BnSamy

تحديث لإعلان وظائف في دكان تك *️⃣ عندنا وظيفتين متاحتين حاليًا، وكل وظيفة ليها Form منفصلة فيها كل التفاصيل، وتعتبر Mini Interview كده، بحيث تملاها ونفهمك بشكل كبير، وبرضه لو لقيت نقطة غير مناسبة ليك تقدر توفر وقتك ومتقدمش وتيجي انترفيو ونعتذر لك. يعني Win-Win 😁 الوظائف المتاحة: 1️⃣ موظف خدمة عملاء + إدخال بيانات وظيفة مناسبة لحديثي التخرج، يعني لو متخرج الأسبوع الماضي عادي تقدر تقدم. *️⃣ طبيعة الشغل فيها رد على العملاء ومتابعة رسائل وتعليقات، مع إدخال بيانات ومنتجات على الموقع والمنصات. رابط التقديم: https://forms.gle/CaMzqtZbdewVWGDg6 2️⃣ مدير تشغيل وإدارة ودي وظيفة مختلفة تمامًا، مش لحديث التخرج ومش سكرتارية. *️⃣ محتاجين شخص عنده خبرة في المتابعة والإدارة والتشغيل، يقدر يتابع الموظفين والأقسام، يشوف المهام اللي خلصت واللي متأخرة، يتابع التقارير، ينسق بين الحسابات والمخازن وخدمة العملاء والأونلاين، ويكون حلقة وصل بين الإدارة وباقي الفريق. يعني باختصار: شخص يمسك خيوط الشغل اليومية، يحل المشاكل اللي يقدر عليها، واللي محتاج قرار يرفعه للإدارة بشكل واضح ومنظم. رابط التقديم: https://forms.gle/Ebi3nStK8vcjUVtA8 *️⃣ أتمنى محدش يعلق بأسئلة على البوست ده، لأن كل Form شارحة تفاصيل الوظيفة المناسبة ليها، واللي يلاقي الشروط مش مناسبة يقدر يوفر وقته ووقتنا. اللي يعرف حد مناسب لأي وظيفة من الاتنين ياريت يبعتله البوست. ⬅️ مهم جدًا: 0️⃣ المطلوب مذكور فمن فضلك بلاش فلسفة وتقول ممكن تعدل البند دا... أصلي عاوز أقدم بس أنا طالب والوظيفة عاوزة خريج؛ أصل عاوز أقدم واشتغل من البيت والوظيفة حضور... 1️⃣ لو حديث تخرج أو خبرتك بسيطة، قدم على وظيفة خدمة العملاء. 2️⃣ لو عندك خبرة في الإدارة والمتابعة والتشغيل، قدم على وظيفة مدير تشغيل وإدارة. 3️⃣بلاش نقدم على وظيفة مش مناسبة لمجرد التجربة، عشان منضيعش وقت بعض 🙏 4️⃣ أكثر من 75% من اللي قدموا في وظيفة خدمة العملاء قدموا وهما مش مطابقين ولما كان بيظهر لهم رسالة اعتذار كانوا بيعدلوا الإجابة... يا شباب وقتي ووقتكم... دا طبعاً غير اللي كان بيتسلى وبيهرج

بيقولك الحكم دا شغال مأمور في محكمة في فرنسا، دا مفروض ميكونش بيعدي جنب محكمة أصلاً. بس نقول ايه، فرنسا مش بتحدف علينا غير كده بداية من مجمع كليرمون واعلان ما سمي لاحقاً بالحروب الصليبية مروراً بالسفاح بونابرت ولاحقاً ما فعلوه بالجزائر وأفريقيا ولغاية الرسومات المسيئة وإعادة نشرها على مستوى حكومي... يا راجل دا حتى مفاعل ديمونة فرنسي. فرنسا مش بتحدف حاجة عدلة

إعلان وظيفة في دكان تك مطلوب وظيفة مبتدئ حديث التخرج، يعني لو متخرج الاسبوع الماضي عادي تقدر تقدم احتراماً مني لوقتكم ووقتي عملت Form فيها كل التفاصيل ويعتبر دي mini انترفيو كده، بحيث تملاها نفهمك بشكل كبير... وبرضك لو انتا لقيت نقطة غير مناسبة ليك فتقدر توفر وقتك ومتقدمش وتيجي انترفيو ونعتذر لك. يعني win-win فاللي مهتم من الشباب أو الفتيات يقدر يقدم https://forms.gle/CaMzqtZbdewVWGDg6 أتمنى محدش يعلق بأي اسئلة عالبوست دا عشان الفورم شارحه كل شيء واللي مش مناسب ليه خلاص 😁. اللي مستني وظيفة مدير بقى فدي برضك قريب هعلن عن وظيفة مدير، مهو مش كله لحديث التخرج بس يلا شارك البوست مع اللي تعرفه مناسب (حديث التخرج لإن أكيد كبير السن الوظيفة وشغلها ومرتبها مش مناسب ليه فبلاش إحراج ليه ولينا).

في رأيي الشخصي الذهب هيدي الناس المزنوقة فيه فرصة الايام القادمة، هنشوف 4200 وممكن جداً 4300. *️⃣ الناس المحبوسة وعندها التزامات ممكن تكون دي فرصة كويسة ليكم. *️⃣ الناس اللي بره، خليك بره، طول ما احنا تحت 4400 فاحنا لسه هابطين، فبلاش تتخدع وتقول خلاص هشتري عشان اجيب 5 و 6 الاف، أصبر... *️⃣ ممكن نوصف الوضع الحالي بإنه (اتجاه تصحيح قصير صاعد جوا اتجاه هابط متوسط المدى، جوا اتجاه صاعد طويل المدى.) يعني بالبلدي، صاعد على مدى ايام جوا الترند الهابط على مدي اسابيع جوا الترند الصاعد على مدى شهور وسنين. *️⃣ ممكن تشوفوا محلل فني تثقوا فيه هقولكم دعم ومقاومة وشوية كلام دقيق قوي ومفيهوش جو (تحت 4400 والكلام الواسع بتاعي دا). *️⃣ دا اللي قادر اقوله دلوقتي لان معنديش طاقة الصراحة... وكل البوست هو رأيي الشخصي اللي مقتنع بيه، لكن أنا اظل مبتدأ ضعيف في التحليل دا، تحليل الدولة واقتصادها واتجاه وإجراءات متوقعة ممكن اعتبر نفسي شاطر وفوق المتوسط لكن في التحليل لسه على أدي، فشوف حد شاطر وراجع لان دي فلوسك، لا لما هتكسب هتبعت لي ولا لما تخسر هتيجي تاخد مني، كلام في الهوا.

من الحاجات الصعبة واللي ملهاش حل في الوضع الاقتصادي هي التوظيف... في الوضع الصعب الاقتصادي وارتفاع الأسعار هنا الشاب حديث التخرج هيلاقي في معضلة، هشتغل وهقبض 6-7-8 الاف جنية... المبلغ دا مش هيكفي تعمل أي شيء. *️⃣ إنتا لسه بادئ حياتك وقصادك مأساة، عاوز تكون نفسك وتحوش وتشوف ازاي تأسس شقة وأسرة وجرام الذهب اللي أد مرتبك دا، فهنا الشاب عنده مسارين ملهمش ثالث. *️⃣ المسار الأول ودا بسميه المسار الاحترافي، يركز على تطوير نفسه وخاصة في وجود كل العلوم ب ضغطة زر، حاجة لم تتحقق لأي جيل سابق، يقدر يتعلم ٱي شيء وببلاش ومن بيته وبدون ما يتحرك... دا لو ملقاش أصلا ممكن يستخدم الذكاء الصناعي يعلمه... المسار دا في عيوب أهمها انه محتاج مجهود ضخم وعزيمة من حديد وخاصة ان المردود بتاعه بطيء، منحنى التعلم دي مشكلته انه بطيء في البداية... يعني عاوز التزام ومجهود يومي مستمر لشهور متواصله ومش شايف لسه أي نتيجة في حياته. *️⃣ المسار الثاني ودا بسميه مسار فرقع لوز، يبقى عمال يتنطط بين الشركات وبين الوظايف، هشتغل في دي لا دي، هتعلم دي، اسبوعين ويقول فاكس هروح دي، لا هرقص في تيك توك، لا هبقي Media Buyer لا هبقى مش عارف ايه... المشكلة التنطيط دا بيخلي عادة المحصلة صفرية في الغالب الا لو حد محظوظ أو موهوب وهو بينط نزل في حته ظبطت معاه فرصة متجيش 5% حتى... المحزن انهم مش أغبياء وعارفين ان فرص النجاح بالطريق دا صعب لكن زي قصة جبل الذهب نهاية الزمن اللي هيتقاتل عليه من كل 100 هيوصل 1 لكن الكل هيقول لعلي أكون أنا الذي أنجو، فالكل هيتنطط ويقول مش يمكن أطلع انا اللي هتظبط معايا. *️⃣ المعضلة بقى موقفتش هنا، في جانب درامي أكثر وهو أصحاب الشركات، هما شايفين الخريجين معظمهم فرقع لوز، طيب عليا من دا بإيه؟ بقوا يقولوا (وظف بنت) أيوا الإجابة السحرية بقت كده، شغل بنت مش ولد، البنت مش مطلوب منها تكون نفسها ولا تعمل شيء فسهل تقبل بالراتب، ملهاش في التنطيط وفرق لوز، فهي هتكون أكثر استقراراً بل والتزام، مخها مش مشتت ب عشروميت حاجة زي الولد. *️⃣ فصراحة كان الله في عون الشباب، لإن الموضوع ملوش حل، أصل هتقول للشركات معلش عينوا ولاد عشان احنا هنكون أسرة 🤔 طيب وأنا مالي هو أنا مصلح اجتماعي؟ هتقولهم لا ادوا الشاب 10 و 15 ألف جنية عشان يعرف يكون نفسه، طيب اعمل دا ليه وانا اقدر أعين بنت نفس الوظيقة براتب اقل بكثير؟ جمعية خيرية مثلاً. *️⃣ معضلة ملهاش حل، لما بفكر فيها ك شخص صاحب بيزنس مش بلاقي لها حل (بالمناسبة كل الموظفين عندي بالمكتب رجالة) ، لما بستشير حد في الشغل بلاقي اجابة موحدة سمعتها من 5 حتى الآن، عين بنات يا محمد وهتريح نافوخك من كذا وكذا وكذا دول اللي بتشتكي منهم. بس للاسف ليه ملقتش البنت الأولى اللي بيها نبني باقي المنظومة 😂. *️⃣ لكن فعلاً لما اتجاهل كوني صاحب بيزنس وأفكر وأبص للصورة من فوق، هو احنا لو كلنا شغلنا بنات، المجتمعات ايه اللي هيحصل فيها؟ هو طبعاً في وظايف محجوزة للرجالة للفارق العضلي (مع انك في الصين 🇨🇳 العفاريت دول تلاقي عندهم البنت شغالة اي وظيفة تتخيلها، شيال حتى عادي، فحته العضلي دي حصرية عندنا وهتنقرض مع الزمن)... كان الله في عون الشباب ودا تعاطف مني معاهم لكني في النهاية صاحب بيزنس مش مصلح اجتماعي 😁.

في حاجة في عالم البترول اسمها crack spread ودا باختصار كده المصافي بتاخد كام عشان تحولك برميل البترول ل خامات.. بيسموه برضك مؤشر 321 عشان معناه ان 3 براميل بترول بتتحول ل 2 برميل بنزين و 1 برميل ديزيل. وطبعا مفيش سعر موحد ل 321 وكل منطقة في الكوكب وليها سعرها. *️⃣ المهم يا سيدي قبل الحرب كانت المصافي عندها الهامش دا 20/25 دولار... الحرب حصلت بقت 40 دولار... خلصت الحرب بقت 60 دولار 😂 ولو قولنا البرميل ب 70 دولار فدا معناه ان البرميل بقى يدفع تكرير وتنقية بسعر الخام نفسه. يعني سعر الخام الفعلي هو سعر شراء البرميل + سعر 321. وطبعا للدقة، سعر الخام 70 دولار الحالي دا عقود تسليم سبتمبر.

شهر يونيو كان شهر حافل في اليوتيوب... قدرت أنزل 7 فيديوهات ( 5 فيديو و 2 فيلوج) وهو رقم قياسي الحمد لله ومكنتش متوقع رغم إنه كان شهر صعب علياً ضغوطات وأمور أخرى كده لكن أهي بتمشي حتى لو بتعرج؛ للمقارنة فشهر مايو كان 4 فيديو + 1 لايف و شهر أبريل كان برضك 4 فيديو + 2 لايف وشهر مارس 6 فيديو ... *️⃣ شهر يوليو بقى في خطتي إن شاء الله برضك نشر 7 فيديوهات + 2 لايف (الأول هيكون يوم 9 أو 10 يوليو إن شاء الله) وال 7 فيديوهات هيكون 2 عن الوضع الحالي والتطورات يعني و 3 فيديو شروحات والمسار القديم (أكثر فيديوهات مرهقة وأقل فيديوهات مشاهدة لإن الناس بتحب الوضع الحالي وكلمني دولار وذهب) + 2 فيديو 1 منهم دردشة عن سعر البنزين ومشكلة الطاقة ودعمها في مصر والفيديو الثاني هيكون إن شاء الله دردشة عامة. عامة اللي فاته شهر يونيو دا اللي نشر وملخص سريع كده لكل فيديو ايه اللي فيه... الترتيب من الأحدث إلى الأقدم 1️⃣ يوم 26 يونيو نشر فيديو عن مزايا البطاقات الخاصة بالحسابات وكذلك الكريديت كارد؛ اتكلمت عن التأمين ضد التلف وزيادة الضمان والتأمين الطبي وغيره https://youtu.be/k5umjlmpcPw 2️⃣ يوم 22 يونيو نشر فيديو عن مستجدات الوضع الاقتصادي ودعم مصر لمعيار ISO 20022 وايه وضع الذهب الحالي https://youtu.be/KlLgJDeWOFM 3️⃣ يوم 20 يونيو كان فيديو غريب شوية والناس محبتوش عشان غير مألوف؛ كنت عالبحر وصورت فيلوج قصير 7 دقايق عن قرار الإمارات حظر السوشيال للأطفال وقولت إن دا ممكن يوقعنا في فخ إيران واعتمادهم عال VPN ويطلع اللي ورا دا الصهاينة... يعني جيت تكحها عميتها. https://youtu.be/LS8PHONXfMw 4️⃣ يوم 16 يونيو نشر فيديو عن اتفاق إيران وأمريكا والمستجدات والوضع وقتها وقرار الفيدرالي تثبيت الفائدة واليابان تقرر رفع الفائدة واتكلمنا عن تدفقات هوت ماني قوية. https://youtu.be/Vz0lpSdSdVI 5️⃣ يوم 7 يونيو نشرت فيديو عن إن الدولار في طريقه لل 50 (كان وقتها فوق 51) واتكلمنا عن الذهب نازل ليه وخبر الوظائف الأمريكي (اللي هو بالمناسبة هيحصل النهاردة تاني والتأثير هيتكرر سواء إيجابي أو سلبي حسب اللي شرحناه في الفيديو وقتها فمش محتاج أكرر) https://youtu.be/92VlhMara6U 6️⃣ يوم 3 يونيو نشرت فيلوج سريع من هونج كونج وكنت بتكلم فيه عن إني بفكر أنشر فيلوجات وايه رأيكم؛ وكمان جبت سيرة التعديلات الضريبية الجديدة التي تم إقرارها. https://youtu.be/l6qc0hCbpSg 7️⃣ يوم 2 يونيو نشرت فيديو عن حرب الاستثمار بين البنوك مع تيلدا وثاندر وإزاي التطبيقات دي سحبت مليارات من البنوك https://youtu.be/k0sjCZZ-e-k *️⃣ اللي مشافش الفيديوهات يقدر يروح يتسلى وكل فيديو هيلاقي تحتيه التايم لاين بتاعه عشان يروح للجزئية اللي هو عاوزها.

3️⃣ صراع كشف: وده النوع اللي الجمهور بيحبه جداً. شخص عامل صورة مثالية عن نفسه: ملاك، ناصح، محترم، فاهم، وطني، نظيف، صاحب رسالة ومتدين وأخلاقي. وبعدين خناقة تفتح ملفات قديمة، أو تكشف تناقضات، أو تطلع كلام كان مستخبي. هنا الصراع بيعمل وظيفة مهمة: بيكسر الهالة المزيفة حوالين بعض الناس. وده صحي أحياناً، بس الخطر إن الجمهور يخلط بين كشف الحقيقة والتشفي. في فرق بين إنك تفرح إن الحقيقة ظهرت، وبين إنك تستمتع بذبح شخص عشان زهقان وعاوز يتسلى. كمان في نقطة مهمة، الهالة دي مأساة لأنها بتخليك شايف المشهور مثالي قوي وأكيد مش بيغلط، فمجرد تلاقي له غلطات بشرية عادي، خلاص اقلب عليه... فلازم نفرق بين خطأ بشري وبين الكوارث. 4️⃣ صراع مصنوع: وده أسوأ نوع، القذارة والرخص. اتنين يعملوا خناقة، أو يكبروا خلاف صغير، أو يلمحوا لبعض، أو يعملوا سلسلة ردود، أو كل واحد ينزل ستوري “مش هسكت تاني”. والهدف الحقيقي مش حق ولا مبدأ ولا كشف ولا يحزنون. الهدف تريند. لأن الخوارزميات بتكافئ الغضب. المحتوى الهادئ ممكن الناس تشوفه وتعدي، لكن الخناقة تتشير، وتتعلق عليها، ويترد عليها، وتتحول لسلسلة حلقات. وبدل ما المؤثر ينتج قيمة، يبدأ ينتج صراع. وده بالمناسبة مربح جداً على المدى القصير، ومدمر جداً على المدى الطويل. ⬅️ وهنا لازم نكون منصفين شوية. المشكلة مش في المؤثرين بس. الجمهور نفسه جزء من المعادلة. الجمهور يقولك: “إحنا زهقنا من الخناقات”. نفس الجمهور يفتح الخناقة، ويتفرج، ويشير، ويحلل، ويستنى الرد القادم. فالمعادلة ماشية كده: المؤثر محتاج انتشار، والمنصة تكافئ التفاعل، والجمهور يحب الفرجة، والبراندات تراقب الأرقام، والدراما تكسب. *️⃣ فالصراع هنا مش مجرد أخلاق أفراد. هو كمان نتيجة تصميم المنصات القائم على شد الانتباه، هتعرف تعمل محتوى يشد انتباه الناس هتاخد مكافأة وفلوس. ومع الوقت المحتوى بيزيد فالناس تتشتت أكثر فلازم تبقى انتا أكثر عنفاً في جذب الانتباه وهكذا، حلزونة لا نهائية، الخلاصة ممكن نقول السوشيال ميديا لا تصنع الصراع من العدم، لكنها تكافئه لما يظهر (يعني بتحبه وتعمله الريتش بالبلدي كده). ودي جملة مهمة جداً. ⬅️ طيب هل ده طبيعي؟ آه. هل ده صحي؟ مش دائماً. في فرق بين إني أقول “الخناقات مفهومة” وبين إني أقول “الخناقات حلوة”. أنا مش ببرر الشتيمة، ولا الفضح الشخصي، ولا التلميحات القذرة، ولا استخدام الجمهور كوقود في معركة مصالح. أنا بقول إننا لازم نفهم ليه ده بيحصل. *️⃣ الصراعات طبيعية في مرحلة نضج السوق، لكن مش كل صراع مفيد. الصراع المفيد هو اللي يكشف معلومة، يصحح صورة، يحاسب شخص، أو يوضح تضارب مصالح. أما الصراع الرديء فهو اللي يتحول لتلقيح، وسفالة، وابتزاز عاطفي للجمهور، وسبوبة دراما. ⬅️ الخلاصة بقى: سوق المؤثرين مرّ بثلاث مراحل. مرحلة الانفجار: ناس كتير طلعت، جمهور كتير، فلوس كتير، فرص كتير. مرحلة التشبع: الجمهور اتقسم، الإعلانات بقت أصعب، المنافسة زادت، والوصول قل. مرحلة الصراع والفرز: الخلافات تظهر، الصور المثالية تتكسر، والناس تبدأ تميز بين اللي بيقدم قيمة واللي بيقدم شو. *️⃣ والمرحلة الجاية غالباً مش هتبقى هدوء. المرحلة الجاية هتبقى احتراف أو خروج. اللي عنده قيمة حقيقية هيكمل، واللي عايش على الصيت بس هيتعب، واللي عايش على الخناقات هيفضل موجود، بس في خانة مختلفة: مش مؤثر صاحب قيمة، صانع دراما. *️⃣ فخناقات المؤثرين مش مجرد انحدار أخلاقي. هي علامة إن سوق السوشيال ميديا خرج من مرحلة الوفرة ودخل مرحلة التشبع. ولما التورتة تبطل تكبر، الناس تبدأ تتخانق على القطع.... السوق بدأ يشبع من التصنع بتاع Personal branding وخلاص بدأت الناس تدور على القيمة ورا الهالة المصطنعة. *️⃣ بس خلاص وأخيراً أنا مشهور كيوت لا بتاع خناقات ولا عامل برسونال براندج (دا عملت فيديو من أسبوعين عالبحر بفانلة كت 😂 يعني صباح تدمير صورة البرسونال براندج لشخص محسوب اقتصادي والعالم بتاع الوقار والبدل والكلام الرزين دا) نظام إن البرسونال براندج بتاعي هو إن مفيش برسونال براندج 😂😂. بوست طويل قوي بس انتم عارفين، آه الفيديوهات جميلة، آه ممكن تجيب شوية فلوس تشتري ساندوتشين، بس الكتابة في دمي بحبها حتى وهي مش بتأكل عيش حاف 😭😭😭.

تقريباً بقينا كل يومين نشوف خناقة بين ناس مشاهير ومؤثرين، صراعات الكوميونتي و influencer entrepreneur وشوية الكلام الكبير دا... البعض يخش في الخناقة والبعض الآخر شايفها مجرد “ناس تافهة بتتخانق”. من وجهة نظري وكشخص نظرياً محسوب إني مشهور والصيت ولا الغنى... خليني أقولكم إن آه ممكن جزء منها تفاهة طبعاً، وجزء منها استعراض، وجزء منها قلة قيمة… بس جزء كبير منها كمان طبيعي جداً، آه فعلاً طبيعي، وعارفك مستغرب لكن لو بصينا للموضوع كـ سوق مش هتستغرب. ⬅️ أيوه يا جماعة، سوق مستغرب ليه؟ *️⃣ سوق فيه فلوس، انتباه، براندات، جمهور، وكاميرات مفتوحة 24 ساعة، عالم بودكاست وناس بتكسب من الشهرة ولو السوشيال قفل حياتهم وقفت... فتعالوا نبص عليها من زاوية مختلفة شوية. مش زاوية مين وحش ومين كويس، لكن زاوية السوق دا اتطور إزاي؟ وليه الخناقات زادت دلوقتي؟ 1️⃣ في الأول السوشيال ميديا كانت أرض مفتوحة. أي حد عنده حضور، أو كاريزما، أو شوية معرفة، أو حتى بجاحة (عالم تيك توك) فسهل قوي ينتشر ويتشهر. المنصات كانت بتدي reach عالي، الجمهور كان لسه متعطش، البراندات كانت لسه بتجرب وبتصرف كثير، وعدد اللاعبين قليل مقارنة بحجم الفرصة، فتلاقي الناس اللي بدأت زمان عندها ملايين المتابعين عادي جداً وساعات تستغرب هو فلان دا إزاي متابعة ملايين، اشمعنى دا مش قوي للدرجة دي، السر هو أن السوق كان فاضي. *️⃣ فكان طبيعي تلاقي ناس كتير بتطلع مع بعض. فلان كبر، وعلان كبر، والتالت كبر، والرابع لقى لنفسه جمهور. مش لأنهم كلهم عباقرة، لكن لأن التورتة نفسها كانت بتكبر. يعني السوق كان في مرحلة وفرة. مش لازم واحد يكسب عشان التاني يخسر؛ كلهم ممكن يكسبوا عادي لأن الجمهور بيزيد، والفلوس بتزيد، والمنصات بتوزع انتباه بسخاء. وبالمناسبة مش شرط المكسب فلوس عشان ما تقلبوش الموضوع مادي، في ناس معاها فلوس كثير وناقصها الشهرة المعنوية فهنا كان بيكسبها بسهولة... فمش كله فلوس. 2️⃣ المرحلة 2: بعد شوية حصل التحول الطبيعي اللي بيحصل في أي سوق: السوق اتشبع. الجمهور اتقسم على ناس كتير، البراندات بقت أذكى وأدق وأبخل، المنصات قللت الوصول العضوي، والمحتوى نفسه بقى مكرر. هنا بقى الموضوع اختلف. التورتة مبقتش بتكبر بنفس السرعة. *️⃣ فبدل ما السوق يبقى كله طالع لفوق مع بعض، بقى واحد ياخد مساحة غالباً بياخدها من مساحة حد تاني. وهنا تبدأ الحساسية. مش شرط غيرة شخصية بس، ولا شرط “نفسنة” وخلاص. أحياناً دي نتيجة اقتصادية طبيعية لسوق دخل مرحلة منافسة صفرية أو شبه صفرية. يعني الانتباه محدود، الإعلانات محدودة، الميزانيات محدودة، والناس مش هتتابع كل الناس. فطبيعي تبدأ الخناقات حوالين المكانة، الفلوس، الجمهور، والعلاقات. ⬅️ وده مش معناه إن السوق باظ. دي نقطة مهمة. الناس بتتعامل مع خناقات المؤثرين كأنها دليل إن المجال كله تافه وفاسد وانتهى، بس الحقيقة إن أي سوق جديد بيحصل له نفس الدورة تقريباً: يبدأ فوضوي، يكبر بسرعة، يتشبع، يدخل مرحلة صراع، وبعدين يحصل فرز. *️⃣ ده حصل في الإعلام، وحصل في الصحافة، وحصل في اليوتيوب، وحصل في التجارة الإلكترونية، وحصل في أي صناعة فيها فلوس وانتباه ونفوذ. الصراع مش دايماً مرض. دا حتى عالم AI دلوقتي هتلاقي عشروميت شركة، كمان كام سنة المنافسة هتتحسم بين 4-5 بس وكلنا خلاص بدأنا نشوفها... عالم العربيات الكهرباء الصينية دلوقتي برضك شركات كثير لكن هيتفلتر برضك... فساعات بيبقى عرض طبيعي من أعراض النضج. بس طبعاً مش كل صراع برضك بنشوفه هو صراع نضج؛ في صراعات قذرة وعبيطة ورخيصة جداً. ⬅️ تعالوا نفرق بين أنواع الخناقات: 1️⃣ صراع مصالح: دا الواضح والصريح والسهل والصراع الرخيص، اتنين كانوا مستفيدين من بعض، وبعدين المصلحة اتعارضت. فلوس، إعلان، وكالة، عمولة، براند، مشروع مشترك، أو اتفاق اتكسر. وده في البيزنس بيحصل كل يوم. بس الفرق إن صراعات البيزنس العادية بتحصل في مكاتب ومحاكم واجتماعات مقفولة، إنما عند المؤثرين بتحصل قدام الجمهور. فتظهر كأنها فضيحة كبرى، وهي أحياناً مجرد خناقة شركاء. 2️⃣ صراع مكانة: وده أخطر وألذ نوع بالنسبة للجمهور. واحد حاسس إن التاني خد منه مساحة، أو بقى أهم منه، أو الجمهور بقى يسمعه أكثر. وسوق المؤثرين مبني على مورد حساس جداً اسمه الانتباه. والانتباه مورد محدود. مش كل الناس هتشوف كل الناس، مش كل البراندات هتدفع لكل الناس، ومش كل المنصات هتطلع كل الناس. فالمكانة نفسها بتبقى محل نزاع. وده يخلي خناقة ظاهرها “مبدأ”، لكن جذرها الحقيقي: أنا مكاني بيتهدد، أنا الكبير هنا ولازم أتخانق عشان أحافظ على مكانتي.

كمية بوستات غير طبيعية بشوفها إن مطار القاهرة قررت بشكل غير معلن من يوم 24 يونيو إن مسموح فقط بباور بنك سعة حد أقصى 10 آلاف وبشرط ميكونش أنكر. *️⃣ الناس عمالة تحلف ان دا حصلها، وأدور ملاقيش أي قرار صادر، وكل اللي ينفي يطلع سافر من اسبوعين وشهر فات (أنا سافرت يوم 1 يونيو عادي بأنكر 25 ألف). *️⃣ الغريب إن برضك لم يتم نفي الموضوع ولا عمل أي توضيح، اللي هو أنا أروح المطار معايا باور بنك سعرها 4 آلاف جنية يقولوا لي، سوري هات دي مش مسموحة، ولما ترجع مصر دور عليها هنشيلهالك في الحفظ والصون 😡 😡 *️⃣ عامة أنا معنديش خطط سفر قريب بس مبحبش المفاجآت أنا، بحي أكون عارف ومخطط ومتوقع الاحتماليات كلها، أي مفاجأة بتهنجني وتعصبني وأنا حالياً جهازي العصبي لوحده بيعاني. *️⃣ أتمنى لو حد عنده رد حاسم للموضوع دا، مش أخبار عامة وسمعنا واصل الصين مطبقة نظام وأصل حوادث الطيران، أصل الإماراتية بتسمح بكذا وشغل المعتاد بتاع معنديش رد بس لازم أخش أقول شيء، يا ريت اللي يعرف وضعنا بالظبط مش وضع الكوكب يقولي. يا مصر بتعمليها إزاي 😭😭

عدنا بعد غياب لخط السير والمسار القديم للفيديوهات وهو الشرح الشرح المرة دي للكروت البنكية وايه الفارق بين الفئات المختلفة. وهل كنت تعرف إن بطاقتك البنكية بتديلك ضمان إضافي عالمشتريات اللي بتشتريها حتى 12 شهر بل وتأمين ضد التلف والسرقة؟ طيب تعرف إنها بتديلك تأمين طبي بره مصر؟ اعرف الحكاية والمزايا اللي البنوك مش بتقوالهالك عن كروتك البنكية "سواء كارت حساب أو بطاقة إئتمان... من بنك إسلامي أو من بنك عادي https://youtu.be/k5umjlmpcPw

للاسف اتكسر ال 4 الاف وراح الحاجز النفسي، الطريق مفتوح يلا لل 3800

الصورة دي اخدتها إمبارح بالليل قبل ما أنام اللي هو لو شخص طبيعي يقول أيوا يعني أنا أعمل ايه الذهب نازل الدولار بينزل في مصر الفضة نازلة البترول نازل البورصة نازلة البتكوين نازل أعمل ايه يا استاذ غسان 😂 *️⃣ النقطة دي قلشت عليها في آخر الفيديو اللي نزلته من 3 ايام وقولت دا مش وقت الذهب، ولا العقار، ولا دولار، ايه دا والبورصة برضك مش احسن حاجة، طيب اعمل ايه اعمل ايه، ابعتوا لبن سامي أي فلوس مش عاوزينها... وركزوا. أي فلوس مش عاوزينها يعني مش سلف 😂😂😂 *️⃣ لكن لو اتكلمنا جد فالموضوع فعلا غلس، كل شوية توقعات المحللين تزود فرص رفع الفايدة في أمريكا، ورفع الفايدة الأمريكي هيجبر كوكب الأرض كله يرفع، لو أمريكا رفعت 0.25 فمصر هترد ب 1% اى 1.5% حتى لو بنعمل حاليا رقم ربح خزعبلي 20% عالدولار للهوت ماني، هي كده ميصحش أمريكا تزود وانتا تتفرج. عامة اجتماع الفيدرالي القادم 29 يوليو انا متوقع لسه تثبيت، لكن اللي بعده 16 سبتمبر نبدأ نقلق.

*️⃣ متقلقش محدش مهما اتدمر هيوصل للتدمير اللي في مفهومك ولا مفهوم 90% من الشعب... فلا تقلق عليهم ومتخليش دا مدخلك لقبول إزالة ورقة التوت، عشان مندمرهمش شيل ورقة التوت، لا تقلق. وخد بالك من الورقة سواء في الموضوع دا أو أي موضوع قادم. حاسس إني مؤخرًا زودت في البوستات غير الاقتصادية، الجماعة اللي يتابعوني عشان الاقتصاد أكيد زعلانين، بس أنا مقدرتش أمسك نفسي.

من حوالي 15-20 سنة كنت بقلب في التلفزيون وبالصدفة قابلت شيخ، حد اتصل بيه قاله: يا شيخ أنا شغال مع الدولة وفي مناقصة، وفي حد عرض عليا أدفع له فلوس والمناقصة هترسى عليا... الشيخ قاله: حرام دي رشوة. *️⃣ الراجل قال للشيخ: بس المنافسين بتوعي بيدفعوا رشاوى، فأنا لازم أدفع زيهم وإلا مش هشتغل... فالشيخ اتعصب وقاله: هو إنتا متصل بيا عاوزني أحلل لك الرشوة؟ الغلط بيفضل غلط، وشيوع الغلط والحرام مش هيخليه حلال. *️⃣ الراجل قاله: طيب ما كلهم بيدفعوا، فالشيخ قاله: كلهم هيروحوا النار، ادفع وروح معاهم النار... أنا مش هحلل الرشوة. *️⃣ من وقت الموقف دا وأنا بقيت باخد بالي من النقطة دي، في مقولة بيسموها Argumentum ad populum أي Appeal to Common Practice، وهي مغالطة منطقية صاحبها بيظن إن المنتشر أكيد تصرف سليم... تلاقي حد يقولك: دا في الستينات مكانش في محجبات، وهتلاقي صور والدتك ولا جدتك وقتها بدون حجاب، أيوه يعني إيه؟ هو لو أمي ملبستش الحجاب في الستينات ولا جدتي ولا مصر كلها فدا هيخلي الحجاب مبقاش فرض مثلاً؟ *️⃣ نفس الحكاية دي شايفها منتشرة في الخناقة الحالية بين عمر المنيري ومؤمن أشرف... أنا عادي بسمي وبقول عادي أسماء ناس لإني بره الموضوع، أنا هنا مش داخل أتكلم في الموضوع نفسه، لكن داخل أطبق نفس فكرة الشيخ القديمة. *️⃣ دلوقتي عندنا طرف وهو عمر غلط، ومن هنا في هجوم واسع عليه، الفكرة إن في أطراف تانية شايفة إن الهجوم على عمر مش مبرر، ومش عشان عمر مغلطش، لأ لأ هما معترفين بغلط عمر، لكن عشان مؤمن كمان غلط... دول كده عاوزين يقولوا كده إني أدفع رشوة عادي عشان الكل بيدفع رشوة. *️⃣ بمعنى عندي طرف غلط فعليه هجوم.. لو بقى ثبت إن الآخر وهو مؤمن غلطان، دا مش بيخلي الأول براءة والأول ميتهاجمش، لا خالص دا مفروض يخلي مؤمن هو كمان يتهاجم وشتان الفارق. *️⃣ هو مش دا هيشطب دا، مش دا وحش ودا طلع وحش فخلاص طرفين متساويين نشطب، دي عقلية (مهندسين) بيحسبوها بالرياضيات، حسابات الرياضة والفيزياء، لكن في العلوم الإنسانية، ودي أصعب حاجة على المهندسين لأنها مش بتتقاس بمعادلات واضحة صريحة، ميقدروش يقولوا دا معطيات تؤدي إلى نتائج محددة... في العلوم الإنسانية مفيش حاجة بتشطب حاجة. *️⃣ فشيوع الغلط مش هيخليه صح، لو مؤمن طلع غلطان مش هيخلي دا عمر خلاص ميتهاجمش، لا خالص بل الصح يتهاجم برضك مؤمن، فالوضع بالنسبة لعمر ثابت أيًا كان... *️⃣ نقطة واحد غلط نموته ولا نحط عليه ليييه؟ الإجابة هي عشان يبقى عبرة... من كام يوم نزلت بوست قلت فيه تغليظ العقوبات، وكان عن حادثة البنت اللي خبطت بائعة القهوة، قلت إن في فلسفة وهي تشديد العقوبة بغباوة بحيث تبقى عبرة... سبحان الله بعد يومين لقيت صديق في ماليزيا باعت لي إنهم هناك عملوا عقوبة تصل لـ60 ألف دولار على أي أب ابنه يتنمر على حد في المدرسة... الرقم ضخم جدًا بمقاييس أي بلد... الهدف هو التدمير، عقوبة ضخمة فكل واحد هيمسك ابنه. لأنك بقيت عارف إن الغلطة ثمنها غالي قوي قوي. *️⃣ المجتمعات إزاي بتتحلل وينتشر فيها صفات سيئة؟ عن طريق إن ناس بتعمل تصرف غلط، والمجتمع بيسكت، لفظ ما زي (فشخ)، أهو دا لفظ عادي دلوقتي لكن زمان كان عيب، لكن دخل وانتشر تدريجيًا لأن الناس سكتت. *️⃣ فلو حد دخل سب بقاموس أول مرة أسمعه، وأنا من مواليد المطرية بالمناسبة، وبعدين المجتمع قال معلش خلاص متعملش كده تاني... شوية وهييجي ثالث ورابع وخامس، شوية وهيبقى دا العادي أصلاً... فأنا لا فارق معايا مؤمن ولا عمر ومقابلتش حد فيهم ولا كلمته شخصي في حياتي... لكن فارق معايا محاولات إن الموضوع يعدي وإن المجتمع اللي بيقاوم هو اللي غلطان... *️⃣ المجتمع خلاص بيدافع عن آخر أوراق التوت الفاضلة على جسمه، المجتمع خوخ من كثرة ما قال عادي معلش عديها، فلما يصحى مرة ويمسك ورقة التوت الأخيرة ويمنعك تشيلها وتعريه، تقوله: إشمعنى يعني جيت على دي ما إنتا بلبوص... بدل ما تشجعه يتمسك بيها وتدريجيًا يحاول يرجع ويجمع ورق التوت ويستر نفسه ويصلحها... قاعد تقوله: ما طول عمرك عمال تسقط ورق، خلاص جيت دلوقتي وهتعملي شريف. *️⃣ هي دي مشكلتي باختصار في الخناقة، لكن الموضوع المباشر، ولا يفرق معايا، يتصالحوا يتخانقوا يرفعوا قضايا يحبسوا بعض، أنا فارق معايا انتقاد آخر ورقة توت. دي كارثة تدل لأي درجة وصل السوس في المجتمع وأفكاره... ما كله بيدفع رشوة، هي جت عليا... خدوا بالكم. *️⃣ ومتقلقوش محدش هيتدمر، وبطلوا تشعروا بالأسى على حد هو مش من طبقتكم، بلاش كونسبت يا عيني كده مستقبله هيضيع وهيفضلوا في فئة ملايين مش هيقدروا يبقوا مليارات... متخافش معنى يتدمر بالنسبة لكم غيرك، إنتا تلاقيك بتحسبها على نفسك وإنك لما بتتهز مش بتعرف تكمل الشهر فصعبان عليك يحصل لحد من الصراع كده ويوصل للمستوى اللي في بالك، لا أطراف الصراع ولا الوسطاء ولا اللي اتزقوا بقوا في الحوار دون قصد.

متقلقش محدش مهما تدمر هيوصل للتدمير اللي في مفهومك ولا مفهوم 90% من الشعب... فلا تقلق عليهم ومتخليش دا مدخلك لقبول ازالة ورقة التوت، عشان مندمرهمش شيل ورقة التوت، لا تقلق. حاسس إني مؤخرًا زودت في البوستات غير الاقتصادية، الجماعة اللي يتابعوني عشان الاقتصاد أكيد زعلانين، بس أنا مقدرتش أمسك نفسي.

من حوالي 15-20 سنة كنت بقلب في التلفزيون وبالصدفة قابلت شيخ، حد اتصل بيه قاله: يا شيخ أنا شغال مع الدولة وفي مناقصة، وفي حد عرض عليا أدفع له فلوس والمناقصة هترسى عليا... الشيخ قاله: حرام دي رشوة. *️⃣ الراجل قال للشيخ: بس المنافسين بتوعي بيدفعوا رشاوى، فأنا لازم أدفع زيهم وإلا مش هشتغل... فالشيخ اتعصب وقاله: هو إنتا متصل بيا عاوزني أحلل لك الرشوة؟ الغلط بيفضل غلط، وشيوع الغلط والحرام مش هيخليه حلال. *️⃣ الراجل قاله: طيب ما كلهم بيدفعوا، فالشيخ قاله: كلهم هيروحوا النار، ادفع وروح معاهم النار... أنا مش هحلل الرشوة. *️⃣ من وقت الموقف دا وأنا بقيت باخد بالي من النقطة دي، في مقولة بيسموها Argumentum ad populum أي Appeal to Common Practice، وهي مغالطة منطقية صاحبها بيظن إن المنتشر أكيد تصرف سليم... تلاقي حد يقولك: دا في الستينات مكانش في محجبات، وهتلاقي صور والدتك ولا جدتك وقتها بدون حجاب، أيوه يعني إيه؟ هو لو أمي ملبستش الحجاب في الستينات ولا جدتي ولا مصر كلها فدا هيخلي الحجاب مبقاش فرض مثلاً؟ *️⃣ نفس الحكاية دي شايفها منتشرة في الخناقة الحالية بين عمر المنيري ومؤمن أشرف... أنا عادي بسمي وبقول عادي أسماء ناس لإني بره الموضوع، أنا هنا مش داخل أتكلم في الموضوع نفسه، لكن داخل أطبق نفس فكرة الشيخ القديمة. *️⃣ دلوقتي عندنا طرف وهو عمر غلط، ومن هنا في هجوم واسع عليه، الفكرة إن في أطراف تانية شايفة إن الهجوم على عمر مش مبرر، ومش عشان عمر مغلطش، لأ لأ هما معترفين بغلط عمر، لكن عشان مؤمن كمان غلط... دول كده عاوزين يقولوا كده إني أدفع رشوة عادي عشان الكل بيدفع رشوة. *️⃣ بمعنى عندي طرف غلط فعليه هجوم.. لو بقى ثبت إن الآخر وهو مؤمن غلطان، دا مش بيخلي الأول براءة والأول ميتهاجمش، لا خالص دا مفروض يخلي مؤمن هو كمان يتهاجم وشتان الفارق. *️⃣ هو مش دا هيشطب دا، مش دا وحش ودا طلع وحش فخلاص طرفين متساويين نشطب، دي عقلية (مهندسين) بيحسبوها بالرياضيات، حسابات الرياضة والفيزياء، لكن في العلوم الإنسانية، ودي أصعب حاجة على المهندسين لأنها مش بتتقاس بمعادلات واضحة صريحة، ميقدروش يقولوا دا معطيات تؤدي إلى نتائج محددة... في العلوم الإنسانية مفيش حاجة بتشطب حاجة. *️⃣ فشيوع الغلط مش هيخليه صح، لو مؤمن طلع غلطان مش هيخلي دا عمر خلاص ميتهاجمش، لا خالص بل الصح يتهاجم برضك مؤمن، فالوضع بالنسبة لعمر ثابت أيًا كان... *️⃣ نقطة واحد غلط نموته ولا نحط عليه ليييه؟ الإجابة هي عشان يبقى عبرة... من كام يوم نزلت بوست قلت فيه تغليظ العقوبات، وكان عن حادثة البنت اللي خبطت بائعة القهوة، قلت إن في فلسفة وهي تشديد العقوبة بغباوة بحيث تبقى عبرة... سبحان الله بعد يومين لقيت صديق في ماليزيا باعت لي إنهم هناك عملوا عقوبة تصل لـ 60 ألف دولار على أي أب ابنه يتنمر على حد في المدرسة... الرقم ضخم جدًا بمقاييس أي بلد... الهدف هو التدمير، عقوبة ضخمة فكل واحد هيمسك ابنه. لانك بقيت عارف إن الغلطة ثمنها غالي قوي قوي. *️⃣ المجتمعات إزاي بتتحلل وينتشر فيها صفات سيئة؟ عن طريق إن ناس بتعمل تصرف غلط، والمجتمع بيسكت، لفظ ما زي (فشخ)، أهو دا لفظ عادي دلوقتي لكن زمان كان عيب، لكن دخل وانتشر تدريجيًا لأن الناس سكتت. *️⃣ فلو حد دخل سب بقاموس أول مرة أسمعه، وأنا من مواليد المطرية بالمناسبة، وبعدين المجتمع قال معلش خلاص متعملش كده تاني... شوية وهييجي ثالث ورابع وخامس، شوية وهيبقى دا العادي أصلاً... فأنا لا فارق معايا مؤمن ولا عمر ومقابلتش حد فيهم ولا كلمته شخصي في حياتي... لكن فارق معايا محاولات إن الموضوع يعدي وإن المجتمع اللي بيقاوم هو اللي غلطان... *️⃣ المجتمع خلاص بيدافع عن آخر أوراق التوت الفاضلة على جسمه، المجتمع خوخ من كثرة ما قال عادي معلش عديها، فلما يصحى مرة ويمسك ورقة التوت الأخيرة ويمنعك تشيلها وتعريه، تقوله: إشمعنى يعني جيت على دي ما إنتا بلبوص... بدل ما تشجعه يتمسك بيها وتدريجيًا يحاول يرجع ويجمع ورق التوت ويستر نفسه ويصلحها... قاعد تقوله: ما طول عمرك عمال تسقط ورق، خلاص جيت دلوقتي وهتعملي شريف. *️⃣ هي دي مشكلتي باختصار في الخناقة، لكن الموضوع المباشر، ولا يفرق معايا، يتصالحوا يتخانقوا يرفعوا قضايا يحبسوا بعض، أنا فارق معايا انتقاد آخر ورقة توت. دي كارثة تدل لأي درجة وصل السوس في المجتمع وأفكاره... ما كله بيدفع رشوة، هي جت عليا... خدوا بالكم. *️⃣ ومتقلقوش محدش هيتدمر، وبطلوا تشعروا بالأسى على حد هو مش من طبقتكم، بلاش كونسبت يا عيني كده مستقبله هيضيع وهيفضلوا في فئة ملايين مش هيقدروا يبقوا مليارات... متخافش معنى يتدمر بالنسبة لكم غيرك، انتا تلاقيك بتحسبها على نفسك وانك لما بتتهز مش بتعرف تكمل الشهر فصعبان عليك يحصل لحد من الصراع كده ويوصل للمستوى اللي في بالك، لا أطراف الصراع ولا الوسطاء ولا اللي اتزقوا بقوا في الحوار دون قصد...

أثناء ما انتم سهرانين منتظرين ماتش مصر (أنا نايم مش معاكم) في مفاجأة وهو فيديو جديد كمان نزل بالقناة الفيديو عن تطبيق معيار ISO 20022 (محلياً) ومعاه أخبار الذهب وهل الدولار هيجري نحو 47 ولا هيهدي شوية يلا اللي سهران يخش يشوف الفيديو أنا نايم والبوست مجدول https://youtu.be/KlLgJDeWOFM

سيبكم من المضيق اللي عمالة إيران تقفله وتفتحه دي في Vlog سريع كده نزلته عاليوتيوب، حاجة صغننه 7 دقايق كده عن حظر الامارات السوشيال ميديا وتأثير دا على VPN والأمن القومي لزيادة استخدام ثغرة اسرائيل بال VPN معلش الفيديو عفوي وسريع وممكن ابقي اصور واحد تاني لاحقا اكثر جودة واتكلم بشكل تفصيلي في الموضوع دا https://youtu.be/LS8PHONXfMw

لي كوان يو لما وصل لحكم سنغافورة لقى البلد مشتته، اعراق مختلفة وفوضى وجهل وفساد ووو... فمن الحاجات اللي عملها سياسة العقوبات الغشيمة.. قالك مفيش رادع زي الغشومية... تقريباً كان بيقرأ قصة فلاد الثالث لما قرر عقوبة معظم الجرايم او حتى عصيان الأوامر شيء واحد وهو الموت بالخازوق وعشان كده عرف عند العرب بفلاد المخزوق وعند الغرب ب الكونت دراكولا 🧛 واستمر في كده حتى هزيمته وقتله على يد السلطان محمد الفاتح. *️⃣ مفهوم العقوبات المبالغ فيها بيكون اشبه ب رعب، تخيل انتا في عصر دراكولا واخدت ارض حد فتتعدم بالخازوق... عشان كده لي كوان يو طبق دا في سنغافورة، هتأكل حمامة في الشارع ولا حيوان بري، غرامة 10 الاف دولار، دخلت الحمام ومشدتش السيفون (اماكن عامة) غرامة 1000 دولار، حد شافك عريان ولو في بيتك والشباك مفتوح غرامة 2000 دولار ، فكرت تستورد لبان هتلبس غرامة 100 ألف دولار... غشومية تخليك تفكر ألف مرة. *️⃣ كل ما بشوف حادث عيال سايقين عربية ابوهم وقتلوا حد زي ما حصل النهاردة بقول لازم الغشومية في العقوبة، بس مش هنقدر نعمل غشومية في الأطفال عشان القوانين الدولية لكن نقدر نعمل غشومية في الأب. *️⃣ الطفل اللي ياخد عربية ابوه و يقتل حد يحاسب الاب بتهمة القتل العمد وليس القتل الخطأ، العقوبة تصل للإعدام شنقاً، انتا اديت ابنك العربية فراح قتل حد فانتا سبب الجريمة... هتقولي الواد اخدها بدون علم ابوه، خلاص انتا اب مش موجود عشان يستأذنوك ومعرفتش تربي، اللي زيك يتعدم ونخلص البشرية. *️⃣ نفس الفكرة حادثة السرعة يعني خبطت حد وقتل بس سرعتك تحت سرعة الطريق تحاسب عادي، لكن لو عديت سرعة الطريق القصوي وقتلت حد تحاسب قتل عمد وتعدم، انتا تعمدت تمشي بسرعة تفوق القصوي يعني متعمد توصل لسرعة قاتلة... دا قتل عمد... ولو كنت سكران قتل عمد اعدام برضك ولو مخدرات قتل عمد. *️⃣ شيء مستفز ان عيال ياخدوا عربية اهلهم يقتلوا حد وبعدين، ولا هياخدوا سنة حبس واهلهم مش هياخدوا يوم حبس... وعيلة قتل لها حد واتدمرت بسبب تهور الأطفال عااادي جداً... اقولكم حاجة مضحكة، عادة الحكم بيكون مخفف حفاظا على مستقبل الأطفال، طيب اللي ماتوا ايه اخبار مستقبلهم؟ لا مش مهم دول.