Dire Dawa Government Communication Affairs Office

ለመመካከር ስንወስን ያንጊዜ አሸነፍን! አዎ፣ ለመመካከር የወሰንን ዕለት፣ ግለኝነታችንን ፣ጠመንጃ አንጋችነትን ፅንፈኝነት እና እልህን አሸንፈናል፤ በሀሳብ ልዕልና ፊት አንገታችንን በኩራት ቀና አድርገናል! ውሳኔው በራሱ የሰላም የመጀመሪያው ፍሬ፣ የመግባባትም ፅኑ መሰረት ነው። በኢትዮጵያችን የፖለቲካ ታሪክ ውስጥ መነጋገርን፣ መደማመጥን እና መቻቻልን እንደ ድክመት የሚቆጥር ባህል ስር ሰዶ ቆይቷል። ልዩነቶችን በጠመንጃ አፈሙዝ፣ ሀሳብን ደግሞ በጉልበት ለመደፍጠጥ የተደረጉት እልህ አስጨራሽ ሙከራዎች፣ ሀገሪቱን ከድህነት አዙሪት እና ከተደራራቢ የፖለቲካ ስብራት አላወጧትም። ነገር ግን፣ ዛሬ መሳሪያችንን አስቀምጠን፣ የተወጠረውን ገመድ አርግበን፣ ክብ ጠረጴዛ ዙሪያ ለመቀመጥ ስንወስን፣ የዚያኑ ሰዓት ያንን የከረመ የፖለቲካ ስብራታችንን ጠግነነዋል። መመካከርን መምረጥ፣ የጥፋት በርን ዘግቶ የፈውስን በር በሰፊው የመክፈት ፅኑ እርምጃ ነው። ገና ቃላት ሳይለዋወጡ፣ ገና ሀሳብ ለሀሳብ ሳይፋጩ፣ ለመገናኘት እና ለመደማመጥ የተዘረጋችው እጅ የድል አድራጊነት ታላቅ ምልክት ናት። ለመመካከር ስንወስን፣ ያንን አሰቃቂ እና ደም አፋሳሽ የሆነውን የመጠፋፋት ታሪካችንን እስከ ወዲያኛው ልንቀብረው ወስነናል ማለት ነው። የተለየ ሀሳብ ያለው እንደ ባዕድ ጠላት የሚፈረጅበትን፣ እና የሀሳብ ልዩነት ሞት የሚያስፈርድበትን የጨለማ ዘመን በይቅርታ አፈር አልብሰነዋል። በምትኩ ደግሞ፣ የጋራ ራዕይን ፣ አብሮነትን እና ህብረ-ብሔራዊ ወንድማማችነትን የሚያለመልም አዲስ ዘር ዘርተናል። ለመነጋገር ቆርጦ መነሳት ማለት፣ የትናንትናውን የቁርሾ ማህደር ዘግቶ፣ የነገውን የተስፋ ብራና መክፈት ማለት ነው። እውነተኛ የፖለቲካ ቁርጠኝነት ማለትም ይሄው ነው፤ ከግል እና ከቡድን ጊዜያዊ ጥቅም ይልቅ፣ የሀገርን ዘላቂ ህልውና አስቀድሞ ታላቅ የህሊና መስዋዕትነትን መክፈል። ውይይት፣ መሸናነፍ ሳይሆን ሁላችንም አሸናፊ የምንሆንበትን መንገድ መፈለግ ነው። በመነጋገር ውስጥ መሸነፍ የለም؛ ያለው መግባባት፣ እና ሀገርን ማዳን ብቻ ነው። የዴሞክራሲ እውነተኛ ፅንስ የሚረገዘው፣ የተለያየ ሀሳብ ያላቸው ወገኖች በአንድ ጣሪያ ስር ተቀምጠው የሀሳብ ሙግት ለማድረግ ሲወስኑ ነው። እነሆ፣ በዚህ ታሪካዊ የ2018 ዓ.ም የለውጥ ጉዞ፣ ኢትዮጵያውያን ለዘመናት የናፈቁትን የመደማመጥ እና የሰለጠነ ውይይት መድረክ እውን እያደረጉ ነው። ይህ የልብ ውሳኔ በራሱ፣ ትውልድን ከጦርነት እና ከመጠፋፋት አዙሪት አውጥቶ፣ በአዲስ ማህበራዊ ስምምነት እና በሰለጠነ የዴሞክራሲ ባህል ላይ ወደምትቆም አዲስ ኢትዮጵያ የሚያሻግር ታላቅ ድል ነው። አሁን ወደ ኋላ መመለስ የለም። ለመመካከር በመወሰናችን ብቻ፣ የጥፋትን ሴራ አክሽፈናል፤ አሮጌውን አፍርሰናል፤ አዲሱን እና ብሩሁን መንገድ ገንብተናል። እውነትም፣ ለመመካከር ስንወስን—ኢትዮጵያ አሸንፋለች! #EBC