Мученикам Хрисанфу и Дарии Римским, глас 4:
Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: имуще бо кре́пость Твою́, мучи́телей низложи́ша, сокруши́ша и де́монов немощны́я де́рзости; тех моли́твами спаси́ ду́ши на́ша.
*
Святому мученику Трифону, глас 8-й:
Мученик Твой, Господи, Трифон во страдании своем венец прият нетленный от Тебе, Бога нашего: имеяй бо крепость Твою, мучителей низложи, сокруши и демонов немощныя дерзости. Того молитвами спаси души наша.
*
Тропарь мученикам и исповедникам Гуpию, Самону и Авиву, глас 5:
Чудеса́ святы́х Твои́х му́ченик/ сте́ну необори́мую нам дарова́вый, Христе́ Бо́же,/ тех моли́твами сове́ты язы́ков разори́,/ Це́рковь святу́ю укрепи́,// я́ко Еди́н Благ и Человеколю́бец.
*
Тропарь мученикам Адриана и Наталии, глас 4:
Мученицы Твои, Господи, во страданиих своих венцы прияша нетленныя от Тебе, Бога нашего, имуще бо крепость Твою, мучителей низложиша, сокрушиша и демонов немощныя дерзости. Тех молитвами спаси души наша.
*
Преподобномученице Евдокии Илиопольской, глас 8:
Пpа́востию у́мною ду́шу твою́ пpивяза́вши в любо́вь Хpисто́ву,/ тле́нных, и кpа́сных, и вpе́менных забы́тием пpетекла́ еси́,/ я́ко Слава учени́ца:/ поще́нием стpа́сти пе́pвее умеpтви́вши,/ стpада́льчески втоpо́е вpага́ посpами́ла еси́./ Тем Хpисто́с сугу́бых венца́ сподо́би тя,/ сла́вная Евдоки́е, пpеподо́бная стpастоте́pпице,// моли́ Хpиста́ Бо́га спасти́ся душа́м на́шим.
*
Преподобным Ксенофонту, супруге его Марии и чадам их, глас 4:
Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их// в ми́ре упра́ви живо́т наш.
*
Преподобной Афанасии игуменье:
В тебе, мати, известно спасеся еже по образу: приимши бо крест, последовала Христу, и деющи учила еси презирати убо плоть, преходит бо: прилежати же о души, вещи безсмертней: тем же и со ангелы срадуется, преподобная Афанасия, дух твой.
*
Преподобному Роману Сладкопевцу, глас 8:
В тебе́, о́тче, изве́стно спасе́ся е́же по о́бразу: / прии́м бо крест, после́довал еси́ Христу́ / и, де́йствуя, учи́л еси́ презира́ти у́бо плоть, прехо́дит бо, / прилежа́ти же о души́ ве́щи безсме́ртней. // Те́мже и со А́нгелы сра́дуется, преподо́бне Рома́не, дух твой.
*
Преподобному Евфимию Великому, глас 4:
Весели́ся пусты́ня неражда́ющая,/ благоду́шствуй неболя́щая,/ я́ко умно́жи тебе́ ча́да муж жела́ний духо́вных,/ благоче́стием насади́в,/ воздержа́нием воспита́в доброде́телей в соверше́нство./ Того́ моли́твами Христе́ Бо́же,// умири́ живо́т наш.
*
Преподобному Ипатию, игумену Руфианскому, глас 8-й:
В тебе, отче, известно спасеся еже по образу: приим бо Крест последовал еси Христу, и дея учил еси презирати убо плоть, преходит бо, прилежати же о души, вещи бессмертней. Темже и со ангелы срадуется, преподобне Ипатиe, дух твой.
*
Тропарь бессребреникам и чудотворцам Косме и Дамиану Асийским, глас 8:
Святи́и безсре́бреницы и чудотво́рцы Космо́ и Дамиа́не,/ посети́те не́мощи на́ша,/ ту́не прия́сте, ту́не дади́те нам.
*
Праведным Иоакиму и Анне, родителям Пресвятой Богородицы, глас 2:
Пра́ведных Твои́х, Го́споди, па́мять пра́зднующе, / те́ми мо́лим Тя, // спаси́ ду́ши на́ша.
*
Праведной Елисавете и пророку Захарии, родителям Иоанна Предтечи, глас 2:
Пра́ведных твои́х Заха́рии и Елисаве́ты, / Го́споди, па́мять пра́зднующе, / те́ми мо́лим Тя: // спаси́ ду́ши на́ша.