BnSamy

صباح الخير *️⃣ الصندوق أعلن خلاص الاتفاق مع مصر والمراجعة ال 3 تمت؛ يعني في خطوات تمت او هتم وخلاص الصندوق وافق وهيصرف لنا 820 مليون دولار ملحوظة الصندوق ليه 750 مليون دولار اقساط الشهر دا عندنا 😂😂 الخطوات لا تعني تعويم عشان الناس حافظة كلمة تعويم دي 😂😂 الخطوات يعني إجراءات اقتصادية ⬅️⬅️ المراجعة القادمة منتصف شهر 9 ثم التالية منتصف مارس 2025

زي النهاردة الصبح من 57 سنة كانت في طفلة صغيرة 10 سنين لسه صاحية من النوم وبتلعب في حديقة البيت الصغيرة بتاعتهم في القنطرة شرق؛ بتستمتع ببداية الإجازة. *️⃣ فجأة سمعت صوت انفجار كبير قريب منهم والكهرباء قطعت وبعدها لقت طيارات كثير في السماء واصوات انفجارت. العيلة اترعبت واتجمعت كلها ويفتحوا الراديو يلاقوه بيقولوا الحرب قامت. *️⃣ تمر الساعات ويلاقوا الباب بيخبط وعالباب جندي بيقولهم عاوز هدوم مدني عشان طيران العدو فيه قناصة بيقتلوا الجنود وعاوزين نهرب وسط المدنيين... ابوها يساعد العسكري وبرضك يلموا هدومهم ويطلعوا يجروا ناحية قناة السويس ويركبوا معدية صغيرة تعديهم الناحية الثانية. *️⃣ وتشوف الطفلة طيران العدو بيضرب المعدية ويمنع استمرار هروب الناس؛ فيجروا يستخبوا في الزراعات عشان يناموا بالليل فيشوفهم الفلاح صاحب الأرض ويصعبوا عليه فيخرج الطيور والحيوانات بتاعته من العشة بتاعتهم وينظفها لهم ويخليهم يناموا فيها. *️⃣ الصبح يلاقوا قوات من الجيش جايه وتقبض عليهم وعلى كل اللي زيهم هربانين عشان مينتشروش في مصر ويحكوا اللي شافوه؛ أصل الراديو بيقول اننا بننتصر فمش عاوزين نشوه الصورة... ويحطوهم في حاجة شبه معسكر اعتقال كبيير قوي... المهم قوي نحافظ علي صورتنا مش مهم نخسر الحرب. *️⃣ يطلع عبد الناصر ويعترف بالهزيمة ويتنحي ويرجع في التنحي ويسيبوهم خلاص يطلعوا لان كل البلد عرفت اللي حصل. *️⃣ الطفلة الصغيرة كبرت وحكت القصة دي لابنها اللي هو أنا؛ أيوا دي أمي الله يرحمها... لما كنت طفل القصة دي كنت بسمعها وأنا صغير كثير. *️⃣ لما كبرت وتحولت لشخصية نقدية متشككة في كل حاجة قولت أكيد أمي (حطت التاتش بتاعها) عالقصة وخاصة إنها كانت 10 سنين وكمان لان البشر بطبيعتهم في نقل القصص بيحطوا التاتس بتاعهم ولا ارادياً كمان؛ وأكيد أنا كمان عملت كده وأنا بحكي. بس كنت بفكر وأقول برضك هما ولاد تيت ويعملوا وو.. *️⃣ لغاية ما حصل العدوان الحالي على إخواتنا والاجرام اللي عملوه وهنا بقيت اسأل نفسي؛ لا دا ماما مش حطت تاتش وزودت؛ لا دي غالباً شالت عشان بتحكي لي ك طفل وأكيد مش حابه تعقدني؛ أول يمكن كانت طفلة صغيرة فمفهمتش أحداث كثير ووالدها (جدي) خبي عليها... ولاد ال.... دول يعملوا أي حاجة نتخيلها ولا نتخيلها. والقصة بينا قديمة قوي قوي وكراهيتنا ليهم مبدأتش بعد العدوان؛ الصراع قديم وإما نحن أو هم؛ مفيش حل وسط.

بمناسبة قطع الكهرباء ال 3 ساعات هشرح لكم تفاصيل الوضع الحالي لأزمة الكهرباء في مصر ببرجماتيه وبحيادية وبكرر دا الوضع الحالي لأزمة الكهرباء فقط. يعني هعتبر نفسي وزير الكهرباء وبصارح الشعب 😁😁. *️⃣ في البداية أنا منبهر إن لسه في ناس متخيلة إن الحكومة بتقطع عننا الكهرباء عشان تصدر الغاز 🤔🤔 حضرتكم صادرات مصر حالياً من الغاز صفررررر.... احنا بنستهلك 100% من انتاجنا + بنستهلك الغاز الفلسطيني المسروق اللي بناخده من ولاد المبقعة وكل دا بيغطي مثلاً 80% من احتياجنا. الكهرباء بتستهلك أكثر من نص استهلاك مصر من الغاز. *️⃣ حالياً بنستخدم سفينة فك الاسالة بتاعة الأردن اللي في العقبة لغاية ما السفينة اللي مصر مأجراها توصل؛ السفينة اللي أجرناها هتوصل الشهر دا وقاعدة عندنا لغاية فبراير 2026 إن شاء الله ويمكن لما توصل ونستورد لها شحنات غاز فهنا يزيد الانتاج من الكهرباء شوية والعجز يقل خاصة إن كمان حسب بعض الصحف والمواقع فمصر قطعت الغاز عن مصانع السماد والأمونيا وهتضخ الغاز دا لمحطات الكهرباء وهتقلل الأزمة. *️⃣ بس فعليا حالياً ومستقبلاً انتا فعلاً في أزمة مش موضوع مبالغات ولا شغل اعلاميين؛ إنتا عندك محطات تقدر نظرياً تنتج كهرباء يكفي مصر وليبيا والسودان وفلسطين والاردن مع بعض؛ بس معندناش غاز نشغل المحطات دي 😔😔. *️⃣ قبل ما حد يقول طيب ما عادي يجيبوا غاز ويشغلوها هو مش في فلوس كثير؛ ماشي هتجيب غاز جميل... الغاز بيصدر بشكل مسال ومحتاج محطات فك إسالة (عندنا في مصر محطتين تسييل لكن انتا محتاج العكس ومتقوليش نعكسهم 😂)... هتقولي طيب ما خلاص هنجيب سفينة فالاجابة هي لا عشان تحل الأزمة خالص محتاج 2 سفينة فك إسالة على الأقل؛ هتقولي نجيبها هقولك مفيييييش مفيييييش... *️⃣ دا حظنا يعني السفينة اللي مصر أجرتها كانت مصنعه عشان تستغل في أستراليا وبعدين المشروع اللي هتشتغل فيه تأجل ل 2026 فإحنا أجرناها ل فبراير 2026 بمبلغ قيل في الصحف الغربية 250 ألف دولار يومي بخلاف المصاريف والصيانات ووو.... بالإضافة إن العقود في قطاع البترول بتكون عقود مستقبلية. *️⃣ يعني ايه عقود مستقبلية؛ يعني الأسعار اللي بتشوفها ويقولك خام برنت زاد او نقص فدي عقود تسليمات بعد شهرين... يعني لو دخلت البورصات تشتري غاز طبيعي هتستلمه بعد شهرين؛ فالحل هيكون إنك تروح لحد اشتري زمان وتديله ضعف السعر وتاخد شحنته (سوق الفوري) ودا مكلف جداً. *️⃣ يبقي حل تجيب غاز كثير وتشغل المحطات حل شبه مستحيل التنفيذ... يبقي الحل هو تستورد مازوت وتشغل المحطات بيها دا حل ظريف وسريع وممكن فعلا يخلي مصر بسرعة مفيهاش انقطاع كهرباء؛ لكن مشكلتنا إن المحطات دي مصممة للعمل بالغاز الطبيعي فإنك تشغلها بالمازوت يبقي هتدمرها وتهلكها فآخر الصيف هتصرف مئات ملايين الدولارات عشان تعملها صيانة وإصلاحات ودا مش منطقي تدمر المحطات اللي انتا لسه بتدفع أقساطها.. *️⃣ فالأزمة مكملة هتقل وتزيد مع موجات الحرارة؛ موجة الحرارة بتسبب حاجتين وهم زيادة الطلب الكهرباء وفي نفس الوقت كفاءة الماكينات في الانتاج بتقل (خازوق مزدوج). *️⃣ الشهر الماضي بلومبيرج قالت إن ولاد الكلب بلغوا مصر إن ضغ الغاز لينا هيقل 22% في الصيف عشان الحر عندهم وزيادة الاستهلاك المحلي طبعاً هناك وبعض الصيانات... معرفش دا اتنفذ أم لا لكن لو تم فدا هيزود مشكلتنا. *️⃣ طبعاً ما سبق لا يعني إن ال 3 ساعات هتستمر؛ لا هتقل ل 2 ساعة ثم تزيد ل 3 ثم 4 ساعات وترجع 2 تاني وهكذا حسب انتظام وتوفر الغاز الطبيعي في الشبكة القومية. ⬅️⬅️ دا الوضع الحالي باختصار وبكرر تاني دا الوضع الحالي؛ عارف أنا الناس عاوزاني أقلبها خناقة ونقول طيب ليه متوسعناش في محطات غير (الغاز) ومنزنقش نفسنا؛ طيب الغاز فين؛ طيب مش عارف ايه والمواضيع الضارة جداً بالسلامة الشخصية دي... أنا بقول البوست هو شرح الوضع الحالي الكهرباء بسسسسسس ومليش دعوة بأي تفاصيل.

في تحديث جميل نزل للحاجة الوحيدة الحلوه اللي حصلت في مصر آخر 10 سنين وهي انستا باي... التحديث هو ال QR Code وروابط الدفع. *️⃣ التحديث ظهر عندي في الاي فون لكن لسبب ما مظهرش في الاندرويد ؛ عنصري شكله لكن يمكن التحديث بالطريق والمواصلات بقي... *️⃣ المهم هتفتح الابلكيشن عادي هيظهر لك تحت حسابك مباشرة زرار QR Code وهيظهر لك QR وتقدر تعمله سكان (لما ييجي لك تحديث) ومباشرة هياخدك للدفع للشخص دا. *️⃣ هيظهر لك خيار تاني جميل قوي وهو روابط الدفع؛ يعني هتقدر تبعت لحد لينك يدوس عليك هوبا مباشرة يفتح له انستا باي لينك السداد ليك مباشرة؛ وبكده نخلص من موضوع سوري غلطنا وحولنا غلط؛ ابعت للناس اللينك بتاعك او ال QR بتاعك. *️⃣ شكراً لشركة بنوك مصر (تحالف المركزي والاهلي ومصر والاستثمار القومي) علي انستاباي 😍😍 ويا رب تدعموا بقي حسابات الشركات فيه ياااارب (نفتح حساب ارسال لكن بنستقبل عادي). هحط لكم في التعليقات شكل ال QR وشكل الابلكيشن بيظهر فين

مش عارف ليه لما بسمع موضوع لو مكانش حصل 7 أكتوبر مكانش الناس دي ماتت ولا شردت؛ بفتكر قوله تعالى (لو كانوا عندنا ما ماتوا وما قتلوا) فكرة إن (مسلم) شايف إن في ناس ماتوا قبل معادهم المكتوب لهم مستفزة قوي... كده كده رزقك خلص وهتموت فإما هيقتلك مجرم سفاح وتبقي شهيد؛ أو تموت زي ملايين المسلمين الآخرين الموته اللي قال عليها سيدنا خالد بن الوليد (وهأنذا أموت على فراشي كما يموت البعير)... الفارق ان ربنا بيسبب الأسباب. دا مش بوست فعلياً لكن مجرد إحساس واستغراب؛ ومش هقعد كالعادة أعمل توضيحات لمحبي سؤء الفهم والتفسير؛ تعبت صحياً من التوضيحات؛ بقعد أكتب بوست ويكون نصه توضيحات لمحبي سؤء الفهم... طز فيكم.؛ لا صحتي ولا ضغطي يسمحوا لي.

مفروض خلال أيام هيعلن زيادات الكهرباء لكن التوقعات هي زيادات 30-35-40% فأنا حاولت أحلل وأتوقع كده شكل الشرايح وعملت الجدول التخيلي دا للاستهلاك يونيو بالاسعار الحالية والاستهلاك دا من يوليو يبقي كام ⬅️ كل المذكور دا توقع مش رسمي ⬅️ الاسعار الكهرباء ويضاف عليها رسوم نظافة خدمة العملاء واي اقساط عندك او غرامات ⬅️ الكارت المسبق لما بتشحن بيترفع له السعر الجديد ويحاسبك علي اي استهلاك سابق كنت اخدته بالسعر القديم؛ مش هتهرب يعني منهم 😂 ⬅️ البوست حصري هنا مش هنشره عالفيسبوك هستني اعلان الزيادة الرسمية واشوف عرفت أتوقعها ولا هما طيبين عن توقعاتي ولا أكثر شراً ⬅️ سعر الشريحة العليا هي 2.3 في توقعي ودا عشان الدولة قالت ان تكلفة الكيلو هي 2.23 جنية... الشريحة العليا يعني من الكيلو 1001... فأنا بقول مفروض دول بتشال الدعم من عليهم لان مفيش منطق تبقي عايش في فيلا او عندك 3 و 4 تكييفات بتشغلهم سوى وتاخد دعم...

كل شوية ألاقي ناس تكتب إن زيادة سعر الخبز وتحريكات البنزين هتسبب تغيرات وقلاقل إجتماعية وسياسية وووو... صلوا عالنبي يا جدعان مفيش حاجة هتحصل عالمستوي بتاع الدولة. اللهم إلا زيادة معدلات الفقر وبالتالي الجريمة؛ وحتي دا مش مضر ليهم؛ لإن الجريمة هتزيد هتسبب زيادة الرغبة في الاحساس بالأمان؛ فشوية الناس القادرة مادياً وكانت عنيدة رافضة تعيش في كومباوند هتقتنع خلاص وهيشوف شقة ودا فيلا ينقل لها... فينشط شغلهم. اومال يعني الكومباوندات اللي بتتبني في كل مكان في مصر دي مين هيقعد فيها لو حاسين بالأمان والخدمات وعندكم خضرة ونظافة بره الكومباوند؟ 🤔🤔 مصائب شعب عند المليارديرات فوائد 😔😔

منبهر بقدرة الدولة علي تغيير سرعات الطريق فجأة وبدون لافتة ضخمة توضح او كتابة السرعة الجديدة عالأرض وتكتفي فقط ب لافته صغيرة حمراء علي جنب وراها في مسافة 500-700 متر رادار *️⃣ المبهر ان طريق زي السويس المنطقة من كوبري النادي الاهلي مدينة نصر الي كوبري 4.5 كان زمان السرعة 60 غيروها ل 100 وحطوا شرط الغاء عاليافطة ال 60 القديمة... هوبا يقرروا من فترة يغيروا الراجع يبقي 60 وببساطه يشيلوا شرط الالغاء دي 😂 فعينك كده كده متعودة تشوف يفط 60 عادي بس ملغاه... الجامد ان الذهاب من النادي الاهلي الي 4.5 السرعة لا تزال 100 بس الراجع من نفس الطريق السرعة 60 😂😂😂 *️⃣ ولا طرق زي محور نجيب محفوظ لسكان التجمع (اللي هو بيوصلنا من شنزو آبي الي التجمع) يحطوا رادار بدون يافطة سرعة قبله 😂 وبعدين يقرروا يحطوا يافطة 80 ويعدلوا بعدها الرادار ل 60 ثم نبقي نشيل اليافطة ونعدلها... تحسن ان الموضوع افخاخ مش رادارات وان الادارة بتاعة الرادار مستقلة عن الادارة بتاعة الافتات. *️⃣ليه لما يكون في تغير مفاجئ في سرعة جزء من الطريق مش بنحط لافته ضخمة او نكتب السرعة عالأسفلت زي دول كثير؟ ليه الافخاخ... وبعدين يزعلوا لما الناس تروح تنزل البرامج اللي تعرفك مكان الرادار؛ مهو بسبب الافخاخ دي والغموض؛ طرق 8 حارات رايح جاي والسرعة 60 😂. ولا عشان نصبح علي مصر ودا من موارد الدولة ولا يحصلها تنمية 😔😔

بوست كله أرقام عن موازنة مصر العام المالي 24/25 اللي هتبدأ من 1 يوليو: جميع الاستخدامات أي كل ما سوف تصرفه الدولة مبلغ 5541 مليار جنية وهذه هي أكبر 5 بنود هيتم انفاق الأموال فيها: 1️⃣ مبلغ 1843 مليار جنية أي نسبة 33.2% بند سداد فوائد الديون. (كان مخطط لها 1120 مليار جنية بالموازنة الحالية لكن متوقع توصل 1360 مليار جنية) 2️⃣ مبلغ 1606 مليار جنية أي نسبة 29% لبند سداد أصول الديون مقابل 1315 مليار جنية الموازنة السابقة. ⬅️⬅️ يعني بند الدين متوقع 3449 مليار جنية الموازنة القادمة مقابل 2435 مليار جنية الموازنة السابقة (اللي كان مخطط له) 3️⃣ مبلغ 635.9 مليار جنية أي نسبة 11.47% بند الدعم مقابل 532 مليار متوقع حالياً 4️⃣ مبلغ 575 مليار جنية أي نسبة 10.3% بند دفع أجور جميع العاملين بالدولة. مقابل 493 متوقع حالياً. 5️⃣ بند الاستثمارات وهي بناء المباني سكنية وغير سكنية وطرق وكباري وشراء أراضي ومعدات وآلات وغيرهم مبلغ 495 مليار جنية بنسبة 8.9% مقابل 334 مليار جنية متوقعة حالياً. *️⃣ تفاصيل الدعم للي مهتم: 1️⃣ دعم السلعي (التموين ورغيف العيش والبنزين والسولار والغاز والكهرباء المياة والأدوية وألبان الأطفال) مبلغ 297 مليار جنية بنسبة 5.3% من انفاق مصر. ومتوقع انه العام الجاري قيمته توصل 271 مليار جنية. 2️⃣دعم اجتماعي (دعم المعاشات التأمين الصحي وتكافل وكرامة ووو) مبلغ 231 مليار جنية مقابل 208 مليار جنية العام الجاري. 3️⃣الدعم التنموي (دعم تنمية الصعيد ودعم الاسكان ودعم القروض الميسرة) مبلغ 12.5 مليار جنية. مقابل 10.8 متوقعين العام الجاري. 4️⃣دعم الاقتصاد (دعم الصناعة ودعم الزراعة َتنشيط الصادرات ودعم الانتاج الحربي ووو) مبلغ 47 مليار جنية مقابل 40.8 حالياً. 5️⃣احتياطي الدعم ودا مبلغ محطوط كده لزوم لو اي بند خرم معاهم ودا فين 46 مليار جنية ⬅️⬅️ دخل مصر دا بسيط خالص هما 2625 مليار جنية مقابل 2430 مليار جنية متوقع حالياً... تفاصيله الضرايب متوقعه 2022 مقابل 1550 متوقعة حالياً... ايرادات اخري بقي 600 مليار مقابل 865 مليار متوقع حالياً. (في 3 كمان منح) ⬅️⬅️ يعني كل ايراد مصر ضرايب وغيره نحط فوقه 724 مليار جنية ونسدد بيهم الديون (أصل وفوايد) وبعدين نشوف هنصرف عالدولة منين. *️⃣ يعني الدولة بتاخد كل الايراد ونستلف فوقه 724 مليار جنية وتسدد الديون... فكده محتاجين لسه مرتبات ودعم ومصاريف مختلفة؛ فعشان كده الدولة بتقصقص المصاريف المختلفة والدعم لان كل دا بالديون. يعني باختصار للي تاه مني ⬅️ مصر ايرادها 2625 مليار جنية ⬅️ بتصرف 3449 مليار جنية للديون ⬅️ وبتصرف 2092 مليار جنية لكل حاجة تانية انتهي البوست واعتذر لو نقلت اي رقم غلط لاني كتبت البوست وانا منتظر بالعربية وعمال اتنقل بين الموازنة والنوتس؛ لكن الموازنة علي موقع المالية تقدروا تنزلوها

لا تقرأ هذا البوست لو بتزعل *️⃣ رئيس الوزراء أعلن منذ قليل زيادة سعر رغيف العيش المدعم ل 20 قرش من الشهر المقبل (يونيو). *️⃣ إمبارح قال ان في خطة لعمل توازن في قطاع المحروقات والبترول يعني بحيث هيتم زيادات تدريجية لسعر البنزين بحيث بنهاية 2025 يكون السولار مدعوم برضك لكن البنزين بيعمل توازن ويغطي (يعني مفروض يكسب من البنزين عشان يعوض دعم السولار ودا معناه لتر 20+ عشان الحبايب وان كان نظريا لو فكروا يغطوا الدعم السولار من سعر البنزين محتاجين سعر 30 جنية للتر ودا صعب في رأيي) *️⃣ قالوا برضك انهم هيعلنوا قريب خطة رفع أسعار الكهرباء بحيث يقل العجز اللي عندهم بحيث خلال 4 سنين تكون الكهرباء غير مدعومة كلياً وقال وزير الكهرباء ان الكيلو بيكلف الدولة 223 قرش ويباع للمواطنين ب ب 58 قرش (اول 50 كيلو بس اللي بتباع بالسعر دا بشرط عدم تجاوز ال 100 كيلو اجمالي) وأعلي شريحة بتاخد الكيلو ب 165 قرش يعني لو عايش في قصر بتستهلك الالاف الكيلو وات فبرضك بتاخد كهرباء مدعومة. *️⃣ هيئة الدواء قالت (في كل الجرايد مصادر أكدت يعني مصادر كل الصحف 😂 كله عرف) إمبارح بالليل زيادة أسعار علي دفعات تستمر ل 3 شهور بحيث هيتم زيادة قيل 3500 دواء بنسب زيادة 20% لأدوية الأمراض المزمنة و 30-50% لغير المزمنة (وبكرر كل ما سبق بيقولك مصادر مفيش بيان رسمي). للتذكير بس كل الخطوات دي بهدف خفض عجز الموازنة وخاصة ان بعثة الصندوق يقال في مصر بتعمل المراجعة الثالثة ومفروض تخلص قبل يوم 15 يونيو عشان كده العيش هيزيد من 1 يونيو والادوية هتزيد الله اعلم امتي؛ وخلال ايام هنشوف خبطة بنزين. أسف إني بنقل لكم الأخبار دي وأنا تجاهلت بعضها لكن لما زادوا قولت اجمعهم سوى