VAYO FM NEWS

ឱកា​សកា​រ​ងារជាង៩ម៉ឺន​កន្លែងនឹងត្រូវនាំយកទៅជូន​អតីតពល​ករ យុវជន និង​ប្រជាពលរដ្ឋនៅ​ខេ​ត្ត​​​ពោ​ធិ៍​សា​ត់​នាថ្ងៃស្អែកនេះ ============= ទីភ្នាក់ងារ​ជាតិមុខ​របរ និង​ការ​ងារ (NEA) នៃ​​ក្រសួង​​ការងារ​និង​បណ្ដុះ​បណ្ដា​ល​វិជ្ជាជីវៈនឹងនាំ​យកឱកាសកា​រងារជាង៩ម៉ឺន​កន្លែងទៅ​ជូ​នអតីតពល​ករ យុវ​ជន និង​ពលរដ្ឋមូ​ល​ដ្ឋាននៅ​ខេត្តពោធិ៍សាត់ រួមទាំង​អត្ថប្រយោជន៍ នៃរបបស​ន្តិសុខស​ង្គម (ប.ស.ស.) និង វគ្គបណ្តុះ​បណ្តា​ល​ជំនាញ​បច្ចេកទេស និងវិជ្ជា​ជីវៈ ដោយ​ឥតគិ​តថ្លៃ នា​ថ្ងៃទី ២៨​-២៩ ខែសី​ហា​ ឆ្នាំ២០២៦នេះ។ ============= 🌐អានព័ត៌មាន 👉Facebook 👉Telegram 👉TikTok 👉YouTube 👉IOS 👉Android

ក្នុងក្របខ័ណ្ឌអាស៊ានបូកបី៖ កម្ពុជាជំរុញការពង្រឹងភាពជាដៃគូលើការបញ្ជាក់វិញ្ញាបនបត្រជំនាញឆ្លងដែន ​ ============= កម្ពុជាជំរុញការពង្រឹងភាពជាដៃគូលើការបញ្ជាក់វិញ្ញាបនបត្រជំនាញឆ្លងដែន ជំនាញ AI យានយន្តអគ្គិសនី និងសន្តិសុខតាមប្រព័ន្ធអ៊ីនធឺណិត ក្នុងក្របខ័ណ្ឌអាស៊ានបូកបី។ ការជំរុញនេះធ្វើឡើងដោយលោក ហេង សួរ រដ្ឋមន្ដ្រីក្រសួងការងារនិងបណ្ដុះបណ្ដាលវិជ្ជាជីវៈ នៅក្នុងកិច្ចប្រជំុរដ្ឋមន្ត្រីការងារអាស៊ានបូកបីលើកទី១៤ (14th ALMM+3) រួមមានប្រទេសចិន ជប៉ុន និងកូរ៉េខាងត្បូង ក្រោមមូលបទ “ការលើកកម្ពស់មូលធនមនុស្សអាស៊ាន៖ វិញ្ញាបនបត្រជំនាញឆ្ពោះទៅរកការទទួលស្គាល់ជាសកល” នាព្រឹកថ្ងៃទី២៧ ខែសីហា ឆ្នាំ២០២៦ តាមប្រព័ន្ធវីដេអូ។ កិច្ចប្រជុំនេះរៀបចំឡើងនៅទីក្រុងបាងកក ប្រទេសថៃ។ ​ ============= 🌐អានព័ត៌មាន 👉Facebook 👉Telegram 👉TikTok 👉YouTube 👉IOS 👉Android

ព័ត៌មានជាតិ-អន្ដរជាតិសំខាន់ៗសម្រាប់ថ្ងៃទី២៧ ខែសីហា ឆ្នាំ២០២៦៖ ១. ជនល្មើសត្រូវតែបង្ក្រាប! តែអភិបាលខេត្ដក៏មិនអនុញ្ញាតឱ្យ ឡានចតសម្រាកពេលយប់នៅតំបន់ផ្លូវវាងក្រុងពោធិ៍សាត់ទៀតដែរ! ២. ក្រុមAOTចុះពិនិត្យផ្ទាល់នៅទីតាំងកងទ័ពថៃពង្រាយទូកុងតឺន័រ ជីកប្រឡាយ ធ្វើផ្លូវរំលោភទឹកដីកម្ពុជា! ៣. បទពិសោធផ្ទាល់ខ្លួន! និស្សិតរូបនេះលើកទឹកចិត្ដស្ដ្រីក៏អាចរៀនជំនាញ វិស្វកម្មសំណង់ស៊ីវិលបានដូចបុរស! ៤. មន្ដ្រីជំនាញ៖តំបន់អានសេះស្ថិតក្នុងទឹកដីកម្ពុជាដែលកងកម្លាំងថៃ កំពុងកាន់កាប់ដោយខុសច្បាប់! ៥. សម្តេចហ៊ុន សែន៖ សង្រ្គាមកម្ពុជាថៃជាទម្រង់សង្រ្គាមទំនើបដោយថៃប្រើ លេសបង្រ្កាបបទល្មើសឆបោកអនឡាញដើម្បីកាន់កាប់ទឹកដីកម្ពុជាខុសច្បាប់ ៦. សម្តេចធិបតីបានលើកឡើងជាថ្មីនូវជម្លោះព្រំដែនកម្ពុជា-ថៃចំពោះ មុខមេដឹកនាំសភាចំនួន៤០ប្រទេស ៧. ជនបរទេសជាង៧០០នាក់ស្ថិតក្នុងចំណោមមនុស្សជិត ១៥០០នាក់បាត់ខ្លួនក្នុងគ្រោះទឹកជំនន់នៅនេប៉ាល់និងទីបេ ៨. កូរ៉េខាងជើងព្រមានឆ្លើយតបយ៉ាងខ្លាំងក្លាក្រោយអាមេរិកអនុម័ត ការលក់អាវុធទំនើបឱ្យកូរ៉េខាងត្បូង

ព្រះមហាក្សត្រ៖ប្រធានបទពង្រឹងច្បាប់អន្ដរជាតិនិងដោះស្រាយជម្លោះដោយ​សន្ដិវិធី​នៃសន្និសីទ​ISC-2ស្របនឹងកាលៈទេសៈបច្ចុប្បន្ន ============= តាមរយៈព្រះរាជសារក្នុងឱកាសបើកសន្និសីទប្រធានសភានៃអន្ដរសភាលើកទី២(ISC-2) ដែលកម្ពុជាធ្វើជាម្ចាស់ផ្ទះនាថ្ងៃនេះ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា មានព្រះរាជបន្ទូលថា ប្រធានបទ សាមគ្គីភាពដើម្បីសន្ដិភាពនិងវិបុលភាព៖ ពង្រឹងច្បាប់អន្ដរជាតិ និងដោះស្រាយជម្លោះដោយសន្ដិវិធី ជាប្រធានបទប្រកបដោយអត្ថន័យ និងសមស្របនឹងកាលៈទេសៈបច្ចុប្បន្ន។ ព្រះអង្គមានព្រះរាជបន្ទូលទៀតថា នៅពេលដែលពិភពលោកកំពុងប្រឈមមុខនឹងការប្រកួតប្រជែងផ្នែកភូមិសាស្ដ្រនយោបាយ ជម្លោះប្រដាប់អាវុធ ការបាត់បង់ទំនុកចិត្ដគ្នាទៅវិញទៅមក និងបញ្ហាប្រឈមផ្នែកសន្ដិសុខទាំងបែបប្រពៃណីនិងមិនមែនប្រពៃណី ប្រធានបទនេះបានបង្ហាញយ៉ាងច្បាស់អំពីភាពចាំបាច់ជាបន្ទាន់ក្នុងការពង្រឹងកិច្ចសន្ទនា ការអត់ធ្មត់ កិច្ចសហប្រតិបត្ដិការ និងការប្រកាន់ខ្ជាប់នូវនីតិអន្ដរជាតិ។ ============= 🌐អានព័ត៌មាន 👉Facebook 👉Telegram 👉TikTok 👉YouTube 👉IOS 👉Android

ជនបរទេសជាង៧០០នាក់ស្ថិតក្នុងចំណោមមនុស្សជិត១៥០០នាក់បាត់ខ្លួនក្នុងគ្រោះទឹកជំនន់នៅនេប៉ាល់និងទីបេ ============= តួលេខអ្នកស្លាប់និងបាត់ខ្លួននៅក្នុងគ្រោះទឹកជំនន់ដ៏មហន្តរាយនៅប្រទេសនេប៉ាល់និងតំបន់ទីបេរបស់ប្រទេសចិនបានប្រែប្រួល ដោយចំនួនអ្នកស្លាប់កើនឡើងដល់២៧០នាក់​និងអ្នកបាត់ខ្លួនកើនដល់ជិត១ ៥០០នាក់។ ក្នុងចំណោម​អ្នកបាត់ខ្លួននោះទៀតសោត មានជនបរទេសរហូត​ដល់​ជាង៧០០នាក់។ នេះបើតាមអាជ្ញាធរបាននិយាយ នៅថ្ងៃ​ទី២៧ខែសីហាឆ្នាំ២០២៦។ នៅក្នុងនោះ ខាងនេប៉ាល់​មានជនបរទេសបាត់ខ្លួនជិត៥០០ ខណៈខាងទីបេ​មានជនបរទេស២៦០នាក់បាត់ខ្លួន។ បើតាមCNA ជនបរទេសទាំងនោះ មកពីប្រទេសឥណ្ឌាច្រើនជាងគេ​ជិត២០០នាក់ អាមេរិកជាង៦០នាក់ និងមកពីប្រទេស​ផ្សេងទៀតដូចជាអូស្រ្តាលី អង់គ្លេស កាណាដា ម៉៉ាឡេស៊ី កូរ៉េខាងត្បូង សិង្ហបុរី ហ្វីលីពីន។ ============= 🌐អានព័ត៌មាន 👉Facebook 👉Telegram 👉TikTok 👉YouTube 👉IOS 👉Android

កម្ពុជាជំរុញការទទួលស្គាល់ជំនាញនិងការផ្ទេរអត្ថប្រយោជន៍សន្តិសុខសង្គម​សម្រាប់​លើក​កម្ពស់ការចល័តកម្លាំងពលកម្មអាស៊ាន ============= កម្ពុជាបានជំរុញការទទួលស្គាល់ជំនាញ និងការផ្ទេរអត្ថប្រយោជន៍សន្តិសុខសង្គមសម្រាប់លើកកម្ពស់ការចល័តកម្លាំងពលកម្មអាស៊ាន នៅក្នុងកិច្ចប្រជុំរដ្ឋមន្ត្រីការងារអាស៊ានលើកទី២៩(29th ALMM) ។ កិច្ចប្រជុំនេះនិងកិច្ចប្រជុំពាក់ព័ន្ធព័ន្ធធ្វើឡើងក្រោមមូលបទ “ការលើកកម្ពស់មូលធនមនុស្សអាស៊ាន៖ វិញ្ញាបនបត្រជំនាញឆ្ពោះទៅរកការទទួលស្គាល់ជាសកល” នាថ្ងៃទី២៦ ខែសីហា ឆ្នាំ២០២៦ តាមប្រព័ន្ធវីដេអូ។​ ============= 🌐អានព័ត៌មាន 👉Facebook 👉Telegram 👉TikTok 👉YouTube 👉IOS 👉Android

ក្រសួងការងារនិងបណ្តុះបណ្តាលវិជ្ជាជីវៈ បានផ្តល់ជូននូវវីឌីអូដែលបង្កើតឡើងដោយកម្មវិធី AI ដើម្បីជាមូលដ្ឋានដល់សិស្សានុសិស្សៗ មាតាបិតា អាណាព្យាបាល សាធារណជន ក្នុងការទទួលបានព័ត៌មានបន្ថែមសម្រាប់ពិចារណាក្នុងការរៀនជំនាញផ្នែកបច្ចេកទេស និងបច្ចេកវិទ្យានៅតាមសាកលវិទ្យាល័យ ឬគ្រឹះស្ថានធីវេត(TVET)ណាមួយ។ ============= 👉Facebook 👉Telegram 👉TikTok 👉YouTube 👉IOS 👉Android

កូរ៉េខាងជើងព្រមានឆ្លើយតបយ៉ាងខ្លាំងក្លាក្រោយអាមេរិកអនុម័តការលក់អាវុធទំនើបឱ្យកូរ៉េខាងត្បូង ============= ក្រសួងការបរទេសកូរ៉េខាងជើង នៅថ្ងៃទី២៧ខែសីហា​ឆ្នាំ២០២៦នេះ បានថ្កោលទោសចំពោះការសម្រេចចិត្ត​របស់អាមេរិកក្នុងការអនុម័តការលក់មីស៊ីលទំនើប និងឧបករណ៍ពាក់ព័ន្ធឱ្យទៅប្រទេសកូរ៉េខាងត្បូង ដោយ​ចាត់ទុកថាជាសកម្មភាពបង្កអរិភាពដោយបើកចំហរបស់អាមេរិក។ បើតាមសារព័ត៌មានរដ្ឋកូរ៉េខាងជើង​KCNA​បានចុះផ្សាយ កូរ៉េខាងជើងបានប្តេជ្ញាឆ្លើយតបយ៉ាង​ខ្លាំងក្លានិងភ្លាមៗ ចំពោះការបង្កការគំរាមកំហែងថ្មីដល់​បរិយាកាសសន្តិសុខរបស់ខ្លួន។ អ្នកនាំពាក្យក្រសួងការបរទេសកូរ៉ខាងជើង បាននិយាយ​ថាអាមេរិកនៅក្នុងឆ្នាំនេះ បានអនុម័តការលក់ប្រព័ន្ធ​អាវុធជាច្រើនប្រភេទឱ្យកូរ៉េខាងត្បូង រួមទាំងមីស៊ីល​ទំនើបបាញ់ពីអាកាសទៅអាកាស ឧទ្ធម្ភាគចក្រកង​ទ័ពជើងទឹក ឧទ្ធម្ភាគចក្រវាយប្រហារនិងគ្រាប់បែក។ ============= 🌐អានព័ត៌មាន 👉Facebook 👉Telegram 👉TikTok 👉YouTube 👉IOS 👉Android

ក្រុមAOTចុះពិនិត្យផ្ទាល់នៅទីតាំងកងទ័ពថៃពង្រាយទូកុងតឺន័រ ជីកប្រឡាយ ធ្វើផ្លូវរំលោភទឹកដីកម្ពុជា! ============= ក្រុមអ្នកសង្កេតការណ៍អាស៊ាន(AOT) បានចុះសង្កេតការណ៍ផ្ទៀងផ្ទាត់ រាយការណ៍អំពីស្ថានភាពតាមបណ្តោយព្រំដែនកម្ពុជា-ថៃ និងត្រួតពិនិត្យការដាក់ពង្រាយទូកុងតឺន័រ រាយបន្លាលួស ជីកប្រឡាយ ធ្វើលេណដ្ឋាន ធ្វើផ្លូវលើទឹកដីកម្ពុជា និងការកាន់កាប់ដោយខុសច្បាប់របស់យោធាថៃ នៅច្រកអូរស្មាច់ ក្នុងតំបន់អូរខ្លាឃ្មុំ ដែលស្ថិតនៅភូមិអូរខ្លាឃ្មុំ សង្កាត់អូរស្មាច់ ក្រុងសំរោង ខេត្តឧត្តរមានជ័យ។ ជាទង្វើដែលបណ្តាលឱ្យប្រជាពលរដ្ឋស៊ីវិលកម្ពុជាចំនួន៣៦៦នាក់ ស្មើនឹង៩៨គ្រួសារ ក្នុងនោះស្ត្រី១៩០នាក់ កុមារចំនួន១០១នាក់ មិនទាន់អាចវិលត្រឡប់ទៅកាន់លំនៅដ្ឋានវិញបាននៅឡើយ។ នេះបើតាមការបញ្ជាក់របស់អ្នកនាំពាក្យក្រសួងការពារជាតិកម្ពុជា។ ============= 🌐អានព័ត៌មាន 👉Facebook 👉Telegram 👉TikTok 👉YouTube 👉IOS 👉Android

មន្ដ្រីជំនាញ៖តំបន់អានសេះស្ថិតក្នុងទឹកដីកម្ពុជាដែលកងកម្លាំងថៃកំពុង​កាន់កាប់​ដោយ​ខុសច្បាប់! ============= តំបន់អានសេះគឺស្ថិតក្នុងទឹកដីកម្ពុជា ដែលបច្ចុប្បន្នកំពុងត្រូវបានកាន់កាប់ដោយខុសច្បាប់របស់កងកម្លាំងថៃ​ក្រោយសង្គ្រាមនៅចុងឆ្នាំ២០២៥។ នេះគឺជាការបញ្ជាក់របស់លោក ​ស្រ៊ឺ បូរ៉ា ​អគ្គនាយកកិច្ចការបច្ចេកទេសព្រំដែន។ មន្ដ្រីជំនាញរូបនេះអះអាង​ដូច្នេះដោយយោងតាមផែនទីមាត្រដ្ឋាន ១/២០០ ០០០ និងកំណត់ហេតុ (PV) បោះបង្គោលរបស់គណៈកម្មការឥណ្ឌូចិន-សៀម ឆ្នាំ១៩០៨ និង ១៩១៩ និងយោងតាមផែនទី L7017 មាត្រដ្ឋាន ១/៥០ ០០០ ដែលថៃគូសដោយឯកតោភាគី។ នេះបើតាមការបញ្ជាក់របស់លោកនៅក្នុងកិច្ចសម្ភាសជាមួយទូរទស្សន៍ជាតិ។ នាយករដ្ឋមន្ដ្រីថៃកាលពីថ្ងៃទី២៣ ខែសីហា ឆ្នាំ២០២៦ បានធ្វើដំណើរទៅកាន់តំបន់នេះ ហើយត្រូវបានកម្ពុជាតវ៉ាយ៉ាងខ្លាំងព្រោះជា​ការចូលក្នុងដែនអធិបតេយ្យកម្ពុជាដោយគ្មានការអនុញ្ញាត។ ============= 🌐អានព័ត៌មាន 👉Facebook 👉Telegram 👉TikTok 👉YouTube 👉IOS 👉Android

បទពិសោធផ្ទាល់ខ្លួន! ​និស្សិតរូបនេះលើកទឹកចិត្ដ​ស្ដ្រីក៏អាចរៀនជំនាញ​វិស្វកម្ម​សំណង់​ស៊ីវិល​បានដូចបុរស​!​ ============= និយាយ​ពី​ជំនាញវិ​ស្វកម្មសំណង់ស៊ីវិល អាចមានមតិខ្លះគិតថា​បុរសស័ក្ដិសមនឹងរៀនជំនាញនេះជាងស្ដ្រី។ យ៉ាងណាមិញ បច្ចុប្បន្នក៏មានស្ដ្រីចាប់យកជំនាញនេះដែរ​ ដូចជា​កញ្ញា ស៊ាប កល្យាណ កំពុងសិក្សាឆ្នាំទី៣ ជំនាញវិស្វកម្មសំណង់ស៊ីវិល នៅវិទ្យាស្ថានជាតិពហុបច្ចេកទេសអង្គរ(NPIA) ស្ថិតក្នុងខេត្ដសៀមរាប។ មានដើមកំណើត​នៅខេត្ដឧត្ដរមានជ័យ កល្យាណ បានចាកចេញពីស្រុក​ដើម្បីបន្ដចាប់ក្ដីស្រមៃរបស់ខ្លួន។ ​កញ្ញារៀបរាប់ថា​ ការចូលរៀនជំនាញនេះមិនមែនជារឿងចៃដន្យឡើយ ប៉ុន្ដែជាការតាំងចិត្ដជម្នះរាល់បញ្ហាលំបាក និងសម្លឹង​វែងឆ្ងាយពីទីផ្សារការងារនៅពេលអនាគត។ ​ជាមួយគ្នា និស្សិតរូបក៏ចង់បង្ហាញឱ្យឃើញថា ជំនាញវិស្វកម្មសំណង់ស៊ីវិលមិនមែនរៀនបានតែបុរសទេ ស្ដ្រីក៏អាចរៀនបានដូចគ្នា។ ​ដូច្នេះខ្លួនលើកទឹកចិត្ដស្ដ្រីដែលចង់រៀនជំនាញនេះហើយនៅស្ទាក់ស្ទើរ សូមមានភាពក្លាហាននិងតាំងចិត្ដថាខ្លួនពិតជាអាចធ្វើបាន៕​ ============= 🌐អានព័ត៌មាន 👉Facebook 👉Telegram 👉TikTok 👉YouTube 👉IOS 👉Android

ក្រោយពិនិត្យឃើញមានការតាំងលក់អាវយឺតដែលរំលេចនូវខ្លឹមសារគ្រោតគ្រាត មិនសមរម្យ ក្រុមការងារមន្ទីរវប្បធម៌ និងវិចិត្រសិល្បៈខេត្តកំពង់ធំ សហការជាមួយរដ្ឋបាលស្រុកប្រាសាទសំបូរ បានចុះទៅអប់រំណែនាំអាជីវករដែលបានដាក់តាំងលក់អាវយឺតដែលមានរំលេចខ្លឹមសារមិនសមរម្យ និងអសុរោះ។ ជាមួយគ្នា អាជីវករត្រូវបានណែនាំឱ្យ ធ្វើកិច្ចសន្យាបញ្ឈប់ការតាំងបង្ហាញ និងលក់ដូរសំលៀកបំពាក់ដែលមានរំលេចនូវខ្លឹមសារ គ្រោតគ្រាត មិនសមរម្យ អសុរោះ ទាំងនេះ ដែលជាទង្វើអសីលធម៌នៅក្នុងសង្គម៕ ============= 👉Facebook 👉Telegram 👉TikTok 👉YouTube 👉IOS 👉Android

ជនល្មើសត្រូវតែបង្ក្រាប! តែអភិបាលខេត្ដក៏មិនអនុញ្ញាតឱ្យឡានចតសម្រាកពេលយប់នៅ​តំបន់ផ្លូវវាងក្រុងពោធិ៍សាត់ទៀតដែរ! ============= លោក ខូយ រីដា អភិបាលខេត្តពោធិ៍សាត់ បានបញ្ជាក់ប្រាប់វិទ្យុវាយោថា លោកបានដាក់កងកម្លាំងល្បាតមិនឱ្យមានរថយន្តណាមកឈប់ចតលើចញ្ចើមផ្លូវដើម្បីសម្រាកពេលយប់នៅតំបន់ផ្លូវវាងក្រុងពោធិ៍សាត់ទៀតទេ ដើម្បីកុំឱ្យមានបញ្ហាដល់តៃកុងឡាន។ ម្យ៉ាងឡានមួយចំនួនដែលមកឈប់សម្រាក បានធ្វើឱ្យខូចហេដ្ឋារចនាសម្ព័ន្ធសួនច្បារ ដែលតម្រូវឱ្យមានការជួសជុលជាបន្តបន្ទាប់។ លោកសង្កត់ធ្ងន់ថា ចោរពិតប្រាកដស្រួលរក ប៉ុន្តែចោរលួចខ្លួនឯងហើយស្រែកថាចោរលួច គឺពិបាកចាប់ហើយចាប់មិនបានទេ។ ============= 🌐អានព័ត៌មាន 👉Facebook 👉Telegram 👉TikTok 👉YouTube 👉IOS 👉Android

រញ្ជួយដីកម្រិត៤.៣រ៉ិចទ័របានកើតឡើងនៅប្រទេសឡាវក្បែរភាគឦសានប្រទេសថៃ ============= រញ្ជួយដីកម្រិត៤.៣រ៉ិចទ័របានកើតឡើងនៅប្រទេសឡាវ នៅយប់រំលងអធ្រាត្រឈានចូលថ្ងៃទី២៧ខែសីហាឆ្នាំ២០២៦នេះ ដោយចំណុចកណ្តាលរបស់វាស្ថិតនៅចម្ងាយ​ប្រហែល២៨៣គីឡូម៉ែត្រ ភាគឦសានRim Khong ក្នុងស្រុក Chiang Khong ខេត្ត Chiang Rai​ប្រទេសថៃ។ បើតាមសារព័ត៌មានថៃThe Nation ការញ្ជួយផែនដីបានកើតឡើងនៅម៉ោង២៖២១នាទី​យប់ថ្ងៃព្រហស្បតិ៍នេះ នៅជម្រៅ១០គីឡូម៉ែត្រ។ ភ្លាមៗមិនទាន់មានសេចក្តីរាយការណ៍អំពីការខូចខាតនៅឡើយទេ ខណៈការរញ្ជួយដីកម្រិតនេះ អាចធ្វើឱ្យវត្ថុក្នុង​ផ្ទះរង្គើ និងបង្អួចញ័រ។ យ៉ាងណាមិញ ថៃបានណែនាំ​ប្រជាជន​ដែលរស់នៅតំបន់ក្បែរនោះ ឱ្យតាមដានព័ត៌មាន​ផ្លូវការនិងបន្តតាមដានស្ថានការណ៍។ ============= 🌐អានព័ត៌មាន 👉Facebook 👉Telegram 👉TikTok 👉YouTube 👉IOS 👉Android