BnSamy

كل شوية ألاقي ناس تكتب إن زيادة سعر الخبز وتحريكات البنزين هتسبب تغيرات وقلاقل إجتماعية وسياسية وووو... صلوا عالنبي يا جدعان مفيش حاجة هتحصل عالمستوي بتاع الدولة. اللهم إلا زيادة معدلات الفقر وبالتالي الجريمة؛ وحتي دا مش مضر ليهم؛ لإن الجريمة هتزيد هتسبب زيادة الرغبة في الاحساس بالأمان؛ فشوية الناس القادرة مادياً وكانت عنيدة رافضة تعيش في كومباوند هتقتنع خلاص وهيشوف شقة ودا فيلا ينقل لها... فينشط شغلهم. اومال يعني الكومباوندات اللي بتتبني في كل مكان في مصر دي مين هيقعد فيها لو حاسين بالأمان والخدمات وعندكم خضرة ونظافة بره الكومباوند؟ 🤔🤔 مصائب شعب عند المليارديرات فوائد 😔😔

منبهر بقدرة الدولة علي تغيير سرعات الطريق فجأة وبدون لافتة ضخمة توضح او كتابة السرعة الجديدة عالأرض وتكتفي فقط ب لافته صغيرة حمراء علي جنب وراها في مسافة 500-700 متر رادار *️⃣ المبهر ان طريق زي السويس المنطقة من كوبري النادي الاهلي مدينة نصر الي كوبري 4.5 كان زمان السرعة 60 غيروها ل 100 وحطوا شرط الغاء عاليافطة ال 60 القديمة... هوبا يقرروا من فترة يغيروا الراجع يبقي 60 وببساطه يشيلوا شرط الالغاء دي 😂 فعينك كده كده متعودة تشوف يفط 60 عادي بس ملغاه... الجامد ان الذهاب من النادي الاهلي الي 4.5 السرعة لا تزال 100 بس الراجع من نفس الطريق السرعة 60 😂😂😂 *️⃣ ولا طرق زي محور نجيب محفوظ لسكان التجمع (اللي هو بيوصلنا من شنزو آبي الي التجمع) يحطوا رادار بدون يافطة سرعة قبله 😂 وبعدين يقرروا يحطوا يافطة 80 ويعدلوا بعدها الرادار ل 60 ثم نبقي نشيل اليافطة ونعدلها... تحسن ان الموضوع افخاخ مش رادارات وان الادارة بتاعة الرادار مستقلة عن الادارة بتاعة الافتات. *️⃣ليه لما يكون في تغير مفاجئ في سرعة جزء من الطريق مش بنحط لافته ضخمة او نكتب السرعة عالأسفلت زي دول كثير؟ ليه الافخاخ... وبعدين يزعلوا لما الناس تروح تنزل البرامج اللي تعرفك مكان الرادار؛ مهو بسبب الافخاخ دي والغموض؛ طرق 8 حارات رايح جاي والسرعة 60 😂. ولا عشان نصبح علي مصر ودا من موارد الدولة ولا يحصلها تنمية 😔😔

بوست كله أرقام عن موازنة مصر العام المالي 24/25 اللي هتبدأ من 1 يوليو: جميع الاستخدامات أي كل ما سوف تصرفه الدولة مبلغ 5541 مليار جنية وهذه هي أكبر 5 بنود هيتم انفاق الأموال فيها: 1️⃣ مبلغ 1843 مليار جنية أي نسبة 33.2% بند سداد فوائد الديون. (كان مخطط لها 1120 مليار جنية بالموازنة الحالية لكن متوقع توصل 1360 مليار جنية) 2️⃣ مبلغ 1606 مليار جنية أي نسبة 29% لبند سداد أصول الديون مقابل 1315 مليار جنية الموازنة السابقة. ⬅️⬅️ يعني بند الدين متوقع 3449 مليار جنية الموازنة القادمة مقابل 2435 مليار جنية الموازنة السابقة (اللي كان مخطط له) 3️⃣ مبلغ 635.9 مليار جنية أي نسبة 11.47% بند الدعم مقابل 532 مليار متوقع حالياً 4️⃣ مبلغ 575 مليار جنية أي نسبة 10.3% بند دفع أجور جميع العاملين بالدولة. مقابل 493 متوقع حالياً. 5️⃣ بند الاستثمارات وهي بناء المباني سكنية وغير سكنية وطرق وكباري وشراء أراضي ومعدات وآلات وغيرهم مبلغ 495 مليار جنية بنسبة 8.9% مقابل 334 مليار جنية متوقعة حالياً. *️⃣ تفاصيل الدعم للي مهتم: 1️⃣ دعم السلعي (التموين ورغيف العيش والبنزين والسولار والغاز والكهرباء المياة والأدوية وألبان الأطفال) مبلغ 297 مليار جنية بنسبة 5.3% من انفاق مصر. ومتوقع انه العام الجاري قيمته توصل 271 مليار جنية. 2️⃣دعم اجتماعي (دعم المعاشات التأمين الصحي وتكافل وكرامة ووو) مبلغ 231 مليار جنية مقابل 208 مليار جنية العام الجاري. 3️⃣الدعم التنموي (دعم تنمية الصعيد ودعم الاسكان ودعم القروض الميسرة) مبلغ 12.5 مليار جنية. مقابل 10.8 متوقعين العام الجاري. 4️⃣دعم الاقتصاد (دعم الصناعة ودعم الزراعة َتنشيط الصادرات ودعم الانتاج الحربي ووو) مبلغ 47 مليار جنية مقابل 40.8 حالياً. 5️⃣احتياطي الدعم ودا مبلغ محطوط كده لزوم لو اي بند خرم معاهم ودا فين 46 مليار جنية ⬅️⬅️ دخل مصر دا بسيط خالص هما 2625 مليار جنية مقابل 2430 مليار جنية متوقع حالياً... تفاصيله الضرايب متوقعه 2022 مقابل 1550 متوقعة حالياً... ايرادات اخري بقي 600 مليار مقابل 865 مليار متوقع حالياً. (في 3 كمان منح) ⬅️⬅️ يعني كل ايراد مصر ضرايب وغيره نحط فوقه 724 مليار جنية ونسدد بيهم الديون (أصل وفوايد) وبعدين نشوف هنصرف عالدولة منين. *️⃣ يعني الدولة بتاخد كل الايراد ونستلف فوقه 724 مليار جنية وتسدد الديون... فكده محتاجين لسه مرتبات ودعم ومصاريف مختلفة؛ فعشان كده الدولة بتقصقص المصاريف المختلفة والدعم لان كل دا بالديون. يعني باختصار للي تاه مني ⬅️ مصر ايرادها 2625 مليار جنية ⬅️ بتصرف 3449 مليار جنية للديون ⬅️ وبتصرف 2092 مليار جنية لكل حاجة تانية انتهي البوست واعتذر لو نقلت اي رقم غلط لاني كتبت البوست وانا منتظر بالعربية وعمال اتنقل بين الموازنة والنوتس؛ لكن الموازنة علي موقع المالية تقدروا تنزلوها

لا تقرأ هذا البوست لو بتزعل *️⃣ رئيس الوزراء أعلن منذ قليل زيادة سعر رغيف العيش المدعم ل 20 قرش من الشهر المقبل (يونيو). *️⃣ إمبارح قال ان في خطة لعمل توازن في قطاع المحروقات والبترول يعني بحيث هيتم زيادات تدريجية لسعر البنزين بحيث بنهاية 2025 يكون السولار مدعوم برضك لكن البنزين بيعمل توازن ويغطي (يعني مفروض يكسب من البنزين عشان يعوض دعم السولار ودا معناه لتر 20+ عشان الحبايب وان كان نظريا لو فكروا يغطوا الدعم السولار من سعر البنزين محتاجين سعر 30 جنية للتر ودا صعب في رأيي) *️⃣ قالوا برضك انهم هيعلنوا قريب خطة رفع أسعار الكهرباء بحيث يقل العجز اللي عندهم بحيث خلال 4 سنين تكون الكهرباء غير مدعومة كلياً وقال وزير الكهرباء ان الكيلو بيكلف الدولة 223 قرش ويباع للمواطنين ب ب 58 قرش (اول 50 كيلو بس اللي بتباع بالسعر دا بشرط عدم تجاوز ال 100 كيلو اجمالي) وأعلي شريحة بتاخد الكيلو ب 165 قرش يعني لو عايش في قصر بتستهلك الالاف الكيلو وات فبرضك بتاخد كهرباء مدعومة. *️⃣ هيئة الدواء قالت (في كل الجرايد مصادر أكدت يعني مصادر كل الصحف 😂 كله عرف) إمبارح بالليل زيادة أسعار علي دفعات تستمر ل 3 شهور بحيث هيتم زيادة قيل 3500 دواء بنسب زيادة 20% لأدوية الأمراض المزمنة و 30-50% لغير المزمنة (وبكرر كل ما سبق بيقولك مصادر مفيش بيان رسمي). للتذكير بس كل الخطوات دي بهدف خفض عجز الموازنة وخاصة ان بعثة الصندوق يقال في مصر بتعمل المراجعة الثالثة ومفروض تخلص قبل يوم 15 يونيو عشان كده العيش هيزيد من 1 يونيو والادوية هتزيد الله اعلم امتي؛ وخلال ايام هنشوف خبطة بنزين. أسف إني بنقل لكم الأخبار دي وأنا تجاهلت بعضها لكن لما زادوا قولت اجمعهم سوى

في إنجاز مبسوط حصل قبل كام يوم معايا... يوم 24 مايو تحديداً بالكامل موبايلي مرنش ولا أنا اتصلت بحد... إنجاز الحمد لله لشخص عدو المكالمات إني مش بس مش بتصل بحد لكن قدرت أوصل الناس إن محدش يكلمني *️⃣ بل إن تليفوني من يوم الأربعاء 22 مايو الساعة 7:34 م لغاية يوم السبت 25 مايو الساعة 10:07 صباحاً أي لمدة 39 ساعة و 33 دقيقة موبايل لا اتصل ولا استقبل غير مرة واحدة يوم 23 بالليل اتصلت بمراتي ومردتش عليا 😂😂😂... الكلام ساري علي ال 2 تليفون بال 3 ارقام اللي فيهم 💪💪💪 *️⃣ ياااه يا جدعان... تفتكروا هييجي اليوم اللي احتفل فيه ب 7 أيام بدون ما اقول "ألو 😁". ⬅️ لسه مكلم صديق مكالمة 30 دقيقة 😁 بس احنا متكلمناش قبلها فوت في 2024 ولا 2023 ويمكن متكلمناش في 2022... فالناس اللي بتكلمني كل كام سنة مرة دول لما بيتصلوا برد عليهم ونرغي حتي لو ساعة 😁 مهي مش هتتكرر بقي في الظروف الطبيعية تاني في 2024 😂😂 ⬅️ فكوا يا جدعان وكفاية كلام في البوستات السابقة أعصابكم

ربنا يستر؛ وأتمني ميكونش خبر حقيقي وميكونش في حد مات بس هما ولاد... بيحبوا يسخنوا الدنيا معاريف الصهاينة دول

مفروض الإدارة العامة للمرور تعمل كشف جهاز عصبي ع السواقين في التجديد 😂... الناس اللي بتسوق العربيات في مصر تحس انهم عنده مشاكل عصبية + رعب عدم أمان. *️⃣ تلاقي حد في أول الشارع وانتا في آخر فيضرب كلاكس؛ حضرتك لو راكب بورش مش هتلحق توصل؛ الناس تدخل علي اي تقاطعات في شوارع جانبيه مش تهدي تبص لا تضرب كلاكس؛ المضحك ان ساعات التقاطع فاضي والرؤية موضحة مسافة كبيرة جداً يعني لو بصيت بس هتعرف ان مفيش حد؛ لا هتضرب كلاكس برضك. *️⃣ حالة عدم أمان Unsecurity و trust issues رهيبة؛ الناس حاسه ان أي حد هيحود يبقي هيخبطنا؛ أي حد ماشي عالرصيف يبقي هيعدي فجأة. *️⃣ طبعاً مش بقول إن الشوارع في مصر آمنه كفاية تعرف رقمي 33851 قتيل و 315 ألف و 211 مصاب دي الأرقام الرسمية لحوادث الطرق آخر 5 سنين بس والفعلي أكبر بكثير وخاصة في الاصابات لإنك ممكن تصاب ومتعملش محضر وتسجلها فمش بتدخل داتا الدولة. *️⃣ مشكلة الطرق في مصر إن الدولة صرفت مئات المليارات عالطرق؛ فقط الطرق... منظومة النقل عبارة عن طريق وسائق وسيارة... صرفنا مليارات عالطرق... طيب السائقين؟ كافحنا الفساد وعمل رخص بالفلوس وعملنا اختبارات سواقة حقيقية من واقع الشوارع مش اركن لي بظهرك بين قمعين ؟؟؟ طيب العربيات طلعنا قوانين تمنع بيع أي سيارة جديدة مفيهاش ABS/EBD /ESP وعدد 2 AirBag عالاقل... حد أدني لمواصفات الأمان لأي سيارة تباع في مصر... دا غبور بيبيع عربيات فيها الفرامل ABS وال AirBag بتاعة السواق تعتبر اوبشن ومزايا رفاهية. مهو لازم تطور الثلاثة (طريق وسائق وعربية) مينفعش واحدة منهم لوحدها زي الطرق. *️⃣ المهم حالة الخوف الدائم والقلق دا مش كويس؛ تخيل ناس بتسوق كل يوم وعندها هسهس إن حد هيخبط العربية او يكسر عليا... ولو مفيش عربيات حوليا يبقي المشاة هيعدوا فجأة (وبتحصل ساعات) بس بتكلم عالفكرة نفسها بتاعة إحساس القلق الدائم. *️⃣ مفروض كشف جهاز عصبي معرفش إزاي بس الناس مش هتستمر كده؛ وبعدين تلاقيهم راحوا اشغالهم متعصبين او يعملوا حادث ينزلوا يضربوا بعض أو يتخانقوا... مهو اعصابه مشدودة دايماً *️⃣ أقصد هنا لعدم سؤء الفهم المعتاد... متبصش عالموقف لوحده؛ مد الخط لقدام شوف دا هيوصلنا لفين.

من أسوء الحاجات والغلطات اللي بعملها بقالي فترة هي إن الخارج أكثر من الداخل أو OutPut أكثر من Input... يعني المحتوي اللي بطلعه أكثر من اللي بدخله. *️⃣ لو مش فاهم قصدي فالطبيعي ممكن تحتاج تقرأ 10 صفحات عشان تكتب صفحة واحدة... لكني في الشهور الأخير زادت معدلات الكتابة الخاصة بي ولم تتضاعف بالمقابل معدلات القراءة... دا كان بيحصل إزاي؟ استنزاف موارد؛ معلومات قديمة متراكمة عندي فبسحب منها. *️⃣ تخيل عقلك ك خزان انتا بتدلق فيه 10 صفحات (دا رقم تقديري مش حاجة دقيقة) عشان تسحب منه نتاج صفحة واحدة... الخزان عندك بالفعل فيه مخزون وانتا عمال تضيف 4 و 5 صفحات وتسحب في المقابل صفحة فهنا انتا بتسحب من الرصيد بتاعك في الخزان. *️⃣ كنت بتكلم مع صديق لي من كام يوم وبقوله محتاج اتعلم شوية محتاج أزود قراية كده بغلط غلطة كارثية لإني هييجي وقت معنديش جديد... النقطة دي تسري في الشغل وتسري في الحياة. *️⃣ مش بقول أكيد إني هوقف كتابة لكن يمكن أقلل معدلات الكتابة والنشر أول أغير شوية المحتوي لمحتوي وصفي تلخيصي يعني مثلا أجيب الموازنة وألخص لكم بنود الإيراد وبنود الانفاق؛ المواضيع دي هي مجرد شخص بيلخص مش بيبتكر مش بيفكر؛ فقط تلخيص وعرض معلومات... لكن مواضيع الشرح فدي محتاج تعليم وقراءة قبل أن اكتب فيها. *️⃣ نفس الأمر بيسري في الشغل زي ما بيسري في الحياة؛ محتاج أقلل الوقت اللي بعمل فيه إنتاج OutPut وأزود وقت التعلم وملئ الخزانات اللي بتستنزف من شهور. دعواتكم

النهاردة اجتماع المركزي لتقرير الفائدة ل 6 أسابيع قادمة؛ مفروض الفائدة مرتبطة بالتضخم وحالياً حسب المعطيات الرسمية التضخم بينخفض ففي لكن توقعي هو التثبيت ل سببين أساسيين: 1️⃣ لسه شوية؛ يعني التضخم بيقل اه بس مفروض يستني شوية لغاية ما يتأكد ان الترند بتاع التضخم اتكسر وبقي هبوط حقيقي. 2️⃣ الحكومة خلال ال 6 أسابيع القادمة مفروض هتزود أسعار الكهرباء (1 يوليو) والبنزين والسولار وسعر 2000-4000 دواء بنسب تصل ل 50% في بعضها وسعر المواصلات المختلفة ممكن يشمل دا سعر القطارات والمترو برضك. دا ممكن يرجع التضخم تاني يزيد فالطبيعي المركزي يستني لغاية ما يشوف الاجراءات دي هتعمل ايه في التضخم وبعدين يقرر الخفض. *️⃣ الحكومة أكبر مقترض ومتوسط الاقتراض الحكومي حاليا 100 مليار جنية أسبوعي فكل 1% في الفائدة تعني 2.75 مليون جنية (أسبوعي) بالنسبة للدولة يعني قللت 1% تعني وفرت 19.3 مليون أسبوعي *️⃣ دا غير عمليات سحب السيولة الأسبوعية من البنوك (عمليات السوق المفتوح) اللي المركزي وصل الاسبوع الماضي ل 1 ترليون جنية ودي بفائدة 27.75% الرسمية يعني هياخد ترليون لمدة اسبوع من البنوك ويرده لهم فوقه 5.3 مليار جنية فوائد بعد أسبوع. *️⃣ فالحكومة من مصلحتها انخفاض الفائدة عشان تقلل العجز لكن المركزي يهمه التضخم بغض النظر عن تكلفة دا عالحكومة؛ كل واحد عنده مشكلته وهو مش مسئول عن عجز الحكومة لكن مسئول عن محاربة التضخم. ملحوظة : البوست دا كتبته 6 الصبح ووقتها قولت منشروش دلوقتي خليه لما الناس تصحي وبعدين نسيت ومن شوية قولت هو محدش خالص علق عالبوست ليه؛ راح فين البوست؛ طلعت منشرتوش... الحر سيح العقلية وبقت بالوظه وزهايمر 😂😂