Dire Dawa Government Communication Affairs Office

#ዜና| በአስተዳደሩ እስካሁን በተከናወኑ የሠላም ተግባራቶች እና አጠቃላይ የሠላም እሴቶች ፅንሰ ሀሳብ ላይ ያተኮረ መድረክ ተካሄደ #DGC | ሐምሌ 06 / 2018 በድሬዳዋ አስተዳደር የወጣቶችና ስፖርት ኮሚሸን አዘጋጅነት ለወሰን ተሻጋሪ የበጎ ፈቃደኛ ወጣቶችና ከአስተዳደሩ የተለያዩ አደረጃጀት ለተውጣጡ ወጣቶች የግንዛቤ ማስጨበጫ መድረክ ተከናውኗል። የክረምት በጎ ፍቃድ አገልግሎት በሀገር አቀፍ ደረጃ የማህበራዊ እና ኢኮኖሚያዊ ችግሮችን ለመፍታት ፣ አቅመ ደካሞችን ለመርዳት እና አንድነትን ለማጠናከር የሚከናወን ተግባር መሆኑ ይታወቃል። ከተለያዩ የሀገራችን ክፍሎች ተውጣጥተው ድሬዳዋ ለተገኙት ወጣቶች የእንኳን ደህና መጣችሁ ንግግር ያደረጉት የብልፅግና ፓርቲ ድሬዳዋ ቅርንጫፍ ጽ/ቤት ሀላፊ አቶ ኢብራሂም ዩሱፍ እንዳሉት የወጣትነት እድሜ እጅግ ጠቃሚ አዳዲስ የፈጠራ እና የልማት ስራዎች የሚተገበሩበት እንዲሁም ተፅህኖ መፍጠር የሚችል እምቅ አቅም የሚገኝበት እንደሆነ አመላክተዋል። አቶ ኢብራሂም አያይዘውም ከአንድ ከተማ ወደ ሌላ በመሄድ የበጎ ፍቃድ ተግባር ስራዎችን በማከናወንና የሠላም ግንባታን በማጠናከር ፤ በአንድነት ሠላሟ የተረጋገጠ ኢትዮጵያን ለመፍጠር ፤ ከጦርነት እና ከሁከት ነጻ የሆነች ሀገር ለመገንባት ወሠን ተሻጋሪ ወጣቶች እና የበጎ ፈቃድ አገልግሎት ዘርፈ ብዙ ጠቀሜታ እንዳለው አስገንዝበዋል። የክረምት በጎ ፈቃድ አገልግሎት አቅመ ደካሞችን ከመደገፍ ባሻገር በህሕቦች መካከል ጠንካራ ማህበራዊ ትስስርን የመፍጠር ፋይዳው የጎላ መሆኑንም አስታውሰዋል። የድሬዳዋ አስተዳደር የወጣቶችና ስፖርት ኮሚሽን ኮሚሽነር አቶ ካሊድ መሐመድ በበኩላቸው ወጣቶች በከተማችን በሚኖራቸው ቆይታቸው ድሬዳዋ ውብ ፣ ፅዱ ለነዋሪዎቿ ምቹ እና ተስማሚ እንድትሆን በሚያስችሉ የበጎ ፈቃድ አገልግሎት ተሳታፊ እንደሚሆኑም ገልፀዋል። ከተለያዩ የሀገሪቱ ክፍሎች ተሰባስበው ድሬዳዋ የተገኙት ወጣቶች እንዳሉት በጎነት በራስ ተነሳሽነት ከልብ የሚመነጭ እና ማንም ሊሰጠን የማይችል የየግል የስራ ውጤት ነው ብለዋል። ጭብጨባም ሆነ ሙገሳ ሳያሰፈልገን የመጣንበትን ተግባር በማከናወን ይህን ታላቅ ሃላፊነት በጋር መስራት ይጠበቅብናልም ሲሉ ሀሳባቸውን አጋርተዋል። በየዓመቱ የክረምት ወራት ላይ የሚከናወነው የበጎ ፈቃድ አገልግሎት በሀገር አቀፍ ደረጃ ተጠናክሮ መቀጠሉ ለወጪው ትውልድ ትልቅ እውቅና ጥሎ በማለፍ ረገድ ከፍተኛ ጠቀሜታ እንዳለው ተጠቁሟል።