|شعر اوجاغی|

▫️یاخشی یادیمدادی، دوغولمامیشدان قاباق نئجه مشق ائله‌ییردیک یاشاماغین چئشیدلی شکلینی، جوربه‌جور پوزاسینی، بیر اویونچو هوسی‌یله. بونلارین، دوغولاندان سونرا بیر ایشه یارامایاجاغینی، اونون قایدالارینین دَییشه‌جه‌یینی، عاغلیمیزدان بئله کئچیرمه‌دن. یاخشی یادیمدادی، دوغولمامیشدان قاباق نئجه سئچیب آییریردیق سئوینه-سئوینه گئیینیب گئده‌جه‌ییمیز رنگیمیزه دوشن ان قالین درینی. #ماهر_مهدی #شعر_اوجاغی @SheirOcagi

دیالوق ▫️- من بوتون عؤمرومو قورخویلا کئچیرتدیم. گئرچک‌لشمه‌سی مومکون اولان شئیلردن قورخماق‌لا... اللی ایلی ائله بئله کئچیرتدیم، گئجه‌یاریسیندان سونرا ساعات اوچده یوخودان آتیلیب اویاق قالیردیم. آما بیلیرسن نه وار؟ خسته‌لیگیم تشخیص ائدیلندن بری چوخ راحات یاتیرام.‌ ایندی بیلیرم، ماجرانین ان پیس یئری ائله قورخونون اؤزودور، اصل دوشمن اودور. بس آیاغا قالخ، دیشارییا- گئرچک دونیایا چیخ، بوتون وار گوجونله او حوقّابازین آغزینا وور! 📺 Breaking Bad 2008-2013 #شعر_اوجاغی @SheirOcagi

▫️یاخشی اینسان یاخشیلیق ائتمه‌یی باجاران شخص دئییل، الیندن پیسلیک گلمه‌ین شخص‌دیر. #فرید_عبدالله #شعر_اوجاغی @SheirOcagi

▫️کئچه بیلدیگی یئره‌جن، مین بیر آدام کئچدی مندن. گئیینیلیب بیر دفعه ده، اَینیمه گئندی بو بدن. او دونیادان گؤندریلمیش، سوْن فوتوسویام آتامین. گزدیردیم «من» اولاناجان اۆزونو نئچه آدامین. واراقلار دولدو، قالمادی- دریمده بیر سطیر آغ یئر. حالیمی سون نؤقطه‌یه‌جن، شرح ائله‌دیم شعیر-شعیر. قیریلدی بوتون تئللریم، قوپدو ایچیمدن سس سیمی. سوکوتومون ایفاسیندا دینله‌دین شعیرلریمی. آیری شئی گلمیر الیمدن، ایشیم سؤزده گیزلَنمک‌دی. منیمکی یازماق-زاد دئییل، جانیمدان تمیزلنمک‌دی. #ماهر_مهدی #شعر_اوجاغی @SheirOcagi

▫️اینسانلار صبیرسیز اولدوقلاری اوچون جنّتدن قووولدولار، تنبل اولدوقلاری اوچون گئری دؤنه بیلمیرلر. #فرانتس_کافکا #شعر_اوجاغی @SheirOcagi

▫️مهرِ رُخسارینی دل ماهِ سمادان سئچمز، اعتباری یوخ اونون، آغی قارادان سئچمز. نه هۆنردیر کی تانیر خوبلار ایچره سنی دل، هانسی بیر کس‌دیر او کیم، شاهی گدادان سئچمز؟! ای لبین عاشقه گلخند، گؤزون بیماری- مؤوته مُشرف‌دی، دخی دردی دوادان سئچمز. بس که دل عاشقِ گفتارِ شکربارین‌دیر، ایسته‌ییر نیطقینی؛ دُشنامی دُعادان سئچمز. دلِ دیوانه‌نی زنجیره چکرسن یئری وار؛ عطرِ زولفون نه اوچون مُشکِ ختادان سئچمز؟ سن نه بُت'سان کی، ایا کعبه‌ی اربابِ صفا- مَروه‌ی کویونو حُجّاج صفادان سئچمز؟! دئمه «سیّد»، که وفا ترکین ائدیب قیلدی جفا! طفل‌دیر یار، هله ظولمو وفادان سئچمز. #سیدعظیم_شیروانی #شعر_اوجاغی @SheirOcagi

دیالوق ▫️- اینسانلار چیخارلاری اولاندا بیر-بیری‌یله ایش بیرلیک‌چی‌لیک ائدیر، چیخارلاری اولاندا وفالی قالیر، چیخارلاری اولاندا بیر-بیرینی سئویر و چیخارلاری اولاندا بیر-بیرینی آرادان آپاریرلار. 📺 Game of Thronse 2011-2019 #شعر_اوجاغی @SheirOcagi

‍ ▫️ییرمینجی عصره دائیر یۇخلاماق ایندی، اویانماق یوز‌ ایل سونرا، سئوگیلیم! یوخ، اؤز عصریم قورخوتمور منی! من قاچاق دئییلم، عصریم سفیل عصریم اوز قیزارتیجی عصریم جسور بؤیوک و قهرمان. دونیایا ائرکن گلدیم دئیه قهر ائتمه‌دیم هئچ بیر زامان، من ییرمینجی عصرلی‌یم و بونونلا اؤیونورم¹. منه یئتر ییرمینجی عصیرده اولدوغوم صفده اولماق، بیزیم طرفده اولماق، و دؤیوشمک یئنی بیر عالم اوچون. یوز ایل سونرا، سئوگیلیم! یوخ، هر شئیدن اوّل، و هر شئیه رغماً داها اوّل، و اؤلن و دوغان و سون گونلری گؤزل گله‌جک اولان ییرمینجی عصر، منیم شفق چیغلیق‌لاری‌یلا صاباحا یئتیشن مۆدهیش گئجه‌م سنین گؤزلرین کیمی، گونَشلی اولاجاقدیر، خدیجه‌²م! #ناظیم_حیکمت ¹- فخر ائتمک ²- ناظیم حیکمتین حیات یولداشی Hatice Piraye #شعر_اوجاغی @SheirOcagi

▫️قوزغون تپه‌مده بیر قوزغون وار. بو هر کسی لئشه چئویرن قالانین اۆفوقونده نازلانا-نازلانا اوچاراق، آج‌گؤزجه‌سینه گؤزله‌ییر لئشه دؤنوشمه‌ییمی. من‌سه دۆشونورم، نئجه بیر دۇزاق قۇروم کی، آشاغی ائنسین، هدفیمه قدر. نفس درمک اوچون هردن دورسام، ییخیلدیغیمی اومید ائدیب، تپه‌مه سالدیراجاق. آما اونا آتش آچماق اوچون فورصت گؤزله‌دیگیمی آنلادیقجا سورعتله دؤنور گؤی‌اوزونه. بئله‌سینه، نسیلدن نسیله چوخلو اینسان لئش اولدو یئم اولاراق، ‌بو آلتمیش عصرلیک سئحیرلی قالانین قوزغونونا‌. چوخ واختیم قالماییب. تجروبه‌لریمین راویسی دئییر: یا سنین، یا یاشلی قوزغونون چاره‌سیز اؤلومو یئتیشیب. بو، اینسانی لئشه چئویرن تاریخی دزگاهین سئحیرلی قالاسینین یازقیسی دا،  تاماماً سنین اوخ قابینا و تپَرینه باغلی‌دیر. قالان‌سا سنین بو فورصتین‌دیر. تپه‌مده بیر قوزغون وار، وای اگر فورصتیم الدن گئتسه! #فروغ_فرخزاد #شعر_اوجاغی @SheirOcagi

دیالوق ▫️- سیخینتی‌لارینا ائله یاپیشیبسان، سانکی اؤنملی بیر شئیدی، سانکی بیر دیَری وار. قوی سنه بیر سؤز دئییم: بیر قارا پولا دَیمز، اؤتور گئتسین! 📺 Six Feet Under 2001-2005 آمریکا #شعر_اوجاغی @SheirOcagi

▫️دوغرولوق سیزه چوخ دوست قازاندیرماز، آما دوغرو دوستلار قازاندیرار. #جان_لنون #شعر_اوجاغی @SheirOcagi

▫️یا بیر اولار، یا ایکی. ایسمی پونهان، نییه مندن کوسوبسن؟! یاخشی یامان یا بیر اولار، یا ایکی. بو گون اؤلسم، هامی دئیر یازیق‌دیر، جانی یانان یا بیر اولار، یا ایکی. سن شؤعله‌سن، دؤرد یانیندا فنَرم، بولبولونم، گولشَنیندن کنارام، هر مجلیسده اود توتوبان یانارام، دردیم قانان یا بیر اولار، یا ایکی. هیلال قاشا نه لاییق‌دیر او سۆرمه! مئیلین قیلیب اۆزون مندن چئویرمه! «جوما» دئییر: هر یئتنه سیر وئرمه! دوست مهریبان یا بیر اولار، یا ایکی #موللا_جوما #شعر_اوجاغی @SheirOcagi

▫️یومدوم گؤزلریمی. یومدوم گؤزلریمی، قارانلیقدا سن وارسان قارانلیقدا سؽرت‌اوستو یاتیرسان قارانلیقدا بیر آلتین اۆچ‌گن‌*دیر آلنین و بیلک‌لرین. یومولو گؤز قاپاقلاریمین ایچینده‌سن، سئودیجه‌ییم! یومولو گؤز قاپاقلاریمین ایچینده شارقی‌لار. ایندی اوردا هر شئی سنینله باشلاییر ایندی اوردا هئچ بیر شئی یوخ سندن اؤنجه‌مه عائید و سنه عائید اولمایان. #ناظیم_حیکمت * اوچ‌بوجاق- مثلّث #شعر_اوجاغی @SheirOcagi

▫️زنگینلیک دنیز سویو کیمی‌دیر، نه قدر چوخ ایچسن، سوسوزلوغون بیر او قدر آرتار. #آرتور_شوپنهاور #شعر_اوجاغی @SheirOcagi

▫️بعضاً بیر یانارداغا بنزه‌دیگیمی دوشونورم، قیراقدان باخیلاندا دینج گؤرونورم، آما هر آن جوشا بیله‌رم. 📺 The Sopranos 1999-2007 #شعر_اوجاغی @SheirOcagi

▫️عؤمور نیمداش پالتار کیمی سؤکولور عؤمور، آستاری بیر یانا، اۆزو بیر یانا‌. عمل‌لر خلبیردن کئچیب اؤلچولور، اَیریسی بیر یانا، دۆزو بیر یانا. گونلر اؤتوشدوکجه، ایل اولور آیلار، ساعاتلار جار چکیب بیزی هارایلار. چکیر سرت یوخوشلار، یالچین دوْلای‌لار- حیاتی بیر یانا، بیزی بیر یانا. عؤمور امانت‌دیر، هدیّه دئییل، قایتاریر بیر نسیل، آلیر بیر نسیل. وای او کس‌لره کی، یاشاییر یۆز ایل، دوشمه‌ییر عۆنوانی، ایزی بیر یانا! او واخت کی زحمت‌له گونلر اؤتوشور، عؤموردن عؤمورلر اوسته گون دۆشور. روتبه کندیربازی بیر گون سۆروشور، کوْساسی بیر یانا، اؤزو بیر یانا. قۇللوق اوْربیتینده قاناد چالماغین، کؤلگه‌یه سیغینیب کؤلگه سالماغین، خالقدان سوْروشماییب وکیل اولماغین، آخیردا سوْورولور توْزو بیر یانا. پول‌دور اۆزَرلیگی بد نفس‌لرین، علاجی کارلیق‌دیر کوْبود سسلرین. بئینی معده‌سینده اولان کس‌لرین، سؤزو بیر یانادیر، گؤزو بیر یانا. بعضاً بۇخوو اولور بیزه بیر عادت، قیریب توللاماغا چاتمیر جسارت. «راضی»، آمان وئرمه قوْوسون طبیعت- آلووو بیر یانا، بۇزو بیر یانا! #حسین_راضی #شعر_اوجاغی @SheirOcagi

▫️اونا گؤره، جاواب نه اولورسا اولسون، هئچ اؤنملی دئییلدی. اؤنملی اولان اینسانین قلبینده دوغرو اولدوغونا ایناندیغی شئیلری ائتمه‌سی، همن ایندی حیاتا کئچیرمه‌سی‌یدی. 📚 عاغلیندا بیر سایی توت! #جان_وردون #شعر_اوجاغی @SheirOcagi

▫️آدامدی دا، بعضاً هئچ نه‌یه حوصله‌سی اولمور، اؤزونو گؤتوروب چؤله آتماق ایسته‌ییر. #حسین_پناهی #شعر_اوجاغی @SheirOcagi