TIKVAH-MAGAZINE

የኢትዮጵያ ሜቲዎሮሎጂ ኢንስቲትዩት በወርሃ ነሐሴ የኤልኒኖ ክስተት የመፈጠር ዕድል እንዳለ ገለጸ በመጪው ነሐሴ ወር በምስራቅና በመካከለኛው የፓሲፊክ ውቅያኖስ የባሕር ወለል ሙቀት መጨመር የኤልኒኖ ክስተትን የማስከተል ዕድል እንዳለው አሃዛዊ የትንበያ መረጃዎች እንደሚያመለክቱ የኢትዮጵያ ሜቲዎሮሎጂ ኢንስቲትዩት አስታወቀ። በዚሁ መሠረት በነሐሴ ወር በትግራይ፣ በመካከለኛና በምዕራብ አማራ አንዳንድ ዞኖች መደበኛ ወይም ከመደበኛ በታች የሆነ የዝናብ መጠን ሊመዘገብ እንደሚችል ትንበያው ያሳያል። በአንጻሩ በቤንሻንጉል ጉምዝ፣ በምዕራብ ኦሮሚያ፣ በደቡብ ምዕራብ ኢትዮጵያና በጋምቤላ ክልሎች በአብዛኛው መደበኛና ከመደበኛ በላይ የዝናብ መጠን እንደሚጠበቅ ተብራርቷል። የኢንስቲትዩቱ ምክትል ዋና ዳይሬክተር አሳምነው ተሾመ (ዶ/ር)፣ ባለፈው የሰኔ ወር በምዕራብ፣ በሰሜን እና ሰሜን ምስራቅ የሀገሪቱ አካባቢዎች እስከ 100 ሚሊሜትር የሚደርስ ከፍተኛ የዝናብ መጠን መመዝገቡ ለማሳ ዝግጅት እና ለአካባቢ ጥበቃ ስራዎች ከፍተኛ አስተዋጽኦ ማበርከቱን አስረድተዋል። አክለውም የግብርናውን ዘርፍ ሊከሰቱ ከሚችሉ የአየር ጸባይ ተጽዕኖዎች ለመጠበቅ የዝናብ ሁኔታን የሚመጥኑ ሰብሎችን መጠቀም፣ በአጭር ጊዜ የሚደርሱ ሰብሎችን ማምረትና ድርቅ መቋቋም የሚችሉ ዘሮችን መዝራት አስፈላጊ መሆኑን አስገንዝበዋል። በተጨማሪም የውሃ ማሰባሰብና የውሃ ማቆር ሥራዎችን በማጠናከር ለእርሻና ለመስኖ ልማት የሚያገለግል የውሃ አስተዳደር ሥርዓትን መዘርጋት እንደሚገባ ገልጸዋል። ኢንስቲትዩቱ በክረምቱ ወቅት የሚኖረውን የዝናብ ሁኔታ በሳይንሳዊ ትንተና በመመርኮዝ ቀድሞ በማሳወቅ በግብርና፣ በውሃ ሀብት፣ በአካባቢ ጥበቃና በአደጋ ስጋት ቅነሳ ሥራዎች ላይ ጠቃሚ መረጃዎችን መስጠቱን አጠናክሮ እንደሚቀጥልም ነው ያነሱት። Credit : FMC @TikvahethMagazine