ടെക്നോളജി

എഐ ഉണ്ടായത് 2020-ലോ മറ്റോ ആണെന്ന് ലോകം കരുതാൻ മാത്രം വിപ്ലവകരമായിരുന്നു ജെൻഎഐ ആദ്യമായി ചാറ്റ്ജിപിറ്റിയുടെ രൂപത്തിൽ അവതരിച്ചപ്പോൾ ഉണ്ടായ പ്രകമ്പനങ്ങൾ. അത് വരെ എഐ എന്നത് കമ്പ്യൂട്ടർ പ്രോഗ്രാമർക്ക് മാത്രം വഴങ്ങുന്ന എന്തോ ആണെന്നുള്ള ധാരണ മാറ്റിക്കുറിച്ച് സാധാരണക്കാർക്ക് പോലും അതുമായി ഇടപഴകാനുള്ള അവസരം തുറക്കപ്പെട്ടു. രണ്ട് വർഷം മുന്നേ വരെ LLM മോഡലുകളെ മെരുക്കണമെങ്കിൽ കൃത്യമായ പ്രോംപ്റ്റുകൾ എഴുതാൻ കഴിയണം എന്നും, അതിനായി പഠിപ്പിക്കുന്ന കോഴ്സുകൾ വേണമെന്നും ഉള്ള ധാരണ പരന്നു. പ്രോംപ്റ്റ് എഞ്ചിനീയറിംഗിൽ ബിടെക് വരെ തുടങ്ങുമോ എന്ന് വരെ സംശയിക്കപ്പെട്ടു. മോഡലുകളുടെ വികാസം പിന്നീട് അതി വേഗത്തിലായിരുന്നു എന്ന് മാത്രമല്ല, കോഡിങ്, കോ-വർക്കിംഗ്, ടൂളുകൾ, സ്കിൽസ്, എന്നിങ്ങനെ ആ ഇക്കോസിസ്റ്റം അതിവേഗമാണ് വികസിച്ചത്. ഇതോടെ മോഡലിനെ പരിശീലിപ്പിച്ച് മികച്ച ഔട്ട്പുട്ട് ഉണ്ടാക്കാൻ സാധിക്കണമെങ്കിൽ കോൺടെക്സ്റ്റ് കൃത്യമായിരിക്കണം എന്ന തിരിച്ചറിവിൽ നിന്നും കോൺടെക്സ്റ്റ് എഞ്ചിനീയറിംഗ് വന്നു. എഐ മോഡലുകൾക്ക് കൃത്യമായ ഡോക്യുമെന്റുകൾ, മെമ്മറി, ടൂളുകൾ, ബാക്ക്ഗ്രൗണ്ട് വിവരങ്ങൾ ഒക്കെ കൊടുത്ത് അവയെ കൂടുതൽ സ്മാർട്ട് ആക്കുക എന്നത് വഴി വളരെ കൃത്യമായ അല്ലെങ്കിൽ യഥാർഥ്യത്തോട് കൂടുതൽ അടുത്തു നിൽക്കുന്ന ഉത്തരങ്ങൾ സൃഷ്ടിക്കുക എന്നതാണ് ഇതിൽ ഉദ്ദേശിക്കുന്നത്. ഇത്തരത്തിൽ ക്ലോഡ്, ചാറ്റ്ജിപിറ്റി, ജെമിനി, ക്വെൻ, ജിഎൽഎം, ഡീപ്സീക് തുടങ്ങി ഏത് മോഡലിനേയും ഫൈൻ ട്യൂൺ ചെയ്യാൻ സാധിക്കുമെന്ന് കണ്ടു. ക്ലോഡ് കോ-വർക്ക് വച്ച് മികച്ച ഫലങ്ങൾ സൃഷ്ടിച്ച അനുഭവവും ഉണ്ട്. 2025-2026 കാലത്തിൽ മൾട്ടി-ഏജന്റിക് എഐ സിസ്റ്റങ്ങൾ വ്യാപകമാകാൻ തുടങ്ങിയതോടെ നമ്മൾ അടുത്ത ഘട്ടത്തിലേക്ക് കടന്നിരിക്കുകയാണ് - ഹാർനെസ്സ് എഞ്ചിനീയറിംഗ് എന്നത് വഴി. എഐ മോഡലുകൾ ഒരു ചാറ്റ്ബോട്ട് എന്നതിലും മേലെ ആകുകയാണ് ഇതിൽ. ഇപ്പോഴത്തെ എഐ സിസ്റ്റങ്ങൾ ഒരുമിച്ച് പ്രവർത്തിക്കുന്ന നിരവധി ഘടകങ്ങളുടെ കൂട്ടായ പ്രവർത്തനം ആണെന്നതും, അവയെ എങ്ങിനെ ഫലപ്രദമായി വിനിയോഗിക്കാം (harness) എന്നതുമാണ് ഇതിൽ ഉള്ളത്. ഉദാഹരണത്തിന്, ഇപ്പോഴത്തെ എഐ സിസ്റ്റങ്ങൾക്ക് പിന്നിൽ: - ലാർജ് ലാംഗ്വേജ് മോഡലുകൾ - ഡാറ്റാബേസുകൾ - സെർച്ച് സിസ്റ്റംസ് - ഓട്ടോണോമസ് എഐ ഏജന്റുകൾ - എപിഐകളും മറ്റ് ടൂളുകളും - മെമ്മറി സിസ്റ്റംസ് - ഹ്യൂമൻ ഫീഡ്ബാക്ക് ലൂപ്പുകൾ - സുരക്ഷയും, ഇവാലുവേഷനും ഉറപ്പ് വരുത്തുന്ന പൈപ്പ്ലൈനുകൾ എന്നിവയുടെ യോജിച്ച പ്രവർത്തനം ഉണ്ടാവുന്നുണ്ട്. ഈ ഘടകങ്ങളെയെല്ലാം പരസ്പരം ബന്ധിപ്പിച്ച്, കൂട്ടായി പ്രവർത്തിപ്പിച്ച് വിശ്വസിനീയവും ഉപകാരപ്രദവുമായ ഒരു സിസ്റ്റം ആക്കി മാറ്റുന്ന പ്രക്രിയയാണ് ഹാർനെസ്സ് എഞ്ചിനീയറിംഗ് എന്നത് കൊണ്ട് ഉദ്ദേശിക്കുന്നത്. ചുരുക്കത്തിൽ: - പ്രോംപ്റ്റ് എഞ്ചിനീയറിംഗ് - മികച്ച ചോദ്യങ്ങൾ ചോദിക്കുന്നത് - കോൺടെക്സ്റ്റ് എഞ്ചിനീയറിംഗ് - മികച്ച വിവരങ്ങൾ നൽകുന്നത് - ഹാർനെസ്സ് എഞ്ചിനീയറിംഗ് - സമ്പൂർണ്ണമായ ഒരു എഐ ഇക്കോസിസ്റ്റം ഉണ്ടാക്കുന്നത് ആരുടെ കൈവശം ആണ് ഏറ്റവും ശക്തിയേറിയ മോഡൽ ഉള്ളത് എന്നതിനേക്കാൾ ആർക്കാണ് ഏറ്റവും ഫലപ്രദമായ ഇക്കോസിസ്റ്റം ആ മോഡലുകൾ വച്ച് ഉണ്ടാക്കാൻ കഴിയുന്നത് എന്നതിലാണ് എഐയുടെ ഭാവി രൂപപ്പെടുക എന്ന തിരിച്ചറിവിൽ നിന്നാണ് ഹാർനെസ്സ് എഞ്ചിനീയറിംഗ് വരുന്നത്. ആന്ത്രോപിക്കിന്റെ ക്ലോഡ്, ഓപ്പൺഎഐയുടെ ചാറ്റ്ജിപിറ്റി എന്നിവയുടെ ഒക്കെ വിജയം ഇതാണ് സൂചിപ്പിക്കുന്നത്. ചുരുക്കത്തിൽ എഐ ടൂളുകൾ ഉപയോഗിക്കുന്നതിൽ നിന്ന് എഐ ഇക്കോസിസ്റ്റങ്ങൾ എങ്ങിനെ എൻജിനീയർ ചെയ്യും എന്നതിലേക്കുള്ള മാറ്റമാണ് നമ്മൾ കാണുന്നത്. ഇതൊക്കെ നമ്മുടെ കരിക്കുലത്തിൽ ചേർക്കണമെങ്കിൽ ഓരോ വർഷവും സിലബസിൽ മാറ്റം വരുത്തുകയും അധ്യാപകരും പരിശീലകരും നിരന്തരം അപ്ഡേറ്റ് ചെയ്യപ്പെടുകയും വേണം. Source: ഒന്നും ഇല്ല, മറ്റൊരു ഗ്രൂപ്പിൽ നിന്ന് അടിച്ചോണ്ടുവന്നതാ