BnSamy

حمد لله عالسلامة يا جاي من السفر؛ من أسبوع لما قالوا حوار رفح وحرب ووو قولت مفيش حروب ومصر في أمان واخر البوست قولت دولار راس الحكمة مفروض هيوصل بقي 😁 يلا بقي يا حكومة زودي اسعار البنزين؛ وكده كده الاسبوع القادم درجة الحرارة 40 فالشعب هيبقي مفرهد وبيكتب كوميك علي الحر ومين فتح الفرن 😂😂😂

بعد ما شوفت فيديوهات مشروع GPT 4o وجوجل Astra الجداد فالخصوصية رايحة في حته مش حلوه خالص *️⃣ الموضوع هيتعدي انك بتبحث بالتليفون فعارف عنك؛ لا خالص دا هتدخله في حياتك وتقوله ايه رأيك في اللبس وتفتح له الكاميرا ويشوف البيت والكومبيوتر وشغلك وأصحابك واكلك وتحكي له وتاخد رأيه... يا راجل دا جوجل في الاعلان جايبه المبرمجة فاتحة الكاميرا بتوريه المكتب وبتسأله لو شوفت نظارتي قولي... انتا متخيل الناس هتوريه بيوتها وتقوله رأيك احط الانتريه هنا ولا هنا والموبايل يعرف ايه في البيت ويظهر لك لاحقاً إعلانات حاجات ناقصاك 😉... وتخيل العيال بقي هتوريه ايه عن حياتك وبيتك وهما في أيديهم الموبايلات ومش فاهمين قوتها. *️⃣ حرفيا هيعرف عنك حياتك مش بس زي دلوقتي اللي بتقرر تبحث عنه (او تقوله بالصدفة قصاد المايك) ؛ لكن اللي بتفكر فيه وانتا هتروح متطوع تديله داتا؛ فهتلاقي اللي يحكي له انه زهقان ولا متخانق مع اصحابه عشان فلان عمل كذا اتصرف ازاي... فلان عمل كذا دي مكنتش هتخش تبحث عنها فمكانش هيعرفها عنك. *️⃣ مرة كبير مصممي أبل السابق جوني ايف قال لشخص في حفلة (اوفلاين يعني) احنا مش بنفكر كثير الناس عاوزة ايه؛ احنا بنعمل المنتج ونخليهم يحبوه. فدا هيحصل مع الذكاء الصناعي اللي هتحبه وتتعلق بيه وترغي معاه حياتك. *️⃣ الذكاء الصناعي لما يعرف تفاصيل اضافية عنك فهنا هيقدر يتلاعب بيه زي الاعلام بالظبط وهيقترح عليك ويتلاعب بعقلك ورأيه وتوجهاته. *️⃣ أنا طبعاً مش ضد التقدم لكن بقول ان غالبية الناس أصلاً مش بتفكر؛ أساسا مخها في ودنها وعنيها ؛ انتا لابس كده ليه؟ عشان فلان المشهور لابس كده؛ انتا بتاكل هنا ليه؟ عشان الانفلونسر الفلاني نصح بيه؛ اشتريت دا ليه؟ عشان شوفته في اعلان؛ انتا بتأيد ليه علان السياسي؛ اصلي قريت بوست عالفيسبوك إنه حلو؛ انتا بتعارض ليه كذا هيقولك اصلي سمعت انه قال كذا. *️⃣ الناس غالبيتها أساساً مش بيفكروا وتقوله شي علي طول يمشي؛ الناس دي الذكاء الصناعي هيلعب بيهم كورة شراب... الزمن الحالي الناس فيه بتحب تريح نفسها وعاوزة شورت كت؛ لسه هقرأ كتاب ما أشوف ملخص ؛ لسه هشوف الملخص أنا عاور فيديو... هو عاوز يريح نفسه وهييجي له ذكاء صناعي هيقوله علي طول الاجابة المختصرة... الناس هتحبه قوي وهتريح مخها خاااالص... والمليارات هتتعمل من تريح الزبون المخ دا. *️⃣ طبعاً هتلاقي اللي يقولك التقنية دايماً ليها جانبين وفي ناس هتستفيد ووو؛ ايوا صح وفي ناس بتستفيد من الفيسبوك واليوتيوب والتيك توك؛ بس الغالبية الكاسحة ايه؟ يعني كام % بيفتح تيك توك للترفيه وكام للتعليم؛ الاجابة ليك انتا... فالتقنيات دي هتبقي مفيدة جداً طبعاً لكن الغالبية الكاسحة مش هتستخدمها لتطوير الذات وانتا عارف وأنا عارف دا فبلاش نضحك علي بعضنا... البوست أكيد مش معمول للناس اللي بتفهم إزاي تستفيد من التقنيات وتحمي نفسها من الجوانب الضارة؛ دول ناس معلمين؛ أنا بكلم الناس البطيخة زي حالاتي 😂😂. *️⃣ الحل هو انك تسخدم التقنية وتفكر مش هتمشي وراها؛ عارف أنا متأكد إن في ناس دلوقتي عاوزة تكتب وتقولي في اي فيديوهات شرح ليهم او اعلانية؛ صراحة أنا كنت جايب لينكات بس قررت محطهاش عشان أضرب لك مثالين 1️⃣ إنك لا إرادياً فكرت في سؤال فين اللينك؛ لسه هروح جوجل؛ فيميو؛ يوتيوب واكتب GPT 4o او Project Astra واشوف نتايج؛ أنا عاوز أخلص بسرعة... فهمت بقي قصدي بالكلام اللي فوق لما شرحت التيك واي. 2️⃣ عشان أنا ممكن أوجه تفكيرك؛ اه تخيل معايا إني بفضل GPT 4o عن جوجل فروحت جايب لك أفضل فيديوهات ل GPT وجبت واحد مختصر ل جوجل؛ بس خلاص حطيت الاثنين وانتا هتشوفهم؛ ايه هيحصل لمخك؟ هتبدأ تقول دا GPT أحسن من جوجل... أنا كده وجهت تفكيرك بدون ما أتكلم... فهمت الذكاء الصناعي هيلعب بمخك إزاي؛ هو مش هيكذب ولا يدلس خالص؛ هو هيديك النتايج اللي تحركك في اتجاه هو يختاره؛ وتبقي انتا بنفسك بتختار لكن بتختار الاختيار اللي هو رسمه ليك. انتا واثق فيا اني مش هخدعك؛ وبرضك واثق في الذكاء الصناعي وهتقول يعني هو مصلحته إيه انه يخدعني. صباح الفل بوست عالسخان كده؛ لا تخافو ولكن احذروا.

طبقاً لاتفاق مصر مع صندوق النقد فمفروض علي يوم 15 يونيو القادم (وقفة عرفات 16 يونيو) تكون المراجعة الثالثة للصندوق تمت... والمراجعة الرابعة 15 سبتمبر وبعد كده هتبقي 15 مارس و 15 سبتمبر *️⃣المراجعة تعني ان وفد الصندوق ييجي مصر يشوف مصر عملت ايه في الخطوات اللي وعدت بيها فمفروض في اجراءات اقتصادية تتم قبل أي زيارة للصندوق *️⃣اجراءات اقتصادية لا تعني سعر الصرف عشان الناس مجرد تقول اجراء اقتصادي تقولك يعني تعويم جديد 😁؛ لا يا عم مش تعويم جديد لكن مصر من 2022 وهي واعدة الصندوق ب 15 حاجة ونفذت منهم 7 بس فالصندوق بيبعت وفود كل مراجعة تشوف مدي تقدم مصر في تنفيذ الوعود. *️⃣ أيوا المصطلح كده تنفيذ الوعود لإن اللي بيحط برنامج الإصلاح هي الدولة؛ يعني مصر هي اللي بتوعد بسعر الصرف المرن وإلغاء دعم الطاقة وبيع الشركات وكده والصندوق بيصدق عالوعود دي ويقول ماشي آمين يا سيدي هعدي عليك كل 6 شهور أشوفك نفذت إيه من اللي وعدتني بيه. *️⃣أول مراجعة طبقاً لاتفاق 2022 كانت مارس 23 ولم تتم لان مصر منفذتش حاجة وثاني مراجعة سبتمبر 23 ولم تتم برضك... جه الصندوق قعد مع مصر مارس 23 (مفروض دا موعد المراجعة رقم 3) واتفق معانا يزود القرض... *️⃣ومصر عملت تعويم مارس والصندوق عمل مراجعة مارس و سبتمبر 23 وقالنا هاجي يونيو 24 اعمل مراجعة مارس 24 المتأخرة... وبعدين نرجع للجدول بتاعنا مراجعة مارس ومراجعة سبتمبر لغاية سبتمبر 26. *️⃣فمفروض تبدأ مصر يعني قبل كل مراجعة تعمل شوية تظبيط عشان الصندوق ييجي يقولنا تمام شطار خدوا دفعة (وهاتوا ضعفها اقساط قديمة 😂). *️⃣ال 15 نقطة المتفق عليهم بيكون محورهم حاجة من 2؛ الكاش فلو يعني إجراءات تزود الدخل أو تقليل الإنفاق؛ أو إجراءات هدفها الوقوف علي الوضع المالي الحقيقي للدولة عشان تعرف تخطط صح. *️⃣ايه النقاط التي لم تتم لسه؛ دا موضوع عاوز بوست مستقل لكن اختصاراً مفروض لسه ملف دعم البنزين (قوم ايه مصر تطلع لهم بدعم كهرباء دلوقتي 😂)... وفي أمور خاصة بالحكومة زي انها تنشر العقود الحكومية فوق 20 مليون جنية راحت لمين والمناقصة المقبولة كانت تفاصيلها ايه وأصحابها وتفاصيل عن العقود المرفوضة 😂 وكده... *️⃣ومطلوب من مراجع مالي نشر مراجعة Audit لموازنات ال 3 أعوام الماضية وتدقيق مالي فيها 😂. ومطلوب كمان نشر التفاصيل الضريبية لمؤسسات الدولة وأي جهات بتاخد إعفاءات وهنقل نصاً كوبي بيست (ويشمل ذلك شركات القطاع العام، وشركات قطاع الأعمال العام، الشركات المملوكة للجيش والهيئات الاقتصادية والمشاريع المشتركة والشراكات.) *️⃣مطلوب برضك الكشف عن ديون مصر الحقيقية؛ ولو مش فاهم الفارق فقرض المونوريل دا قرض علي هيئة الانفاق وليس عالحكومة يعني مش بيدخل في ديون مصر ال 168 مليار دولار المعلنه... وقرض المفاعل علي شركة الكهرباء مش وزارة الكهرباء؛ وقروض مصر للطيران دين عليها مش علي وزارة الطيران؛ وقروض شركة العاصمة الإدارية ديون عليها مش على وزارة الإسكان وهكذا... فمطلوب مصر تعلن ديون كل الدولة ومكتوب كده نصاً كوبي بيست (إجمالي الالتزامات والمدفوعات المستحقة من وإلى وزارة المالية لدى الهيئة العامة للبترول. الهيئة العامة للسلع التموينية، وهيئة المجتمعات العمرانية الجديدة، والهيئة القومية للبريد، والهيئة القومية لسكك حديد مصر، وبنك الاستثمار القومي، والبنك المركزي المصري، والشركة القابضة لكهرباء مصر، والشركة القابضة لمياه الشرب والصرف الصحي، ومصر للطيران.) *️⃣مطلوب برضك الإسراع في رقمنه القطاع العقاري (مشروع الرقم القومي للشقق والثروة العقارية ودا مشروع ضخم هكتب عنه لاحقاً بوست) والمشروع دا يهدف إلي تعظيم الضرائب العقارية).... وفي برضك طلبات خاصة بالموازنة وعناصرها وشكلها وكده...وفي تعديلات خاصة بالجمارك وسرعة الافراج الجمركي وتقليل عدد الأيام الخاصة بيه... *️⃣ دا ملخص ال 8 نقاط اللي لسه لم تنفذ من اتفاق 2022 والصندوق في كل زيارة هييجي يراجع ويشوف تقدم مصر في تنفيذهم ايه وطبعاً التأكد إن ما سبق تنفيذه زي التعويم لسه شغال عادي. *️⃣ فكده معاكم بقي ايه الإجراءات الاقتصادية اللي هتم لغاية نهاية 2026 بفرض التزام مصر يعني 😁😁 بس أهو واترك لكم تخيل ايه هيتنفذ وايه هنفض لتنفيذه *️⃣لكن بالبلدي ممكن نقول إن مفروض قبل 15 يونيو يتم زيادة البنزين ودا أسهل طلب في كل ما سبق ومتأخر؛ وممكن يتم الكشف عن تقرير المراجع المالي للموازنات السابقة. *️⃣طبعاً في تفاصيل تانية خاصة ب نصائح الصندوق في الاصلاح الاقتصادي والشفافية والتنافسية في الأسواق والكلام دا وإحنا مش بنحب حد ينصحنا فمش هنفذها... لكن ال 15 نقطة السابق ذكر 8 لسه منهم دا تعهد مصري فأمرنا لله بقي أخدوا وعد رجالة مننا 😔.

أضحك معايا عالحرامية عميل دخل اشتري من عندنا في دكان تك بس من تخزين أمازون منتج 1750 جنية وبعدين سرقه وعمل مرتجع وهمي لأمازون وبعدين الحرامي جوميا وعمل طلب من تاجر صديق ب 5000+ جنية وبعد ما وصله عمل مرتجع وحط انه جاله المنتج بتاعي 😂 ؛ يعني سرقني واستخدم السرقة دي في سرقة تاجر تاني في جوميا وظاهر عنده في جوميا اسمه العميل سامح في حلوان؛ ونفس الحكاية ظاهرة عندي 😂 دي التأثيرات الاجتماعية للوضع الاقتصادي ولسه اللصوص هينتشروا لإن الوضع هو بيئة خصبة لنمو الجريمة ( عدم وجود قانون + فقر + جهل + غياب الدين) = الجريمة تنتشر.

مش قادر نفسياً أكتب مقالات لكني برضك هسيبكم مع الابتسامة اليومية زي إمبارح بالظبط وطبعاً متوقع زي إمبارح ما ناس فهمت إني معترض علي تعلييم المصريين 😂😂 مش معترض علي التقدم التقني للمركزي فمتوقع البوست دا الناس دي تفهم إني معترض علي الاستثمار الأجنبي

قولت اسيبكم مع ابتسامة قبل النوم تكنولوجيا مالية + البنك المركزي المصري 😂😂😂 زي كده اكنك بتقول كورس جرافيكس علي كومبيوتر بمعالج i3 الجيل الاول 😂😂 تصبحون علي خير؛ كل يوم من دا ابتسامة قبل النوم

النهاردة الجمعية العامة للأمم المتحدة صوتت بإجماع 143 صوت للموافقة علي أن تصبح فلسطين دولة معترف بيها. *️⃣ فعلياً القرار دا تسلية يعني وديكور لإنه محتاج ليه تصويت مجلس القمل ب 9 أصوات +مجلس ياخد الفيتو... طبعاً دا مستحيل؛ وحتي لو تم فالإجابه هي ملح أقصد طز مش هتفرق كثير فعلياً لكن أهو خليهم بتسلوا. *️⃣ التصويت كان 143 نعم و 9 رفضوا و 25 امتنعوا عن التصويت. اللي صوتوا ب لا هم: أمريكا الارجنتين التشيك المجر ميكرونيسيا (جزر 100 الف نسمة) بابوا غينيا الجديدة بالاو (جزيرة 22 ألف نسمة) ناورو (جزيرة 14 الف نسمة) *️⃣ اللي امتنعوا عن التصويت 25 دولة هم: بريطانيا ألمانيا إيطاليا كندا أوكرانيا النمسا السويد هولندا فنلندا كرواتيا سويسرا ألبانيا (الوحيدة المسلمة) بلغاريا رومانيا جورجيا موناكو بارجواي (الوحيدة في أمريكا الجنوبية) جزر مارشال (جزيرة) شمال مقدونيا مولدوفا مالاوي (الوحيدة في افريقيا) فيجي (جزر مليون نسمة) فانواتو (جزر 300 الف نسمة) لاتفيا ليتوانيا *️⃣ البوست لا يعني اي حاجة واللي فاكر ان اللي اتغير بالسلاح هيتعدل بالقلل المتحدة يبقي عبيط لكن قولت أقولكم أسماء الدول عشان ملقتش كثير مهتم يوضحهم مين

إمبارح بلومبيرج الشرق نقلت عن مصدر في المركزي المصري إنه ناوي قبل نهاية 2024 يصدر منظومة الهوية الرقمية اللي تسمح للمصريين فتح حساب بنكي وعمل الإجراءات البنكية بدون الحاجة للذهاب للفرع ⬅️⬅️ مبروك العالم البنكي المصري هيدخل القرن ال 21 💪💪 ويخرج من القرن ال 20 والعصور الوسطي البنكية 🛖🛖... *️⃣ شكلي محتاج أرجع أجيب مقال التطور الطبيعي للزمن وأعيد صياغته بعد سنين وأنشره عشان من إمبارح بشوف تعليقات عالخبر بطريقة (مصر بتتقدم) وهنا في خلل مهول للتفرقة بين انك بتتقدم وبين انك (تبطل تتخلف) شتان الفارق... فكون إنك وقفت مشي للخلف فدا مش معناه انك بتمشي لقدام... في حاجة اسمها التطور الطبيعي للزمن لو مواكبتوش تبقي بتتخلف؛ لو واكبته يبقي عادي؛ سبقت التطور الطبيعي للزمن يبقي هنا إنتا بتتقدم.

الحقاً بالبوست السابق أدي تعاملات النهاردة "أسهم وسندات" في البورصة 1️⃣ المصريين حيازاتهم قلت 1.7 مليار جنية 2️⃣ العرب صافي حيازتهم قلت 819 مليون جنية 3️⃣ الأجانب حيازاتهم زادت 2.52 مليار جنية يعني لما تحول للدولار أبو 48 للتقريب: ⬅️ تلاقي العرب النهاردة خرجوا من البورصة ب 17 مليون دولار ⬅️ الاجانب زودوا حيازتهم ب 52 مليون دولار ⬅️⬅️ يعني صافي اليوم أكثر من 35 مليون دولار حصيلة اليوم إيجابي دخول إجانب من قبل ما اليوم يبدأ أهو قولت لكم اللي هيحصل...

رأس المال جبان *️⃣ من أشهر الأساسيات في الاقتصاد إن رأس المال جبان؛ محدش هيخاطر بفلوسه... في احتمال ان الدولار يزيد؛ احتمال بس 1% يبقي السعر يزيد؛ طيب الدولار بينزل بس في احتمال 1% بس انه يطلع تاني فبرضك يخاف ومينزلش الأسعار... ودا محلياً تعالوا بقي نشوف عالمياً ايه. *️⃣ لما بيحصل توترات كده بسبب ولاد ال... جيرانا الأوغاد وتلاقي جروبات فتكات عالفيسبوك تقولك ايوا هتولع ايران هتضرب حزب الله؛ اوعي بيستفزونا... كان ببساطة تقول لأي حد لا مش هيحصل لييه. *️⃣ افتح أي ابلكيشين مال عالمي ولا حتي جوجل شوف سعر البترول ايه الاخبار... خد بالك سعر البترول دا هو سعر التسليمات آجل 3 شهور (في عقود ابعد عادي موجودة) لكن الاسعار دي بتاعة يوليو واغسطس... فمتقوليش جروب الفيسبوك شايف ان في لبش والمليارديرات اللي بيديروا اقتصاديات الكوكب وبيعملوا بيزنس من البترول مشافوش دا وبيشتروا البترول عادي بنفس الاسعار. *️⃣ أوعي ياض هيدخلوا رفح وتولع؛ بسيطة هاتلي يا ابني كده سعر البترول آخر اسبوع ايه حصل له... ايه دا خام برنت نزل من 88 ل 82 دولار 🤔🤔... طيب خلاص توتر عالمي يبقي الذهب اكيد هيطير؛ لا عادي برضك نفس الحركة... يبقي محدش مقلق من حاجة. *️⃣ نفس الحكاية في مصر؛ يالهوي ربنا يسترها علينا؛ دول بيستفزونا وعاوزين يجرونا في حرب 😂😂 وكلام مضحك كثير... طيب عندي سؤال ليك.. هما مش عندهم علاقات ماسكة الكوكب وكلنا عارفين نفوذهم وبان في الحرب صح؟ *️⃣ طيب إزاي سمحوا لصندوق النقد يوقع معاك اتفاقية جديدة؟ ما كان بتلكك انك مش بتنفذ البنوك ويسيبك بتقع سقوط حر... طيب بلاش الصندوق؛ ال 20+ مليار دولار من ساعة التعويم اللي رجال الاعمال اجانب و المؤسسات الاجنبية جت باعتهم للبنوك المصرية من التعويم واخدوا جنية مصري سلفوه للحكومة... بكرر دول باعوا أكثر من 20 مليار دولار واخدوا جنية مصري سلفوه للحكومة... الاجانب شايفين إن الجنية دا وقته مش الدولار في مصر. فهل حد هيثق في عملة دولة علي وش حرب 🤔🤔🤔 *️⃣ هتقولي ان الاجانب دول عبط ومش شايفين احتمالية الحرب اللي جروب حوكشة عالفيسبوك شايفها؟ *️⃣ يعني عاوز تقولي يا بن سامي إن دخوا رفح لو تم مش هيأثر علي مصر؟ مين قال كده؛ طبعاً هيأثر علينا بل ممكن يبقي حافز بسرعة للمقرضين ييجوا... لإن تطورات في رفح تعني لبش أكبر يبقي مصر هييجي لها مساعدات أكبر يبقي عملتها هتستقر بسبب المساعدات... فاللبش زاد مصر هييجي لها مساعدات وهتاخد فلوس؛ طيب الحرب خلصت؟ برضك مصر هييجي لها مليارات الدولارات ك عقود اعادة إعمار؛ هما مش هيثقوا في حد يعمل اعادة اعمار غيرنا؛ ومستحيل يدوا للفلسطينيين اسمنت وحديد وطوب واسلاك كهرباء ورخام وبلاط ووو لانهم هيخافوا يتسرب للمقاومة... فمصر هتاخد عقود مليارية. *️⃣ فدا يفسر لك إزاي وليه دخل 20 مليار دولار هوت ماني لبلد مفروض علي حدودها (حرب) لانهم شايفين منافع الحرب دي لمصر؛ ومعندهمش شك 1% ان مصر ممكن تتورط في الحرب دي. *️⃣ نفس الكلام دا تاخده تحطه علي توترات مع إيران ؛ بص علي بورصات الخليج (عندهم بورصات بجد مش ديكور البورصة عندنا) لو في توترات يبقي هتلاقي مذابح في البورصة الخليجية. ⬅️⬅️ رقم علي جنب؛ يومياً ما بين 50 الي 200 مليون دولار الاجانب بيبيعوهم للبنوك في مصر وياخدوا جنية مصري يقرضوه للحكومة او يشتروا بيه سندات قديمة من البورصة وبكرر عشرات الملايين دي يومياً يومياً 😁 وييجي علي علوكا يقولك الدولارر هيقفز؛ صح المؤسسات الاجنبية عبط بيبيعوا دولارهم والمصري ذكي محتفظ بيه 😂😂. دا عشان الطفل المصري اذكي طفل في العالم 😂. ⬅️⬅️ الخلاصة *️⃣ مفيش لبش لينا؛ مش هنتجر لحرب ولا حد بيستفزنا أصلا غير في خيالنا... مصر دولة كبيرة واسرائيل متقدرش تاخد قرار منفرد إنها تحاربنا متقدرش؛ نفس الفكرة إيران؛ وكل العالم عارف كده؛ فلا الحرب دي هتوسع وتشمل مصر ولا ايران ولا حد حاطط احتمالية للموضوع دا في الكوكب الأهطل بتاعنا فمتقلش... *️⃣ اقلق بس لما كل يوم تلاقي البورصة (السندات) في خروج عنيف "يومي" للأجانب؛ وقتها تعرف انهم شايفين حاجة قدام إحنا مش شايفنها عالفيسبوك بتاعنا. في انتظار بقي وصول الدفعة الثانية بتاعة رأس الحكومة؛ مفروض دا وقتها بقي 🙂