Dire Dawa Government Communication Affairs Office

የታሪክ ስብራቶችን በውይይት የመጠገን ቁርጠኝነት ******************* ጠቅላይ ሚኒስትር ዐቢይ አሕመድ (ዶ/ር) ለሕዝብ ተወካዮች ምክር ቤት ባቀረቡት ማብራሪያ፤ የኢትዮጵያን የፖለቲካ ታሪክ፣ የከረሙ ውስብስብ ችግሮቻችንን እና ሀገራዊ ምክክር ያለውን ወሳኝ ሚና በተመለከተ ጥልቅ መልዕክቶችን አስተላልፈዋል። ጠቅላይ ሚኒስትሩ፣ ኢትዮጵያውያን ወደ ግጭት የሚመሯቸውን ጉዳዮች ወደ ጠረጴዛ አምጥተው ሁሉንም አሸናፊ ለሚያደርገው ምክክር ራሳቸውን እንዲያዘጋጁ ጥሪ አቅርበዋል። በዘመናዊ የፖለቲካ ታሪካችን፣ እያንዳንዱ አዲስ መንግሥት የነበረውን አፍርሶ ከዜሮ መጀመሩ፤ ሀገራዊ ተቋማት እንዳይገነቡ እና የሕግ የበላይነት መሠረት እንዳይዝ አድርጓል። አሁን የተያዘው አቋም ግን ካለፈው ስህተት የተማረ ነው። ያለውን አፍርሶ አዲስ ምስቅልቅል ውስጥ ከመግባት ይልቅ ጠቃሚውን ይዘን፣ የጎደለውን ሞልተን ኅብረታችንን የሚያጠናክር ማሻሻያ ማድረግ እንደሚገባ ጽኑ አቋም ተይዟል። በሀገራችን አሁንም ድረስ በየቦታው የሚታየው የትጥቅ ትግል ዋጋ ቢስነት ሌላው የምክክሩ ገፊ ምክንያት ነው። ሕዝብን ከቀዬው አፈናቅሎ እና አባቶችን አስለቅሶ የሚደረግ ትግል ምንም ዓይነት የፖለቲካ ትርፍ አያመጣም። በመሆኑም ከጠመንጃ አፈሙዝ ይልቅ በጠረጴዛ ዙሪያ በሀሳብ የማሸነፍን ብቸኛ የሠለጠነ መንገድ እንድንከተል ነባራዊ ሁኔታው ያስገድደናል። በኢትዮጵያ ታሪክ ተደረጉ ጥቂት የፖለቲካ ድርድሮች አብዛኛው በጣት የሚቆጠሩ የፖለቲካ ልሂቃን እና የትጥቅ ትግል መሪዎች የሥልጣን ክፍፍል ስምምነቶች ናቸው። የአሁኑ ሀገራዊ ምክክር ግን ከዚህ ፍጹም በተለየ መልኩ ከመሠረቱ ጀምሮ አርሶ አደሩን፣ የሀገር ሽማግሌዎችን፣ የሃይማኖት አባቶችን፣ ሴቶችን እና ወጣቶችን ያካተተ እውነተኛ የሕዝብ ድምጽ ነው።