Tikvah-University

"የመንግሥት ከፍተኛ ትምህርት ተቋማት ፕሬዝዳንት እና ምክትል ፕሬዝዳንት አሰያየም መመሪያ ቁጥር 1146/2018" ምን ምን አካቷል? ትምህርት ሚኒስቴር በመንግሥት ከፍተኛ ትምህርት ተቋማት ፕሬዝዳንቶች እና ምክትል ፕሬዝዳንቶች አሰያየምን የሚገዛ አዲስ መመሪያ (መመሪያ ቁጥር 1146/2018) በዚህ ወር ይፋ አድርጓል። በዚiህ ወር ይፋ የሆነው መመሪያው በከፍተኛ ትምህርት ተቋማት ውስጥ የነበረውን የአመራር አሰያየም ስርዓት በመቀየር፣ በብቃትና በውድድር ላይ የተመሠረተ አሰራር የሚተገብር ነው። በዩኒቨርሲቲዎች እየተከናወኑ የሚገኙ የሪፎርም ስራዎችን ለመምራት በሙያቸው የበሰሉ፣ በስነ-ምግባር የታነጹና በዩኒቨርሲቲው ማኅበረሰብ ዘንድ ቅቡልነት ያላቸው አመራሮች እንደሚያስፈልጉ መመሪያው ያትታል፡፡ አዲሱ መመሪያ የአመራር ምርጫው ግልጽ በሆነ የነጥብ ድልድል (30/30/40) እንዲመራ ደንግጓል። በዚህም ትምህርት ዝግጅትና አካዳሚክ ማዕረግ 30 በመቶ ነጥብ የሚይዝ ሲሆን፤ የስራ ልምድ 30 በመቶ ነጥብ እና ስትራቴጂያዊ ዕቅድና አቀራረብ (40 በመቶ) ይይዛል። ተወዳዳሪዎች የተቋሙን ችግሮች እንዴት እንደሚፈቱና ወደፊት እንዴት እንደሚመሩት የሚያሳይ ዕቅድ ለዩኒቨርሲቲው ካውንስልና ለቦርድ አባላት በዝርዝር ማቅረብ ይጠበቅባቸዋል። የምልመላ ሒደቱ በሁለት ገለልተኛ ኮሚቴዎች (4 አባላት ባሉት የእጩ ተወዳዳሪ አፈላላጊ ኮሚቴ እና 7 አባላት ባሉት የምልመላና መራጭ ኮሚቴ) እንዲመራ ይደረጋል። በመንግሥት ከፍተኛ ትምህርት ተቋማት ውስጥ ለአመራርነት የሚታጩ ተወዳዳሪዎች በሙስና፣ በእምነት ማጉደልና ከስነ-ምግባር ጋር በተያያዙ ከባድ ወንጀሎች ተከስሰው ጥፋተኛ ያልተባሉና በሥራ አፈጻጸማቸው ላይ ተጽዕኖ የሚያሳድር የፍትሐብሔር ክስ የሌለባቸው መሆን አለባቸው። በተጨማሪም እጩዎቹ ኢትዮጵያዊ ወይም ትውልደ ኢትዮጵያዊ መሆን የሚጠበቅባቸው ሲሆን፤ ለኃላፊነት ከመመረጣቸው በፊት የጡረታ ዕድሜያቸው ሳይደርስ ሙሉ የሥራ ዘመን ማገልገል የሚችሉ መሆን ይኖርባቸዋል። የአካዳሚክ ደረጃን በተመለከተ፣ ለፕሬዝዳንትነት የሚወዳደሩ ወንድ እጩዎች ቢያንስ የረዳት ፕሮፌሰርነትና ከዚያ በላይ ማዕረግ ሊኖራቸው ይገባል። በማንኛውም የመንግሥት ዩኒቨርሲቲ ውስጥ በተከታታይ ሁለት ጊዜ በፕሬዝዳንትነት ያገለገለ አመራር በድጋሚ መወዳደር አይችልም፤ ሆኖም በምክትል ፕሬዝዳንትነት ሁለት ጊዜ ያገለገለ አመራር ለፕሬዝዳንትነት ቦታ መወዳደር እንደሚችል በመመሪያው ተመላክቷል። ለፕሬዝዳንትነት የሚወዳደር እጩ ቢያንስ 2 ዓመት በፕሬዝዳንትነት ወይም 3 ዓመት በምክትል ፕሬዝዳንትነት/ዲንነት ያገለገለ መሆን አለበት። መመሪያው የሴቶችን ተሳትፎ ለማበረታታት ልዩ ድንጋጌዎችን ያስቀመጠ ሲሆን፣ በቂ የሴት እጩዎች በሌሉበት ወቅት የአካዳሚክ ማዕረግ ሳይጠበቅባቸው በሁለተኛ ዲግሪ እንዲወዳደሩ ዕድል ይሰጣል። እንደ መመሪያው ገለጻ፣ የዩኒቨርሲቲ ፕሬዝዳንት የአንድ ጊዜ የአገልግሎት ዘመን 6 ዓመት ሲሆን፤ የምክትል ፕሬዝዳንቶች ደግሞ 4 ዓመት ይሆናል። የዩኒቨርሲቲው ፕሬዚዳንት አንድ የስራ ዘመኑን አጥናቆ ለሁለተኛ ዙር ያለ ውድድር እንዲቀጥል የሚደረገው የተቋሙ የስራ አፈጻጸም ከፍተኛ ሲሆን እና ይህም በትምህርት ሚኒስቴር ሲጸድቅ ብቻ ይሆናል። ይሁን እንጂ አመራሩ በስልጣን ዘመኑ በየሦስት ወሩ በቦርዱ ይገመገማል። ውጤቱ በሁለት ተከታታይ የስድስት ወር ግምገማዎች ከ60 በመቶ በታች ከሆነ፣ በጤና እክል ስራውን ማከናወን ካልቻለ፣ ወይም በከባድ የዲሲፕሊንና የሙስና ተግባር ላይ ከተሰማራ ከኃላፊነቱ እንዲነሳ ለሚኒስቴሩ ሀሳብ ሊቀርብ ይችላል። በምልመላና ምርጫ ሂደቱ ላይ ቅሬታ ያለው ማንኛውም ተወዳዳሪ፣ ውጤቱ በይፋ በተገለጸ በ10 ቀናት ውስጥ ለዩኒቨርሲቲው ቦርድ ቅሬታውን ማቅረብ ይችላል። በቦርዱ ውሳኔ ካልተስማማ ደግሞ ለትምህርት ሚኒስቴር ይግባኝ የማለት መብቱ የተጠበቀ መሆኑን መመሪያው ይደነግጋል። @tikvahuniversity