Kloop кыргызча

Кемпир-Абад иши: Сотто Дүйшөбаевдин абалы начарлап, адвокат аны үй камагына чыгарууну суранды 14-майда сот учурунда Кемпир-Абад ишинин фигуранты Кеңешбек Дүйшөбаевдин абалы начарлап, залдан аны замбилге салып чыгарып кетишти. Анын тууганынын айтымында, Дүйшөбаевдин артериалдык кан басымы жана канындагы сахардын көрсөткүчү жогору болуп атканына карабастан сот турумдары өтүп жатат.

«Азыр булар ачык эле кыйноого өтүштү. Муну кандай дейбиз? Адамдын кан басымы менен сахары жогору болуп атат, кечээ сотко колтуктап келип алып келишти»,

— деди тууганы. Дүйшөбаевдин адвокаты Акын Авазбеков соттон анын баш коргоо чарасын өзгөртүүнү суранганын билдирди. Анын айтымында, 15-майда Дүйшөбаев процессте боло албайт, себеби абалы начар болгондуктан ТИЗОдон алып келе алышкан жок. Видео: ПолитКлиника

Жапалакта 40ка жакын тургун жол коопсуздугун талап кылып, нааразычылык акциясына чыкты 15-майда тургундар Ош — Ноокат — Баткен жолунда окуучуларды унаа коюп кеткен окуяларга тынчсыздануусун билдиришти. Бул тууралуу «Азаттык» басылмасы жазды. Жергиликтүүлөр 13-майда мектепке бара жаткан алты жаштагы баланы оор жүк ташуучу унаа коюп кеткенин белгилешти. Алардын айтымында, ушуну менен жыл башынан бери аталган жолдо төрт баланы унаа коюп кеткен. Буга чейин тургундар шаардык мэрияга жол чырак орнотуу боюнча бир нече жолу кайрылып, бирок маселе чечилбегенине даттанышты. Ошондой эле алар жергиликтүү бийлик өкүлдөрүн эл менен жолугушуусун талап кылышты.   ИИМдин маалыматына ылайык, 2024-жылдын 1-январынан тарта 17-мартына чейин Кыргызстанда 1 173 жол кырсыгы катталган. Анда жалпы 82 адам каза болуп, дагы 1 673 киши жаракат алган. #кабарлар

Билим берүү боюнча эксперт Ари Покканын китебинин бет ачары Бишкекте автордун катышуусунда өтөт Билим берүү тармагындагы дүйнөлүк алдыңкы эксперт, финляндиялык Ари Покка Кыргызстанга «Мыкты мектеп. Мектепти финдердей башкаралы» китебинин бет ачарына катышуу үчүн келди. Бул тууралуу «Клоопко» Bugupress басма үйүнөн билдиришти. Маалыматка ылайык, иш-чара басмай үй жана Билим берүү министрлиги тарабынан 16-май саат 10:00дө Бишкек шаарындагы «Орион» мейманканасында өткөрүлөт. Кирүү акысыз, катышуу үчүн билдирмени толтуруу керек. «Ари Покка 14-17-май күндөрү Бишкекте болуп, Кыргызстандын билим берүү министри жана бул тармактагы адистер менен жолугушат. Жергиликтүү мугалимдер, мектеп директорлору үчүн тренингдерди өткөрөт», — деп айтылат билдирүүдө. «Мыкты мектеп. Мектепти финдердей башкаралы» китебинде — Финляндиянын мектептериндеги натыйжалуу жана адилеттүү система тууралуу айтылат. Анда автор өзүнүн 20 жылдык тажрыйбасы менен бөлүшүп, мектепти ийгиликтүү уюштуруп, башкаруу сырларын айтып берет. Ари Покка — өнүккөн өлкөлөрдүн билим берүү системасын реформалоо программаларынын жооптуусу жана мүчөсү, Эл аралык мектеп директорлорунун биримдигин жетекчиси. 2023-жылы Bugupress басма үйү Америкалык экономист Дарон Ажемоглу жана Жеймс Алан Робинсондун Why Nations Fail китебин «Эмне үчүн кээ бир өлкөлөр өнүкпөйт?» деген аталыш менен кыргызча басып чыгарып, анын бет ачары китептин авторлорунун биринин катышуусунда өткөн. #кабарлар

Чудинов «Курулуп жаткан электр станциялар дирекциясын» көпкө жетектеген жок – Жапаров бул буйрукту жокко чыгарды Бир нече саат мурун мурдагы премьер-министр Игорь Чудинов «Курулуп жаткан электр станциялар дирекциясы» ишканасын жетектей турганын кабарлаганбыз. Бирок Садыр Жапаров бул буйрукту жокко чыгарып, энергетика министри Таалайбек Ибраевге бул чечимди президентке билдирбегени үчүн сөгүш жарыялады. Энергетика министринин кезектеги буйругу менен ишкананын башкы адиси Равшанбек Касымов «Курулуп жаткан электр станциялар дирекциясынын» башкы директорунун милдетин аткаруучу болуп дайындалды. #кабарлар

‼️Жазуучу Олжобай Шакир беш жылга эркинен ажыратылды 14-майда Чүй облусунун Аламүдүн райондук соту жазуучу, публицист Олжобай Шакирди «массалык баш аламандыкка чакырган» деген айып менен беш жылга эркинен ажыратты. Олжобай Шакир 2023-жылы август айында кармалып, андан бери ТИЗОдо отурат. Анда УКМКдан Шакир социалдык тармактардагы баракчаларында «бийлик өкүлдөрүнүн мыйзамдуу талаптарына активдүү баш ийбөөгө жана массалык баш аламандыкка чакырыктарды камтыган чагымчыл мүнөздөгү билдирүүлөрдү» жарыялаганын билдирген. 📌Биздин телеграм-каналга катталыңыз: https://t.me/kloopkyrgyz #кабарлар

Президент Жапаров аялдарга жана балдарга карата зомбулукка ыкчам жооп кайтарууну тапшырды Өлкө башчынын басма сөз кызматы билдиргендей, президент Жапаров 13-май күнү акыйкатчы Жамиля Жаманбаеваны кабыл алды. Жолугуушунун жүрүшүндө өлкө башчысы аялдарга жана балдарга карата зомбулук фактыларына ыкчам жооп кайтаруунун маанилүүлүгүн белгиледи. Ошондой эле, президент Жапаров Акыйкатчы институтунун алдына коюлган милдеттерди аткарууда ишмердүүлүгүн күчөтүүгө ар тараптуу колдоо көрсөтүүгө даяр экенин билдирип, жарандардын укуктарын жана эркиндиктерин коргоо боюнча алдыңкы тажрыйбаларды алмашууда эл аралык кызматташтыкты чыңдоонун маанилүүлүгүн белгиледи. Аны менен катар жолугушууда сот адилеттигине жетүүнү жакшыртуу, жарандардын юридикалык сабаттуулугун жана маалымдуулугун жогорулатуу, ошондой эле басмырлоого жана адам укуктарын бузууга каршы күрөшүү боюнча чараларды күчөтүү маселелери талкууланды. #кабарлар

⚡Олжобай Шакирди сотко алып келишти Бүгүн Аламүдүн райондук соту массалык башаламандыкка чакыруу иши боюнча ага өкүм чыгышы мүмкүн. Мурдараак мамлекеттик айыптоочулар жазуучуну жети жылга кесүүнү суранышкан. Видео: Kloop

⚡️Милиция өгөй атасы тарабынан сабалган үч жашар кыз мурда да кордук көргөнүн билдирди Бул тууралуу 14-майда Ички иштер министринин орун басары Эркебек Аширходжаев Жогорку Кеңештин тармактык комитетинин жыйынында билдирди.

«2-3 ай мурун ал кыздын буту сынып, ооруканага жаткырылган экен. Анда “кулап кетип буту сынды” деген маалымат менен жаткызышыптыр. Териштиргенде анда дагы кыздын бутун өгөй атасы сындарганы маалым болду»,

— деди Ашираходжаев. ИИМдин башчысынын орун басары окуя боюнча кыздын энесин дагы жоопко тартуу керектигин, бирок ал беш айлык боюнда бар экенине байланыштуу бошотулганын билдирди. Ал эми Саламаттык сактоо министрилигин өкүлү кызды 8-майда чоң энеси үйүнө алып чыгып кеткенин, учурда дарыгерлердин көзөмөлүндө экенин билдирди. Кызга мээнин чайкалышы, оң жана сол тарабынан кабырганын сыныгы, сандын сыныгы диагноздору коюлган. Чүй облусунун айылдарынын биринде үч жашар кыздын сабалышы тууралуу майдын башында белгилүү болгон. ЖМКлардын маалыматына караганда, сабалгандан кийин өгөй атасы кызды итканага түнөөгө мажбурлаган. Окуя боюнча «Кыйноо» беренеси боюнча кылмыш иши козголду. Азыр кыз чоң энеси менен жашайт. #кабарлар

Мурдагы министр Чудинов «Курулуп жаткан электр станциялардын» директору болуп дайындалды Мурдагы премьер-министр Игорь Чудинов «Курулуп жаткан электр станциялар» дирекциясынын башкы директору болуп дайындалды. Бул тууралуу Энергетика министрлигине таянып, «Азаттык» жазды. «Курулуп жаткан электр станциялар» дирекциясы 2023-жылы Минкаб тарабынан Улуттук энерго холдингдин ордуна түзүлгөн. 2024-жылдын 28-февралында «Камбар-Ата 1» ГЭСи дирекциянын башкаруусуна өткөрүлгөн. Чудинов 2007-2009-жылдары, Курманбек Бакиевдин тушунда премьер-министр болгон. 2010-жылдагы апрель революциясынан кийин кызмат абалынан кыянат пайдаланууга шектелип кармалган. 2015-жылы Чудинов «Бир Бол» партиясынан ЖК депутат болуп келген. Бирок үч жылдан кийин жерлерди мыйзамсыз транформациялоо боюнча кылмыш ишине байланыштуу мандатынан ажыратылган. #кабарлар

Сузактагы кырсык: Окуяны иликтеген комиссиянын иши аягына чыкты Жалал-Абад облусунун Сузак районунда 2-майда болгон окуянын чоо-жайын иликтөө боюнча ведомстволор аралык комиссиянын иши жыйынтыкталды. Анда Катмы жайлоосунда «Манас» айтуу учурунда жүк ташуучу унаа ондогон балдарды сүзүп кетип, натыйжада 30га жакын мектеп окуучусу жабыркаган. Комиссиянын корутундусу: 🟩уюштуруучулар тарабынан катышуучулардын коопсуздугу камсыздалбаган; 🟩облустук жана райондук ички иштер органдарынын жетекчилери өздөрүнүн милдеттерин аткарышкан эмес; 🟩билим берүү мекемелеринин жооптуу адамдары райондук жана облустук администрациялар менен өз ара аракеттенүүнү жана маалымат алмашууну талаптагыдай жүргүзбөгөн; 🟩иш-чараны уюштуруу 1-майдан 5-майга чейинки расмий эс алуу күндөрүнө туура келгени үчүн татаалдашкан. Ага ылайык, 21 кызматкер тартиптик жоопкерчиликке тартылып, алтоону кызматтан бошотуу сунушталды. #кабарлар