Uzdiplomat | Расмий канал

🔴Янги тартиб меҳмон кутиш ҳашаматини камайтира оладими? ✔️100 минг сўмлик сомсадан 49 млн сўмлик меҳмонхонагача: давлат меҳмон кутиш харажатларига лимит қўйди Ўзбекистонда давлат хизматчиларининг хорижий хизмат сафарлари ва чет эл делегацияларини қабул қилиш харажатлари бўйича янги тартиб тасдиқланди. Энди давлат ҳисобидан қилинадиган сафар, меҳмонхона, овқатланиш, транспорт, совға ва протокол харажатлари олдиндан белгиланган лимитлар асосида молиялаштирилади. Сўнгги йилларда давлат тадбирлари ва расмий меҳмонларни қабул қилиш билан боғлиқ қиммат харажатлар жамоатчиликда бир неча бор муҳокама қилинган. Энг машҳур мисоллардан бири — Сенат буюртма қилган донаси 100 минг сўмлик сомса эди. 2022 йилда Олий Мажлис вакиллари ва Вьетнам вице-президенти Во Тхи Ан Суан бошчилигидаги делегация иштирокидаги 25 кишилик тушлик 60 млн 375 минг сўмга тушгани ёзилган. Ўша дастурхонда донаси 100 минг сўмлик сомса, порцияси 360 минг сўмлик десерт, 335 минг сўмлик авокадо ва креветкали салат, 160 минг сўмлик нон ва 260 минг сўмлик грек ёнғоғи бўлгани айтилган. Бундан ҳам аввал, 2022 йилда Тошкент халқаро инвестиция форуми харажатлари муҳокамага сабаб бўлган. Форумда бир дона сомса 70 минг сўм, бир порция ош 80 мингдан 130 минг сўмгача, бир порция норин 130 минг сўм, 0,33 литр минерал сув 36,8 минг сўм, 1,5 литр газли ичимлик 32,2 минг сўмдан баҳолангани очиқланган. Форум учун камида 15 млрд сўмдан ортиқ маблағ сарфлангани хабар қилинган. Шу пайтгача бу соҳа асосан 1994 йилда тасдиқланган тартиб билан бошқариб келинган. Унда Ўзбекистон раҳбарлари ва делегацияларининг хорижий ташрифлари ҳамда чет эл делегацияларини қабул қилиш билан боғлиқ харажатлар давлат бюджети ҳисобидан қопланиши белгиланган эди. Амалда эса кўп ҳолларда харажатлар смета ва ҳақиқий сарфлар асосида расмийлаштирилган. Энди тартиб ўзгаряпти: хизмат сафарига кетишдан олдин иш режаси ва харажат сметаси тасдиқланади. Сафардан қайтгач, 3 иш куни ичида ҳисобот топширилади. Яъни “бориб келинди” деган умумий ёндашув ўрнига “нима учун борилди, қанча сарфланди, қандай натижа бўлди?” деган саволларга ҳужжат билан жавоб берилади. Хорижга хизмат сафари харажатлари ҳам мамлакатлар кесимида аниқ белгиланмоқда. Масалан, АҚШга борган давлат хизматчиси учун кундалик харажат 54 доллар, меҳмонхона учун энг юқори меъёр 220 доллар этиб белгиланган. Туркияда бу 54 доллар ва 150 доллар, Германияда 48 евро ва 180 евро, Францияда 48 евро ва 200 евро, Буюк Британияда 36 фунт ва 220 фунт. Марказий Осиё давлатлари бўйича лимитлар анча паст. Қозоғистонда кундалик харажат 30 доллар, меҳмонхона 150 долларгача; Қирғизистон, Тожикистон ва Туркманистонда кундалик харажат 30 доллар, меҳмонхона 120 долларгача бўлиши мумкин. Қарорнинг Ўзбекистонга келадиган хорижий меҳмонларни қабул қилиш харажатлари ҳам аниқ кўрсатилган. Масалан, расмий тушлик ёки кечки овқат учун юқори даражадаги меҳмонлар бўйича бир киши ҳисобига 6 БҲМгача, яъни ҳозирги ҳисобда 2 млн 472 минг сўмгача сарфлаш мумкин. 1-даражали меҳмонлар учун бу 1 млн 236 минг сўмгача, 2-даражали меҳмонлар учун 824 минг сўмгача. Кофе-брейк ҳам алоҳида ҳисобланган: тоифага қараб бир киши учун 206 минг сўмдан 618 минг сўмгача. Совғалар учун эса юқори даражадаги меҳмонга 20 БҲМгача — 8 млн 240 минг сўмгача, 1-даражали меҳмонга 4 млн 120 минг сўмгача, 2-даражали меҳмонга 2 млн 60 минг сўмгача харажат қилиш мумкин. Меҳмонхона лимитлари эса каттароқ рақамларда кўринади. Тошкент шаҳрида юқори даражадаги меҳмон учун энг юқори тоифадаги хона 120 БҲМгача, яъни 49 млн 440 минг сўмгача бўлиши мумкин. Люкс хона учун 7 млн 4 минг сўмгача, яримлюкс учун 4 млн 944 минг сўмгача, стандарт хона учун 2 млн 884 минг сўмгача лимит белгиланган. Telegram |Instagram |  You Tube | Facebook | X

uzdiplomat иқтибоси: 🖍 "Биз эскиларни айблаймизки, аларға ислоҳдан сўзласак, чидай олмайдурлар. Аммо ўзимизнинг мақтаб, рисола, таҳрир ва маслакимизни бир киши танқид этдими, чидай олмаймиз, диққат ила мунаққид сўзини тингламаймиз, Мунаққид бизни тўғримизға минг сўз ила баёни муддао этар экан, биз они ичиндан ўн сўзини номаъқул топиб, юзиға урармиз. Ва ёинки важҳсиз онинг сўзини радду ўзиға эътироз этармиз». 1914 й. МАҲМУДХЎЖА БЕҲБУДИЙ, Маърифатпарвар, жадидчилик ҳаракатининг етакчиси, биринчи ўзбек драматурги ва жамоат арбоби (1875-1919) Каналга уланиш:✏️ https://t.me/uzdiplomat

Мирзиёев Трампни 80 ёшлик юбилейи билан табриклаб, уни Ўзбекистонга таклиф қилди Ўзбекистон Президенти Шавкат Мирзиёев АҚШ Президенти Дональд Трампга таваллуд куни — 80 ёшлик юбилейи муносабати билан табрик йўллади. Мактубда Трамп бой сиёсий тажрибага эга, ўз халқи ҳурматига сазовор давлат арбоби сифатида таърифланди. Мирзиёев АҚШнинг халқаро майдондаги нуфузи ва қудрати мустаҳкамланиб бораётганини қайд этди. “Бугун Ўзбекистон – АҚШ алоқалари ҳар қачонгидан ҳам мустаҳкам ва амалий руҳ касб этмоқда”, дейилади табрикда. Президент Мирзиёев Ўзбекистон АҚШ билан стратегик шерикликка асосланган кўп қиррали ҳамкорликни янада чуқурлаштиришдан манфаатдор эканини билдирди. Савдо-иқтисодий ва инвестициявий алоқаларни янги босқичга олиб чиқиш устувор йўналишлардан бири сифатида кўрсатилди. Сўнгги маълумотларга кўра, Трамп 80 ёшлик юбилейини Оқ уйда спорт тадбири билан нишонлаши, шундан сўнг Франциядаги G7 саммитида иштирок этиши режалаштирилгани ҳақида АҚШ нашрлари ёзмоқда. Табрикда Мирзиёев Дональд Трампнинг тинчлик ва барқарорликни таъминлашга қаратилган халқаро саъй-ҳаракатларини юқори баҳолади. Шунингдек, халқаро ва минтақавий платформалар доирасидаги ҳамкорлик амалий натижалар билан бойиб боришига ишонч билдирилди. Стратегик шерикликнинг истиқболли йўналишларини муҳокама қилиш мақсадида Шавкат Мирзиёев Дональд Трампни Ўзбекистонга илк тарихий ташриф билан келишга таклиф қилди. Якунда давлат раҳбари АҚШ Президентига мустаҳкам соғлиқ, оилавий бахт, масъулиятли давлатчилик фаолиятида муваффақиятлар, Америка халқига эса тинчлик ва фаровонлик тилади. Telegram |Instagram |  You Tube | Facebook | X

Афғонистонда аёлларга қўйилган янги чекловларга қарши норозилик куч билан бостирилди Афғонистоннинг Ҳирот вилоятида аёлларга нисбатан жорий этилган янги чекловлар ортидан норозилик намойишлари бошланди. Маҳаллий ҳокимият аёлларнинг кийиниши ва ташқи кўринишига оид талабларни кучайтирганидан сўнг, қоидаларни бузганликда гумон қилинган аёллар оммавий равишда ушлана бошлаган. Июнь ойи бошида «Толибон»нинг Фазилатни ёйиш ва иллатларнинг олдини олиш вазирлиги аёллар ташқи кўринишига оид янги талабларни эълон қилди. Унга кўра, ҳудуддаги аёллар юз ниқоби ва пайпоқ кийиши шарт этиб белгиланган, шунингдек, косметикадан фойдаланиш тақиқланган. Маҳаллий ОАВ ва ҳуқуқ ҳимоячилари маълумотига кўра, 6–8 июнь кунлари Ҳиротда камида 30 нафар аёл ва қиз ушбу талабларни бузганликда айбланиб ушланган. Қўлга олинганлар орасида «Чегара билмас шифокорлар» — MSF халқаро гуманитар ташкилоти ходимаси ҳам бўлган. Ташкилот вакилларига кўра, у икки кундан сўнг ўзи ва яқинлари белгиланган қоидаларга амал қилиш мажбуриятини олганидан кейин озод қилинган. Ҳирот вилояти губернатори Нур Аҳмад Исломжар аёллар ушланганини тасдиқлаган. Унинг иддаосича, ҳибсга олинган аёлларда «психологик ва диний муаммолар» бор. Ҳибслар ҳақидаги хабарлардан сўнг ижтимоий тармоқларда норозилик акцияларига чақириқлар пайдо бўлди. 9 июнь куни Ҳиротнинг бир ҳудудида ўнлаб киши, жумладан аёллар ва эркаклар намойишга чиқди. БМТнинг Афғонистонга кўмаклашиш миссияси — UNAMA маълумотига кўра, хавфсизлик кучлари намойишчиларга қарши ўқотар қурол ишлатган. Оқибатда камида икки киши, жумладан бир бола ҳалок бўлган, 20 дан ортиқ одам яралангани айтилмоқда. Афғонистон полицияси эса намойишни тарқатишда қурол қўлланганини рад этган. Норозиликлар бостирилганидан кейин «Толибон» хавфсизлик чораларини кучайтирган. Afghanistan International маълумотига кўра, Ҳиротга ва Кобулнинг ғарбий туманларига қўшимча кучлар ҳамда ҳарбий техника юборилган. Маҳаллий аҳолига кўра, кўчаларда юзлаб қуролланган ҳарбийлар, бронетехника ва назорат постлари пайдо бўлган. Патруллар одамларни тўхтатиб, ҳужжатларини текширган ва қаерга кетаётгани ҳақида сўраган. Шунга ўхшаш чоралар Кобулдаги Дашт-е-Барчи ҳудудида ҳам жорий этилган. У ерда кўчаларга ҳарбий постлар қўйилиб, аҳоли текширувдан ўтказилгани хабар қилинмоқда. Шунингдек, қўшни ҳудуд ва вилоятларга ҳам аёллар кийимига оид талаблар янада қатъий назорат қилиниши мумкинлиги ҳақида огоҳлантиришлар юборилган. Бундай огоҳлантиришларда янги қоидаларга амал қилмаган аёллар ҳибсга олиниши мумкинлиги айтилган. Бу эса Ҳиротдаги воқеалардан кейин аёллар устидан назорат бошқа ҳудудларга ҳам кенгайиши мумкинлигини кўрсатади. БМТнинг «Аёллар» тузилмаси вазиятдан хавотир билдирди. Ташкилотга кўра, аёлларнинг ўзбошимчалик билан ҳибсга олиниши улар учун узоқ муддатли оқибатларга сабаб бўлиши мумкин. Афғонистон жамиятида аёлнинг ҳибсга олиниши озод этилганидан кейин ҳам унинг обрўси, хавфсизлиги ва ижтимоий ҳаётига салбий таъсир қилиши мумкин. Аввалроқ «Толибон» Афғонистонда болалар никоҳини қонунийлаштирувчи ҳужжат қабул қилгани хабар қилинган эди. Telegram |Instagram |  You Tube | Facebook | X

🔴Ўзбекистонда одамлар соғлиқни сақлаш тизимидан розими? Uzdiplomat Тошкентнинг бир нечта туманларида аҳолидан давлат тиббиёти ҳақида фикр сўради. Респондентлар “прописка” муаммоси, поликлиникалардаги узун навбатлар, таниш-билишчилик ва туғруқхоналардаги эҳтимолий норасмий тўловлар ҳақида гапирди. Айрим фуқаролар эса камера олдида очиқ фикр билдиришдан чўчишини айтди. 💬 “”Прописка” бўлмаса Тошкентда касалхона қабул қилмайди.” 💬 “Поликлиникаларда навбат жуда кўп.” 💬 “Яхши шифокорлар маош пастлиги учун хусусий клиникаларга кетиб қолди.” Сиз давлат тиббиётидан розимисиз? Фикрингизни изоҳларда қолдиринг. ▶️ Тўлиқ маълумотлар видеода Telegram | Instagram I You Tube I Facebook I X

uzdiplomat иқтибоси: 🖍 “Биз учун, ота-она сифатида, энг муҳим вазифа бу фарзандларимизга тўғри йўл-йўриқ кўрсатиш ва уларни мустаҳкам ахлоқий ва маънавий қадриятларга эга инсофли ва камтар инсонлар қилиб тарбиялашдир». 2013 йил, сентябрь ЛОЛА КАРИМОВА - ТИЛЛАЕВА Ўзбекистоннинг ЮНЕСКОдаги собиқ элчиси 🌐Telegram |📱Instagram | 📱 You Tube | 📱Facebook |🕊 X

🔴Бекободда одам ўлимига сабаб бўлиб, жасадни каналга ташлаган собиқ ИИБ ходими 7 йилга қамалди Марҳумнинг яқинлари бу жазодан норози Тошкент вилояти Бекобод туманида маст ҳолда автомобил бошқариб, пиёдани уриб юборган ва кейин марҳумнинг жасадини каналга ташлаган собиқ ички ишлар ходимига ҳукм ўқилди. Ҳодиса 2025 йил 11 декабрь куни тунда Бекобод тумани Қорақўйли маҳалласи ҳудудидан ўтган Қорасув–Бўка–Бекобод автомобиль йўлининг 64-километрида содир бўлган. 1989 йилда туғилган, Бекобод шаҳар ИИБ жиноят-қидирув бўлими тезкор вакили бўлган ҳайдовчи Nexia-3 автомобилида 43 ёшли пиёдани уриб юборган. Суд материалларига кўра, ҳайдовчи аввал жабрланувчини шифохонага олиб бормоқчи бўлган, бироқ кейин фикридан қайтиб, ҳодисани яширишга уринган. У турмуш ўртоғига Matiz автомашинасини олиб келишни айтган, марҳумни бошқа машинага ўтказиб, ҳодиса жойидан 41 километр узоқликдаги Шова маҳалласи ҳудудидан оқиб ўтувчи Фарҳод канали бўйига олиб борган ва жасадни сувга ташлаган. Йўл-транспорт ҳодисаси ҳақида гувоҳ 102 рақамига хабар берган. Шу хабар асосида ҳуқуқни муҳофаза қилувчи органлар ҳаракатга тушган ва иш фош этилган. Марҳум Бердиёр Умматқуловнинг яқинлари эса 80 кун давомида унинг тақдири ҳақида аниқ маълумотсиз яшаган. Қидирув ишлари қишнинг совуқ кунларида ҳам давом этган. Марҳумнинг жасади 2026 йил 28 февраль куни, орадан 79 кун ўтиб, канал қирғоғидан топилган. Унинг шахси ДНК экспертизаси орқали тасдиқланган. Суд-тиббий экспертизаси хулосасига кўра, жабрланувчи йўл-транспорт ҳодисаси вақтида олган тан жароҳатлари оқибатида қисқа вақт ичида вафот этган. Шу сабабли суд судланувчига нисбатан Жиноят кодексининг 117-моддаси — хавф остида қолдириш бўйича қўйилган айбловни тасдиқламади. Суд изоҳига кўра, агар жабрланувчи ҳодисадан кейин тирик қолиб, ёрдам кўрсатилмагани оқибатида вафот этганида, ушбу модда бўйича жавобгарлик келиб чиқиши мумкин эди. Бироқ суд собиқ ходимни Жиноят кодексининг 266-моддаси 2-қисми — транспорт воситасини бошқариш қоидаларини бузиш одам ўлимига сабаб бўлгани ҳамда 134-моддаси 1-қисми — марҳумнинг жасадига нисбатан нолойиқ ҳаракатлар содир этганликда айбдор деб топди. Zamon.uzнинг маълум қилишича, судланувчи судда айбини қисман тан олиб, қилмишидан пушаймонлигини билдирган. У жазони ўтаб қайтганидан кейин марҳумнинг оиласига ёрдам беришини айтди ва суддан енгиллик сўради. Марҳумнинг яқинлари эса унинг хатти-ҳаракатлари оилага оғир маънавий ва моддий зарар етказганини айтиб, қонуний ва оғирроқ жазо тайинлашни сўради. Суд ҳукмига кўра, судланувчи 3 йил муддатга транспорт воситаларини бошқариш ҳуқуқидан маҳрум қилинди ва унга якуний тартибда 7 йил озодликдан маҳрум қилиш жазоси тайинланди. Жазони манзил-колонияда ўташ белгиланди. Ҳукмда судланувчининг турмуш ўртоғи воқеа жойига Matiz автомобилини олиб келгани қайд этилган. Бироқ унинг марҳум жасадини каналга ташлашда иштирок этгани далиллар билан исботланмагани билдирилган. Тарафлар ҳукм устидан белгиланган тартибда апелляция шикояти бериш ҳуқуқига эга. Telegram |Instagram |  You Tube | Facebook | X

Шавкат Мирзиёев Никол Пашинянни сайловдаги ғалабаси билан табриклади Ўзбекистон президенти Шавкат Мирзиёев Арманистон бош вазири Никол Пашинянга унинг “Ватандошлик келишуви” партияси парламент сайловида ғалаба қозонгани муносабати билан табрик йўллади. Арманистонда 7 июнь куни ўтказилган парламент сайловида Пашинян бошчилигидаги партия қарийб 50 фоиз овоз тўплаб, ҳокимиятда қолиш учун етарли устунликка эришди. Халқаро нашрлар бу натижани Пашинян учун ҳокимиятдаги учинчи муддатни таъминлаган сиёсий ғалаба сифатида баҳоламоқда. Мирзиёев ўз табригида сайлов натижалари арман халқининг Пашинян олиб бораётган ички ва ташқи сиёсатга, жумладан Жанубий Кавказда тинчлик ва фаровонликни таъминлаш йўлидаги саъй-ҳаракатларига ишончи юқори эканини кўрсатганини таъкидлади. Ўзбекистон етакчиси, шунингдек, икки давлат ўртасидаги ўзаро манфаатли ҳамкорлик келгусида янада кенгайишига ишонч билдирди. Пашинян 2018 йилдаги “Бахмал инқилоб”дан кейин Арманистон ҳукуматини бошқара бошлаган. 2026 йилги сайлов унинг Россия таъсиридан нисбатан узоқлашиш, Ғарб билан алоқаларни кучайтириш ва Озарбайжон билан тинчлик жараёнини давом эттириш сиёсатини қўллаб-қувватлаш бўйича янги мандат сифатида кўрилмоқда. Айни пайтда Арманистон мухолифати сайлов натижаларига эътироз билдириб, айрим қонунбузарликлар бўлганини даъво қилаяпти. Telegram |Instagram |  You Tube | Facebook | X

🔴АҚШда икки ўзбекистонлик ноқонуний миграция ва пул ювиш схемасида айбланди АҚШ Адлия вазирлиги Нью-Йоркда яшовчи икки нафар ўзбекистонлик — 39 ёшли Акмал Расулов ва 52 ёшли Искандар Шукуровга нисбатан ноқонуний миграцияни ташкил этиш ва пул ювиш бўйича айблов эълон қилинганини маълум қилди. Нью-Йорк жанубий округи прокуратураси хабарига кўра, Расулов ва Шукуров 4 июнь куни қўлга олинган. Суд қарори билан Шукуров ҳибсда қолдирилган, Расулов эса гаров эвазига озод қилинган. Тергов версиясига кўра, улар 2021–2025 йиллар давомида хориж фуқароларини, асосан Ўзбекистон фуқароларини, АҚШга ноқонуний олиб кириш билан боғлиқ схема юритган. Бу хизмат учун ҳар бир шахсдан минглаб доллар олингани айтилмоқда. Айблов ҳужжатида қайд этилишича, гумонланувчилар ва уларнинг шериклари мигрантларни АҚШга кириш учун аввалдан рухсатсиз чегара пунктига олиб келиш ёки иммиграция ходимлари текширувисиз қуруқлик чегарасидан ўтказишни ташкил қилган. Тергов маълумотларига кўра, Расулов ва Шукуров Мексикада яшовчи шериги билан ҳамкорлик қилган. Улар халқаро пул ўтказмалари орқали унга маблағ юборган. Айрим ўтказмаларда тўлов мақсади “қарзни қайтариш” ёки “юридик хизматлар” сифатида кўрсатилгани, бу орқали пулнинг ҳақиқий мақсадини яширишга урингани иддао қилинмоқда. АҚШ қонунчилигига кўра, уларга пул ювиш бўйича тил бириктириш айблови билан 20 йилгача, ноқонуний миграцияни ташкил этиш бўйича тил бириктириш айблови билан эса 5 йилгача қамоқ жазоси тайинланиши мумкин. Прокуратура тергов давом этаётганини билдирган. Шу билан бирга, айблов ҳужжатида келтирилган маълумотлар ҳозирча фақат даъво экани, Расулов ва Шукуровнинг айби судда исботланмагунча улар айбсиз ҳисобланиши таъкидланган. Аввалроқ, АҚШда ўзбекистонликлар иштирокидаги ҳуқуқбузарликлар кўпайгани фонида Нью Йоркдаги Бош консулхона мурожаат қилган эди. Идора фуқароларни маҳаллий қонун ва маданиятни ҳурмат қилишга чақирди. Ҳар қандай қонунбузарлик бутун ўзбек жамоатчилиги ҳақидаги тасаввурга салбий таъсир қилиши мумкинлиги таъкидланди. Telegram |Instagram |  You Tube | Facebook | X

Андижонда одамлар мушкулини енгиллаштирмоқчи бўлган «фидоий» ходимлар қўлга тушди Андижон вилоятида мансаб ваколатини суиистеъмол қилиш ва кредит ажратишда “ёрдам” бериш баҳонасида пул талаб қилиш билан боғлиқ икки ҳолат аниқланди. Биринчи ҳолат Андижон вилояти Қурилиш ва уй-жой коммунал хўжалиги соҳасида ҳудудий назорат қилиш инспекциясида қайд этилган. Инспекциянинг шўъба бошлиғи Андижон шаҳридаги савдо дўконида ичимлик сувидан ноқонуний фойдаланилгани бўйича расмийлаштирилган далолатномада кўрсатилган зарар миқдорини камайтириб беришни ваъда қилган. Маълум қилинишича, “Андижон сув таъминоти” АЖ томонидан мазкур дўкон фаолияти натижасида давлатга қарийб 680 млн сўмлик зарар етказилгани юзасидан далолатнома тузилган. Шўъба бошлиғи эса мансабдор танишлари орқали ушбу зарарни қайта ҳисоблатиб, камайтириш ҳамда маъмурий чора кўрилишида ёрдам бериш эвазига 30 млн сўм талаб қилган. ДХХ, Иқтисодий жиноятларга қарши курашиш департаменти ва ИИБ ходимлари ҳамкорлигида ўтказилган тезкор тадбирда у дўкон эгасидан талаб қилинган пулни олган вақтда ашёвий далиллар билан ушланган. Иккинчи ҳолатда акциядорлик тижорат банкларидан бирининг Асака тумани филиали “Маҳаллабай ишлаш” бўлими бош менежери тадбиркорлик фаолиятини бошламоқчи бўлган фуқарога 3 млрд 650 млн сўм кредит олиб беришда ёрдамлашишни ваъда қилган. У ушбу хизмат эвазига 8 минг АҚШ доллари талаб қилгани айтилмоқда. Маълумотларга кўра, бош менежер жорий йилнинг апрель–май ойларида фуқародан жами 7800 доллар олган. Бироқ ваъдасини бажара олмаганидан сўнг, пулнинг 1000 долларини қайтариб бераётган вақтда ДХХ ва ИИБ ходимлари томонидан қўлга олинган. ДХХ хабарида вазият айнан қайси банк ходими билан боғлиқлиги очиқланмаган. Ҳозирда ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда. Telegram |Instagram |  You Tube | Facebook | X

📄uzdiplqomat iqtibosi🖍 «Зиёли инсон жамиятдаги катта иллатларни танқид қилгани учун ҳақ олмайди, кўксига медал тақилмайди, аксинча, катта зарар кўриш эҳтимоли бор. Зиёлини тўғри сўзлари учун яккалаб қўйишлари, ишдан бўшатишлари, мамлакатдан бадарға қилишлари, қамашлари мумкин. Зиёлининг ҳақгўйлигидан оиласи, қариндошлари ҳам муаммоларга дуч келади. Оломон ҳам унинг фойдаси учун гапираётган зиёлини ёқтирмайди. Ҳўш, ҳар томонлама зарар кўрар экан, нима учун зиёли инсон халқ ва ватан манфаатини ўйлаб ҳақни сўзлашдан қайтмайди? Ахир ҳақгўйлик унинг ҳаётини дўзаҳга айлантириб юборади-ку". Раҳимжон Раҳмат, Ёзувчи, журналист Telegram |Instagram |  You Tube | Facebook | X

🔴Журналистларни қўллаб-қувватлаш бўйича янги лойиҳа муҳокамага қўйилди ✔️Ўзбекистон медиасини ривожлантиришга қаратилган Президент қарори лойиҳаси эълон қилинди. Лойиҳада асосий янгиликлардан бири сифатида Журналистлар уюшмаси ҳузурида Миллий медиа ва журналистлик фаолиятини қўллаб-қувватлаш жамғармасини ташкил этиш таклиф қилинмоқда. Унга ҳар йили давлат бюджетидан 40 млрд сўм ажратилиши кўзда тутилган. Жамғарма ҳисобидан: — фаол журналистлар мунтазам рағбатлантирилади; — ҳар чоракда 20 та долзарб материал муаллифлари мукофотланади; — ҳар йили 100 та энг яхши таҳлилий материал учун танлов ўтказилади; — журналистика йўналишида ўқиётган 50 нафар талабанинг контракти тўлаб берилади; — коррупция мавзусидаги материаллар учун “Журналистик ечимлар” грант дастури жорий этилади; — давлат мукофоти ёки “Олтин қалам” ғолиби бўлган журналистларнинг ижара харажатлари қопланади; — ОАВ учун солиқ ва божхона имтиёзлари берилиши таклиф қилинмоқда; — журналистлар учун фактчекинг платформаси яратилади; — Журналистлар уюшмасига аъзоларини суд жараёнларида ҳимоя қилиш имконияти берилади. Батафсил сайтда ўқинг! ❗️Фото СИ орқали ясалган. Telegram | Instagram | You Tube | Facebook | X

🎬 “Ўзбек киноси комада, у жон бермоқда” 🔴 Қарор ва қонунлар ўзгартира олмаган кинематография: ўзбек киносини ким бошқаради? Тўлиқ интервью 35 йилдан бери бирорта ҳам ўзбек фильми ўз харажатини қопламаган. Нега? Нима учун фильмларимиз жаҳоннинг нуфузли фестивалларига етиб бормаяпти? Канн ҳақидаги гаплар қанчалик ҳақиқат? Кинематография агентлиги фестивалларга фильм юборадими? Давлат маблағига яшашга ўрганган тизим нега ҳануз ўз прокат бозорини ярата олмади? 🎙Бу ва бошқа оғриқли саволларга режиссёр ва сценарист Рашид Маликов жавоб беради. ❗️«Ўзбек киноси фақат давлат бюджетига қараб қолган» ❗️«Канн ҳақидаги кўп гаплар ҳақиқат эмас» ❗️«Прокат тизими бўлмас экан, кино ҳеч қачон даромадли бўлмайди» Telegram | Instagram |  You Tube | Facebook | X

🔴Францияда қишлоқ хўжалиги соҳасида ишлаш имконияти эълон қилинди ✔️Маош 1600 евродан кўп Миграция агентлиги Франциянинг қишлоқ хўжалиги соҳасида мавсумий иш ўринлари учун танлов бошланганини маълум қилди. Маълум қилинишича, ишчилар Франциянинг икки ҳудудида мева ҳамда сабзавот етиштириладиган далаларда ҳосил йиғим-терими ишларига жалб этилади. Мева далаларида иш 17 августдан, сабзавот далаларида эса 1 октябрдан бошланади. Вакансияга 25–45 ёшдаги, судланмаган, француз тилини мулоқот даражасида биладиган ҳамда қишлоқ хўжалиги соҳасида камида уч йиллик тажрибага эга эркак ва аёллар таклиф этилмоқда. Номзодларга ойига 1650 евро миқдорида маош тўланиши белгиланган. Виза расмийлаштириш, авиачипта, турар жой, транспорт ва озиқ-овқат билан боғлиқ айрим харажатлар номзодлар ҳисобидан қопланади. Шу билан бирга, виза ва авиачипта учун сарфланган маблағларнинг бир қисми ишга жойлашгандан сўнг Миграция агентлиги томонидан компенсация қилинади. Танлов иш берувчи вакиллари томонидан онлайн тарзда ўтказилади. Анкеталарни қабул қилиш 20 июнга қадар давом этади. Иш ўринлари сони чекланган, дейилган агентлик хабарида. Telegram | Instagram | You Tube | Facebook | X

#achchiq_hazil 🔴Ҳокимлар жаримани маош миқдоридан келиб чиқиб тўласинми ёки “пора ставкасидан”? Яқинда Экология инспекторига нисбатан куч ишлатган собиқ ҳоким ўринбосари салкам 62 миллион сўм жарима тўлаши маълум қилинди. Мазкур жарима миқдори ижтимоий тармоқларда қизғин муҳокамаларга сабаб бўлди. Айримлар бу миқдорни катта деб баҳолаган бўлса, бошқалар юқори лавозимли амалдор учун бу унчалик сезиларли жазо эмаслигини таъкидлади. Шу муносабат билан Уздипломат мухбири коррупция мавзуларини ёритиб борувчи журналист Нодирбек Нортўраевга савол билан юзланди: — Ҳокимларга жарима белгилашда уларнинг маошидан келиб чиқиш керакми ёки “пора ставкасидан”? Журналист аччиқ ҳазил тариқасида “пора ставкаси”дан келиб чиқиб жарима белгиланса, давлат бюджети тақчиллигини анча тез бартараф этиш мумкинлигини айтди. Албатта, мазкур жавоб ҳазил тарзида айтилган фикрдир. Эслатиб ўтамиз, коррупцияга қарши курашнинг мақсади бюджетни тўлдириш эмас, балки коррупциядан ҳоли, адолатли ва ҳисобдор бошқарув тизимини шакллантиришдир. Telegram | Instagram |  You Tube | Facebook | X

«Обод» махалласининг чанг кўчалари қачон асфальт кўради? Қашқадарё вилояти Яккабоғ туманидаги “Обод” маҳалласи аҳолиси ички кўчаларнинг аҳволи оғирлигидан норози бўлиб, мутасаддиларга мурожаат қилиб келади, лекин фойдаси йўқ. Фуқароларнинг айтишича, маҳалладаги тахминан 500 метрлик йўл йиллар давомида таъмирланмаган. Ёз ойларида кўча чанг-тўзонга ботса, қишда лойга айланиб, ҳаракатланишни қийинлаштирмоқда. Қолаверса, оғир юк машиналари ўтганда ҳавога кўтарилган чанг уйлар ичигача кириб боради, айрим фуқаролар эса нафас олишда қийналмоқда. Мурожаатда тез тиббий ёрдам ва такси хизматлари ҳам кўча аҳволи туфайли маҳаллага киришни истамаслиги қайд этилган. Айниқса, ёмғирли кунларда беморлар ва ёш болаларни асфальт йўлгача кўтариб чиқишга тўғри келади. Шунингдек, маҳалла аҳолиси мазкур муаммо юзасидан бир неча бор ҳокимликка мурожаат қилганини, аммо ҳозирча амалий натижа бўлмаганини билдирган. ❗️«Реал Ўзбекистон» лойиҳасида иштирок этинг! Ўз ҳудудингизга оид янгиликлар, сурат ва лавҳаларни телеграмдан @uzdiplomat_uz га жўнатинг! Telegram | Instagram | You Tube | Facebook | X

🔴Дам олиш кунлари ҳаво ҳарорати +42 даражагача кўтарилиши мумкин Ўзгидромет маълумотларига кўра, 13–15 июнь кунлари Ўзбекистоннинг аксарият ҳудудларида қуруқ ва ёғингарчиликсиз об-ҳаво сақланиб туради. Жума куни ҳаво ҳарорати +33...+36 даража атрофида бўлади. Дам олиш кунларида эса иссиқлик кучайиб, ҳаво +36...+38 даражагача, чўл ҳудудларида +40 даражагача, мамлакатнинг энг жанубий қисмларида эса +42 даражагача кўтарилиши кутилмоқда. Шанба куни Қорақалпоғистонда, якшанба куни эса Қорақалпоғистон, Хоразм, Навоий ва Бухоро вилоятининг айрим ҳудудларида қисқа муддатли ёмғир ва момақалдироқ кузатилиши мумкин. Шамол тезлиги 7–12 м/с бўлиб, айрим жойларда 13–18 м/с гача кучаяди. Шимолий ва чўл ҳудудларда шамол тезлиги 20–22 м/с гача етиши, чанг-тўзонлар кузатилиши мумкин. Тоғолди ва тоғли ҳудудларда қисқа муддатли ёмғир ёғиши, момақалдироқ бўлиши ҳамда сел-сув тошқини хавфи сақланиб қолмоқда. Тошкент шаҳрида ҳам дам олиш кунлари асосан қуруқ ва кам булутли об-ҳаво кузатилади. Ҳаво ҳарорати кундузи +36...+38 даражагача кўтарилиши кутилмоқда. Telegram | Instagram | You Tube | Facebook | X

Тошкентда хавфли ҳаракатланган Cobalt ҳайдовчиси ўқ узиш орқали тўхтатилди Тошкент шаҳрининг Яккасарой туманида йўл ҳаракати қоидаларини қўпол равишда бузиб, бир нечта автомашинага шикаст етказган Cobalt ҳайдовчиси ички ишлар ходимлари томонидан ўқ узиш орқали тўхтатилди. Тошкент шаҳар ИИББ маълум қилишича, воқеа 11 июнь куни соат 21:30 атрофида Шота Руставели кўчасида содир бўлган. Автомобилни бошқариб келган 44 ёшли фуқаро ИИО ходимларининг тўхташ ҳақидаги қонуний талабларига бўйсунмаган ва ҳаракатни давом эттирган. Қайд этилишича, ҳайдовчи йўлда бошқа иштирокчилар ҳаётига хавф туғдириб ҳаракатланган ҳамда бир нечта транспорт воситасига техник шикаст етказган. Ҳуқуқ-тартибот идоралари ходимлари томонидан унинг кейинги ҳаракатларининг олдини олиш мақсадида аввал огоҳлантириш берилган. Шундан сўнг хизмат қуролидан фойдаланилиб, автомашинанинг ғилдирагига ўқ узилган ва транспорт воситаси тўхтатилган. Дастлабки маълумотларга кўра, ҳайдовчи руҳий-асаб касалликлари шифохонасида рўйхатда турган шахс ҳисобланади. Ҳозирда ҳолат юзасидан терговга қадар текширув ҳаракатлари олиб борилмоқда. Telegram | Instagram | You Tube | Facebook | X

uzdiplomat иқтибоси: 🖍 «Давлат хизматчилари даромадларини декларация қилиш тизими 2021 йил январдан жорий этилади». АКМАЛ БУРҲОНОВ, Коррупцияга қарши курашиш агентлиги директори 2020 йил, октябрь (2026 йилнинг ярми ўтди, лекин давлат хизматчилари даромадларини декларация қилиш тизими ишга тушгани йўқ...) Telegram | Instagram | You Tube | Facebook | X

🔴АҚШдан яна 24 нафар ўзбекистонлик депортация қилинди 11 июнь куни Америка Қўшма Штатлари Ўзбекистонга махсус депортация рейсини амалга ошириб, АҚШ ҳудудида қолиш учун қонуний асосга эга бўлмаган 24 нафар Ўзбекистон фуқаросини ватанга қайтарди. Бу АҚШнинг ноқонуний миграцияга қарши сиёсати доирасидаги навбатдаги тадбир бўлди. АҚШ ҳукумати маълум қилишича, мазкур рейс мамлакат чегаралари хавфсизлигини таъминлаш ва иммиграция қонунларига риоя этилишини назорат қилиш бўйича олиб борилаётган чора-тадбирларнинг бир қисми ҳисобланади. Расмий баёнотда қайд этилишича, АҚШ ҳудудига ноқонуний кирган ёки мамлакатда яшаш учун қонуний мақомга эга бўлмаган шахслар қонунчиликка мувофиқ ушлаб турилиши ва мамлакатдан чиқариб юборилиши мумкин. Шунингдек, Вашингтон депортация жараёнларини ташкил этиш ва фуқароларни қабул қилишда ҳамкорлик кўрсатаётгани учун Ўзбекистон ҳукуматига миннатдорлик билдирди. Сўнгги ойларда АҚШ маъмурияти ноқонуний миграцияга қарши чораларни кучайтириб, депортация амалиётини фаоллаштирмоқда. Бу жараён Марказий Осиё давлатлари, жумладан Ўзбекистон фуқароларига ҳам таъсир кўрсатмоқда. Айни пайтда АҚШда қонуний мақомсиз яшаётган Ўзбекистон фуқароларининг аниқ сони очиқланмаган. Бироқ мутахассислар АҚШнинг миграция сиёсати қатъийлашаётгани сабабли депортация ҳолатлари келгусида ҳам давом этиши мумкинлигини таъкидламоқда. Яна шу мазмундаги материаллар билан танишиш Telegram | Instagram |  You Tube | Facebook | X