Dire Dawa Government Communication Affairs Office

#ዜና | የበጎ ፈቃድ አገልግሎት ማህበረሰባዊ ትስስርን ለማስቀጠል ትልቅ አቅም መሆኑ ተገለፀ #DGC | ሐምሌ 12/2018 በድሬዳዋ አስተዳደር በወረዳ 03 የ2018 ዓ.ም የክረምት በጎ ፈቃድ አገልግሎት መርሃ ግብር በይፋ መጀመሩ የሚታወቅ ሲሆን በዛሬው ዕለት የአረጋውያን እንክብካቤ፣ የማዕድ ማጋራት እና የደም ልገሳ ተግባራት ተከናውነዋል። ከዚህ በተጨማሪም የክረምት በጎ ፈቃድ አገልግሎት መርሃ ግብር አካል የሆነውና በወረዳው ወጣቶች መካከል የሚከናወነው የስፖርት ውድድር በዛሬው ዕለት በይፋ ተጀምሯል። በማስጀመሪያ መርሃ ግብሩ ላይ የተገኙት የወረዳ 03 ዋና ስራ አስፈፃሚ አቶ ምትኩ ሁነኛው የክረምት በጎ ፈቃድ አገልግሎት ማህበረሰባዊ ትስስርን ለማስቀጠል ትልቅ አቅም የሚፈጥር ተግባር መሆኑን ገልጸዋል። በዛሬው መርሃ ግብር የአቅመ ደካሞችና አረጋውያን እንክብካቤ፣ የወጣቱን አካላዊና አእምሯዊ ብቃት የሚያሳድጉ ስፖርታዊ መርሃ ግብሮች እንዲሁም የሰውን ህይወት ለመታደግ የሚደረገው የደም ልገሳ ስራ መካተታቸውን ጠቁመዋል። ይህ ስፖርታዊ ውድድር በወረዳው ወጣቶች መካከል ያለውን የወንድማማችነትና የእርስ በርስ ትስስር ይበልጥ እንደሚያጠናክረውም አብራርተዋል። "በጎ ፈቃደኝነት የዜግነት ግዴታን በተግባር የምንወጣበት ታላቅ ስራ ነው" ያሉት አቶ ምትኩ፤ ወጣቱና ነዋሪው እርስ በርስ በመረዳዳት፣ የታመሙትን በመጠየቅ፣ አቅመ ደካሞችን በመደገፍ እንዲሁም በስፖርታዊ መድረኮች ጤናማ ፉክክርን በማሳየት የላቀ ማህበረሰባዊ አሻራቸውን እንዲያሳርፉ ጥሪያቸውን አስተላልፈዋል። በማስጀመሪያ መርሃ ግብሩ ላይ የተሳተፉ የወረዳው ወጣቶች በበኩላቸው በበጎ ፈቃድ ስራውና በስፖርታዊ ውድድሮች ላይ ለመሳተፍ ከፍተኛ መነሳሳት እንዳላቸው ገልጸዋል። ወጣቶቹ በሰጡት አስተያየት የክረምቱን ወቅት ማህበረሰባቸውን በሚጠቅሙ የደም ልገሳ፣ የአረጋውያን ቤት እድሳት እና የአካባቢ ጥበቃ ስራዎች ላይ በማዋል እንዲሁም በስፖርት ሜዳዎች ወረዳቸውን በንቃት በመወከል የዜግነት አሻራቸውን ለማሳረፍ መዘጋጀታቸውን አረጋግጠዋል። በኤደን ሳሙኤል ፎቶ፦ ያብስራ ተክሌ