FM መረጃ

የአክሱም ዩኒቨርሲቲ የጦር ጉዳተኞችን ከግቢው በማስወጣት ተማሪዎችን ለመቀበል ዝግጁ መሆኑን አስታወቀ የአክሱም ዩኒቨርሲቲ ከትምህርት ሚኒስቴር በተሰጠው አቅጣጫ መሠረት በዲዲአር (ትጥቅ ማስፈታት፣ መበተንና መልሶ ማቋቋም) ሂደት ከትጥቅ እንቅስቃሴ የተሰናበቱ የጦር ጉዳተኞችን ከዋናው ግቢ የማስወጣት ሥራ እያከናወነ እንደሚገኝና ሂደቱ ተማሪዎች ከመድረሳቸው በፊት ሙሉ በሙሉ እንደሚጠናቀቅ ለትምህርት ሚኒስቴር በጻፈው ደብዳቤ አመለከተ። ዩኒቨርሲቲው የመማር ማስተማር፣ የምርምርና የማህበረሰብ አገልግሎት ሥራውን ሰላማዊና ደህንነቱ በተጠበቀ ሁኔታ ማከናወን እንዲችል የዩኒቨርሲቲው ዋና ግቢ ከማንኛውም የጦር ጉዳተኞች ነፃ እንዲሆን ሚኒስቴሩ ቀደም ሲል አቅጣጫ መስጠቱ ይታወቃል። ይህንን ተከትሎ ዩኒቨርሲቲው ከአካባቢው፣ ከዞንና ከከተማ አመራሮች ጋር በመተባበር ጉዳዩን የሚያስፈጽም ኮሚቴ አቋቁሞ እየሰራ መሆኑን ጠቅሶ፣ ወደ ግቢው ገብተው የነበሩ የጦር ጉዳተኞችም ጥያቄውን በመቀበል ለመውጣት ፈቃደኛ መሆናቸው ተገልጿል። በተጨማሪም ከዋናው ግቢ ውጭ ያሉ ሌሎች ሦስት የዩኒቨርሲቲው ግቢዎች ከዚህ ጉዳይ ጋር የተያያዘ ምንም ዓይነት ችግር የሌለባቸው መሆኑ ተጠቅሷል።