ኢንፍራኮን ሚዲያ - Infracon Media

የፌዴራል ቤቶች ኮርፖሬሽን በመርካቶ የ2,500 የንግድ ሱቆች ግንባታን አስጀመረ ◂▸◂▸◂▸

የፌዴራል ቤቶች ኮርፖሬሽን በመርካቶ ጣና ገበያ አካባቢ በ1 ነጥብ 8 ሄክታር መሬት ላይ የሚያርፉ የ2,500 ዘመናዊ የንግድ ሱቆች ግንባታን በዛሬው ዕለት በይፋ አስጀምሯል።

የግንባታ ፕሮጀክቱን ያስጀመሩት የኮርፖሬሽኑ ዋና ሥራ አስፈጻሚ ዶክተር ረሻድ ከማል ሲሆኑ፣ ከዚህ ቀደም በቦታው ላይ የነበሩት 230 ያህል አሮጌ ሱቆች ተነስተው በምትካቸው ባለ 5 ወለል የሆኑ ዘመናዊ የንግድ ሕንፃዎች እንደሚገነቡ ተገልጿል።

ዶክተር ረሻድ በዝግጅቱ ላይ ባደረጉት ንግግር፤ ኮርፖሬሽኑ ሀገራዊ ለውጡን ተከተሎ ባካሄደው ጠንካራ ተቋማዊ ሪፎርም ዓመታዊ ገቢውን ከ300 ሚሊዮን ብር ወደ 12 ነጥብ 5 ቢሊዮን ብር ማሳደግ መቻሉን ገልጸዋል። አዲሱ የግንባታ አሰራር ከተከራይ ደንበኞች እና ከግል ባለሀብቶች ጋር በመቀናጀት የሚከናወን በመሆኑ፣ ኮርፖሬሽኑ በዜሮ ኢንቨስትመንት በ10 የተለያዩ ሳይቶች ላይ ግንባታውን ለማስጀመር መቻሉን ተናግረዋል። አብረው መስራት ለሚፈልጉ ብቁ የግል አልሚዎችም የጋራ አሰራር ጥሪ አቅርበዋል። አዲስ የሚገነቡት የንግድ ሱቆች የአዲስ አበባ ከተማን ደረጃ የጠበቁ፣ በቂ የመኪና ማቆሚያ (ፓርኪንግ) ያላቸው እና ከአንድ ዓመት ባነሰ ጊዜ ውስጥ ተጠናቀው ለአገልግሎት የሚበቁ ናቸው። ፕሮጀክቶቹ ለከተማዋ የኮሪደር ልማት እና የገጽታ ግንባታ ከፍተኛ አስተዋጽኦ ከማበርከታቸው ባሻገር፣ ከ10 ሺህ በላይ ለሚሆኑ ዜጎች ቋሚ የሥራ ዕድል ይፈጥራሉ ተብሎ ይጠበቃል። በተጨማሪም ለግንባታው የተነሱ ሱቆች ያጡትን ገቢ ለመተካት ታስቦ፣ በመርካቶ አዳራሽ ገበያ አካባቢ በ3 ወራት ውስጥ ግንባታቸው የተጠናቀቀ 399 አዳዲስ ሱቆች በዛሬው ዕለት በይፋ ተመርቀው ወደ ኪራይ አገልግሎት ገብተዋል።