ኢንፍራኮን ሚዲያ - Infracon Media

የኮንስትራክሽን ኤክስፖርቱ ዕውን ሆነ‼️ ◂▸◂▸◂▸ ትናንት በህልም ደረጃ የተሰነቀው፣ በወረቀት ላይ የተከተበው ያ ታላቅ ራዕይ ዛሬ በጁባ ሰማይ ሥር ደምቆ ዕውን ሆኗል፤ ፌቤኮ የኮንስትራክሽንና የቤት ልማት አገልግሎትን ወደ ውጭ አገር ኤክስፖርት ለማድረግ የጀመረው ታሪካዊ ጉዞ፣ ይፋዊ የውል ስምምነት በመፈራረም ወደማይቀለበስ ተግባራዊ ምዕራፍ ተሸጋግሯል፤ ይህ ስኬት ተቋሙ ከአገር ውስጥ አድማስ አልፎ በቀጠናው ደረጃ ግዙፍ አሻራውን ለማሳረፍ ያደረገው የድል ጉዞ ማብሰሪያ ነው፤

ቀደም ሲል በአዲስ አበባ ከተማ ተፈርሞ የነበረው የመግባቢያ ስምምነት፣ አሁን በጁባ ከተማ በተደረገው አዲስ ታሪካዊ ውል ወደ ሙሉ ተግባር እንዲቀየር ተደርጓል፤ የደቡብ ሱዳን መንግሥት ለዚሁ ዘመናዊ የቤት ግንባታ የሚሆኑ የሕንፃ ሳይቶችን መረጣ እና ተያያዥ የቅድመ ዝግጅት ሥራዎችን በዝርዝር ገምግሞ ማጠናቀቁን አስታውቋል፤

በግዛቱ የኮንስትራክሽን እና ቤቶች ኮርፖሬሽን በቀረበው የጥናት ሪፖርት መሠረት፣ ሁሉም ነገር ለግንባታው መጀመር ዝግጁ መሆኑ ተረጋግጧል፤ ይህን የምሥራች ያተመው ውል የተፈረመው በፌዴራል ቤቶች ኮርፖሬሽን ዋና ሥራ አስፈፃሚ በዶክተር ረሻድ ከማል እና በደቡብ ሱዳን ሴንተራል ኢኳቶሪያል ግዛት አስተዳዳሪ በክቡር ኢማኑኤል አድል ስም ነው፤ በዚህም መሠረት ኮርፖሬሽኑ በጁባ ከተማ እምብርት ላይ የወቅቱን ስልጣኔና ውበት የሚያንፀባርቁ ዘመናዊ የንግድና የመኖሪያ ሕንፃዎችን በይፋ የሚገነባ ይሆናል፤ ይህ ፊርማ የፌቤኮን መሐንዲሶች ጥበብና አቅም ወደ አፍሪካ መድረክ ያሻገረ ድል ነው።

በጁባ የነበረው ቆይታ በፊርማ ብቻ የተገደበ አልነበረም፤ ዶክተር ረሻድ ከማል ከደቡብ ሱዳን መንግሥት ልዩ መልዕክተኛ ከክብርት አዱት ኪር ጋር እጅግ ፍሬያማና ስልታዊ ውይይት አካሂደዋል፤

በዚህ ወሳኝ መድረክ ላይ በደቡብ ሱዳን የኢትዮጵያ አምባሳደር ክቡር ደሊል ከድር እና በዚያው አገር በተለያዩ የኢንቨስትመንት ዘርፎች የተሰማሩት ታዋቂው ኢትዮጵያዊ ባለሀብት ዶክተር አይሸሽም ተካ ተገኝተው ለጉዳዩ ይበልጥ ድምቀትና ጥንካሬ ሰጥተውታል፤ የደቡብ ሱዳን ፌዴራል መንግሥት ሙሉ ድጋፍ በውይይቱ ወቅት ክብርት አዱት ኪር ለዚህ ታላቅ ፕሮጀክት ያላቸውን አክብሮትና ተስፋ የገለጹ ሲሆን፣ ኮርፖሬሽኑ በጁባ ለሚያካሂደው የቤት ልማት ፕሮግራም የደቡብ ሱዳን ፌዴራል መንግሥት አስፈላጊውን ድጋፍ ሁሉ ያለምንም ስስት እንደሚያደርግ አጽንኦት ሰጥተው ተናግረዋል፤

የደቡብ ሱዳን መንግሥት ለስምምነቱ ተግባራዊነት ያለውን ቁርጠኝነት በማረጋገጥ፣ ይህ የቤት ግንባታ በሁለቱ እህትማማች አገራት መካከል ያለውን ጠንካራና ታሪካዊ ግንኙነት ወደ ላቀ ከፍታ እንደሚያሸጋግረው ሙሉ እምነታቸውን ገልጸዋል፤ የጋራ ተጠቃሚነትና የወንድማማችነት መርህ ዋና ሥራ አስፈፃሚው ዶክተር ረሻድ ከማል በበኩላቸው፣ የፌዴራል ቤቶች ኮርፖሬሽን ወደ ደቡብ ሱዳን ያቀናው ለብቻው ለማትረፍ ሳይሆን የጋራ ተጠቃሚነትን፣ አብሮነትን እና ወንድማማችነትን መርህ አድርጎ መሆኑን በኩራት ገልጸዋል፤ ተቋማቸው በአጭር ጊዜ ውስጥ ሙሉ በሙሉ የቅድመ ዝግጅት ሥራዎችን አጠናቆ ግንባታውን በይፋ እንደሚጀምርና የኢትዮጵያን የኮንስትራክሽን ጥራት በጁባ ምድር ላይ እንደሚያሳይም ቃል ገብተዋል፤ በድል የተጠናቀቀው ጉዞ እና የነገው ተስፋ ለአራት ቀናት በደቡብ ሱዳን ሲካሄድ የነበረውና ታሪካዊ ስኬት የተመዘገበበት ይፋዊ የሥራ ጉብኝት ተጠናቆ፣ ዶ/ር ረሻድ ከማል እና በርሳቸው የሚመራው የሥራ ልዑካን ቡድን ትናንት ወደ መዲናችን አዲስ አበባ ተመልሷል፤ ይህ ጉዞ ፌቤኮን ከኪሳራ አዙሪት አውጥቶ፣ ቴክኖሎጂን አስታጥቆ፣ የገርጂንና የሌሎችን ከአሥር በላይ ግዙፍ ግንባታዎችን አሳክቶ፣ አሁን ደግሞ የኮንስትራክሽን አገልግሎትን እስከ ውጭ አገር ኤክስፖርት ለማድረግ የቻለ ብርቱ ማኔጅመንት መኖሩን በድጋሚ የመሰከረ ደማቅ ታሪክ ሆኖ ተመዝግቧል፤ ፊቱን ወደ ድሬዳዋና ወደ ቀጠናው አገራት የዞረው ፌቤኮ፣ ዛሬም ግዙፍነቱን ጠብቆ በተስፋ እየተጓዘ ነው።