WARTA – беларускае нацыянальнае медыя

🇪🇸🏆 ГІШПАНІЯ — ЧЭМПІЁН СЬВЕТУ-2026 У драматычным фінале Гішпанія перамагла Аргентыну — 1:0 у дадатковы час. Героем матчу стаў Фэран Торэс. На 106-й хвіліне ён атрымаў перадачу ад Ніка Ўільямса і забіў залаты гол, які прынёс сваёй краіне Кубак сьвету. Для Гішпаніі гэта другое чэмпіёнства сьвету ў гісторыі. Упершыню каманда выйграла трафэй у 2010 годзе — і вось праз 16 гадоў зноў вярнулася на футбольную вяршыню.

ЗЯНОН БЕЛЕНЬКІ: РЭАЛЬНА АБ ВАЖНЫМ ДЛЯ БЕЛАРУСАЎ Ворагі нацыі толькі што (ліпень 2026г.) выдалі чарговую прыдуманую падставу для рэпрэсіяў супраць беларусаў. У "экстрэмісты" залічылі беларускіх ваяроў-дабраахвотнікаў падразьдзелу "1514", якія ваююць супраць расейскіх агрэсараў-тэрарыстаў ва Украіне (гэта каб нішчыць і тэрарызаваць ваярскія сем'і і сваякоў у Беларусі). Таксама аб'явілі "экстрэмісцкай" народную праграму "Вольная Беларусь". (Шчыра кажучы, невядома навошта; мяркую, што ў бліжэйшы час аб'явяць "экстрэмісцкай" нават Біблію"). "Будзем выкараняць да канца", кажуць пра беларускую культуру ворагі нацыі. У сувязі з гэтымі чарговымі замахамі рэжыму супраць беларусаў, адзначу некалькі палажэньняў у духу праграмы "Вольная Беларусь". (Што станецца са спраўцамі рэжыму, пакуль пакідаем у дужках. Будзе створаны Народны трыбунал і прызначаны спэцыяльны пракурор па злачынствах генацыду.) Што датычыць нашых дабраахвотнікаў-ваяроў ва Украіне, то ўсе яны, а таксама беларускія партызаны, змагары на чыгунцы, будуць залічаны ў ветэраны вызвольнай вайны ва Украіне, статус якіх будзе адлюстраваны ў заканадаўстве. Згодна заканадаўства, усе дабраахвотнікі (незалежна ад узросту) будуць атрымліваць пажыцьцёва пэнсію ветэранаў-дабраахвотнікаў вызвольнай вайны ва Украіне. Гэтая пэнсія будзе прыраўняна да пэнсіі членаў ураду і дэпутатаў парляманту. Усе ваяры (асабліва параненыя) будуць мець права на пастаянную медыцынскую дапамогу і рэабілітацыю за кошт дзяржавы. Пакалечаныя будуць яшчэ мець выплаты па інваліднасьці. Прозьвішчы ўсіх ваяроў будуць унесеныя ў ганаровую кнігу ваеннай памяці і ў энцыкляпэдычныя матар'ялы. Сямейнікі ваяроў, пацярпелыя ад рэпрэсій за дабраахвотнікаў, атрымаюць вяртаньне адабранай маёмасьці, матэрыяльную кампэнсацыю і медыцынскую рэабілітацыю. Беларусы, якія загінулі ва Украіне на вайне супраць расейскіх агрэсараў будуць унесены ў мэмарыяльны нацыянальны сьпіс загінулых герояў за волю Украіны і Беларусі. Сем'ям загінулых (бацькам, дзецям, сужэнцам) будзе выплачана разавая дзяржаўная кампэнсацыя ў колькасьці ад 200 да 300 тысячаў даляраў (у пералік на рублі). Пастаяннае медыцынскае лячэньне і рэабілітацыю за кошт дзяржавы атрымаюць усе рэпрэсаваныя палітзьняволеныя, якім тое будзе неабходна. Палітзьняволеным і беларусам, выгнаным за межы краіны, будзе гарантавана вяртаньне адабранай маёмасьці і кампэнсацыя за яе зьнішчэньне. Хто гэта усё можа забясьпечыць? Рэальна пасьля ліквідацыі антыбеларускага рэжыму такое можа забясьпечыць урад і парлямант, створаны на ідэях, прынцыпах і напрацоўках "Вольнай Беларусі", альбо тыя беларусы і палітычныя сілы, якія будуць дзейнічаць у рэчышчы гэтых справядлівых палітычных народных інтарэсаў. Сродкі. Сродкі на падтрымку заслужаных і пацярпелых беларусаў, пра што вышэй была размова, рэальна магчымыя на пачатку з бюджэту дзяржавы. Цягам часу ў Беларусь будуць вернутыя мільярды даляраў, адабраных у народа злачыннымі кіраўнікамі антынароднага рэжыму. Вядома, дзе і ў якіх краінах схаваныя гэтыя сродкі. Вядома, як іх можна вярнуць народу. Яны будуць вернутыя і пойдуць на карысьць ўсім беларусам і найперш тым, якія ваявалі, змагаліся і якія пацярпелі ад рэпрэсій злачыннага рэжыму і ад злачыннай прамаскоўскай палітыкі. Зянон Пазьняк палітычны лідар НВР "Вольная Беларусь" 17 ліпень 2026 г.

Сёньня беларускаму палітвязьню, журналісту Ігару Ільяшу спаўняецца 38 гадоў Гэта ўжо другі дзень народзінаў, які Ігар Ільяш сустракае за кратамі. Ігар Ільяш — журналіст, філёзаф паводле адукацыі і суаўтар дакумэнтальнай кнігі «Беларускі Данбас», напісанай разам з жонкай Кацярынай Андрэевай. Яго затрымалі 22 кастрычніка 2024 году, а ў верасьні 2025-га асудзілі на чатыры гады калёніі і штраф — за камэнтары незалежным мэдыя. На сёньня Ігар правёў у няволі год і восем месяцаў. Калі адлічваць увесь чатырохгадовы тэрмін ад дня затрыманьня, за кратамі яму застаецца правесьці яшчэ каля двух гадоў і трох месяцаў. Жонка Ігара, журналістка «Белсату» Кацярына Андрэева, таксама была палітзьняволенай. Яе затрымалі ў лістападзе 2020 году і асудзілі агулам на восем гадоў і тры месяцы зьняволеньня. 19 сакавіка 2026 году, дзякуючы намаганьням ЗША, Кацярыну вызвалілі пасьля больш як пяці гадоў няволі і вывезьлі ў Летуву. Ігар Ільяш па-ранейшаму застаецца за кратамі. Свабоду Ігару Ільяшу і ўсім беларускім палітвязьням.

Расейскі фондавы рынак перажывае самую працяглую сэрыю падзеньня з 1997 году Індэкс Маскоўскай біржы зьніжаецца ўжо 18 тыдняў запар, страціўшы амаль 30% з пачатку красавіка. За апошні месяц акцыі найбуйнейшых расейскіх кампаніяў, у тым ліку «Газпрому», ВТБ і «Аэрафлоту», патаньнелі на 20–50%. Аналітыкі зьвязваюць абвал з масавым выхадам інвэстараў з расейскіх актываў. Раней Bloomberg паведамляў, што расейскія мільярдэры выводзяць за мяжу дзясяткі мільярдаў даляраў праз асьцярогі адносна далейшага пагаршэньня эканамічнай сытуацыі.

Сёньня адбудзецца матч за трэцяе месца Чэмпіянату Сьвета 2026 па футболе, на полі сустрэнуцца Англія і Францыя Бронзавы фінал чэмпіянату сьвету — самы нелюбімы і разам з тым самы відовішчны матч турніру. Дзьве каманды з разьбітымі сэрцамі, вызваленыя ад ціску і асуджаныя на адкрыты, атакавальны футбол. Але ў Францыі і Англіі для матывацыі хапае асабістых рахункаў. Чытаць цалкам: https://warta.media/4909

У Падмаскоўі зьнішчылі адзін з найбуйнейшых складоў Wildberries Маштабны пажар відаць з космасу. Акрамя таго, дроны ўдарылі па нафтабазе ў Нагінску, прыкладна за 50 км ад Масквы. У Тамбоўскай вобласьці, як сьцьвярджаюць расейскія і ўкраінскія крыніцы, расейская СПА выпадкова трапіла па яшчэ адным складзе Wildberries. Паводле расейскіх паведамленьняў, у бок Маскоўскага рэгіёну ляцелі ня менш за 370 дронаў. У сацсетках таксама зьявіліся відэа з маштабнымі пажарамі.

Катастрафічная сітуацыя ў медыцынскіх ВНУ: упершыню назіраецца недабор абітурыентаў Улады зрабілі ўсё, каб медыцынская адукацыя ў Беларусі стала непрывабнай для будучых студэнтаў. Прычына простая: калі вы паступаеце ва ўніверсітэт на бюджэт, вы прымусова павінны адпрацаваць 2 гады. Калі па мэтавым — 5 гадоў. Але калі пасьля заканчэньня ВНУ і інтэрнатуры вы захочаце ці павінны будзеце прайсці ардынатуру за кошт бюджэту (а іншага варыянту цяпер няма), тады прыйдзецца адпрацаваць яшчэ не менш за 5 гадоў. Сумарна выходзіць 7 год абавязковай прымусовай адпрацоўкі, без магчымасьці выбару месца. Як заўважае Эўрарадыё, у БДМУ за некалькі гадзін да заканчэньня прыёму дакументаў на 201 месца па конкурсе на спецыяльнасьці "Лячэбная справа" прэтэндуе 240 чалавек. Здавалася, конкурс ёсьць. Але проста цяпер атрымаць бясплатную адукацыю і стаць доктарам могуць тыя, у каго менш за 300 балаў з 400, што для медуніверсітэта — дрэнны паказчык. Будучымі педыятрамі ці фармацэўтамі патэнцыйна могуць стаць абітурыенты з 260 баламі. У рэгіянальных ВНУ яшчэ горш. Так, у Віцебскім медуніверсітэце дагэтуль няма конкурсу на "Лячэбную справу" ці "Педыятрыю". І лекарамі з гарантаваным працаўладкаваньнем могуць стаць абітурыенты, якія маюць менш за 200 балаў. Падобная катастрофа адбываецца і ў медуніверсітэце ў Гродна.

У 2025-м прахадныя балы на бюджэт (па конкурсу) у медыцынскія ВНУ амаль нідзе не апускалася ніжэй за 350, аналагічная сітуацыя была і на платнае навучаньне.

Беластоцкага актывіста, які цішком вярнуўся ў Беларусь праз «камісію па вяртаньні» і стаў героем прапаганды, усё роўна асудзілі У міліцэйскім «спісе экстрэмістаў» з’явілася імя актывіста Анатоля Вайцяхоўскага, які ў пачатку года вярнуўся ў Беларусь з палітычнай эміграцыі. Перад гэтым ён разам са сваім суседам Уладзімірам Усерам зняўся ў прапагандысцкім фільме БТ. А пасля смерці Усера Вайцяхоўскі напісаў у «камісію па вяртаньні». Проста на мяжы ён даў яшчэ адно інтэрв’ю БТ, піша НН. Як аказалася, Вайцяхоўскага ўсё ж асудзілі — адразу па чатырох палітычных артыкулах: ч. 3 арт. 361 КК (заклікі да санкцый), ч. 2 арт. 367 КК (паклёп на Лукашэнку), ч. 2 арт. 368 КК (абраза Лукашэнкі), ч. 1 арт. 361‑4 КК (садзейнічаньне экстрэмісцкай дзейнасьці). Мінімум, які ён мог атрымаць па гэтых артыкулах — чатыры гады калоніі. Аднак Вайцяхоўскаму, верагодна, далі «хатнюю хімію». Тым не менш ён застаецца «экстрэмістам» з усімі абмежаваньнямі, якія вынікаюць з гэтага статусу.

Кітай абваліў акцыі «Газпрому» да гістарычнага мінімуму Акцыі расейскага «Газпрому» ўпалі да найніжэйшага ўзроўню за ўсю гісторыю таргоў на Маскоўскай біржы, заўважае liganet. Рынкавая капіталізацыя кампаніі скарацілася да $25,6 млрд, а з пачатку 2026 году яна страціла каля $12,5 млрд (1 трлн рублёў). Галоўнай прычынай падзеньня аналітыкі называюць тупік у перамовах па газаправодзе «Сіла Сыбіры – 2». Паводле The Wall Street Journal, Кітай фактычна спыніў перамовы, патрабуючы зьнізіць цану расейскага газу прыкладна да $50 за тысячу кубамэтраў — да ўзроўню ўнутраных расейскіх цэнаў. Пасьля поўнамаштабнага ўварваньня ва Ўкраіну «Газпром» страціў большую частку эўрапейскага рынку, а яго экспарт скараціўся амаль на дзьве траціны. Сёньня асноўнымі пакупнікамі расейскага трубаправоднага газу застаюцца Кітай і Турэччына. Былы віцэ-прэзыдэнт «Газпромбанку» Ігар Валабуеў лічыць, што гэта сьведчыць пра стратэгічную страту Расеяй статусу «газавай звышдзяржавы». Паводле яго, краіна ператвараецца з аднаго з ключавых гульцоў сусьветнага газавага рынку ў ізаляванага пастаўшчыка сыравіны з абмежаванымі магчымасьцямі экспарту, што будзе мець доўгатэрміновыя нэгатыўныя наступствы для расейскай эканомікі. Паводле афіцыйных дадзеных, нафтагазавыя даходы фэдэральнага бюджэту Расеі ў студзені–траўні 2026 году былі прыкладна на 30% ніжэйшыя, чым за аналягічны пэрыяд мінулага году. Менавіта іх скарачэньне цяпер лічыцца галоўным фактарам пагаршэньня стану расейскай эканомікі.

Вадзім Гігін пракаментаваў зьнішчэньне беларускай культуры ў Беларусі: "Будзем выкараняць да канца" Нядаўнюю хвалю закрыцьця этна-крамаў Ragna, HONAR, LSTR Adzieńnie, адмену легендарнага фэсту «Наш Грунвальд» пракаментаваў у эфіры ў прапагандыста Рыгора Азаронка дэпутат і кіраўнік Нацыянальнай бібліятэкі Вадзім Гігін, піша Зеркало.

«Гэтыя спробы сказаць: „Ну калі ж ужо ўлада супакоіцца... Ці будзе адліга?“ Будзе вам па галаве адліга. Будзем выкараняць да канца. <...> Калі вы думаеце, што мы нюх страцілі, калі вы думаеце, што не бачым тое, што вы спрабуеце тут укараніць, то ўсё мы бачым», — заявіў Гігін і прыгадаў, як сілавікі раней «выпалілі» кнігарню «Кнігаўка».

Азаронак у сваю чаргу дадаў, што асабіста маніторыць інтэрнэт у пошуках «крамолы»: глядзіць, дзе што прадаюць і «дзе якія паэткі збіраюцца выступаць». Нагадаем, што фэст «Наш Грунвальд» сёлета быў адменены арганізатарамі. Адначасова з гэтым пад ціскам сілавікоў спынілі працу знакавыя крамы з беларускім мерчам і сімволікай.

Гэтыя людзі нясуць адказнасьць за сьмерць Алеся Пушкіна: Данос на Алеся Пушкіна напісала Вольга Бондарава. Прысуд вынесла "суддзя" Алена Шылько. Пракурорам па справе быў Аляксандр Кароль. 11 лістапада 2022 года "суддзя" Івацэвіцкага раёна Аляксандр Кірылавіч пастанавіў перавесьці Алеся Пушкіна на турэмны рэжым тэрмінам на паўтара года. І былі іншыя — канваіры, супрацоўнікі і адміністрацыя турмы, усе, хто прыніжаў,  абражаў, зьбіваў і зьдзекаваўся з Алеся Пушкіна. Алесь Пушкін — мастак, палітвязень, герой Беларусі. Героі не паміраюць — яны сыходзяць у неўміручасьць. Памяць пра Алеся Пушкіна назаўсёды застанецца ў нашых сэрцах.

https://warta.media/4869 Сёньня ў паўфінале чэмпіянату сьвету па футболе на полі ў Даласе сустрэнуцца Гішпанія і Францыя. Больш аналітыкі матчаў ЧС-2026 чытайце ў разьдзеле «Спорт» Warta Media.

⚡️У Беларусі прызналі «экстрэмісцкімі» песню на верш Ларысы Геніюш, Народную Праграму "Вольная Беларусь" і шэраг беларускіх кніг Суд Заводскага раёну Мінска прызнаў «экстрэмісцкімі» шэраг друкаваных выданьняў. Сярод іх — Народная Праграма "Вольная Беларусь" — гэта "праект новай Беларусі", аўтарства калектыву беларускіх палітыкаў і спецыялістаў, сярод якіх Зянон Пазьняк. Таксама ў сьпіс патрапілі творы: • «Сьвятлана Алексіевіч. 100 цытатаў на Свабодзе» • «Белым белы прастор замарожаны. Зборнік песняў на вершы Ларысы Геніюш i Пётры Русава» • «Менская вясна. - Наша Ніва, 1996» • «Не сьмяшыце мае прыназоўнікі» (Вінцук Вячорка) • «Неокоммунизм в Беларуси: идеология, практика, перспективы» (Станіслаў Шушкевіч) • «Беларуская палітычная сістэма i прэзідэнцкія выбары 2001 году. - Менск. Аналітычная група. Варшава. Цэнтар дэмакратыі ўва Усходняй Эўропе» • «Лёс ліцэя. Аўтабіяграфічныя запісы» (Уладзімір Колас) • «Праграма канстытуцыйных пераўтварэньняў» (Міхаіл Пастухоў). Адметна, што ва ўсіх назвах кніг замест «ў» супрацоўнікі суду пішуць «у». Прачытаць Народную Праграму можна па спасылцы

Беларускі брэнд LSTR паведаміў пра закрыцьцё Гэта ўжо трэці за апошні тыдзень нацыянальна арыентаваны праект, які спыняе працу. Раней пра закрыцьцё паведамілі брэнд Honar і этна-крама "Рагна".

Павел Усаў пра маніфэст расейскага алігарха Мельнічэнкі: "З Пуціным, ці без яго, Расея застанецца імперыяй" Крэмль выбірае мазаічную сістэму ўплываў на палітычную думку Захаду. 1. Рэгулярна пужае Захад ядзернымі ударамі; 2. Рэгулярна пужае экспансіяй Кітаю; 3. Зараз музыка зьмянілася і Масква пачынае пужаць Захад хаосам і непрадказальнасьцю ў выпадку, калі Расея прайграе вайну і цалкам распадзецца. Паказальным з’яўляецца артыкул буйнога расейскага алігарха, з маемасьцю ў 20 млрд., (нарадзіўся ў Гомлі), Андрэя Мельнічэнкі The Economist. Чамусьці некаторыя бачаць у йм праявы блізкага перавароту ў Маскве, бунту алігархаў супраць Пуціна. Нічога такога я не знайшоў, але відавочны новы этап інфармацыйнага і фінансавага ўздзеяньня на сусветных палітыкаў каб наблізіць мірны працэс на ўмовах Масквы. З аднаго боку Мельнічэнка мягка абвінавачвае Захад у пачатку вайны, якая сталася вынікам спробаў адабраць у Расеі суверэнітэт і пераўтварыць яе ў перэферыную дзяржаву. (Відаць для Расеі вайна заўседы была механізмам выхаду з перэферыйнага стану П.У. Вайна супраць Украіны, такім чынам стала правам Расеі на самазахаваньне. Вельмі цікавая і абсалютна хворая логіка). Таму, працягвае, Мельнічэнка, каб спыніць вайну, Захад павінен гарантаваць Расеі статус вялікай дзяржавы, якая будзе акрэсьліваць форму рэгіянальнага парадку і свае жыцьцевыя інтарэсы (верагодна коштам суседніх краінаў, такіх як Украіна і Беларусь). І Захад павінен з гэтым пагадзіцца. Калі гэтага не адбудзецца і ў выніку вайны Расея аслабне, то яе чака хаос і фрагментацыя, якая стане крыніцай яшчэ большых праблем для Захаду, перш за ўсе з прычыны ўзмацненьня Кітаю. Такім чынам, Захад стаіць перад простым выбарым, альбо прыняць Расею як прагназавальную імперыю, падзяліць сьферы ўплываў і далей суіснаваць, альбо атрымаць некантралюемы хаос і моцны Кітай. Іншымі словамі, мы вяртаемся да канцэпцыі ліберальнага імперыялізму з новым абліччам, які прасоўвалі на пачатку 2000 гадоў расейскія лібералы і на якой вырас рэжым Пуціна. Артыкул Мельнічэнкі гэта маніфест расейскага алігархічнага імперыялізму, незалежна ад таго, хто знаходзіцца пры ўладзе. Ён наўпрост кажа, што з Пуціным, ці без яго, Расея застанецца імперыяй. Мельнічэнка прыклад новага (старога) імперыяльнага мысьленьня, бо толькі імперыя дае йм рэсурсы і права на жыцьце і ўзбагачэньне. Хаця з такім скарбам, як у Мельнічэнкі, можна было б стварыць на абломках імперыі сваю ўласную дзяржаву. Крыніца

Чарговы ўдар па беларускай культуры: зачыняецца менская этнакрама "Рагна" на вуліцы Сухой Крама прапрацавала 13 гадоў на вуліцы Сухой у сталіцы. Прычыны такога рашэньня не называюцца. Інтэрнэт-крама пакуль працягвае працаваць.

У памяць пра Алеся Пушкіна (1965 – 2023) 11 ліпеня – гадавіна сьмерці беларускага мастака і палітвязьня Алеся Пушкіна. Алесь Пушкін быў асуджаны лукашыстамі на пяць гадоў пазбаўленьня волі ў калёніі строгага рэжыму і даведзены да сьмерці рэгулярнымі катаваньнямі і зьдзекамі. Сьветлая памяць беларусу Алесю Пушкіну. https://youtu.be/Zjktgczp7XM

Ліст Алеся Пушкіна да Валянціна Стэфановіча з-за кратаў Падчас утрыманьня ў былым менскім СІЗА №1 на Валадарцы праваабаронца «Вясны» Валянцін Стэфановіч атрымаў турэмную «маляву» ад выбітнага мастака і палітвязьня Алеся Пушкіна, які быў даведзены да сьмерці ў гродзенскай турме № 1 у 2023 годзе. Гэты невялікі ліст, напісаны мастаком у карцары напярэдадні выраку, стаў не толькі сьведчаньнем салідарнасьці за кратамі, але і дакумэнтам таго часу. Крыніца: ПЦ "Вясна".

Спыняе працу крама сучаснага беларускага адзеньня «Honar» Пра гэта стала вядома ў сацсетках брэнду.

У Беларусі адмянілі найстарэйшы фестываль гістарычнай рэканструкцыі «Наш Грунвальд» Мерапрыемства, якое мелася адбыцца ў канцы ліпеня ў музейным комплексе «Дудуткі», не адбудзецца, піша Вясна. «Наш Грунвальд» — найстарэйшы і найбуйнейшы фестываль гістарычнай рэканструкцыі ў Беларусі, які праводзіцца з 2008 года. Ён прысвечаны Грунвальдскай бітве 15 ліпеня 1410 года, у якой аб'яднаныя войскі Польшчы і Вялікага княства Літоўскага атрымалі перамогу над Тэўтонскім ордэнам. Штогод у яго рамках праходзілі маштабныя рэканструкцыі сярэдневяковых бітваў, рыцарскія турніры і гістарычныя майстар-класы. Нагадаем, раней у Беларусі адмянілі адразу некалькі фестываляў, якія мусілі адбыцца ў 2026 годзе.