News Of Myanmar

စစ်ကိုင်းတိုင်းဒေသကြီး ဝန်ကြီးချုပ် ဦးကိုလေး မုံရွာခရိုင်အတွင်းရှိ ရပ်ကွက်/ကျေးရွာ အုပ်စုအုပ်ချုပ်ရေးမှူးများ လုပ်ငန်းစွမ်းဆောင်ရည်မြှင့်မားရေး သင်တန်းဖွင့်ပွဲအခမ်းအနား တက်ရောက်   ဇူလိုင် ၁၊ ၂၀၂၆   စစ်ကိုင်းတိုင်းဒေသကြီး၊ မုံရွာခရိုင်အတွင်းရှိ ရပ်ကွက်/ကျေးရွာအုပ်စု အုပ်ချုပ်ရေးမှူးများ လုပ်ငန်းစွမ်းဆောင်ရည်မြှင့်မားရေး သင်တန်းဖွင့်ပွဲအခမ်းအနားကို ဇူလိုင်လ ၁ ရက်၊ မွန်းလွဲပိုင်းတွင် မုံရွာခရိုင် အထွေထွေအုပ်ချုပ်ရေးဦးစီးဌာနရုံးရှိ မြသလ္လာခန်းမတွင်  ကျင်းပပြုလုပ်ရာ သင်တန်းဖွင့်ပွဲ အခမ်းအနားသို့ တိုင်းဒေသကြီးဝန်ကြီးချုပ် ဦးကိုလေး၊ တိုင်းဒေသကြီး အစိုးရအဖွဲ့ဝင်များ၊ မုံရွာခရိုင်/မြို့နယ် အထွေထွေအုပ်ချုပ်ရေးဦးစီးဌာနမှ အုပ်ချုပ်ရေးမှူးများ၊ ခရိုင်/မြို့နယ်အဆင့် ဌာနဆိုင်ရာများ၊ မုံရွာခရိုင်အတွင်းရှိ ရပ်ကွက်/ ကျေးရွာအုပ်စု အုပ်ချုပ်ရေးမှူးများ တက်ရောက်ကြသည်။   ဦးစွာ တိုင်းဒေသကြီးဝန်ကြီးချုပ် ဦးကိုလေးက ရပ်ကွက်/ကျေးရွာအုပ်စု အုပ်ချုပ်ရေးမှူးများသည် ‌ဒေသန္တရအုပ်ချုပ်ရေးယန္တရား၏ အဓိကမောင်းနှင်အားဖြစ်သည့်အတွက် ရပ်ကွက်/ကျေးရွာအုပ်စု အုပ်ချုပ်ရေးမှူးများအနေဖြင့် မိမိတို့၏လုပ်ငန်းတာဝန်နှင့် လုပ်ပိုင်ခွင့်များအား သိရှိနားလည်ပြီး အုပ်ချုပ်ရေးဆိုင်ရာ ပညာရပ်များအား လေ့လာဆည်းပူးသင်နိုင်စေရန်၊ အုပ်ချုပ်ရေးမှူးကောင်းများ ဖြစ်လာစေရန်နှင့် ဥပဒေ၊ နည်းဥပဒေ၊ လုပ်ထုံးလုပ်နည်းများနှင့်အညီ ပြည်သူ့အကျိုးပြုလုပ်ငန်းများအား စွမ်းဆောင်ရည်ပြည့်ဝစွာဖြင့် ထမ်းဆောင်နိုင်စေရန်ဆိုသည့် ရည်ရွယ်ချက်ဖြင့် ယခုသင်တန်းအား ဖွင့်လှစ်ပေးရခြင်း ဖြစ်ပါကြောင်း၊ ရပ်ကွက်/ကျေးရွာအုပ်စု အုပ်ချုပ်ရေးမှူးများအနေဖြင့် မိမိတို့တာဝန် ယူဆောင်ရွက်ရသည့် ရပ်ကွက်/ကျေးရွာအုပ်စုများ၌ တရားဥပဒေစိုးမိုးရေး၊ ရပ်ကွက်အေးချမ်းသာယာရေး၊ ဒေသဖွံ့ဖြိုးရေး၊ ပြည်သူ့အကျိုးပြုလုပ်ငန်းများ ဆောင်ရွက်သည့်အခါတွင်လည်း ဥပဒေနှင့်အညီ တာဝန်ယူ၊ တာဝန်ခံစိတ်အပြည့်ဖြင့် ဆောင်ရွက်သွားကြရန်နှင့် လုပ်ငန်းများဆောင်ရွက်ရာတွင်လည်း အဂတိတရားကင်းရှင်းစွာဖြင့် အုပ်ချုပ်ရေးလုပ်ငန်းများအား ရပ်ရွာပြည်သူများနှင့်အတူ ဝိုင်းဝန်းပူးပေါင်း ဆောင်ရွက်သွားကြရန် လိုအပ်ပါကြောင်း ပြောကြားသည်။      ယင်းနောက် တိုင်းဒေသကြီးဝန်ကြီးချုပ်နှင့် တာဝန်ရှိသူများက ရပ်ကွက်/ကျေးရွာ အုပ်စုအုပ်ချုပ်ရေးမှူးများနှင့် စုပေါင်းမှတ်တမ်းတင် ဓါတ်ပုံရိုက်ကူးကာ အုပ်ချုပ်ရေးမှူးများအား ရင်းရင်းနှီးနှီးလိုက်လံ နှုတ်ဆက်ခဲ့ကြသည်။   အဆိုပါ လုပ်ငန်းစွမ်းဆောင်ရည်မြှင့်မားရေးသင်တန်းသို့ မုံရွာခရိုင်အတွင်းရှိ မြို့နယ် ၄ မြို့ဖြစ်သည့် မုံရွာ၊ ချောင်းဦး၊ ဘုတလင်၊ အရာတော်မြို့နယ်များမှ ရပ်ကွက်/ ကျေးရွာအုပ်စု အုပ်ချုပ်ရေးမှူး (၄၅)ဦးအား ဇူလိုင်လ ၁ ရက်နေ့မှ ဇူလိုင်လ ၃၁ ရက်နေ့အထိ (၁) လအကြာ စာတွေ့၊လက်တွေ့ သင်ကြားပို့ချ ပေးသွားမည်ဖြစ်ကြောင်းသိရသည်။

ဒုတိယဝန်ကြီး ဦးမျိုးမြင့် တီးတိန်မြို့ စည်ပင်သာယာဈေးများ သွားရောက်ကြည့်ရှု ဇူလိုင် ၁၊ ၂၀၂၆ ဆောက်လုပ်ရေးဝန်ကြီးဌာန ဒုတိယဝန်ကြီး ဦးမျိုးမြင့်သည် ချင်းပြည်နယ်အတွင်း ပြန်လည်ထူထောင်ရေးနှင့် ပြန်လည်တည်ဆောက်ရေးကော်မတီဝင်များနှင့်အတူ ဇွန် ၂၉ ရက်တွင် တီးတိန်မြို့ စည်ပင်သာယာဈေး (မြို့မ) တွင် ဆိုင်ခန်းများ ဖွင့်လှစ်ရောင်းချနေမှုနှင့် စကောလမ်းရပ်ကွက် စည်ပင်သာယာဈေးတွင် ဆိုင်ခန်းများ ဖွင့်လှစ်ရောင်းချနေမှုတို့ကို သွားရောက်ကြည့်ရှုအားပေးသည်။ ထို့နောက် တီးတိန်မြို့နယ် ရှောင်စောန်းစံပြကျေးရွာ၌ အခြေခံပညာမူလတန်းလွန်ကျောင်း၌ ကျောင်းအုပ်ကြီး၊ ဆရာ ဆရာမများနှင့်တွေ့ဆုံပြီး ကျောင်းလိုအပ်ချက်များကို တာဝန်ရှိသူများနှင့် ပေါင်းစပ်ညှိနှိုင်းဆောင်ရွက်ပေးကာ ကျေးရွာအတွင်း လှည့်လည်ကြည့်ရှုသည်။ ယင်းနောက် လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာနက လမင်းစီမံချက်ဖြင့် ရှောင်စောန်းစံပြကျေးရွာတွင် နိုင်ငံသားစိစစ်ရေးကတ်နှင့် UID ကတ်ထုတ်ပေးနေမှုကို ကြည့်ရှုအားပေးခဲ့ကြောင်း သိရသည်။

လိုင်စင်သက်တမ်းတိုးသည့် ဆိုင်ကယ်များ ဘေးတွဲတပ်ဆင်အသုံးမပြုရန် ခံဝန်ထိုးရ၊ မလိုက်နာပါကအရေးယူခြင်းခံရမည်ဟုထုက်ပြန် NOM၊ဇူလိုင်၂၊၂၀၂၆ ရန်ကုန်တိုင်းအတွင်းရှိ ဆိုင်ကယ်များလိုင်စင်သက်တမ်းတိုး ရာတွင် ယမန်နေ့(ဇူလိုင်၁ရက်)မှစ၍ ဘေးတွဲတပ်ဆင်အသုံးမပြုရန် ခံဝန်ထိုးခဲ့ရပြီိိး မလိုက်နာပါက ၂၀၂၀ ပြည့်နှစ် ယာဥ်အန္တရာယ်ကင်းရှင်းရေးနှင့် မော်တော်ယာဥ် စီမံခန့်ခွဲမှု ဥပဒေပုဒ်မ ပုဒ်မ ၉၅နှင့် ပုဒ်မ၉၆အ အရေးယူခြင်းခံရမည်ဖြစ်ကြောင်းသန်လျင်မြို့နယ်ကညနမှသတင်းထုတ်ပြန်ထားကြောင်းသိရသည်။ ရန်ကုန်မြို့တွင် ဆိုင်ကယ်စီးခွင့်ပြုထားသည့် မြို့နယ်များ၌ ဆိုင်ကယ်လိုင်စင် သက်တမ်းတိုးဆောင်ရွက်သူများကို ဘေးတွဲပြောင်းလဲအသုံးမပြုကြောင်း ခံဝန်ကတိပြုလွှာတွင် လက်မှတ်ရေးထိုးခိုင်းခဲ့ပြီးလိုက်နာခြင်းမပြုပါက ပုဒ်မ ၉၅ တားမြစ်ချက် ဖောက်ဖျက်မှု(၃) နှစ်ထက်မပိုသော ထောင်ဒဏ်ဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်နိုင်ပြီး ပုဒ်မ ၉၆ ကျပ် ၃၀၀၀၀ ထက်မပိုသော ဒဏ်ငွေချမှတ်မည်ဟုသိရသည်။ "မရှိလို့လုပ်စားတာကိုလက်ခံပါတယ်ဒါပေမဲ့ စည်းကမ်းလေးနဲ့သွားလာမောင်းနှင်မယ်ဆိုပိုပြီးကောင်းတာပေါ့တစ်ချို့ကစည်းကမ်းမဲ့လမ်းပြောင်းပြန်မောင်းချင်သလိုမောင်း ဝင်ချင်သလိုဝင်ထွက်ချင်သလိုထွက် လုပ်နေတာတော့မကောင်းပါဘူး သူတို့သာစည်းကမ်းတကျမောင်းရင် တစ်ကယ်အသုံးပြုနေတဲ့ပြည်သူ တွေစျေးသွားတာ၊ ကျောင်းပို့တာ၊ ဆေးခန်းသွားတာတွေအတွက်အများကြီးအသုံးတည့်ပါတယ်" မြောက်ဥက္ကလာပမြို့နယ်မှဒေသခံတစ်ဦးကပြောသည်။ ပြီးခဲ့သည့် ဇွန် ၂၂ ရက်က ရန်ကုန်တိုင်းလွှတ်တော်တွင်မရမ်းကုန်းမြို့နယ် ကိုယ်စားလှယ်အမှတ် (၁) ဦးမင်းသိန်းထွန်းက လွန်ခဲ့သည့် ရှစ်နှစ်ခန့်မှ ရန်ကုန်မြို့တွင် ပြေးဆွဲသွား လာနေသော ဘေးတွဲယာဉ်များကို တရားဝင် လိုင်စင်ထုတ်ပေးရန် အစီအစဉ်ရှိ မရှိအား မေးမြန်းခဲ့ရာ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ဝင်းတင့်က တရားဝင်တင်သွင်းခဲ့ခြင်းမရှိ၍ တရားဝင် မှတ်ပုံတင်ပေး၍ မရကြောင်းနှင့် ၎င်း အစား တရားဝင် တင်သွင်းခွင့်ပြုထားသည့် သုံးဘီးဆိုင်ကယ် များ အစားထိုးတင်သွင်းလာပါက ကညန ဥပဒေနှင့်အညီ ခွင့်ပြုချက်ထုတ်ပေးသွားမည်ဟု ပြန်လည်ဖြေကြားခဲ့သည်။

သင်္ဃန်းကျွန်းမြို့နယ်လက်ဆယ်ကန်အတွင်း အမျိုးသားတစ်ဦး ရေနစ်သေဆုံး NOM၊ဇူလိုင်၂၊ ၂၀၂၆ ရန်ကုန်တိုင်းဒေသကြီး၊ သင်္ဃန်းကျွန်းမြို့နယ်၊ လေးထောင်ကန်လမ်းမကြီးရှိ (BOC) ကားမှတ်တိုင်အနောက်ဘက် လက်ဆယ်ကန်အတွင်း အမျိုးသားတစ်ဦး ရေနစ်သေဆုံးမှု ဖြစ်ပွားခဲ့ကြောင်းလူမှုကူညီရေးအသင်းမှ သိရသည်။ ဖြစ်စဉ်မှာ ယမန်နေ့ ညနေ ၄ နာရီကျော်ခန့်က ဖြစ်ပွားခဲ့ခြင်းဖြစ်ပြီး၊ သေဆုံးသူမှာ အသက် ၃၀ နှစ်ဝန်းကျင်အရွယ် အမျိုးသားတစ်ဦးဖြစ်ကာ လက်ရှိအချိန်အထိ အမည်နှင့် နေရပ်လိပ်စာကို စုံစမ်းအတည်ပြုနိုင်ခြင်း မရှိသေးကြောင်း ကူညီကယ်ဆယ်ရေးလုပ်ငန်းများ ဆောင်ရွက်ပေးခဲ့သည့် Medical လူငယ်များ (ရန်ကုန်) လူမှုကူညီရေးအသင်းက အသိပေးထားသည်။ သေဆုံးသူ၏ ရုပ်အလောင်းကို သင်္ဃန်းကျွန်း စံပြဆေးရုံကြီးသို့ ပို့ဆောင်ထားကြောင်း သိရသည်။

တပ်မတော်ကာကွယ်ရေးဦးစီးချုပ် ဗိုလ်ချုပ်ကြီး ရဲဝင်းဦးအား ထိုင်းဘုရင့်တပ်မတော်မှ Lt. Gen. Warathep Boonya ဦးဆောင်သည့်ကိုယ်စားလှယ်အဖွဲ့လာရောက်ဂါရဝပြုတွေ့ဆုံ။ ဇူလိုင် ၁၊ ၂၀၂၆

သတ်မှတ် စစ်မှုထမ်းကာလပြည့်မြောက်ခဲ့သည့် ပြည်သူ့စစ်မှုထမ်းအမှတ်စဉ် (၃/၂၀၂၄) မှ ပြည်သူ့စစ်မှုထမ်းများအား ပြည်သူ့စစ်မှုထမ်းတံဆိပ်နှင့် ဂုဏ်ပြုမှတ်တမ်းလွှာများ ထိုက်တန်စွာချီးမြှင့်ပေးအပ် ဇူလိုင် ၁၊ ၂၀၂၆

တပ်မတော်ကာကွယ်ရေးဦးစီးချုပ် ဗိုလ်ချုပ်ကြီး ရဲဝင်းဦး အား ထိုင်းဘုရင့်တပ်မတော်မှ Lt. Gen. Warathep Boonya ဦးဆောင်သည့်ကိုယ်စားလှယ်အဖွဲ့လာရောက်ဂါရဝပြုတွေ့ဆုံ။

နောင်ချိုမြို့နယ်၊ တောင်ရှည်ကျေးရွာရှိ နေအိမ်ခြံဝင်းတစ်ခုအတွင်း၌ TNLA အကြမ်းဖက်အဖွဲ့ ထောင်ထားသည့် မိုင်းအားနင်းမိပေါက်ကွဲမှုကြောင့် အပြစ်မဲ့အဘိုးအိုတစ်ဦးဒဏ်ရာရ NOM ဇူလိုင် ၁၊ ၂၀၂၆ ရှမ်းပြည်နယ် (မြောက်ပိုင်း)၊ နောင်ချိုမြို့နယ်၊ တောင်ရှည်ကျေးရွာနေ ဦးလှမောင် (၈၀) နှစ်သည် ဇွန်လ ၃၀ ရက်နေ့ မွန်းလွဲ ၃ နာရီ ၄၅ မိနစ်အချိန်၌ ၎င်း၏ နေအိမ်ခြံဝင်းအတွင်း အလုပ်လုပ်ကိုင်နေစဉ် TNLA အကြမ်းဖက် အဖွဲ့ထောင်ထားသည့် မိုင်းတစ်လုံးအား နင်းမိပေါက်ကွဲခဲ့မှုကြောင့် ၎င်းတွင် မိုင်းပေါက်ကွဲစထိမှန် ဒဏ်ရာများရရှိခဲ့၍ ဆေးကုသနိုင်ရေး တောင်ရှည်တိုက်နယ်ဆေးရုံသို့ ပို့ဆောင်ထားရှိကြောင်း သိရသည်။ NOM

နောင်ချိုမြို့နယ်၊ ယာပြင်ကျေးရွာအနီးတွင် TNLA အကြမ်းဖက်အဖွဲ့ထောင်ထားသည့် မိုင်းအားနင်းမိပေါက်ကွဲမှုကြောင့် အပြစ်မဲ့အရပ်သားပြည်သူတစ်ဦး ထိခိုက်ဒဏ်ရာရ NOM ဇူလိုင် ၁၊ ၂၀၂၆ ရှမ်းပြည်နယ် (မြောက်ပိုင်း)၊ နောင်ချိုမြို့နယ်ပြည်သူ့ဆေးရုံသို့ ဇွန်လ ၃၀ ရက်နေ့ မွန်းလွဲ ၂ နာရီ ၅၀ မိနစ်အချိန်၌ မိုင်းပေါက်ကွဲစထိမှန်ဒဏ်ရာဖြင့် အမျိုးသားတစ်ဦးရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေး၍ ဖြစ်စဉ်အား စိစစ်ခဲ့ရာ မွန်းလွဲ ၂ နာရီတွင် နောင်ချိုမြို့နယ်၊ ယာပြင်ကျေးရွာနေ ဦးမိုးဦး (ခ) ခင်မောင်ဦး (၃၆) နှစ်သည် ကျေးရွာ၏ အရှေ့တောင်ဘက် ၃ မိုင်ခန့်အကွာရှိ ကြံစိုက်ခင်းအတွင်း အလုပ်လုပ်ကိုင်နေစဉ် TNLA အကြမ်းဖက်အဖွဲ့ထောင်ထားသည့် မိုင်းတစ်လုံးအား နင်းမိပေါက်ကွဲခဲ့မှုကြောင့် ၎င်းတွင် ထိခိုက်ဒဏ်ရာများရရှိခဲ့ခြင်းဖြစ်ကြောင်းသိရသည်။ NOM

ရည်းစားဖြင့်ဟိုတယ်တွင်အတူနေပြီးစစ်မှုထမ်းပါသည်ဆိုကါမိဘထံမှငွေကျပ်သိန်းတစ်ရာတောင်းသည့်သားဖြစ်သူနှင့်ရည်းစားတရာဝန်မအားဖမ်းမိ NOM

စေတုတ္တရာမြို့နယ်၊ ငလဲကျေးရွာနေ ကျေးရွာအုပ်စုအုပ်ချုပ်ရေးမှူးကို PDF အကြမ်းဖက်အဖွဲ့က ဖမ်းဆီးခေါ်ဆောင်သတ်ဖြတ် NOM ဇူလိုင် ၁၊ ၂၀၂၆ မကွေးတိုင်းဒေသကြီး၊ စေတုတ္တရာမြို့နယ်၊ ငလဲကျေးရွာနေ ကျေးရွာအုပ်စုအုပ်ချုပ်ရေးမှူး ဦးပေါ်လာ (၅၆) နှစ်သည် ဇွန်လ ၃၀ ရက်နေ့ နံနက် ၁၀ နာရီအချိန်၌ ၎င်း၏နေအိမ်တွင်ရှိနေစဉ် PDF အကြမ်းဖက်သမားငါးဦးခန့်ရောက်လာပြီး အကြမ်းဖက်ခြိမ်းခြောက်၍ ဖမ်းဆီးခေါ်ဆောင်သွားကာ ကျေးရွာ၏ အနောက်တောင်ဘက် မီတာ ၃၅၀ ခန့်အကွာ စက်လှေဆိပ်သို့ သွားသည့် တောလမ်းအရောက် သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ဦးပေါ်လာတွင် ကျည်ထိမှန်ဒဏ်ရာများရရှိသေဆုံးသွားခဲ့ကြောင်းသိရသည်။ NOM

စမ်းချောင်းတွင် အလုပ်ရှင်ကို အလုပ်သမားဟောင်းဖြစ်သူက ကတ်ကြေးဖြင့်ထိုး NOM၊ဇူလိုင် ၁၊၂၀၂၆ ရန်ကုန်တိုင်း‌ေဒသကြီး၊ စမ်းချောင်းမြို့နယ်၊ သံတံတားရပ်ကွက်၊ ဓမ္မိကဝတီလမ်းတွင် ဇူလိုင် ၁ရက် မွန်းလွှဲ ၂နာရီ ၅၀မိနစ်ခန့်က အလုပ်ရှင်ကို အလုပ်သမားဟောင်းဖြစ်သူက ကတ်ကြေးဖြင့်ထိုးမှု ဖြစ်ပွားကြောင်း သိရသည်။ ဖြစ်စဉ်မှာသံတံတားရပ်ကွက်၊ ဓမ္မိကဝတီလမ်းနေသည့် ကိုနီနီချေ(၃၃နှစ်) ကို အလုပ်သမားဟောင်းဖြစ်သူ မောင်ကျော်သက်ထွေး(၂၁နှစ်)က ကတ်ကြေးနဲ့ထိုးသဖြင့် ပြတ်ရှဒဏ်ရာများရရှိကါရဲသူရိန်(စမ်းချောင်း)လူမှုကူညီရေးအသင်းယာဉ်ဖြင့် ဆေးရုံကြီးသို့ပို့ဆောင်ခဲ့ရကြောင်းသိရသည်။ ရွှေပေါက္ကံမြို့၊ ဆင်ဘုံရွာနေကတ်ကြေးဖြင့်ထိုးသူ မောင်ကျော်သက်ထွေးအား ယနေ့ ၃နာရီခွဲခန့်တွင် သံတားရပ်ကွက်၊ ဇေယျဝတီ (ဗဟို )လမ်း ၊အမှတ်(၃၉)(၆)လွှာအဆောင်မှ ဖမ်းဆီးရမိကြောင်း သိရသည်။ အဆိုပါဖြစ်စဥ်နှင့်ပတ်သတ်၍ စမ်းချောင်းမြို့မရဲစခန်းမှ မောင်ကျော်သက်ထွေး အား အမှုဖွင့်၍ ဥပဒေအရ အရေးယူဆောင်ရွက်လျှက်ရှိကြောင်း သိရသည်။

အကြမ်းဖက်အဖွဲ့အချင်းချင်း ပြန်ဓါးပြတိုက်။

နိုင်ငံတော်သမ္မတ တရုတ်နိုင်ငံသို့ သွားရောက်ခဲ့သည့်ခရီးစဉ်တွင် မြစ်ဆုံစီမံကိန်းနှင့် ပတ်သက်သည် များကို ဆွေးနွေးခဲ့ဟုဆို NOM ဇူလိုင် ၁၊၂၀၂၆ နိုင်ငံတော်သမ္မတ တရုတ်နိုင်ငံသို့ သွားရောက်ခဲ့သည့် ခရီးစဉ်အတွင်းမြစ်ဆုံစီမံကိန်း ပြန်လည်စတင်ရေးနှင့် ပတ်သက်သည့် ဆွေးနွေးမှုများကိုလည်း ဆောင်ရွက်ခဲ့သည်ဟု ဇွန်လ ၃၀ ရက်နေ့က နေပြည်တော်ရှိ နိုင်ငံတော်သမ္မတရုံးတွင် ပြုလုပ်ခဲ့သည့် သတင်းစာရှင်းလင်းပွဲတွင် နိုင်ငံတော်သမ္မတရုံး၏ ပြောရေးဆိုခွင့်ရှိသူ ဒေါက်တာခိုင်ခိုင်စိုးက ပြောကြားခဲ့သည်။ ဧရာဝတီမြစ်ဆုံဒေသတွင် ရေအားလျှပ်စစ်စီမံကိန်း အကောင်အထည် ဖော်နိုင်မည့် နေရာ (၇) နေရာရှိပြီးယင်းတို့အနက် မြစ်ဆုံနှင့် အနီးဆုံးဖြစ်သည့် ဧရာဝတီမြစ်ညာမြစ်ဝှမ်း ရေအားလျှပ်စစ်စီမံကိန်းတစ်ခုတည်းမှပင် လျှပ်စစ်ဓာတ်အား မဂ္ဂါဝပ် (၅,၆၀၀) အထိ ထုတ်လုပ်နိုင်မည်ဖြစ်ကြောင်းပြောကြားခဲ့သည်။ "အဓိက ကတော့ ဧရာဝတီမြစ်ဆုံ ရေအားလျှပ်စစ်စီမံကိန်းကို အကောင်အထည်ဖော်နိုင်ပါက မြန်မာနိုင်ငံတစ်နိုင်ငံလုံး၏ လျှပ်စစ်ဓာတ်အားလိုအပ်ချက်ကို ဖြည့်ဆည်းနိုင်မှာပါ။ အကျိုးသက်ရောက်မှုများနှင့် ပတ်သက်၍ ပညာရှင်တွေရဲ့ လေ့လာတွက်ချက်မှု ရလဒ်များကို တရားဝင် ထုတ်ပြန်ပေးသွားမှာပါ" ဟု နိုင်ငံတော်သမ္မတရုံး၏ ပြောရေးဆိုခွင့်ရှိသူ ဒေါက်တာခိုင်ခိုင်စိုးက ပြောကြားခဲ့သည်။ NOM

ရန်ကုန်မြို့လယ်ရှိ အမှိုက်ပုံးအတွင်း စွန့်ပစ်ထားသည့် မွေးကင်းစ ယောကျ်ားလေးကလေး၏ ရုပ်အလောင်းတွေ့ရှိ NOM ဇူလိုင် ၁၊ ၂၀၂၆ ရန်ကုန်တိုင်းဒေသကြီး၊ ကျောက်တံတားမြို့နယ်၊ အမှတ် (၆) ရပ်ကွက်၊ ၃၈ လမ်းနှင့် ဗန္ဓုလလမ်းထောင့်ရှိ အမှိုက်ပုံးတစ်ခုအတွင်း စွန့်ပစ်ထားသည့် မွေးကင်းစ ယောကျ်ားလေးကလေး၏ ရုပ်အလောင်းကို တွေ့ရှိခဲ့ကြောင်းသိရသည်။ အဆိုပါ ရုပ်အလောင်းကို ဇွန်လ ၃၀ ရက်နေ့တွင် တွေ့ရှိခဲ့ခြင်းဖြစ်ပြီး လင်းလက်လူမှုကူညီရေးအသင်းနှင့် ကျောက်တံတားမြို့နယ် ရဲတပ်ဖွဲ့ဝင်များက ရန်ကုန်ပြည်သူ့ဆေးရုံကြီးသို့ ပို့ဆောင်ပေးခဲ့ကြောင်း သိရသည်။ ဖြစ်စဉ်နှင့်ပတ်သက်၍ သက်ဆိုင်ရာ တာဝန်ရှိသူများက ဆက်လက် စုံစမ်းစစ်ဆေးလျက်ရှိကြောင်း သိရသည်။ NOM

မြန်မာနိုင်ငံဆိုင်ရာ အိန္ဒိယသံအမတ်ကြီး H.E. Mr. Abhay Thakur နှင့် အဖွဲ့ ရန်ကုန်တိုင်းဒေသကြီး ဝန်ကြီးချုပ်အား ဂါဝရပြုတွေ့ဆုံ ဇူလိုင် ၁၊ ၂၀၂၆ မြန်မာနိုင်ငံဆိုင်ရာ အိန္ဒိယသံအမတ်ကြီး H.E. Mr. Abhay Thakur နှင့် အဖွဲ့သည် ယမန်နေ့ နေ့လယ်ပိုင်းက ရန်ကုန်တိုင်းဒေသကြီး ဝန်ကြီးချုပ် ဦးအောင်နိုင်သူအား ရန်ကုန်တိုင်းဒေသကြီးအစိုးရအဖွဲ့ရုံး၊ အစည်းအဝေးခန်းမ (၁) တွင် ဂါဝရပြုတွေ့ဆုံခဲ့သည်။ ထိုသို့ တွေ့ဆုံစဉ် မြန်မာနိုင်ငံနှင့် အိန္ဒိယနိုင်ငံတို့အကြား ကုန်သွယ်မှုနှင့် ရင်းနှီးမြှုပ်နှံမှုများ၊ ချစ်ကြည်ရင်းနှီးမှုနှင့် ဒေသဖွံ့ဖြိုးရေးတိုးတက်ရေး ကိစ္စရပ်များကို ရင်းနှီးပွင့်လင်းစွာ ဆွေးနွေးခဲ့ကြပြီး အမှတ်တရလက်ဆောင်ပစ္စည်းများ အပြန်အလှန်ပေးအပ်ခဲ့ကြသည်။ ထို့နောက် မြန်မာနိုင်ငံဆိုင်ရာ အိန္ဒိယသံအမတ်ကြီး H.E. Mr. Abhay Thakur နှင့် အဖွဲ့က ရန်ကုန် တိုင်းဒေသကြီး ဝန်ကြီးချုပ် ဦးအောင်နိုင်သူနှင့် တိုင်းဒေသကြီးအစိုးရအဖွဲ့ဝင်များအား ရင်းရင်းနှီးနှီး နှုတ်ဆက်ခဲ့ကြောင်း သိရသည်။

တပ်မတော်ဆေးတက္ကသိုလ် (အမျိုးသား/အမျိုးသမီး) ဗိုလ်လောင်းများ ခေါ်ယူခြင်း   ၁။  လျှောက်ထားသူသည်- (က)     ၂၀၂၇ ခုနှစ်၊ ဇန်နဝါရီလ (၁) ရက်နေ့တွင် အသက် (၂၀) နှစ်ထက်မကြီးရ။           (ခ)       ပြည်ထောင်စုသမ္မတမြန်မာနိုင်ငံသား အိမ်ထောင်မရှိဖူးသူ (လူပျို/အပျို) ဖြစ်ရမည်။             (ဂ)       အနည်းဆုံးအရပ် (၅) ပေ၊ (၃) လက်မနှင့် ကိုယ်အလေးချိန် ပေါင် (၁ဝဝ) နှင့်အထက်ရှိရမည်။             (ဃ)     အမြင်အာရုံကြီးမားစွာချို့ယွင်းသူမဖြစ်စေရ။ (မျက်မှန်တပ်ဆင်သူများလည်း လျှောက်ထားနိုင်သည်။)             (င)       တက္ကသိုလ်ဝင်စာမေးပွဲတွင် သိပ္ပံဘာသာတွဲဖြင့် ဖြေဆိုအောင်မြင်သူဖြစ်ရမည်။  ၂။         လျှောက်လွှာများကို မိမိတို့နှင့်နီးစပ်ရာ တိုင်းစစ်ဌာနချုပ်များတွင် ၂၀၂၆ ခုနှစ်၊ ဇွန်လ (၂၉) ရက်နေ့မှစ၍ အခမဲ့ရယူနိုင်သည်။ ၃။  လျှောက်လွှာနှင့်အတူ အကျင့်စာရိတ္တကောင်းမွန်ကြောင်း သက်ဆိုင်ရာတိုင်းဒေသကြီး၊ ပြည်နယ်၊ မြို့နယ် ရဲတပ်ဖွဲ့စခန်းတစ်ခုခုမှ ထောက်ခံ စာ (မူရင်း)နှင့် ပတ်စ်ပို့အရွယ်ဓာတ်ပုံ (၃)ပုံ ပူးတွဲတင်ပြရမည်။ ၄။       လျှောက်လွှာကို ၂၀၂၆ ခုနှစ်၊ ဩဂုတ်လ (၂၇) ရက်နေ့နောက်ဆုံးထား၍ လျှောက်လွှာထုတ်ယူခဲ့သော တိုင်းစစ်ဌာနချုပ်များသို့ ပြန်လည်ပေးပို့ကြရမည်။ ၅။   သတ်မှတ်ချက်နှင့် ပြည့်စုံပြီး အရည်အချင်းပြည့်မီသော လျှောက်လွှာရှင်များသာ တပ်မတော်ဆေးတက္ကသိုလ် ဗိုလ်လောင်းသင်တန်း ဝင်ခွင့်အရည်အချင်းစစ်စာမေးပွဲကို ဖြေဆိုကြရမည်။ ၆။        တပ်မတော်ဆေးတက္ကသိုလ် ဗိုလ်လောင်းသင်တန်း ဝင်ခွင့်အရည်အချင်းစစ်စာမေးပွဲတွင် တက္ကသိုလ်ဝင် စာမေးပွဲသင်ရိုးညွှန်းတမ်းအတိုင်း အောက်ပါဘာသာရပ်များကို ဖြေဆိုကြရမည်-             (က)     အင်္ဂလိပ်စာ။             (ခ)       ဇီဝဗေဒ နှင့် ဓာတုဗေဒ။ ၇။        ဝင်ခွင့်အရည်အချင်းစစ်စာမေးပွဲကို ၂၀၂၆ ခုနှစ်၊ စက်တင်ဘာလ (၁၈) ရက်နေ့တွင် မိမိတို့လျှောက်လွှာ တင်သွင်းရာ တိုင်းစစ်ဌာနချုပ်တည်ရှိသည့်မြို့၌ ဖြေဆိုကြရမည်။ ၈။        ဝင်ခွင့်အရည်အချင်းစစ်စာမေးပွဲ ဖြေဆိုရမည့် နေရာနှင့်အချိန်ကို သတင်းစာမှ ကြော်ငြာပေးမည်။ ၉။        ဖြေဆိုရမည့်ခုံအမှတ်မှာ လျှောက်လွှာတွင်ဖော်ပြထားသည့် ခုံအမှတ်အတိုင်းဖြစ်သည်။ ၁၀။      ဝင်ခွင့်အရည်အချင်းစစ်စာမေးပွဲ ဖြေဆိုအောင်မြင်သူများသည် တပ်မတော်ဗိုလ်ရွေးအဖွဲ့တွင် ဝင်ရောက် အစစ်ဆေးခံရမည်။ တပ်မတော်ဗိုလ်ရွေးအဖွဲ့တွင် ဝင်ရောက်အစစ်ဆေးခံရန် အကြောင်းကြားစာများကို သက်ဆိုင်ရာတိုင်းစစ်ဌာနချုပ်များမှတစ်ဆင့် အချိန်မီပေးပို့သွားမည်။ ၁၁။      သတ်မှတ်ထားသည့်အချက်အလက်များကို တိကျပြည့်စုံစွာရေးသားဖော်ပြခြင်းမပြုသော လျှောက်လွှာများ၊ မမှန်မကန်ဖြည့်စွက်ရေးသားဖော်ပြသောလျှောက်လွှာများနှင့် အချိန်မီမရောက်ရှိသော လျှောက်လွှာများအား ထည့်သွင်းစဉ်းစားမည်မဟုတ်ပါ။ မိမိတို့ လျှောက်လွှာတင်သွင်းသည့်ဌာနတွင် ရွေးချယ်ခြင်းခံရသည်/မခံရသည်ကို သွားရောက်စုံစမ်းမေးမြန်းနိုင်သည်။  စစ်ရာထူးခန့်ချုပ်ရုံး ကာကွယ်ရေးဦးစီးချုပ်ရုံး(ကြည်း)

ရပ်ဝန်းနှင့် ပိုးလမ်းမစီမံကိန်း (BRI) အကောင်အထည်ဖော်ဆောင်ရွက်ရေး လုပ်ငန်းကော်မတီ၏ ပထမအကြိမ် ညှိနှိုင်းအစည်းအဝေး ကျင်းပ   ဇွန် ၃၀၊ ၂၀၂၆   ရပ်ဝန်းနှင့် ပိုးလမ်းမစီမံကိန်း (Belt and Road Initiative – BRI) အကောင်အထည်ဖော် ဆောင်ရွက်ရေးလုပ်ငန်းကော်မတီ၏ ပထမအကြိမ်ညှိနှိုင်းအစည်းအဝေးကို ယနေ့မွန်းလွဲ ၁ နာရီတွင် နိုင်ငံခြားရေးဝန်ကြီးဌာန စတုရင်္ဂဗလခန်းမ၌ ကျင်းပသည်။   အစည်းအဝေးတွင် ရပ်ဝန်းနှင့် ပိုးလမ်းမစီမံကိန်း အကောင်အထည်ဖော် ဆောင်ရွက်ရေး လုပ်ငန်းကော်မတီဥက္ကဋ္ဌ နိုင်ငံခြားရေးဝန်ကြီးဌာန ဒုတိယဝန်ကြီး ဦးကိုကိုကျော်က အဖွင့်အမှာ စကားပြောကြားပြီး တက်ရောက်လာသည့် လုပ်ငန်းကော်မတီ အဖွဲ့ဝင်များက ရပ်ဝန်းနှင့် ပိုးလမ်းမ စီမံကိန်း (BRI) မူဘောင်အောက်တွင် အကောင်အထည်ဖော် ဆောင်ရွက်လျက်ရှိသည့် စီမံကိန်းများနှင့်တိုးတက်မှုများ၊ ကော်မတီအနေဖြင့် မြန်မာနိုင်ငံ၏ အကျိုးစီးပွားဖြစ်ထွန်းစေရေးအတွက် ရပ်ဝန်းနှင့် ပိုးလမ်းမဆိုင်ရာ စီမံကိန်းများတွင် တက်ကြွစွာပါဝင် ဆောင်ရွက်ရေးနှင့် စီမံကိန်းများကို ဆက်လက်အကောင်အထည် ဖော်ဆောင်ရွက်ရေး၊ BRI အကောင်အထည်ဖော်ဆောင်ရွက်ရေး ဦးဆောင်ကော်မတီကို အထောက်အကူပြုရန် ဝန်ကြီးဌာနများအကြား ပေါင်းစပ်ညှိနှိုင်း ဆောင်ရွက်မှုတိုးမြှင့်ရေး၊ BRI စီမံကိန်းများ အကောင်အထည်ဖော်ရာတွင် မြန်မာနိုင်ငံနှင့် တရုတ်နိုင်ငံအကြား အပြန်အလှန် အကျိုးစီးပွား ဖြစ်ထွန်းသည့် ပူးပေါင်းဆောင်ရွက်မှု ဖြစ်စေရေးတို့နှင့် စပ်လျဉ်း၍ အမြင်ချင်း ဖလှယ်ဆွေးနွေးကြသည်။   အစည်းအဝေးသို့ ဝန်ကြီးဌာန ၂၃ ခု၊ ပြည်ထောင်စုစာရင်းစစ်ချုပ်ရုံးနှင့် နေပြည်တော်ကောင်စီတို့မှ ရပ်ဝန်းနှင့် ပိုးလမ်းမစီမံကိန်း အကောင်အထည်ဖော် ဆောင်ရွက်ရေး လုပ်ငန်းကော်မတီအဖွဲ့ဝင်များ တက်ရောက်ကြသည်။

ဒုတိယဝန်ကြီး ဦးမျိုးမြင့် ချင်းပြည်နယ်အတွင်း ပြန်လည်ထူထောင်ရေးနှင့် တည်ဆောက်ရေးလုပ်ငန်းများ ဆောင်ရွက်ရန်အတွက် ဘာသာရေးခေါင်းဆောင်များ၊ မြို့မိမြို့ဖများ၊ ဌာနဆိုင်ရာတာဝန်ရှိသူများနှင့်တွေ့ဆုံဆွေးနွေး   ဇွန် ၃၀၊ ၂၀၂၆   ဆောက်လုပ်ရေးဝန်ကြီးဌာန ဒုတိယဝန်ကြီး ဦးမျိုးမြင့်သည် ချင်းပြည်နယ်အတွင်း ပြန်လည်ထူထောင်ရေးနှင့် ပြန်လည်တည် ဆောက်ရေးကော်မတီဝင်များနှင့် အတူ ဇွန် ၂၈ ရက်တွင် ချင်းပြည်နယ်အတွင်း ပြန်လည်ထူထောင်ရေးနှင့် ပြန်လည်တည်ဆောက်ရေး လုပ်ငန်းများဆောင်ရွက်ရန် ဘာသာရေးခေါင်းဆောင်များ၊ မြို့မိမြို့ဖများ၊ ပြန်လည်ထူထောင်ရေးနှင့် ပြန်လည်တည်ဆောက်ရေးလုပ်ငန်းကော်မတီဝင်များနှင့် တွေ့ဆုံဆွေးနွေးသည်။   ပေါင်းစပ်ညှိနှိုင်းပေး   တွေ့ဆုံစဉ် ဒုတိယဝန်ကြီးက ပြန်လည်ထူထောင်ရေးနှင့် ပြန်လည်တည်ဆောက်ရေးလုပ်ငန်းများကို အချိန်နှင့်တစ်ပြေးညီ အကောင်အထည်ဖော်ဆောင်ရွက်နိုင်ရန် အားလုံးပူးပေါင်းဆောင်ရွက်ကြရန်နှင့် ပြန်လည်ထူထောင်ရေးဆောင်ရွက်ရာတွင် လုံခြုံရေးနှင့် တည်ငြိမ်အေးချမ်းရေးသည် အဓိကကျသည့်အတွက် မိမိတို့ရပ်ရွာ၊ မိမိတို့ဒေသအေးချမ်းအောင် ဝိုင်းဝန်းထိန်းသိမ်းပေးကြရန်လို အပ်ကြောင်း၊ ထို့ပြင်ဒေသတည် ငြိမ်အေးချမ်းရေးနှင့်ဖွံ့ဖြိုးတိုးတက်ရေးအတွက် မြို့မိမြို့ဖများ၊ ဌာနဆိုင်ရာတာဝန်ရှိသူများ ဝိုင်းဝန်းကြိုးပမ်းဆောင်ရွက်ကြရန်ပြော ကြားပြီး တင်ပြချက်များအပေါ် ပေါင်းစပ်ညှိနှိုင်းပေးသည်။   ထို့နောက် တီးတိန်မြို့နယ် လျှပ်စစ်အင်ဂျင်နီယာရုံးရှိ တီးတိန်မြို့အား လျှပ်စစ်ဓာတ်အားဖြန့်ဖြူးပေးနေသည့် 300 KVA ဒီဇယ် ဓာတ်အားပေးစက်ရုံကိုကြည့်ရှုခဲ့ကြောင်းနှင့် တီးတိန်မြို့အား ဇာလွှီးရေအားလျှပ်စစ်စက်ရုံရှိ 200 KW နှစ်လုံးနှင့် 300 KVA ဒီဇယ်ဓာတ် အားပေးစက်ရုံမှ 180 KW တို့ဖြင့် လျှပ်စစ်ဓာတ်အားကို ဖြန့်ဖြူးပေးလျက်ရှိကြောင်း သိရသည်။

တက္ကသိုလ်ဝင်စာမေးပွဲတွင် တစ်နိုင်ငံလုံး ဝိပ္ပံဘာသာတွဲ ပထမရရှိခဲ့သည့် မနီနီကျော်အား POPULAR PLASTIC GROUP က ဂုဏ်ပြုဆုငွေ ကျပ်သိန်း (၃၀) နှင့် လစဉ်ပညာသင်ထောက်ပံ့ကြေး ချီးမြှင့် NOM ဇူလိုင် ၁၊ ၂၀၂၆ ၂၀၂၆ ခုနှစ် တက္ကသိုလ်ဝင်စာမေးပွဲတွင် ဝိပ္ပံဘာသာတွဲဖြင့် တစ်နိုင်ငံလုံး ပထမ (The Whole Burma First) ရရှိခဲ့သည့် ရန်ကုန်တိုင်းဒေသကြီး၊ အခြေခံပညာအထက်တန်းကျောင်း (၁၄) လှိုင်သာယာ (အရှေ့) မှ ကျောင်းသူ မနီနီကျော် အား POPULAR  PLASTIC GROUP က ဂုဏ်ပြုဆုငွေ ကျပ်သိန်း (၃၀) ချီးမြှင့်ပေးခဲ့ပြီး တက္ကသိုလ်ပညာ ဆက်လက်သင်ကြားနိုင်ရေးအတွက် ကျောင်းတက်ရောက်သည့် ကာလအတွင်း လစဉ်ထောက်ပံ့ကြေး ကျပ် (၂) သိန်းကိုလည်း ပံ့ပိုးပေးသွားမည်ဖြစ်ကြောင်း သိရသည်။ POPULAR PLASTIC GROUP သည် လူမှုအကျိုးပြုလုပ်ငန်း (CSR) များကို ကဏ္ဍအသီးသီးတွင် စဉ်ဆက်မပြတ် ဆောင်ရွက်လျက်ရှိပြီး ပညာရေးကဏ္ဍတွင်လည်း ဝန်ထမ်းမိသားစုများမှ ပညာထူးချွန်သည့် သားသမီးများကို ဂုဏ်ပြုချီးမြှင့်ပေးလျက်ရှိသည့်အပြင် ပြင်ပမှ ပညာထူးချွန်ပြီး ပညာဆက်လက်သင်ယူရန် အထောက်အပံ့လိုအပ်သည့် ကျောင်းသား၊ ကျောင်းသူများကိုလည်း ထောက်ပံ့ကူညီလျက်ရှိကြောင်း သိရသည်။ မနီနီကျော်သည် ၂၀၂၆ ခုနှစ် တက္ကသိုလ်ဝင်စာမေးပွဲတွင် ဘာသာရပ် (၅) ခုဂုဏ်ထူး၊ စုစုပေါင်းရမှတ် (၅၃၀) မှတ် ဖြင့် ဝိပ္ပံဘာသာတွဲ တစ်နိုင်ငံလုံး ပထမအဖြစ် အောင်မြင်ခဲ့သူဖြစ်ပြီး ယခုချီးမြှင့်မှုသည် ထူးချွန်ကျောင်းသားများကို အားပေးမြှင့်တင်ရန်နှင့် ပညာရေးဆက်လက်သင်ယူနိုင်ရေးအတွက် ရည်ရွယ်ဆောင်ရွက်ခြင်းဖြစ်ကြောင်း POPULAR PLASTIC GROUP က ထုတ်ပြန်ထားသည်။ NOM