ከስነ-ፅሁፍ ዓለም

📔 ሲ ቫ ና 📖 📖 📖 «የሕይወትህን ጉዞ በጊዜ ሰሌዳ ብቻ ቀፍድደህ አትያዘው፤ በዚህ ፋንታ ህሊናህና ልብህ የሚያምኑበት ነገሮች ላይ አትኩሮትህን አድርግ። በራስህ ላይ ስትዘምት አዕምሮህንና አካልህን የተሻሉ እንዲሆኑ ከልብህ ስትጥር፤ ከውስጥህ አንድ አቅጣጫ ጠቋሚ ነገር እንዳለ እየተረዳህ ትመጣለህ። በእጅህ ላይ ስላለው የእጅ የሰዓት መቁጠሪያ መጨነቁን ታቆምና ሕይወትህን ማጣጣም ትጀምራለህ።» 📖 📖 📖 «ሁልጊዜም አንብብ። በቀን ለ30 ደቂቃዎች ማንበብ በአስተሳሰብህ ላይ ከፍተኛ ለውጥ ይፈጥራል። ቢሆንም ግን አንድ ነገር ላስጠነቅቅህ ግድ ይለኛል። ያገኘኸውን ሁሉ አታንብብ። በውበት በተሸለመው የአዕምሮህ አፀድ ውስጥ ስለምታስቀምጣቸው ነገሮች በጥንቃቄ ማሰብ አለብህ። የአንተን ማንነትና ብሎም የሕይወትህን እርከን የሚያሻሽል ሊሆን ይገባል።» 📖 📖 📖 «የምትችለውን ያህል መጻሐፍት አታንብብ ብዬ አልመክርህም። ሆኖም ዘወትር ማስታወስ ያለብህ፤ አንዳንድ መጻሐፍት የሚቀመሱ ሲሆኑ፣ አንዳንዶቹ ደግሞ የሚታኘኩ ናቸው፤ ሌሎቹ ተላምጠው የሚዋጡ ናቸው። ልነግርህ የምፈልገው ቢኖር ታላላቅ መጻሕፍት ውስጥ ያለውን ጭብጥ ለማግኘት ማንበብህ ብቻ በቂ አለመሆኑን ነው። መጻሕፍቱን መርምረህ ልታጠና ይገባል።» 📖 📖 📖 «በሕይወት ዘመንህ ሁሉ ለገጠሙህ ጥያቄዎች ምላሽ በመጻሕፍት ውስጥ ተቀምጦ ታትሞ ይገኛል። በማንነትህ ውስጥ የሚያስደስት ልዩነትን ይፈጥራል። ያኔ በውስጥህ አንተን ለማገልገል የተቀመጠውን የዕውቀት ክምችት በጨረፍታ ማየት ትጀምራለህ። ከቀድሞው የተሻልክ ለመሆን፣ ወደ መልካም ስብዕናዎች መዳረሻ የሚያስወነጭፉህ መጻሕፍት ብቻ ናቸው።» 📖 📖 📖 «በሕይወት ዘመንህ የሠራሃቸው ስህተቶች፣ የፈተኑህ አጋጣሚዎች እንኳን ቢሆኑ፣ ከአንተ በፊት በምድር ላይ በተራመዱት ሁሉ ተፈጽሟል። በሕይወትህ አስፈላጊው ጥያቄ እና ምላሽ በመጻሕፍት ገፆች ላይ ይገኛል። ትክክለኞቹን መጻሕፍት በሚገባ አንብብ። ሰዎች ችግራቸውን የፈቱበትን ብልሃት ተጠቀምበት። ያኔ በሕይወትህ ላይ በሚፈጠረው መሻሻል ትደነቃለህ።» >>> ━━━━━━━━━ ✍ ሮቢን ሻርማ ትርጉም ➢ የእዮብዘር ዘውዴ በቀለ 📖 📖 📖 📖 📖 https://t.me/Ethiobooks

📔 ፍ ካ ሬ >>> ኮሶ የተባለው ዛፍ በጫካው ውስጥ እድሜ ጠገብ ከሚባሉት በሳል ዛፎች አንዱ ነው። እውነትን እውነት፣ ውሸትን ውሸት ብሎ ፊት ለፊት የሚናገር ስለሆነ ‹ኮሶ መራራ ነው› ይባላል። በመድኃኒት ጥበቡ እጅግ የተመሰከረለት ሲሆን ለጥገኞችና አስመሳዮች አይመችም። ምሬቱን ተጋፍጠው ለሰሙት ግን ነገሩ መሬት ጠብ የማይል እውነተኛ ማርከሻ ነው። ይህን ጠባዩን የሚያውቀው የሰው ልጅ ባለቅኔ የሆነው ከበደ ሚካኤል፦ «ኮሶና ቁም ነገር ይመሳሰላሉ ያለማጣፈጫ እጅግ ይመራሉ፤ ኮሶን ለሰው መስጠት በማር ጠቅሎ ነው ማሩ እያጣፈጠ ኮሶ እንዲያድነው።» ብሎለታል። >>> ════════ ✍ ዓለማየሁ ዋሴ እሸቴ (ዶ/ር) 🗓 2017 ዓ.ም. 📖 📖 📖 📖 📖 https://t.me/Ethiobooks

📔 አለመኖር >>> ማንም ከማንም በማይበልጥበት ዓለም እየኖረ፤ ማንም ቢሆን ዓይኑ እያየ እበልጥሃለው የሚለውን ሰው ማክበር ይቸግረዋል። የሰው አዕምሮ እውነትን ያውቃል። እውነቱ ደግሞ የሰው ሁሉ እኩል መሆን ነው። የሰው ልጅ እኩልነትን እንደ ማስረጃ ከሚያሳዩን አንዱ "ሰው" መሆን ነው። ሰው መሆን ማለት ደግሞ፤ ራቁታችንን ከተወለድን በኋላ፣ ከልብስ ጀምሮ አካላችንን ከሚሸፍኑት የማንነት ሽፋኖች መላቀቅ ነው። ሰው ራቁቱን በመወለድ ይዞት የመጣውን መሰረታዊ ማንነት፦ ማለትም መወለድ፣ መኖርና መሞትን ይዘነጋል። ገላው በእናቱ ሆድ የለመደው ሙቀት ሲቀርበት እንዳይበርደውና እንዳይቆረፍድ ልብስ መደረብን፣ ቆይቶ መለያ ስምን፣ ሃይማኖት፣ ዘር፣ ብሄር፣ ቤተሰብ፣ ሙያ፣ ትምህርትና የመኖሪያ ሰፈርን የመሰሉ ግዑዝና ምናባዊ አልባሳትን በመደረብ "ሰውነቱን" ያጣል። በቀረ ዘመኑ ሁሉ ይዞት የተወለደውን ማንነት ፍለጋ አውቆም ይሁን ሳያውቅ ሲዳክር ይኖራል። ሰው መሆን ከዚህ ሁሉ ድርብርብ ሽፋን የበለጠ መሆኑን ሳያውቅ ወይንም ሳይረዳ ሕይወቱን ይገፋል። ሰው መሆንን ለማወቅ የሚሄድበት ትግል፣ ሁሌም ከብርድ ለመሸሽ ከለላና ጥላ፣ እንዲሁም ሽፋን እንደመፈለግ ነው። ለዚህም ማሳያው የአብዛኛው ሰው ቋሚ ፍላጎት ሕይወትን "መለወጥ" ነው። ሁሉም ሰው "ራሴን ለውጬ"፣ "ቤተሰቤን ለውጬ"፣ "መለወጥ አለብኝ ..."። "ቤተሰቤን ልለውጥ"፣ "ሀገሬን ልለውጥ"፣ "ሃይማኖቴን ልለውጥ" እያለ ይኖራል። በዚህ ሁሉ ለውጥ ውስጥ እያንዳንዱ አዲስ ለውጥ አሮጌ ሕይወት እየሆነ እንደ ልብስ ከመደረብ ውጭ እውነተኛ ለውጥ ሳይሆን ይቀራል። እውነተኛ ለውጥ የማይኖረው ሰው ስላልጣረና ስላልሞከረ ሳይሆን ለውጥ ሂደት እንጂ መድረሻ ባለመሆኑ ነው። በአንድ ለውጥ መርጋት በሰው ተፈጥሮ ውስጥ ከማይቻሉት ሀቆች አንዱ ነው። በመሆኑም ሰው ቢለውጥ፣ ቢለወጥ ከደረባቸው የማንነት አልባሳት አንዱን እና ለጊዜው የተመቸውን ሲሆን ሀብቱን፣ ጉልበቱንና ወገኑን፤ ሳይሆን ሃይማኖቱንና ብሄሩን፣ አልፎ አልፎም ሀገሩን እና የመሳሰለውን እየመዘዘ፤ የተወደደም፣ የተጠላም፣ የተከበረም፣ የተደፈረም፣ የተፈራም፣ የተናቀም እየመሰለው ይኖራል። ከዚህ የማንነት ግራ መጋባት ነፃ የሚወጣው በሞቱ ነው። ሞት ትልቁ ነፃ አውጪ ነው። በሞቱ ሰው ሆኖ ተፈጥሮ "ሰው...እነቱ" ጠፍቶት ሲዋትት የኖረ ሁሉ ሬሳ ሆኖ ይጠፋል። እንዳልነበረ ይረሳል። ስሙና ማንነቱን ሌላ ይወርሰዋል። አሁን በምድር የምንኖር ሰዎች ሁሉ፤ እኛ እያንዳንዳችን በምድር እንደ ግለሰብ መኖራችን ተዘንግቶ "የድሮ ሰዎች" በሚል የወል ስም፣ ኖረን እንደነበር ይታወሳል። በቃ አለቀ። >>> ━━━━━━━━━ ✍ ዳዊት ወንድማገኝ (ዶ.ር) 📄 111 - 113 🗓 ፳፻፱ ዓ.ም. 📖 📖 📖 📖 📖 https://t.me/Ethiobooks

▶   አይዛክ ኒውተን Isaac Newton (1642 - 1727)                ━━━━━━━               @ethiobooks

ሸማኔ ሲፎርሽ ══✦══ ✍ በረከት በላይነህ ' 'ታታሪው' ሸማኔ! ከመመሳሰል ውስጥ ውበትን ቀምሮ፤ 'ጥበብ' ያለብሰናል ካ'ንድ ቀለም ነክሮ። ለባሾች አይደለን? እንተያያለን፣ እንተያያለን፣ እንለካካለን፤ ኤዲያ!! ጥለቱ ጋ ስንደርስ እንለያያለን። መቼም አይታክተን! እንወርዳለን ቆላ፣ እንወጣለን ደጋ፤ 'ጥለት አመሳሳይ' ሸማኔ ፍለጋ። ═══════ 📔 የመንፈስ ከፍታ 📖 📖 📖 📖 📖 https://t.me/Ethiobooks

ሸማኔ / ሸማ   🧵   🧵 🧵 ሸማኔ ድውሩን፣ ባለስልጣን ክብሩን። 🧵 ሸማን በውሃ፣ ሰውነትን በንስሃ። 🧵 ሸማኔ በድሩ፣ ጠይብ በመንደሩ። 🧵 ሸማን ጠምዞ ያሰጧል፣ እህልን አላምጦ ይውጧል። 🧵 ለሸማኔ ማገጃ፣ ስለት ለማረጃ። 🧵 ሸማ በየፈርጁ ይለበሳል። 🧵 ሸማ ማዋስ ለባላገር፣ በቅሎ ማዋስ ለወታደር። 🧵 የሸማ አባቱ፣ ጥለቱ። 🧵 ሸማኔና ጅብ ከጉድጓድ አይወጡም። 🧵 ሸማ ለብሶ ስልቻ፣ በቅሎ ጭኖ ለብቻ። 🧵 የሸማ ጥቅል፣ የወርቅ እንክብል። 🧵 ከሸማኔ ቤት ቁጢት፣ ከለማኝ ቤት ዝተት አይጠፋም። 🧵 ለሸማው መከንጃ፣ ለላሙ መንጃ። 🧵 የሰጠኸኝ ሸማ፣ ከደጅህ ተቀማ።       🧵   🧵    ነገር በምሳሌ @ethiobooks

━━ ሞዓ አንበሳ ዘእምነገደ ይሁዳ ━━ ዳግማዊ ምኒልክ ንጉሠ ነገሥት ዘኢትዮጵያ ------------------------------- ሠራተኛን በሥራው የምትሠድብ ተወኝ! ከዚህ ቀደም ብረት ቢሠራ ጠይብ፣ ሸማ ቢሠራ ሸማኔ፣ ቢጽፍ ጠንቋይ፣ ቤተክርስትያን ቢያገለግል ደብተራ እያላችሁ፤ አርሶ ነጩን ከጥቁር (ጤፍና ሌላ ዘር) አምርቶ የሚያገባውን አራሽ ገበሬ እያላችሁ፤ ነጋዴን ነግዶ ወርቁን ግምጃውን ይዞ ቢገባ አንተ ነጋዴ ገጣባ አጣቢ እያላችሁ በሥራው ሁሉ ትሠድባላችሁ። እጁ ምናምን ሥራ የማያውቀው ሰነፉ ብልሁን እየተሳደበ አስቸገረ። ቀድሞም ይህ ሁሉ ፍጥረት የተገኘው ከአዳምና ከሄዋን ነው እንጂ ሁለተኛ ፍጥረት የለም። ይህ ሁሉ ካለመማር የተነሣ ነው። አዳምንም ብላዕ በሐፈ ገጽከ (በድካምህ ወዝ ብላ) ብሎታል። ይህ ከቀረ ሁሉ ቦዘንተኛ (ሥራ ፈት) ከሆነ መንግሥት የለ፣ አገር የለ። በወዲያ አገር ግን በኤሮፓ ሁሉ አዲስ ሥራ አውጥቶ ነፍጥ፣ መድፍ፣ ባቡር ቢሠራ ሌላውንም እግዚአብሄር የገለጠለትን ሥራ ሁሉ ቢሠራ መሐንዲስ እየተባለ እየተመሰገነ ሠራተኛውም ብዙ ቀለብ (ደመወዝ) ይጨመርለታል እንጂ በሥራው አይሰደብበትም። እናንተ ግን እንዲህ እየተሳደባችሁ አገሬን ባዶ ልታደርጉትና ልታጥፉት ነው። እንግዲህ ግን እንዲህ ብሎ የተሳደበ እኔን የሰደበ ነው እንጂ ሌላውን የሰደበ አይደለም። ስለዚህ ሲሳደብ የተገኘ ሰው መቀጫውን አንድ ዓመት ይታሠራል፡፡ ... ━ ጥር 17 ቀን 1900 ዓ.ም. ━ ━━━━━━━━━━━━━ 📔 ዐፄ ምኒልክና የኢትዮጵያ አንድነት ✍ በተክለጻድቅ መኲሪያ 📖 📖 📖 📖 📖 https://t.me/Ethiobooks

💬 ❝ሕይወት የምታቀብልህን መምረጥ አትችልም። አቀባበልህን መምረጥ ግን ትችላለህ። አንተንም አንተ የሚያደርግህ እሱ ነው። ሁሌም የምታሸንፈው በፍቅር፣ በጥበብ እና በትዕግስት ነው።❞ ጆርጅ ማክላውሪን 💬 ❝ቅናት ግዳዩን ብቻ ሳይሆን የገዛ ራሱን ጭምር የሚቦጫጭቅ ነብር ነው።❞ ማይክል ቢር 💬 ❝ማንኛውም ሰው ቢሆን ራሱን ሳይረዳ በቀናነት ሌላውን ሰው ለመርዳት አለመቻሉ በጣም ምርጥ ከሆኑት የሕይወት ካሳዎች ውስጥ አንዱ ነው።❞ ራልፍ ዋልዶ ኤመርሰን 💬 ❝የሰው ልጅ ውድ ሀብትና ታላቅ ጸጋ ራሱ ሰው ነው።❞           ካርል ማርክስ 💬 ❝በዓለም ላይ ሁለት ዓይነት ያለመርካት ስሜቶች አሉ። አንደኛው ለሥራ የሚያነሳሳ ሲሆን፣ ሁለተኛው ግን ተስፋ የሚያስቆርጥ ነው። የመጀመሪያው የፈለግነውን ሲያስገኝልን፣ ሁለተኛው ግን ያለንንም ያሳጣናል። የመጀመሪያው ዓይነት አለመርካት የመጨረሻ ውጤቱ ስኬት ሲሆን፣ የሁለተኛው ግን ውድቀት ነው። ❞ አልበርት ሁባርድ 💬 ❝የትክክለኛ ቀልድ መነሻ ውስጣዊ ምሬት ነው።❞ ማርክ ትዌን 💬 ❝ሕይወት እንደ ቡና በወተት ናት። ግን ይሄ ልዩነት ባንጎላችን ውስጥ ይኑር እንጂ ስኒው ውስጥ በአንድ በኩል ቡና፣ በሌላ ወተት የለም።❞ ስብሃት ገ/እግዚአብሔር 💬 💬 ጥቅሶች @ethiobooks