Dr najih gulpy

‍ تەماشە، دیای، وینای زوانو گوران-دایلەکتو هەورامانینە ئی یەرە واتیٛما هەنیٛ کە بەکارمەیانیٛ پەی هەستو وینای و تەماشەکەردەی. جا با جوان وەرد و پەڕەناوشا بکەرمیٛ، بزانمیٛ هەریوٙشا چەنی بەکار مەیوٙ، هەریەری کەردەویٛنیٛ. چەمیٛ بەکارمارمیٛ پەی ئەنجامدای هەرمانەکیٛ. تەماشە: ئی واتیٛ تەنیا ڕیٛخەکەش مەنەن، خوتایو چەمەی نیەنە، جە بارو واتسازی-موٙرفۆلۆجیوە پەنەش ماچا ڕیٛخەی بەند bound root چون مەلکوٙ چەمەو (کەردەی) یرە ئیجا بە تەمامی مانای پەڕە مەبەخشوٙ. تەماشە بکەرە: تەماشە مەکەرە. تەماشەمەکەروٙ. تەماشەشکەرد، تەماشەشکەردێ... ماناو ئی تەماشەیە ئانەن کە پەی ماوێ دریٛژی یام کوڵی بەیەک ئاراستە تەماشەو چیٛوێ بکەری، سەرنجەش بدەی، فلم یام دیمەنو کەشوکوٙی، ڕەنگا مەسافێوی نزیک یام دورۆ بوٙنە، چەمیٛش پەی مەگیٛڵنی تا چیٛوێو بیٛزیوە، تا بزانی چیٛش ڕووە مەدوٙنە. پەیشهەن دیمەنەکیٛ بواڕیانیٛ وەرەچەماتەوە. ماچوٙ ئەگەر بەجوانی چەمیٛش پەی بگیٛڵنی مەوینیش. ئەگەر تەماشەش بکەری مەوینیش. یانی تەماشە مەکەری ئینجا مەوینی. تەماشە مکەرو، یانی مدیەو.... نمەواچی موینو. تەماشە بکەرە هەمسانەن چەنی بدیە. دیەی-دیای: ئی واتیٛ چەمەن، گردو دەمکاتەکاو کەردەوەیش چەنە مەسازیانیٛ، بدیە: مەدیە، دیانیٛ، دیانی، دیان. مەدیەو، مەدیەیمیٛ، مەدیوٙ، مەدیانیٛ، مەدیەی، مەدیەیدیٛ. هەکە ماچی بدیە، یام دیان، دیانیٛ یانی وردو چیٛوەکەی مەبیوە کە تەماشەش مەکەری، بە گردو ئاوەزیتەو مدیەی پەی خاڵێوە وردیٛ، چەنی ماچی بدیە کتیٛبەکەیرە، ڕازەکیٛرە، لاپەڕە ئاندە، دیٛڕەو چواری، مزانی چیٛش هەڵەن چاگەنە. یانی بە وردی چەمش بڕینە تا بوینیش. بە هوٙش و هاگادارییوە مدیەی، دیای پەی نزیکی و دوریچ بەکارمەیوٙ. دیانیٛ کتیٛبەکەیرە. دیانیٛ کەشەکارە. هاگاداربیانیٛ مارەکەم دی دلیٛو گیواوەکەینە. هیزی توٙم نەدیەی زەماوندەکیٛنە. ماچوٙ نەدی و بدی، کوڕێشابی، گونشا بڕی. بدی و نەدی نامیٛ بکەرینە (اسم فاعل). وینا و ناوینا وەرانوەرشەن. نمەتاوی جە تەماشەی نامیٛ بکەری بسازنی. وینای: ئی واتیٛچە چەمەن، گردو دەمکاتەکاو کەردەوەیش چەنەنیٛ، پسەو. بوینە: مەوینە، مەوینو، مەوینمیٛ، مەوینی، مەویندیٛ، مەوینوٙ، مەوینا. وینام، ویناش، وینات. چیٛگەنە تەواناو چەمات فرەتەر بەکارماری. ماچا، وینیش؟ ناوەڵا هیچ نمەوینو، تاریکەشەوەنە. یانی وردۆبییەی، سەرنجدای فرەتەرەن، توچ ماچی ئەریٛ دیم، ئەریٛ وینام. ماچوٙ مانگیٛ مەوینی چواردە شەوێنە، ئەریٛ مەوینوش. شەویٛنە موینو. نمەواچمیٛ شەویٛنە مدیەو. دیای پەی دورین پسەو تەماشەی. نمەتاوی هەمان پەرسیٛ و پەیواچەکەی بە (دی) بواچی. چون یاساو واتچنسازی ڕانمەدوٙ پینەی، هازەو کەردەوەکا جیانە (ویەر-نەویەر). وینا: کەسێو کە چەمیٛش بوینانیٛ، نەوین، ناوینا: کەسێو هەکە کوٙر بوٙ. نمەتاوی ئەو واتەکا تەری بەکار باری. سەرنجە بدە چند ماناشا فەرقش هەن چەنی نەدی و بدی. وینای مانای تەرە مەبەخشوٙ، پسەو زاڕوٙڵە وینای، وەرم وینای، یانی جۆرێن جە وینای هەکە بە چەمیٛ نیەن، وەرم خەیاڵو ویٛتنە وینیش، زاڕوٙیچ یاگێو تەرۆ مزیوٙوە. جەهامەن کاتنە ماچا وەرمێش دیەن پۆتوٙوە. وەرمێم دیەن. وەلێم نەژنیەنم بواچا وەرمدیەی، یام زاڕوٙڵەدیەی، فرەتەر ویناکەی بەکارئاومان، وەلێم کاتیٛو مەبوٙوە بە کەردەوە (دی) بەکار مەیوٙ، وەرمم دی. یانی جیاوازی بەکارئاوردەیشان هەن، جەهەمان کاتنە یوٙشیەچشا هەن. با نمونیٛ واتچنی بارمیٛوە پەی هەریەری، کە ماناکیٛشا پسەن یوٙی. تەماشەم کەرد_دیانیٛ_ وینام. ئی نمونە ویەردەن، سەرنجە بدەیدیٛ کە تەماشە، وینا یاگەگیرونامیٛ لکیٛ (م) شا لکان پوٙرە، وەلێم (دیا) یاگەگیرونامیٛ لکێ (انیٛ) لکان پوٙرە، چون دیا کەردەوێوی نەویەرەن تەنیا بکەر هوٙرمەگیٛروٙ ماچی من دیانیٛ. ولێم (وینا) کەردەوێوی ویەرەن، بکەر و وەرکار هوٙرمەگیٛروٙ. (من توٙ مەوینو). تەماشەکەردیچ بەهەمان شیٛوە ویەرەن. تەماشەمەکەرو_ مەدیەو_ مەوینو. تەماشە بکەرە_تەماشە مەکەرە_ بدیە_مەدیە_ بوینە_مەوینە. هەر زوانێو تایبەمەندییٛو ویٛش هەنیٛش جە بەکارئاوردەی واتەکاشنە. هەرپاسە ناوچە، دەگا جیاوازی هەن جە بەکارئاودەی واچەکاشانە. شمەیچ بەسەرنجەکاتا ئی باسیە چاخ بکەردیٛ. ناجح گوڵپی 24/6/2024

تەماشە، دیای، وینای زوانو گوران-دایلەکتو هەورامانینە ئی یەرە واتیٛما هەنیٛ کە بەکارمەیانیٛ پەی هەستو وینای و تەماشەکەردەی. جا با جوان وەرد و پەڕەناوشا بکەرمیٛ، بزانمیٛ هەریوٙشا چەنی بەکار مەیوٙ، هەریەری کەردەویٛنیٛ. چەمیٛ بەکارمارمیٛ پەی ئەنجامدای هەرمانەکیٛ. تەماشە: ئی واتیٛ تەنیا ڕیٛخەکەش مەنەن، خوتایو چەمەی نیەنە، جە بارو واتسازی-موٙرفۆلۆجیوە پەنەش ماچا ڕیٛخەی بەند bound root چون مەلکوٙ چەمەو (کەردەی) یرە ئیجا بە تەمامی مانای پەڕە مەبەخشوٙ. تەماشە بکەرە: تەماشە مەکەرە. تەماشەمەکەروٙ. تەماشەشکەرد، تەماشەشکەردێ... ماناو ئی تەماشەیە ئانەن کە پەی ماوێ دریٛژی یام کوڵی بەیەک ئاراستە تەماشەو چیٛوێ بکەری، سەرنجەش بدەی، فلم یام دیمەنو کەشوکوٙی، ڕەنگا مەسافێوی نزیک یام دورۆ بوٙنە، چەمیٛش پەی مەگیٛڵنی تا چیٛوێو بیٛزیوە، تا بزانی چیٛش ڕووە مەدوٙنە. پەیشهەن دیمەنەکیٛ بواڕیانیٛ وەرەچەماتەوە. ماچوٙ ئەگەر بەجوانی چەمیٛش پەی بگیٛڵنی مەوینیش. ئەگەر تەماشەش بکەری مەوینیش. یانی تەماشە مەکەری ئینجا مەوینی. تەماشە مکەرو، یانی مدیەو.... نمەواچی موینو. تەماشە بکەرە هەمسانەن چەنی بدیە. دیەی-دیای: ئی واتیٛ چەمەن، گردو دەمکاتەکاو کەردەوەیش چەنە مەسازیانیٛ، بدیە: مەدیە، دیانیٛ، دیانی، دیان. مەدیەو، مەدیەیمیٛ، مەدیوٙ، مەدیانیٛ، مەدیەی، مەدیەیدیٛ. هەکە ماچی بدیە، یام دیان، دیانیٛ یانی وردو چیٛوەکەی مەبیوە کە تەماشەش مەکەری، بە گردو ئاوەزیتەو مدیەی پەی خاڵێوە وردیٛ، چەنی ماچی بدیە کتیٛبەکەیرە، ڕازەکیٛرە، لاپەڕە ئاندە، دیٛڕەو چواری، مزانی چیٛش هەڵەن چاگەنە. یانی بە وردی چەمش بڕینە تا بوینیش. بە هوٙش و هاگادارییوە مدیەی، دیای پەی نزیکی و دوریچ بەکارمەیوٙ. دیانیٛ کتیٛبەکەیرە. دیانیٛ کەشەکارە. هاگاداربیانیٛ مارەکەم دی دلیٛو گیواوەکەینە. هیزی توٙم نەدیەی زەماوندەکیٛنە. ماچوٙ نەدی و بدی، کوڕێشابی، گونشا بڕی. بدی و نەدی نامیٛ بکەرینە (اسم فاعل). وینا و ناوینا وەرانوەرشەن. نمەتاوی جە تەماشەی نامیٛ بکەری بسازنی. وینای: ئی واتیٛچە چەمەن، گردو دەمکاتەکاو کەردەوەیش چەنەنیٛ، پسەو. بوینە: مەوینە، مەوینو، مەوینمیٛ، مەوینی، مەویندیٛ، مەوینوٙ، مەوینا. وینام، ویناش، وینات. چیٛگەنە تەواناو چەمات فرەتەر بەکارماری. ماچا، وینیش؟ ناوەڵا هیچ نمەوینو، تاریکەشەوەنە. یانی وردۆبییەی، سەرنجدای فرەتەرەن، توچ ماچی ئەریٛ دیم، ئەریٛ وینام. ماچوٙ مانگیٛ مەوینی چواردە شەوێنە، ئەریٛ مەوینوش. شەویٛنە موینو. نمەواچمیٛ شەویٛنە مدیەو. دیای پەی دورین پسەو تەماشەی. نمەتاوی هەمان پەرسیٛ و پەیواچەکەی بە (دی) بواچی. چون یاساو واتچنسازی ڕانمەدوٙ پینەی، هازەو کەردەوەکا جیانە (ویەر-نەویەر). وینا: کەسێو کە چەمیٛش بوینانیٛ، نەوین، ناوینا: کەسێو هەکە کوٙر بوٙ. نمەتاوی ئەو واتەکا تەری بەکار باری. سەرنجە بدە چند ماناشا فەرقش هەن چەنی نەدی و بدی. وینای مانای تەرە مەبەخشوٙ، پسەو زاڕوٙڵە وینای، وەرم وینای، یانی جۆرێن جە وینای هەکە بە چەمیٛ نیەن، وەرم خەیاڵو ویٛتنە وینیش، زاڕوٙیچ یاگێو تەرۆ مزیوٙوە. جەهامەن کاتنە ماچا وەرمێش دیەن پۆتوٙوە. وەرمێم دیەن. وەلێم نەژنیەنم بواچا وەرمدیەی، یام زاڕوٙڵەدیەی، فرەتەر ویناکەی بەکارئاومان، وەلێم کاتیٛو مەبوٙوە بە کەردەوە (دی) بەکار مەیوٙ، وەرمم دی. یانی جیاوازی بەکارئاوردەیشان هەن، جەهەمان کاتنە یوٙشیەچشا هەن. با نمونیٛ واتچنی بارمیٛوە پەی هەریەری، کە ماناکیٛشا پسەن یوٙی. تەماشەم کەرد_دیانیٛ_ وینام. ئی نمونە ویەردەن، سەرنجە بدەیدیٛ کە تەماشە، وینا یاگەگیرونامیٛ لکیٛ (م) شا لکان پوٙرە، وەلێم (دیا) یاگەگیرونامیٛ لکێ (انیٛ) لکان پوٙرە، چون دیا کەردەوێوی نەویەرەن تەنیا بکەر هوٙرمەگیٛروٙ ماچی من دیانیٛ. ولێم (وینا) کەردەوێوی ویەرەن، بکەر و وەرکار هوٙرمەگیٛروٙ. (من توٙ مەوینو). تەماشەکەردیچ بەهەمان شیٛوە ویەرەن. تەماشەمەکەرو_ مەدیەو_ مەوینو. تەماشە بکەرە_تەماشە مەکەرە_ بدیە_مەدیە_ بوینە_مەوینە. هەر زوانێو تایبەمەندییٛو ویٛش هەنیٛش جە بەکارئاوردەی واتەکاشنە. هەرپاسە ناوچە، دەگا جیاوازی هەن جە بەکارئاودەی واچەکاشانە. شمەیچ بەسەرنجەکاتا ئی باسیە چاخ بکەردیٛ. ناجح گوڵپی 24/6/2024

‍ ولی-گوڵ-گوٙراڵیٛ-هەراڵە چەنی سلام و ئیٛژانەی پەی هامڕاکام. گجار بڕێو هامڕێما ماچا (گوڵ) واچێوە هەورامیە نیەنە، جا ئی ڕوشنکەردەیەمە بوٙنەو ئانەیوە نویست. ولی: پسە ولە شەسپەڕیٛ، ولە پایزیٛ، ولەگوڵای، ئا ولیٛ هەکە باخچەکانە هەمەڕەنگیٛشا هەنیٛ. ولی قتولە مەکەروٙ، خونچە مەکەروٙ، ئیجا مەتەنگیوٙوە مەبوٙنە بە ولی، بوەشا وەشەنە. دماتەر پەڕەکەشا مەڕیٛزوٙ و قنچکەکەشا جیا مەنوٙ، ئی ولیٛ دلیٛڕاسەشانە ئەندامو نیٛرو مایشاهەن، تومەکەشا هەن چاگەنە. ولی بە قەڵەم منریوٙ، پیٛوەن مەکریانیٛ تا جوٙرەکیٛشا خاستەریٛ ببانیٛ. بە کوردی پی ولیٛ ماچا گوڵ، گوڵەباخ، وەلێم هەورامی (ولی) ش ماچا. گوڵ: گیواو، ڕوەک، تەماکوٙ، گوڵ مەکەروٙ، کاتێو مەیاوان پەنە، دماو گوڵکەردەی تەمەنو ژیواش سەرمشوٙ، گوڵەکە مەبوٙنە بە توٙم، توٙمەکە مەڕیٛزوٙ. واتەنشا تەماکوٙکە گوڵش کەردەن، زافەرانەکە گوڵش کەردەن، هەرمەڵەکیٛ گوڵشکەردەن، فڵانە گیواو گوڵشکەردەن، هەرگیز نەوچیان ولەگڵاوکیٛ یام ولە سورەکیٛ گوڵش کەردەن، بەڵ وچیان ولە گڵاوەکیٛ ولیش گیٛرتیٛنیٛ. ئی جوٙرە جە گوڵی بە توٙم فریٛ بانیٛ، تومەکە مەڕیٛزوٙ یام ویٛشت توٙمەکەی مەشانی و دماتەر مزیوٙ. جە گوڵی چندەها واتیٛ و ئیدەیمیٛ و مەسەلیٛما وەشیٛکەردیٛنیٛ، پسەو (گوڵزار، گوڵڕەنگ، گوڵەباخ، سەرگوڵە، گوڵئەندام، گوڵعوزار). گوٙڕاڵیٛ: ئی گوٙراڵیٛ جوٙرێتەرنیٛ کە وەهار یام پایزەنە چەنیو گیواوی مزیانیٛ، گوراڵەکیٛ ڕەنگەشا موٙرە، چەرمیٛ، سورە مرمانا، هەرپاسە جوٙرەها ڕەنگیٛ تەریٛشا هەنیٛ. ئەوپەڕەکەش یەسێو بەرزیٛ مەبانوە. ئی گوراڵیٛ کەم تەمەنیٛنیٛ، توٙمەکەشا مڕیٛزوٙ ویٛڕەس بەئاوەو وارانی مەژیواوە. هەراڵە: باخەکە نیشتەن هەراڵە، هەڵبەت فرەو میوەکاو هەورامانی و دنیای وەهاریٛنە یام جە پلەو گەرمای دیاریکریاینە هەراڵە مەکەرانیٛ، ئی هەراڵە مەبوٙنە بە سەمەر (بەر)، هەشتاڵوی، مرویٛ، شیٛڵانیٛ، هەڵوچیٛ... ئینیٛ گرد هەراڵە مەکەرانیٛ و دماتەر مەبانیٛ بە میوە، دلیٛو میوەکەینە، پیٛشە، توم هەن. جە ڕاو پیٛوەن، یام پیٛشەکەیشاوە یام پیٛوەنیوە متاومیٛ فرەتەریٛشا بکەرمیٛ. هەرکەس کوچالێو دیوانەکەو سەیدی و بیسارانی و مەولەیوش وانابوٙوە، ئەکەید چندە یاگیٛونە واتیٛ (گوڵ) یشا بەکار ئاوردیٛنە دلیٛو شعرەکاشانە، جا وەروئانەی حەیفەن یەکسەر بڕیارە بدەیمیٛ گوڵ هەورامی نیەن، تەنیا بەخاترەو ئانەی برا زوانەکامانە بەکارمەیوٙنە!!! گوڵ چون ڕوی ئازیز نەزاکەت پوٙشان.... مەولەوی نەوروٙز گوڵ خیٛزەن نەوروٙز گوڵ خیٛزەن... سەیدی دڵەی غەریبان چون پەڕەی گوڵەن گوڵ خار تیٛش نیشوٙ خەیلیٛ موشکڵەن... بیٛسارانی ناجح گوڵپی 22/6/2024

ئامرازو"خوٙ"ی ئامرازو خوٙی، وەختو قسیٛکەردەینە فرە بەکار مەیوٙ، نمونەو بەکار ئاوردەیش(خوٙ ماس نیەن لچیٛتۆ دیار بوٙ)، (خوٙ نانش نەسوٙتەن ساجەرە). سەرنجە بڎەیمیٛ نیشانیٛ(خوٙ) ی کەوتیٛنە وەڵیٛ هەردووە واتچنەکەیوە، یام مەگنوٙ وەڵیٛو واتچنیوە ماناکیٛش پەڕە مکەروٙوە یام مانێوەی تەمامە مەڎوٙنە بە واتچنەکەی. ئەگەر واتچنەکان بە بیٛ بەکار ئاوردەیو (خوٙ)ی بنویسمیٛ یام بواچمیٛ، ماناکیٛشان حەر مەنێنە،، وەلێم هەست مەکەری کە مانای پەڕە نمەڎان، لارەسەنگیێوە هەن و مانای ڕازوانیە نمەدان، پاسە بوٙ(خوٙ) ئامرازو بەستەین ئەرکو بەستەی دویٛ ڕستان مەگیٛروٙ گەردەن. ماناکیٛچش ویٛش جە گلەیی و بناشتینە نیشانە مەڎوٙنە. خۆ توٙ جە گرد کەسی خراپتەرنی. هیٛمای خوٙ زمسان تەشریف نەبەردەن نەوروٙز گوڵ موژدەی وەهار ئاوردەن (سەیدی : 1385) خوٙ ویٛم نەدیەنۆ چی ویٛم سەخڵەت کەرو سەرو ئاڎیشا؟ کەوتەن وەڵیٛ ڕستەیوە. وازم چەنە بارە خوٙ هەنگم قڕوٙڵەنە نەڎیەنۆ. چیٛگەنە کەوتەن میانو دویٛ واتچنان و بەستیٛنێش یوترینیوە.https://t.me/Drnajihgulpy 19/6/2024 ناجح گوڵپی

گرنگیو واتچنسازی جە زوانەنە واتچنسازی زوان مەپاریٛزنوٙ، نمازوٙ بفوٙتیوٙ-بمروٙ. زوان پەسێش هەنیٛ، کە پەنەشا ماچمیٛ پوٙلەواتیٛ، یام بەشەکاو دوای (نامیٛ، یاگەگیرونامیٛ، یاوەرنامیٛ، کەردەوە-چەمە، یاوەرکەردەوە، ئامڕازیٛ بەستەی و یاونای، ژمارە)، کە هەریوٙشا گرنگی ویٛش هەنش، بەتایبە کەردەوە کە موٙرەو ئەژناسەو زوانەکەیش ئینا دلیٛچەماوە. کەمتەر مەگنوٙ چیٛرو کاریگەری زوانە بیٛگانەکا، یام برا زوانەکاش، پەوکای فرە دیٛر کەردەوە جە زوانەنە مەفاڕیوٙ، وەروئانەی پیٛسەو ویٛش مەمانوٙوە. پوٙلەواتەکیٛ تەریٛ مەکریوٙ جە زوانە لایدەکاوە هوٙرشا بگیٛرمیٛ، وەلێم کەردەوە قەرز نمەکریوٙ، پەوکای گرنگتەرین پەساو زوانین کە نمازوٙ زوان دلیٛنە بشوٙ. کەردەوە پیٛسەن دڵی، کە چندە گرنگەن پەی لاشەی، کەردوەیچ ئاندە گرنگەن پەی واتچنسازی و پەی زوانی، دڵ جەهەرمانە کەوت لاشە مەمروٙ، زوانیچ کەردەوەش فاڕیا ئەکید ڕووەو دلیٛنە شیەی مەلوٙ. فرێوە جە هەورامیەکا کاتو دوای و چەناینە بڕێو نامیٛ، یاوەرنامیٛ مەفاڕانیٛ، وەلێم هەرگیز نمەتاوان کەردوەکەیش بفاڕان، هەر بەهەورامی ماچاش. وەلیٛم خەریکەن کەردەوەکیٛچما ڕووە فاڕیای ملانیٛ، مەوینمیٛ بڕێو دەسەواتانە کەردەوەیچشا فاڕان، پسەو (وەشە ویس) کە (وەشە)کەش هەورامین و (ویس)ەکەش کوردین، چون کەسانێو ئی واتیٛشا ئاردیٛنەنە کە زانیاری وردشا نیەن سەرو زوانی و موٙرفۆلۆجی. واتچن هیٛقمی مەدوٙ بەزوانی، ویٛپا مەمردنوٙش، وەرگەو گیٛجەلولەکا و مشەقەتو ژیوای سەختی مەگیٛروٙ. نمونیٛ پەی فاڕیای کەردەوەی و نامیٛ. کاوان ئاسودەش وەشەمسیوٙ. وەشەویست نەمروٙ*. هەڵەن. وەشەسیات نەمروٙ. ڕاسەن میٛمانە وەشەویسەکا*. هەڵەن میٛمانە وەشەسیاکا. ڕاسەن شاخەکەنە وەروە مەواروٙ*. کەشەکەنە وەروە مەواروٙ. ناجح گوڵپی 14/6/2024 سەرچەمە. کتبو واتچنسازی syntax هەڵای چاپ نەبیەن.

‍ وەرزنای-وەرزیای وەرزنای: وەرزنای چەمەی ویەرەن، وەرزیای چەمەی نادیارەن: ئەوەوەرزیای، ئەوەوەرزنای، وەرزنایوە، پەنەوەرزنای، پەیوەرزیای، پۆوەرزیای، چەنەوەرزیای. وەرزنایش وەرزنو. وەرزیای وەرزیوٙ، وەرزنای مەوەرزنو. وەرز ڕیٛخەو چەمەکەین، واتیٛو وەرزش جە ڕیٛخەو ئی چەمەیە وەشە مەبوٙنە (وەرز+ش)، کە نامیٛ چەمەینە، هەرپاسە نامیٛ بکەری(وەرزیەر-وەرزیار) هەر ئەچی چەمەیوە هوٙرگیریان. کە پەی هەرمانبەری (اسم فاعل) بەکار مەیوٙ، کەسێو، کە هەرمانە بکەروٙنە جە باخەنە، کشتوکیارەنە. ئەوسا هەورامانەنە وەرزیەرشا گیٛرتەن پەی هەرمانوکارو مەرزەی، پەی دەرەوەو خەلەی، کشتوکیاری تا بێوە کوٙ. هەورامینە ماچا: فڵانەکەس وەرزیان، یام خاس وەرزیان، یانی جە سەرەتاوە نەمان هەرمانکەردەی و قاڵبیەن، ئیسە بەڵەدەن، خاس هەرمانەکیٛ مزانوٙ. وەرزنای و موٙچنای لاو ئیٛمەوە فرە باو بیەن. وەرزنای بە کەردەوە-عەمەلی-پراکتیک هەرمانەکیٛ مەکەری. موٙچنای بە موچیاری و نەزەری-بەوانای موانیش دمایی تەتبیقەش مەکەری. پەی واتیٛو (هەربەنە -هەروەنە) ئاکەسنە هەکە هەن شوٙنەو هەر و هەسەریوە، باریٛ مەبەروٙ. پەوکای واتیٛو وەرزیار-وەرزیەر و وەرزش ئەچی چەمەیوە هوٙرگیریێنیٛ. ناجح گوڵپی 6/7/2024 سەرچەمە: ڕازوانو هەورامی بەرگی دووەم

🔹#ژیوانامە: مامۆسا شرام هەورامی ✍️نویسەر: #سوبحان_ئەمینی 🎼مووسیقا: فەریبورز لاچینی، کەیوان ساکت، عەلی‌ڕەزا ئەفکاری، ئێحسان نەیزەن 🎙وانایۆ، میکس و ڕێک‌وستەی: ش. شەریف‌زادە https://t.me/dengaheng