Harari Region Water Supply and Sewerage Authority

በሐረሪ ክልል በ1 ቢሊዮን ብር በጀት ዘመናዊ የፍሳሽ ማጣሪያ ፕሮጀክት ግንባታ እየተፋጠነ ነው። *** በሐረሪ ክልል በ1 ቢሊዮን ብር በጀት እየተገነባ ያለው ግዙፍ የፍሳሽ ቆሻሻ ማጣሪያ ፕሮጀክት እየተፋጠነ እንደሚገኝ የክልሉ ውሃና ፍሳሽ ባለስልጣን አስታወቀ። የባለስልጣኑ ሥራ አስኪያጅ ኢንጂነር አህመድ መሐመድ እንደገለጹት ፕሮጀክቱ የሐረር ከተማን የፍሳሽ ቆሻሻ አወጋገድ ሥርዓት በዘመናዊ መንገድ የሚቀይር ነው። ፕሮጀክቱ 11 የጋራ መኖሪያ ቤት ሳይቶችን፣ የጁገል ዙሪያንና የዲያስፖራ መንደርን ከማጣሪያ ጣቢያው ጋር የሚያገናኝ 29 ኪሎ ሜትር የፍሳሽ መስመር ዝርጋታን ያካተተ ነው ብለዋል። በ5.6 ሄክታር ላይ የሚያርፈው ይህ የማጣሪያ ጣቢያ በቀን 1,400 ሜትር ኩብ ፍሳሽ ቆሻሻን የማጣራት አቅም ይኖረዋል ያሉት ኢንጂነር አህመድ ታክሞ የሚወጣው ውሃ ለመስኖና ለአረንጓዴ ልማት የሚውል ሲሆን የሚተርፈው ጠጣር ተረፈ ምርት ደግሞ ለአርሶ አደሮች እንደ ተፈጥሮ ማዳበሪያነት እንደሚያገለግል አስገንዝበዋል። በአሁኑ ወቅት ግንባታው በጥሩ አፈፃፀም ሂደት ላይ የሚገኘው ይህ ግዙፍ ፕሮጀክት በሂደቱ ለበርካታ ሥራ አጥ ዜጎችና ባለሙያዎች ሰፊ የሥራ ዕድል እየፈጠረም ይገኛል። ይህ ግዙፍ ፕሮጀክት የሲቪልና የኤሌክትሮ መካኒካል ሥራዎችን አጠናቆ በ2019 በጀት ዓመት መጨረሻ ላይ ሙሉ በሙሉ ለግልጋሎት ይበቃል ተብሎ እንደሚጠበቅ ሥራ አስኪያጁ ጠቁመዋል። የፕሮጀክቱን ግንባታ እያከናወነ የሚገኘው አገር በቀል ድርጅት አለማየሁ ተፈራ የውሃ ሥራዎች ግንባታ ጠቅላላ ተቋራጭ የፕሮጀክት ሥራ አስኪያጅ ኢንጂነር ሙሴ አስፋው ይህ ዘመናዊና ግዙፍ የፍሳሽ ቆሻሻ ማጣሪያ ፕሮጀክት ከአዲስ አበባ ቀጥሎ በአገር አቀፍ ደረጃ በግዙፍነቱ ሁለተኛው መሆኑን ገልጸዋል። ፕሮጀክቱን በጥራትና በፍጥነት ለማጠናቀቅም በከፍተኛ ትኩረት እየተሠራ መሆኑን አመልክተዋል። በሄኖክ ግርማ 08/10/18