ልህቀት የንባብ ባህል ማጎልበቻ ማዕከል

ላለፉት ሶስት ሳምንታት ሲያወያየን የቆየው የደራሲ አበረ ሽፈራው #የዕድሜ_ገበያ_እና_ሌሎችም የአጫጭር ታሪኮች ስብስብ በ 261 ገጾችና በውስጡ ባካተታቸው 12 ታሪኮች ተቀንብቦ ለአንባቢያን ቀርቧል። ታሪኮቹ በአመዛኙ ማሕበራዊ ጉዳይ ላይ ያተኮሩ ሲሆኑ ሌሎች ሀሳቦችም ተዳስሰውበታል። ከእውነተኛው አኗኗራችን የሚገጥሙ (ከነባራዊው እውነት ያልራቁ) ታሪኮች በርከት ብለው የሚገኙበት መጽሐፍ ነው። ታሪኮቹ ታሪክ ብቻም አይደሉም። በታሪክ ተዋዝተው የቀረቡ ሞጋች ጽንሰ-ሀሳቦችም ጭምር እንጂ። የመምከር፣ የመሸንቆጥ፣ የማንቃት፣ የጥያቄ መፍጠር፣ የጥያቄ መመለስ እንዲሁም አዲስ ያልሆነን ነገር በአዲስ ዕይታ ለማሳየት የመሞከር ተግባራት ተንጸባርቀዋል። ስለዚህ መጽሐፉን ያነበበ ከእነዚህ ተግባራት ጋር ይተዋወቃል ማለት ነው። ተግባራቱ የሚመነጩት ጸሐፊው በጽሁፉ ውስጥ ሊያስተላልፍ ከፈለገው የታሪክ ጭብጥ መሆኑ የሚነገር ጉዳይ አይደለም። መጽሐፉ ቢነበብ ጠቃሚ ሀሳቦች የሚገኙበት ነውና በጋራ ከተወያየነው ይበልጥ በግል ንባብ ይካሄድበት ለማለት እንወዳለን። መልካም ንባብ! ልህቀት "እናንብብ ፤ እንለወጥ!"