|شعر اوجاغی|

▫️نه سنی سئوه‌جم، نه باشقاسینی. آیریلیب گئده‌جم سندن خبرسیز، نه سنی سئوه‌جم، نه باشقاسینی. من داوام ائده‌جم یولوما سنسیز، نه سنی سئوه‌جم، نه باشقاسینی. گؤمه‌جم قلبیمه سئوگینی درین، چوخ اولدو قلبیمه دردین، هم سرین. بیر قرام قالماییب آرتیق دیَرین، نه سنی سئوه‌جم، نه باشقاسینی. سوْیاجام الیم‌له قلبین یاراسین، اؤزونه سئوینجلی گونلر آراسین! آلیب آپاریبسان عشقین پاراسین، نه سنی سئوه‌جم، نه باشقاسینی. گئجه‌نی سئچه‌جم همدم اؤزومه، بیر گولوش ساچاجام هردن اۆزومه، معطّل قالارسان منده دؤزومه، نه سنی سئوه‌جم، نه باشقاسینی. آرتیق یولونا دا چیخمایاجاغام، یالانچی گؤزونه باخمایاجاغام، سئوگیمی یئرلره آتمایاجاغام، نه سنی سئوه‌جم، نه باشقاسینی. #پروین_عظیم‌اووا #شعر_اوجاغی @SheirOcagi

▫️هئی باسدیریریق، باسدیریریق، باسدیریریق کئچمیش گونلرین آرخاسیندان گئدن اومیدلری. هئی بورج آلیریق، بورج آلیریق، بورج آلیریق صاباحیمیزدان اومید. 📚 فتح‌نامه‌ی کلات #بهرام_بیضایی #شعر_اوجاغی @SheirOcagi

دیالوق ▫️- «پول یاخشی بیر شئی دئییل» دئین‌لرین، الی پولا چاتماییب حتماً. 📺 ساختمان پزشکان ۱۳۹۰ #سروش_صحت #شعر_اوجاغی @SheirOcagi

▫️یاتمیش دَییرمان آ یاتمیش دَییرمان، یاسلی دییرمان، غمین اوره‌ییمده قایناییب-داشیر! دهنه‌نین دیبینده یارالی یارغان، آرخینین قبرینده یۇخولو داشلار. دئ کیم دایاندیریب دلی چاخچاخی؟! نوْو¹ونون گور نبضی نییه دوْنوبدو؟ اؤلوب گئدنین ده سؤزو وار آخی، نییه موقدّس‌لر اۇنودولوبدو؟! سن آی گومان یئریم، دردیم دیلمانجی! زامان اوْد قامچینی هامییا چیرپدی. شاهاد²ی پایلایان او دَییرمانچی- او آللاه آدامی هاردا قالیبدی؟ #آغا_لاچینلی ¹- آرخ - سو یولو ²- دییرماندا اۆیودولن تاخیل اوچون آلینان حاقّ- دییرمان حاقّی #شعر_اوجاغی @SheirOcagi

▫️او جان آلان نه بیلیر عاشقین پناهی نه‌دیر، اونا بو حوسنو وئرن قدرتِ الٰهی نه‌دیر؟! صفاسین اؤزگه گؤرور، من بلالاری چکیرم، منیم بو قانه دؤنن کؤنلومون گوناهی نه‌دیر؟! داغیتدی زولفون اۆزه دلبریم، کئچنده دئدیم: «بونون یانیندا بهشتین گل و گیاهی نه‌دیر؟!» بو قاره‌گؤزلولرین اولمایینجا مجنونو، جهاندا کیم بیله‌جک، عشق بارگاهی نه‌دیر؟! گئجه-گوندوز ائدیرم آه و ناله کویوندا، سوروشماییر بو قدر بیر فقیرین آهی نه‌دیر. گول‌اوزلو، نازلی گؤزَللرمیش، ایندی من بیلیرم- محبّت اهلینین عالمده قبله‌گاهی نه‌دیر. تار'یندا «واحد» اگر «قوربان»ین ملاحتی وار، دایان بیر ایندی گؤرک زولفونون سئگاهی نه‌دیر! #علی‌آغا_واحد #شعر_اوجاغی @SheirOcagi

▫️دونیادا هئچ بیر شئی یوخسللوق قایغیسی قدر اۆزوجو دئییل. پولو آشاغیلایان اینسانلاردان چوخ آجیغیم گلیر. بونلار یا ایکی‌اۆزلودورلر یا دا آخماق. پول آلتینجی دویغو کیمی‌دیر، اولماسا اوبیری بئش دویغونون هئچ فایداسی یوخدور. بونو دا ائشیدیبسن، دئییرلر: «یوخسوللوق صنعتچی‌لری حرکته گتیرن ان یاخشی سبب‌دیر.» بونو دئین‌لر یوخسوللوغون نئشترینی جانلاریندا اصلا حیسّ ائتمه‌ییبلر. بونلار یوخسوللوغون، اینسانین باشینا نه‌لر گتیردیگینی بیلمیرلر. یوخسوللوق اینسانی سونسوز بیر آلچاقلیغین ایچینه آتیر، قانادینی یئریندن قوپاریر و روحونو سرطان کیمی یئییر. 📚 اینسانین اسارتی #سامرست_موام #شعر_اوجاغی @SheirOcagi

▫️منی سنسیز بوراخما! اللرینی گؤزوم اوسته قوْی، آنا، اوره‌ییمی اوره‌یین‌له اوْی، آنا، کدریمی سئوینجین‌له سوْی، آنا، منی سنسیز، سنی منسیز بوراخما! باخ آلا گؤزومه، جنّتی گؤروم، تئلینی اوخشاییب ساچینی هؤروم، تیتره‌ین قلبیمی سئوگین‌له بۆرۆم، منی سنسیز، سنی منسیز بوراخما! دیز چؤکوم قارشیندا، اَییم باشیمی، آغلاییب گؤزومدن تؤکوم یاشیمی، باغیریب سس سالیب چاتیم قاشیمی، منی سنسیز، سنی منسیز بوراخما! سن اولدون دردیمین یئتن هارایی، نئیلیرم دونیادا پولو، سارایی! سن منیم کؤنلومون گونشی، آیی، منی سنسیز، سنی منسیز بوراخما! سنین‌له حیاتا گولورم، آنا، اؤزومو بختوَر بیلیرم، آنا، اولماسان یانیمدا، اؤله‌رم، آنا، منی سنسیز، سنی منسیز بوراخما! آغاران ساچینین دنینه قوربان، منه لای‌لای دئین دیلینه قوربان، یاناغی قیریشان اۆزونه قوربان، منی سنسیز، سنی منسیز بوراخما! قوجالما! عصادا اسمه‌سین الین، سؤز توتسون کلمه‌لر سؤیله‌ین دیلین، بوکمه‌سین یارادان -هئچ زامان- بئلین، منی سنسیز، سنی منسیز بوراخما! نه قدر بؤیوسم، مؤحتاجام سنه، احتیاج دۇیورام تک نفسینه. آی آللاه، حئیرانام بیرجه سسینه، منی اونسوز، اونو منسیز بوراخما! #پروین_عظیم‌اووا #شعر_اوجاغی @SheirOcagi

▫️دلبر، سنین اول گلشن و گلزارینا قوربان، اون دؤرد گئجه‌لیک آی تکی رخسارینا قوربان، اَیری قاشینا، طرّه‌ی طرّارینا قوربان، سۆزگون گؤزونه، نرگسِ خمّارینا قوربان! ای سئوگیلی یاریم، ای طُرفه نگاریم، سنسن گل‌عذاریم، یوخ صبر و قراریم، خلّاقینا، پیغمبرینه، تانرینا قوربان! #حاجی‌بابا_حسین‌اوو #شعر_اوجاغی @SheirOcagi

▫️غملریمی سودا بوغماق ایسته‌ییرم، آما شرفسیزلر اۆزمه‌یی اؤیره‌نیبلر. #حسین_پناهی #شعر_اوجاغی @SheirOcagi

▫️آنا اللرین‌له سیغال چک ساچلاریما، گؤزلرین‌له باخ اۆزومه، آی آنا! کدریندن خوشبختلیگی پای ائیله، بیر نغمه قوش هر سؤزومه، آی آنا! سوسسون دیلیم، قلبیم داشیب-چاغلاسین، غم-غوصّه‌نین آغزین اؤرتوب-باغلاسین! سن آغلاما، قوجا داغلار آغلاسین، هارایینا تانری یئتسین، آی آنا! گؤیلر قدر سنه عاشیق اولموشام، سنینله من نئچه یاشا دولموشام. اۆزولنده، چیچک کیمی سولموشام، شام تکی سن کؤزَرمیسن، آی آنا! دَییشمه‌رم گول-چیچه‌یه عطرینی، بزه‌یه‌رم هر شعیرده سطرینی. عؤمور بویو آنلامادیم دردینی، دردلرینه ملهم اوللام، آی آنا! من دونیانین وار-دؤولتین نئیله‌رم؟ یانیمدا قال، بختوَرم بیله‌رم. حیاتیمدان کدر-غمی سیله‌رم، بو جهانا سیغیشمارام، آی آنا! دولانارام پروانه‌تک باشینا، من قوربانام داملایان گؤز یاشینا! چئوریله‌یدیم بیرگونلوک سیرداشینا، کاش بیله‌یدیم چکدیگینی، آی آنا! #پروین_عظیم‌اووا #شعر_اوجاغی @SheirOcagi

▫️یالنیزلیغین -ایستر منطیق، ایستر تجروبه باخیمیندان- یالنیز اولماق‌لا دخلی یوخدور. یالنیزلیق حاقّیندا اؤنملی اولان شئی، چئوره‌ده‌کی آداملارین ساییسی دئییل، اینسانین باشقالاری‌یلا اولان ایلیشکیسینده، اؤزونو نه تهر حیسّ ائتمه‌سی‌دیر. 📚 یالنیزلیغین فلسفه‌سی #لارس_اسوندسن #شعر_اوجاغی @SheirOcagi

▫️هله‌لیک سلام‌علیکینی کسمه کی وار اریک هله‌لیک، بو باغ سنین، بو کؤنول، سئوگی اوسته‌لیک هله‌لیک! پریشانام، گزیرم، شاهیدیم قدیم کوچه‌لر، تاوار، بازار، تزه میدان، پیرَتمَلیک هله‌لیک. گئدیب سوراغینی قارتال داشیندا آختاریرام، دئیم، گلیب ساوالاندا چکیر کئشیک هله‌لیک. یا بلکه ده ساری‌ داشدان دوران او هئیکل‌دیر، شهر یئرینده باشین ساخلاییبدی دیک هله‌لیک. باشیمدا مین دنه میسگر دۆکانینین سسی وار، فیٖلارموْنیک‌¹دی، چالیر سمفونیک موزیک هله‌لیک. عاشیقلار عشقینه بو عشقه دؤرد آشیق آتدیم. نه آلچی دوردو، نه توْوخان، نه بؤک، نه جیک هله‌لیک. بیچاق، اوراق، قمه، اوخ، دهره، بالتا، کرکی، گزن، بو عشقی دوغراماغا اولدولار شریک هله‌لیک. کسیک-کسیک کسیلیب‌دیر، بؤلوک-بؤلوک بؤلونوب، ایپک کیمی اورک اولموش دلیک-دلیک هله‌لیک. #امین_رسولی ¹- موزیک‌سئور ²- کئچمیشده باشماقچی‌لارین گؤن کسمک اوچون ایشلَتدیگی ایتی آلت #شعر_اوجاغی @SheirOcagi

▫️نه ائتمک اولار؟ عؤمرون یاریسی خیال‌لاردا کئچیر. بلکه بونا گؤره ده حیات بئله شیرین اولور. بلکه اینسان آرزو ائتدیکلرینین هامیسینا چاتا بیلمیر دئیه حیات بو قدر عزیزدیر. #چنگیز_آیتماتوو #شعر_اوجاغی @SheirOcagi

▫️آللاه ائله‌سین اوزوملر یئتیشسین دونیا کئفلنسین بودره‌سین خیاوانلار بیر-بیرینین چیینینه وورسون جومهور باشقانلاری‌لا دیلنچی‌لر. سینیرلار کئفلنسین بیر آنلیق. توفنگ‌لر اونوتسون پارچالاماغی. بیچاقلار اونوتسون کسمه‌یی. قلم‌لر، «آتش»ی «آتش کس»یازسین. آللاه ائله‌سین کئفلی‌لیک، نسنه‌لره کئچسین. پنجره‌لر دووارلاری سیندیرسین... #الیاس_علوی #شعر_اوجاغی @SheirOcagi

🔹تحکییه ادبی درنه‌یی (548-جی جلسه) 🔹 ساغدوش(ساغدیش) 🔹بهومیل هئرابال 🔹چئک ادبییاتی 🔹اورمیه-چهارراه آپادانا- مجتمع فرهنگی هنری اورمیه 🔹سه شنبه- 9 تیرماه ۱۴۰۵ 🔹ساعت 16:30-19:30 @tahkie آدرس تلگرام Butajournal.com #ادبییات #آذربایجان_تورکجه_سی #مودئرن_نثر_تحکییه #بهومیل_هئرابال #چئکواسلاواکی_ادبییاتی 🟦 کانالیمیزین تلگرامدا لینکی https://t.me/Tahkie 🟦 کانالیمیزین بله‌ده لینکی. ble.ir/join/A2Hg8F3tmf

▫️یالنیز یاشایا بیلمیرم، حیاتیمی بیرینین آیاغینا تؤکمه‌لی‌یم. #ریچارد_براتیگان #شعر_اوجاغی @SheirOcagi

▫️ائله‌ییب آللاه اونو حُسن و ملاحت کانی، ائتمه‌میش کم او پریوَشدن ادب-ارکانی. اونو گؤزدن بئله بیر دم ده اوزاق قویماز، اگر- عاشیقین چاتسا بونا ذرّه قدر امکانی. اؤیله بیر حاله سالا عاشیقینی جانانی، گؤتوره باشینا فریادی اونون هر یانی! جانا پرچیم‌له‌میش اؤز عشقینی جانان، ای دل چیخماسین -رحم ائله‌سین- بیر دنه ده پیکانی! وئره آللاه اونا انصافِ مُدام، ظلم ائله‌یه، چیخا تا عرشه قدر عاشیقینین افغانی! ای کؤنول، وصلین اومورسان -دئدیلر- جانانین، آی گؤزون چیخماسین، آزدیرمی سنه هجرانی؟! دَییشر «یاسین» آدین، ای دل، اگر بیر کیمسه، گؤرسه اول شوخو، اونون اولماسا گر حئیرانی. #یاسین_خلیل #شعر_اوجاغی @SheirOcagi

دیالوق ▫️- سونوندا عشق هر شئیین دارماداغین اولماسی اوچون یاخشی بیر ندن‌دیر. 📺 Money Heist 2017-2021 #شعر_اوجاغی @SheirOcagi

▫️قوجالا بیلمه‌میشم. اؤزومه یاراشان گونلریم آز اولوب، کاسیبچیلیق دوْلو کیمی دؤیوب طالعیمی. حاقسیزلیقدان دوغان بیر کاسیبچیلیق‌لا باریشا بیلمه‌میشم هئچ واخت. همیشه اؤزومدن ضعیف‌لر آت اوینادیب دؤرد یانیمدا. یاخشی اوینامیشام، توپوم اولماییب، یاخشی قاچسام دا، «کئت»¹یم اولماییب. یاخشی اوخوسام دا، قیزارا-قیزارا آلمیشام بئش‌لریمی. کؤهنه پالتاریمدان اوتانیب ازبر بیلدیگیم درسدن «ایکی» آلمیشام. همیشه گئجیکدیرَردیم سئنتیابرلارین بیر'ینی. اوشاقلیغیمی تزه‌دن یاشاماق ایسته‌میشم همیشه. همیشه قانادسیز قوش کیمی چیرپینمیشام طالعیمین الینده. حاقسیزلیق ایچینده بوغولا-بوغولا، گونلریمی پوزا-پوزا، اللی یاشیما چاتمیشام. درد، لوْتوْ² داشلاری کیمی دوْلدوروب عؤمور کارت‌لاریمی. دویغولاریم اژدها کیمی آتیلیب اوستومه، قویماییب منی قوْجالماغا. فوتبال اوینایاندا «کئت»یم اولماییب اوشاقلیغیمدا. ایندی ده شاعیرم- کیتابیم یوخدور. دیرَنمیشم همیشه بو طالعه، دویغولاریمین عینادی‌دیر ساچلاریمین قارالیغی. دۆیمه‌چه³ آرزولاردان سینه‌مده باهاردیر... قوْجالا بیلمه‌میشم. #یافث_تورک‌سس ¹- اسپورت باشماق ²- اوستونده نؤمره‌لر یا شکیل‌لر اولان اؤزل کارت‌لاردا اوْینانیلان بیر اوْیون ³- پوچور- آچیلمامیش تومورجوق #شعر_اوجاغی @SheirOcagi

▫️هئچ بیر اولای حیکمَتسیز دئییل. آداملار دَییشیر، سن اورک قوپارماغی اؤیره‌نیرسن. دوروملار خارابلاشیر، یاخشی گونلرین قدرینی بیلیرسن. یالان‌لارا اینانیرسان، سونوندا اؤزوندن باشقاسینا اینانماماغی اؤیره‌نیرسن. بعضاً ده یاخشی شئیلر آرادان گئدیر، داها یاخشی شئیلر بیر-بیرینین یانیندا جورلاشیر. #مرلین_مونرو #شعر_اوجاغی @SheirOcagi