𝖉𝖗. 𝖉𝖊𝖇𝖔𝖑

" ያልተከፈለው የትርፍ ሰዓት ክፍያ መፈጸም አለበት " - የአማራ ህክምና ማህበር የተሻሻለው የጤና ባለሙያዎችን የትርፍ ሰዓት ስራ ክፍያ የሚፈቅድ መመሪያ መጽደቁንና ከሐምሌ 2018 ዓ/ም ጀምሮ ተግባራዊ እንደሚደረግ የአማራ ክልል ጤና ቢሮ አስታወቀ። የአማራ ክልል ጤና ቢሮ በመንግስት ተቋማት ለሚሰሩ ጤና ባለሙያዎች በተሻሻለው የትርፍ ሰዓት ክፍያ መሰረት ከሐምሌ 1 ቀን 2018 ዓ/ም ጀምሮ ተግባራዊ እንዲሆንና ከመስከረም 1 ቀን 2019 ዓ/ም ጀምሮ በስታንዳርዱ የተሰራው ስምሪት ተግባራዊ እንዲደረግ በተዋረድ ላሉ ተቋማት ባሰራጨው ሰነድ አስታውቋል። የክልሉ መስተዳድር ምክር ቤት ሐምሌ 18/2018 ዓ/ም ባካሄደው 7ኛ ዙር 1ኛ ዓመት የሥራ ዘመን 1ኛ መደበኛ ስብሰባ በክልሉ የመንግስት ጤና ተቋማት የሚሰሩ የጤናው ዘርፍ ሠራተኞች የተሻሻለ የትርፍ ሰዓት ክፍያ የሚፈቀድበት ሁኔታና ክፍያ ለመወሰን የወጣ ረቂት መመሪያ ላይ ተወያይቶ ውሳኔ ላይ ደርሷል። መመሪያው መሻሻል እንዳለበት ተስማምቶ መመሪያውን ማጽደቁን የተሰራጨው ሰነድ ይገልጿል። መመሪያውም ከሐምሌ 1/2018 ዓ/ም ጀምሮ የጸና ይሆናል። መመሪያው በክልል መስተዳድር ም/ቤቱ ከጸደቀበት ከሐምሌ 2018 ዓ/ም ጀምሮ ተግባራዊ እንዲደረግና ውዝፍ ክፍያን እንደማያስተናግድ መወሰኑን የክልሉ ርዕሰ መስተዳድር አቶ አረጋ ከበደ ፊርማ ያረፈበት ደብዳቤ ያሳያል። የጤና ዘርፍ ስራ ከህይወት ጋር የተያያዘና አገልግሎቱ በሥራ፣ በሳምንቱ መጨረሻ የእረፍት፣ በህዝብ በዓላት በሆኑ ቀናት ጭምር ለ24 ሰዓታት የሚሰጥ በመሆኑ ከመንግስት የስራ ሰዓት ውጭ ተመድበው ለሚሰሩ ጤና ባለሙያዎች "ወጥ የሆነ የትርፍ ሰዓት ክፍያ መክፈል አስፈላጊ ሆኖ" መገኘቱ በሰነዱ ተገልጿል። በመመሪያው መሰረት የትርፍ ሰዓት ሥራ ክፍያ መጠንና አሰላል ምን ይመስላል ? በትርፍ ሰዓት ስራ ተመድቦ የሚሰራ የጤናው ዘርፍ የመንግስት ሠራተኛ በወር የሚያገኘው መደበኛ ደመወዝ ለ30 ቀናት ሲካፈል በአንድ ቀን የሚያገኘው ደመወዝ፣ እንዲሁም በቀን የሚያገኘው ደመወዝ ደግሞ ለ8 ሰዓት ሲካፈል በአንድ ሰዓት የሚከፈለውን ደመወዝ ይሰጣል ይላል መመሪያው። በዚህም የትርፍ ሰዓት ሥራ አበሉ የሚሰላው፦ - በስራ ቀናት ከምሽቱ 12 እስከ 4 ሰዓት ለሚሰራው የትርፍ ሰዓት ሥራ ለመደበኛው ሥራ በሰዓት የሚከፈለው ደመወዝ በ1.25 ተባዝቶ፣ - በሥራ ቀናት ከምሽቱ 4 እስከ ንጋቱ 12 ሰዓት የሚሰራ የትርፍ ሰዓት ሥራ በሰዓት የሚከፈለው ደመወዝ በ1.5 ተባዝቶ፣ - በቅዳሜ እና እሁድ ለሚሰራው የትርፍ ሰዓት ሥራ በሰዓት የሚከፈለው ደመወዝ በ2 ተባዝቶ፣ -በህዝብ የበዓል ቀናት ለሚሰራው የትርፍ ሰዓት ሥራ በሰዓት የሚከፈለው ደመወዝ በ2.5 ተባዝቶ፣ -ከንጋቱ 11፡30 እስከ ምሽቱ 12 ሰዓት እና ከንጋቱ 12 ሰዓት እስከ ጠዋቱ 2፡30 የሚሰራው የትርፍ ሰዓት ሥራ በሰዓት የሚከፈለው ደመወዝ በ1 ተባዝቶ ይከፈላል። የህዝብ በዓላት ቀን እሁድና ቅዳሜ በሚሆንበት ጊዜ የሚከፈለው በህዝብ በዓል ቀን አሰላል መሰረት መሆኑን፣ ከመደበኛው ደመወዝ የሚገኝ የትርፍ ሰዓት ስራ ክፍያ ለኑሮ አስቸጋሪ በመሆኑ ለበረሃ ወይም የውርጭ አካባቢዎች የተፈቀደ አበል ተግባራዊ እንደሚደረግ በመመሪያው ሰፍሯል። በተያያዘ፣ ማንኛውም በትርፍ ሰዓት ሥራ ተመዳቢ ባለሙያ ያከናወነውን የሥራ ውጤት በእለቱ ለአገልግሎት ጥራት ቁጥጥር ክፍል ሪፖርት ማድረግ እንደሚጠበቅበት የሚገልጸው መመሪያው፣ "ይህ ባልሆነበት ሁኔታ በትርፍ ሰዓት ሥራ ተመድቦ ቢሰራ እንኳ ክፍያ መፈጸም አይቻልም" ይላል። በመመሪያው የተሻሩ ሕጎች ምንድን ናቸው? በጤና ተቋማት ለሚያገለግሉ የጤና ተቋማት የተረኝነትና ሌሎች ጥቅማጥቅሞች መወሰኛ ክልል መስተዳድር ምክር ቤት መመሪያ 20/2017 ዓ/ም በዚህ መመሪያ መሻሩ ተጠቅሷል። በተጨማሪ፣ ከዚህ በፊት የተላለፉ የትርፍ ሰዓት ሥራ አከፋፈል መወሰኛ ሰርኩላር ደብዳቤዎች በዚህ መመሪያ ተሽረዋል። እነዚህ ሁለት የሽረት ድንጋጌዎች ቢኖሩም በዚህ መመሪያ መሰረት የተሸፈኑ ጉዳዮችን የሚመለከት ከትርፍ ሰዓት ሥራ ውጭ ተፈቅደው የነበሩ ሌሎች ጥቅማጥቅሞች ባሉበት እንደሚቀጥሉ ተገጿል። በሌላ በኩል ፦ መመሪያ ውዝፍ ክፍያ እንደማያስተናግድ መወሰኑን ከዚሁ መመሪያ ጋር የተያያዘው ደብዳቤ የሚያሳይ ሲሆን የአማራ ህክምና ማህበር ደግሞ፣ ከዚህ ቀደም በተሻሻለው የትርፍ ሰዓት ሥራ ክፍያ መሰረትም ሆነ የነባሩን ክፍያ ከየካቲት 2018 ዓ/ም ጀምሮ ሙሉ በሙሉ ያልፈከፈሉ ተቋማት እንዳሉ ገልጾ፣ የአሁኑ መመሪያ አያስተናግደውም የተባለው "ውዝፍ ክፍያ" ይህንኑ ከሆነ ተቀባይነት እንደሌለው ገልጿል። የማህበሩ ፕሬዚዳንት ዶክተር ታደሰ ፈንታ ለቲክቫህ ኢትዮጵያ በሰጡት ቃል፣ "ውዝፍ" የሚለው በመመሪያው የተጠቀሰው ቃል ማብራሪያ እንደሚፈልግል ገልጸው፣ ከሐምሌ 2018 ዓ/ም በፊት ያልተከፈለው የባለሙያዎች ውዝፍ "በዚህ መመሪያ መሰረት አይደለም መከፈል ያለበት የሚል መሆን መቻል አለበት" ብለዋል። "የትርፍ ሰዓት ሥራ ክፍያ ማባዣው (1.25፣ 1.5፣ 2፣ 2.5፣ 1) የሚለው የሚመለከተው ከሐምሌ ጀምሮ ያለውን ክፍያ እንጅ ከዚህ በፊት ያልተከፈለውን አይደለም የሚል መሆን አለበት። እንደማህበር እንደዚያ ይሆናል ብለን ነው የምናስበው" ሲሉም ተናግረዋል። ስለዚህ ከሐምሌ 2018 ዓ/ም በፊት ያልተከፈለው ውዝፍ የትርፍ ሰዓት ክፍያ አሁን በተሻሻለው መመሪያ መሰረት መስተናገድ አይችልም እንጅ "አይከፈልም" የሚል መሆን እንደሌለበት ገልጸው፣ ያልተከፈለው የትርፍ ሰዓት ክፍያ መፈጸም እንዳለበት አሳስበዋል። (ሙሉ መመሪያው ከላይ ተያይዟል) ቲክቫህ ኢትዮጵያ አዲስ አበባ #TikvahEthiopiaFamilyAA @tikvahethiopia