların idarə edilməsini rəqəmsallaşdıran “BillKill.az” platformasının və kənd təsərrüfatı təchizatçılarını vahid məkanda birləşdirən “OnWay” startapının qurucuları ilə həmsöhbət olub. Hər iki layihə vergi güzəştləri sayəsində xidmət coğrafiyasını genişləndirməyi, eləcə də güclü komanda və investor dəstəyi ilə fəaliyyətini böyütməyi hədəfləyir. Ətraflı - https://vergiler.az/news/article/40034.html

Bu ilin ötən dövründə 35 “Startap” şəhadətnaməsi verilib 2026-cı ilin yanvar-iyun aylarında Kiçik və Orta Biznesin İnkişafı Agentliyinə (KOBİA) “Startap” şəhadətnaməsi almaq üçün mikro və kiçik sahibkarlıq subyektlərindən 87 müraciət daxil olub. Müraciətlər müvafiq sənədin verilməsi üzrə yaradılmış Ekspertlər Şurası tərəfindən Nazirlər Kabinetinin 29 yanvar 2021-ci il tarixli Qərarı ilə təsdiq edilmiş “Startapın müəyyən olunması meyarları”na əsasən qiymətləndirilib və 35 sahibkara “Startap” şəhadətnaməsinin verilməsi barədə qərar qəbul olunub. Şəhadətnamə almış sahibkarların 28-i hüquqi, 7-i fiziki şəxsdir. Onların 26-sı Bakı şəhərində, 9-u isə regionlarda fəaliyyət göstərir. Müvafiq sənədi almış sahibkarların 2-si qadındır. Ətraflı - https://smbgovaz.short.gy/FWyjHF

Qəbələ və İsmayıllı rayonlarında fəaliyyət göstərən sahibkarların nəzərinə! İyulun 24-də Qəbələ və İsmayıllı rayonlarında sahibkarlıq fəaliyyəti ilə məşğul olan biznes subyektlərinin qəbulu təşkil olunacaq. Kiçik və Orta Biznesin İnkişafı Agentliyinin (KOBİA) İdarə Heyəti sədrinin müavini Rüfət Atakişiyev müvafiq rayonlar üzrə sahibkarların müraciətlərini dinləyəcək, suallarını cavablandıracaq. Qəbul saat 11:00-dan etibarən Qəbələ şəhərində Heydər Əliyev Mərkəzində (Ünvan: Heydər Əliyev prospekti 40) keçiriləcək. Sahibkarlıq fəaliyyəti ilə bağlı məsələlər üzrə qəbula gəlmək istəyən vətəndaşlar KOBİA-ya müraciət etməklə qəbula yazıla bilərlər (Tel.: 055 500 12 17, e-mail: afshin.afsarbayli@smb.gov.az, Afşin Əfsərbəyli, KOB dostu).

Regionlarda investisiya fəallığının artırılması və KOB-ların dəstəklənməsi istiqamətində tədbirlər həyata keçiriləcək Bu, Prezident İlham Əliyevin Sərəncamı ilsə təsdiqlənmiş “Məşğulluq Strategiyasının həyata keçirilməsinə dair 2026–2030-cu illər üçün Tədbirlər Planı”da yer alıb. Planın icrası İqtisadiyyat Nazirliyinə tapşırılıb, digər icraçılar isə Kənd Təsərrüfatı Nazirliyi, Rəqəmsal İnkişaf və Nəqliyyat Nazirliyi, yerli icra hakimiyyəti orqanları və Azərbaycan Sahibkarlar Konfederasiyasıdır (tövsiyə olunur). Tədbirlər Planına əsasən, 2026–2030-cu illərdə regionlarda investisiya fəallığının stimullaşdırılması, istehsal olunan malların və xidmətlərin daxili və xarici bazarlara çıxışının dəstəklənməsi üçün tədbirlər görüləcək. Mikro, kiçik və orta sahibkarlıq (KOB) subyektlərinin investisiya və innovasiya fəallığının stimullaşdırılması üçün əlverişli şərait yaradılacaq. KOB subyektlərinin məlumatlandırılması, onlar üçün təlimlərin təşkili, dayanıqlığının gücləndirilməsi, mövcud iş yerlərinin qorunub saxlanılması və yeni iş yerlərinin yaradılmasına dəstək göstərilməsi istiqamətində də işlər görüləcək. (AZƏRTAC)

🌾 Naxçıvanda ilk qadın kənd təsərrüfatı kooperativi yaradılıb ◼️ Naxçıvan Muxtar Respublikasında “Aqrosahibkar qadınlarla iş” layihəsi çərçivəsində yaradılan “Fermer” İstehsal-İstehlak Qadın Kooperativinin təqdimatı keçirilib. ◼️ Kənd Təsərrüfatı Nazirliyinin məlumatına görə, kooperativ kənd qadınlarının iqtisadi imkanlarının genişləndirilməsi, istehsal potensialının birləşdirilməsi və bazar əlaqələrinin gücləndirilməsi məqsədilə yaradılıb. ◼️ Hazırda kooperativ Sədərək, Culfa, Ordubad, Babək və Şərur rayonlarını təmsil edən 32 qadın aqrosahibkarı birləşdirir. Üzvlər heyvandarlıq, taxılçılıq, bağçılıq, meyvəqurutma, quşçuluq, çörək və şirniyyat istehsalı kimi sahələrdə fəaliyyət göstərirlər. ◼️ Kooperativ üzvlərinin istehsal etdiyi 100-dən artıq çeşiddə məhsul yerli bazarlarda, eləcə də Türkiyənin İğdır vilayətində satışa çıxarılır. Kooperativin əsas hədəfləri vahid məhsul markasının formalaşdırılması, qablaşdırma və marketinqin təkmilləşdirilməsi, satış bazarlarının genişləndirilməsi, logistika və rəqəmsal satış imkanlarının inkişafı, eləcə də ixrac potensialının artırılmasıdır. ◼️ “Fermer” İstehsal-İstehlak Qadın Kooperativinin sədri vəzifəsinə Naxçıvan Muxtar Respublikasının Əməkdar kənd təsərrüfatı işçisi Mehparə Hüseynova seçilib. ◼️ Naxçıvanda ilk dəfə yaradılan qadın kənd təsərrüfatı kooperativinin kənd qadınlarının iqtisadi fəallığının artırılmasına, ailə təsərrüfatlarının gəlirlərinin yüksəldilməsinə və aqrar sahənin inkişafına töhfə verəcək.

🇦🇿🇧🇾 Azərbaycan "INNOPROM.Belarus" sərgisində vahid ölkə stendi ilə təmsil olunacaq ◼️ Azərbaycan Respublikası İqtisadiyyat Nazirliyi 2026-cı ilin 30 sentyabr – 2 oktyabr tarixlərində Belarus Respublikasının Minsk şəhərində keçiriləcək "INNOPROM” beynəlxalq sənaye sərgisində vahid ölkə stendində iştirak üçün ixracatçıların müraciətlərinin qəbulunu elan edir. ◼️ İxracın və İnvestisiyaların Təşviqi Agentliyinin (AZPROMO) məlumatına görə, vahid ölkə stendində iştirak edəcək ixracatçıların maksimum sayı 10 şirkət təşkil edəcək. İştirakçılar müsabiqə əsasında seçiləcək. Seçim meyarları ilə AZPROMO-nun rəsmi internet səhifəsindən tanış olmaq olar.

🏭 İqtisadi Zonaların İnkişafı Agentliyinin idarə etdiyi sənaye parklarında sahibkarlar üçün əlverişli investisiya mühiti və geniş dövlət dəstəyi mexanizmləri yaradılıb.

Biznesə xidmət sahəsində innovativ model kimi KOB evlərinə maraq artır Sahibkarlara xidmətlərin göstərilməsi sahəsində innovativ model olan KOB evlərinin fəaliyyəti ilə tanış olmaq məqsədilə bir sıra ölkələrin nümayəndə heyətləri Bakı şəhərində və regionlarda fəaliyyət göstərən KOB evlərində olublar. Ətraflı - https://smbgovaz.short.gy/rJDHKK