FM መረጃ

የእንቁጣጣሽ ወረቀት ይዞ ሆቴል ገብቶ ባለ 240 ሺህ ብር አይፎን የሰረቀው ታዳጊ እጅ ከፈንጂ ተያዘ ! በታዲያስ አዲስ ፕሮግራም ላይ ከአዲስ አበባ ፖሊስ የህዝብ ግንኙነት ባልደረባ ከኮማንደር ቶማስ ጋር የተደረገው ቆይታ በእውነትም ብዙ የሚያስደምሙ፣ የሚያስቁ እንዲሁም ትልቅ ማህበራዊ መልእክት ያዘሉ ክስተቶችን ይፋ አድርጓል። የመጀመሪያውና በርካቶችን እያነጋገረ ያለው ክስተት የተፈጸመው በአራዳ ክፍለ ከተማ ወረዳ 4 በሚገኝ አንድ ዓለም አቀፍ ሆቴል ውስጥ ነው። አንዲት ትውልደ ኢትዮጵያዊት እንግዳ ባረፈችበት ሆቴል ክፍል በር ይንኳኳል። አንኳኪው ደግሞ የባህል ልብስ ለብሶ "የአበባዮሽ/እንቁጣጣሽ" ወረቀት የያዘ ታዳጊ ልጅ ነው። ባህሉን የምታውቀው እንግዳም በደስታ ወረቀቱን ተቀብላ ለልጁ ስጦታ የሚሆን ገንዘብ ልታመጣ ወደ ውስጠኛው ክፍል ታመራለች። ይሁን እንጂ ልጁ የዋጋ ግምቱ ከ240 ሺህ ብር በላይ የሚያወጣውን አይፎን ፕሮ ማክስ ስልክ ጠረጴዛው ላይ ተመልክቶ በቅጽበት ይዞ ይሰወራል። ይባስ ብሎም ይሄን ውድ ስልክ መገናኛ አካባቢ በ6 ሺህ ብር ብቻ ሊሸጠው ሲደራደር በቁጥጥር ስር ውሎ ስልኩ ለባለቤቱ ተመልሷል። ሁለተኛው አስገራሚ ክስተት ደግሞ በአቃቂ ቃሊቲ ክፍለ ከተማ የተፈጸመው ነው። አንድ ሌባ 8 በጎች እና 13 ፍየሎችን (በድምሩ 21 እንስሳትን) ሰርቆ ጭኖ ሳይሆን በእግሩ እየነዳ ሲሄድ እጅ ከፍንጅ ተይዟል! የሚገርመው ነገር ልክ የራሱ ከብቶች ይመስል ምንም አይነት ፍርሃትና ጥርጣሬ በማይፈጥር መልኩ በሙሉ Confidence ሆኖ መንገደኛውን ሁሉ "እረኛ" መስሎ እያታለለ ሲነዳቸው ነበር። ነገር ግን በፖሊስ እና በህብረተሰቡ ንቃት ወንጀሉ ሳይሳካ እጁን ሊሰጥ ችሏል። ከእነዚህ አጋጣሚዎች እና በዋዜማው ከተከሰተ አንድ የሰው ህይወት ያለፈበት የትራፊክ አደጋ ውጪ፣ አጠቃላይ የበዓሉ ድባብ ካለፉት ዓመታት ይልቅ እጅግ ሰላማዊ ሆኖ ማለፉ ተገልጿል። በአጠቃላይ ግን ከዚህ የበዓል ሰሞን ወሬ የምንማረው ትልቁ ቁምነገር፣ የልጆች አስተዳደግ የትምህርት ቤት ወይም የህግ አካላት ብቻ ሳይሆን የሁላችንም የወላጆች እና የማህበረሰብ የጋራ ኃላፊነት መሆኑን ነው። ልጆቻችንን በስነ-ምግባር ካላነጽናቸው ነገ ለማህበረሰቡም ራስ ምታት መሆናቸው አይቀርም።  እናንተስ በታዳጊው ድርጊት እና በወላጆች የክትትል ኃላፊነት ዙሪያ ምን ትላላችሁ? ሀሳብ አስተያየታችሁን አካፍሉን እስኪ ?