Gurage Zone Government Communication Affairs

በጌታ ወረዳ ከ50 ሚሊዮን ብር በላይ ወጪ የተገነባው የፉቻሬ የንጹህ መጠጥ ውሃ ፕሮጀክት ተመርቆ አገልግሎት መስጠት ጀመረ። ሕዳር 3/2019 ዓ.ም (ወልቂጤ) በጉራጌ ዞን ጌታ ወረዳ በመንግስት፣ በኢትዮጵያ ካቶሊካዊት ቤተክርስቲያን የእምድብር ሀገረ ስብከት እና በማህበረሰቡ ተሳትፎ ከ50 ሚሊዮን ብር በላይ ወጪ የተገነባው የፉቻሬ 44 የንጹህ መጠጥ ውሃ ፕሮጀክት ተመርቆ ለአገልግሎት ክፍት ተደረገ። ፕሮጀክቱ ከ8 ሺህ በላይ የሚሆኑ የአካባቢውን ነዋሪዎች ተጠቃሚ የሚያደርግ ሲሆን፣ በተለይም የእናቶችን እና የተማሪዎችን እንግልት እንደሚያቃልል ተገልጻል። በምርቃት ስነ-ስርዓቱ ላይ የተገኙት የማዕከላዊ ኢትዮጵያ ክልል ውሃ፣ ማዕድንና ኢነርጂ ልማት ቢሮ ምክትል ሀላፊ እና የመጠጥ ውሃ አቅርቦትና ሳንቴሽን ዘርፍ ሀላፊ ኢንጅነር ካሳዬ ተክሌ እንደገለጹት፤ በክልሉ የመጠጥ ውሃ ሽፋን አነስተኛ በመሆኑ ችግሩን ለመቅረፍ ህብረተሰቡ፣ አጋር ድርጅቶች እና መንግስት በመቀናጀት እየሰሩ ነው። በመሰረተ ልማት ዝርጋታ ህብረተሰቡን ተጠቃሚ ከሚያደርጉ አጋር ድርጅቶች አንዷ በኢትዮጵያ ካቶሊካዊት ቤተክርስቲያን የእምድብር ሀገረ ስብከት ተጠቃሽ ስትሆን በትምህርት፣ በጤና እና በንጹህ መጠጥ ውሃ አቅርቦት ዘርፍ ማህበረሰቡን ተጠቃሚ እያደረገች መሆኑን ገልጸዋል። የጉራጌ ዞን ምክትል አስተዳዳሪ እና የግብርና መምሪያ ኃላፊ አቶ አበራ ወንድሙ በበኩላቸው፤ ውሃ ለሰው ልጅ ህይወት መሰረት ከመሆኑ ባሻገር ማህበራዊ፣ ኢኮኖሚያዊ፣ ፖለቲካዊ እና አካባቢያዊ ጠቀሜታ ያለው በመሆኑ ልዩ ትኩረት ሊሰጠው እንደሚገባ አስገንዝበዋል። በመሆኑም የሕይወት መሰረት ለሆነው ውሃ ልዩ ትኩረት በመስጠት እና በዘርፉ የሚስተዋሉ ተግዳሮቶችን በመቅረፍ፣ ሁሉም የህብረተሰብ ክፍል ንፁህ የመጠጥ ውሃ ተጠቃሚ እንዲሆን የሚከናወኑ መልካም ተግባራትን አጠናክሮ ማስቀጠል የሁሉም ባለድርሻ አካላት ኃላፊነት መሆኑን አስገንዝበዋል። በዞኑ በርካታ የገጸ እና የከርሰ-ምድር የውሃ ሀብት የሚገኝ ሲሆን ይህንን ጸጋ ለልማት በማዋል ህዝቡን ተጠቃሚ ለማድረግ ከአጋሮችና ከህብረተሰቡ እንደዚሁም ከባለሀብቱ ጋር በመቀናጀት ሰፊ ስራ እየተሰራ ይገኛሉ ብለዋል። በመሆኑም ከመንግስት ጥረት ጎን ለጎን የእምድብር ካቶሊካዊት ቤተክርስቲያን፣ የጉራጌ ልማትና ባህል ማህበር፣ ባለሀብቶች፣ መንግስታዊ ያልሆኑ ድርጅቶች፣ የልማት አጋሮች እንዲሁም መላው ህብረተሰብ በቅንጅት በመሳተፍ አበረታች ውጤቶችን እያስመዘገቡ እንደሚገኙ ገልጸዋል። በተለይም በኢትዮጵያ ካቶሊካዊት ቤተክርስቲያን የእምድብር ሀገረ ስብከት ከመንፈሳዊ አስተምህሮቷ ባሻገር በዞኑ ማህበረሰብ ዘንድ በስፋት የሚወሱና ለታሪክ የሚተላለፉ የንፁህ መጠጥ ውሃ ግንባታዎችን በማከናወን ከፍተኛ አገልግሎት እየሰጠች በመሆኗን ኃላፊው ምስጋና አቅርበዋል። በስነ-ስርዓቱ ላይ የተገኙት የኢትዮጵያ ካቶሊካዊት ቤተክርስቲያን የእምድብር ሀገረ ስብከት ሊቀ ጳጳስ አቡነ ሉቃስ ፍቅሬ ፤ ህብረትና አንድነት ካለ የህዝብን ህይወት መለወጥ ይቻላል። ቤተክርስቲያኒቷ በሰላም እሴት ግንባታ እና በማህበረሰባዊ እድገት ስራዎች ላይ ሀይማኖትና ብሄር ሳትለይ በመላ ሀገሪቱ በስፋት እንደምትሰራ አብራርተዋል። የአካባቢው ነዋሪዎች ቀደም ሲል እናቶችና ተማሪዎች ውሃ ለመቅዳት ረጅም መንገድ በመጓዝ ይደርስባቸው የነበረው እንግልት አሁን በአቅራቢያቸው ንጹህ መጠጥ ውሃ በማግኘታቸው እንደቀረፈላቸው ገልጸው፣ ለመንግስትና ለእምድብር ሀገረ ስብከት ያላቸውን ደስታና ምስጋና ገልጸዋል። የጌታ ወረዳ ዋና አስተዳዳሪ አቶ ዘውዱ ዘፕሬ የወረዳው የመጠጥ ውሃ ሽፋን እጅግ ዝቅተኛ እንደነበር አስታውሰው፣ የፉቻሬ የንጹህ መጠጥ ውሃ ፕሮጀክት እውን በመሆኑ ሽፈሰኑ ከፍ እንደሚያደርገው ገልፀዋል።

የአገልግሎት አሰጣጥን በማዘመን አመራሩ ህዝብ የሚማረርባቸው እና የሚንገላታባቸውን ጉዳዬች ማስቀረት አለብን። ርዕሰ መስተዳድር የትምጌታ አስራት (ዶ/ር)

በእዣ ወረዳ የሚከናወኑ የግብርና ልማት ሥራዎችን በተግባር ለመመልከትና የልማት እንቅስቃሴዎችን በመስክ ለመከታተል የወረዳው የግብርና ሥራዎች የመስክ ጉብኝት እየተካሄደ ይገኛል። ‎ ‎ህዳር 3/2019 ዓ.ም (ወልቂጤ) ‎ ‎ጉብኝቱ በእዣ ወረዳ ግብርና ጽህፈት ቤት አስተባባሪነት በወረዳው የሚከናወኑ የግብርና ልማት ተግባራትን፣ የአርሶ አደሩን የልማት ተሳትፎና በመስክ የተጀመሩ የልማት ሥራዎችን በቀጥታ ለመመልከት ያለመ ነው። ‎ ‎ ‎ጉብኝቱም የግብርና ልማት ሥራዎችን በተግባር በመመልከት ልምድ ለመቀመርና ለቀጣይ የልማት ሥራዎች ጠቃሚ አቅጣጫዎችን ለማመላከት መሆኑን ተመላክቷል። ‎ ‎በጉብኝቱም የወረዳው አመራሮች፣ የወረዳና ቀበሌ ባለሙያዎች፣ የቀበሌ ሊቀመናብርትና ሌሎችም ባለድርሻ አካላት ተሳትፈዋል። ‎ ‎መረጃው የወረዳው የመ/ኮ/ጉ/ጽ/ቤት ነው።

በጉራጌ ዞን ጌታ ወረዳ ፉቻሬ 44 ቀበሌ ከ50 ሚሊየን ብር በላይ ወጪ የተገነባው የንጹህ መጠጥ ውሃ ፕሮጀክት እየተመረቀ ነው። ህዳር 3/2019 ዓ.ም (ወልቂጤ) በጉራጌ ዞን ጌታ ወረዳ ፉቻሬ 44 ቀበሌ በመንግስት፣ በኢትዮጵያ ካቶሊካዊት ቤተክርስቲያን እምድብር ሀገረ ስብከትና በማህበረሰቡ ትብብር ከ50 ሚሊዮን ብር በላይ ወጪ የተገነባው የንፁህ መጠጥ ውሃ ፕሮጀክት ከ8ሺህ በላይ የህብረተሰብ ክፍሎች ተጠቃሚ እንደሚያደርግ ተጠቁሟል። ንጹህ የመጠጥ ውሃ ግንባታው 10 ቦኖዎች ተዘርግቶለት ለቀበሌውና በዙሪያው ላሉ የማህበረሰብ ክፍሎች ተደራሽ እንደሚሆንም ተመላክቷል። የፍቻሬ የንጹህ መጠጥ ውሃ ግንባታ ፕሮጀክት በሰከንድ ከ7 ሊትር በላይ ውሃ ያመርታል። 90 ኪሎ ዋት ማመንጨት የሚችል ሶላር ሲስተም የተገጠመለት ይህ የንጹህ መጠጥ ውሃ ፕሮጀክት ለማህበረሰቡ ተደራሽ እንደሚደረግም ተገልጿል። በምርቃቱ የጉራጌ ዞን አስተዳደር ምክትል አስተዳዳሪና የግብርና መምሪያ ሀላፊ አቶ አበራ ወንድሙ፣ የማዕከላዊ ኢትዮጵያ ክልል ውሃ ማዕድንና ኤነርጂ ልማት ቢሮ ምክትል ኃላፊና የመጠጥ ውሃ አቅርቦት ሳንቴሽን ዘርፍ ኃላፊ ኢንጅነር ካሳዬ ተክሌ፣ የጉራጌ ዞን ብልጽግና ፓርቲ የፖለቲካና አቅም ግንባታ ዘርፍ ሀላፊና ረዳት የመንግስት ተጠሪ አቶ ደሳለኝ ፈቀደ፣ የዞንና የወረዳው ከፍተኛ የስራ ሃላፊዎች፣ በጉራጌ ዞን በኢትዮጵያ ካቶሊካዊት ቤተክርስቲያን የእምድብር ሀገረ ስብከት ሊቀ ጳጳስ አቡነ ሉቃስ ፍቅሬ፣ ሌሎች የሀገረ ስብከቱ የስራ ሀላፊዎችና የአካባቢው ማህበረሰብ ተገኝተዋል።

በጉራጌ ዞን በእኖር ኤነር መገር ወረዳ ወቅታዊ የቡና ምርት አሰባሰብ በምስል!

በምሁር አክሊል ወረዳ ወጣቶች ከከተማ ወደ ቀያቸው ተመልሰው በግብርና በመስራታቸው ለምርታማነት እድገት የድርሻቸው እየተወጡ መሆኑ ተገለጸ ህዳር 3/2019(ወልቂጤ) በምሁር አክሊል ወረዳ በመኸር ወቅት በወጣቶች የለሙ ማሳዎች በተለያዩ የስራ ኃላፊዎች ተጎብኝቷል። ወጣት አለማየሁ ባዘዘው፣ወጣት ታደሰ ናማጋ እና ወጣት ከድር ኑር በምሁር አክሊል ወረዳ በኤቸነ ቀበሌ በግብርና እርሻ ልማት ስራ የተሰማሩ ወጣቶች ናቸው። ከዚህ በፊት ለግብርና ስራ ምንም አይነት ትኩረት ባለመስጠትና የአካባቢን ጸጋ ባለማወቅ ከተማ ሂደው በችግር ይኖሩ እንደነበር አስታውሰው አሁን ግን በርካታ ወጣቶች ወደ ቀያቸው ተመልሰው ግብርና መስራት መጀመራቸው ተናግረዋል። በአካባቢን ያለ ጸጋ በአግባቡ ማወቅ እና መስራት ለስኬት ያበቃል ያሉት ወጣቶቹ በወረዳው ደግሞ በተለይ በግብርና ዘርፉ ብዙ መስራት እንደሚቻል አብራርተዋል። አሁን ግን ከከተማ ወደ ገጠር በመመለስ እስካሁን ምንም ያልታረሱ አዳዲስ መሬቶች በማረስ ስንዴ አምርተዋል። በቀጣይ በስንዴ እና በገብስ የጀመሩት ስራ በጤፍ፣ በአትክልትና ፍራፍሬ፣በመስኖ፣በድለባና በንብ ማነብ ዘርፍ ተሰማርተው እንደሚሰሩ ገልጸዋል። ለዚህ መንግስት ግብአት፣መሬት እና ብደር በመስጠት ላደረገላቸው ድጋፍ አመስግነው በቀጣይ ተጠናክሮ እንዲቀጥልላቸው ጠይቀዋል። የጉራጌ ዞን ምክትል አስተዳዳሪና የግብርና መምሪያ ኃላፊ አቶ አበራ ወንድሙ ወጣቶች በግብርና ስራ ተሰማርተው በመስራት ኢኮኖሚያዊ ተጠቃሚ እየሆኑ ይገኛል። ለአብነትም በምሁር አክሊል ወረዳ በአንድ ቀበሌ ብቻ በ16 ሄክታር መሬት እስከ 35 የሚሆኑ ወጣቶች ተደራጅተው መስራታቸው ለወጣቶች የስራ እድል የሚፈጥርና ምርታማነትን እንዲጨምር የሚያደርግ መሆኑን ተናግረዋል። በምሁር አክሊል ወረዳ ሰፋፊ ያልታረሱ መሬቶች በወጣቶች መታረሳቸው እጅግ የሚደነቅ ተግባር ነው ያሉት አቶ አበራ ይህ ደግሞ የዞናችን ግብርና ወደ ተሻለ ደረጃ ከፍ የሚያደርግ ነው። የወረዳው ግብርና ጽ/ቤት ኃላፊ አቶ መኑር ጀማል እንደገለፁት በወረዳው የሚገኙ የወል፣ የእምነትና የመንግስት ተቋማት ያላቸውን መሬት በማረስ ምርትና ምርታማነትን ማሳደግ እንዳለባቸው እና ወረዳችን ላይ ያለውን የተፈጥሮ ጸጋ በመለየት ወደ ተግባር ተገብቶ ተሰርቷል። በበጀት ዓመቱ ለዘመናት ሳይታረሡ የነበሩ መሬቶችን በመለየት በተለያዩ ሰብሎች መሸፈናቸው የገለጹት አቶ መኑር ለወጣቶቹ የግብአት፣የብድር እና የመሬት አቅርቦት መመቻቸቱ አስገንዝበዋል። ማህበረሰቡ ያለውን መሬት በተገቢው ተጠቅሞ የራሱ የኑሮ ደረጃ በማሻሻልና ለገበያም በማቅረብ ተወዳዳሪ ሊሆን ይገባል ብለው ለውጤታማነቱ መንግስት አስፈላጊውን ድጋፍ እንደሚያደርግ አመላክተዋል።

አርሶ አደሩ ያለምንም መዘናጋት የራሱና የቤተሰቡን ጉልበት በተገቢው ተጠቅሞ የደረሱ ሰብሎችን ፈጥኖ በመሰብሰብ የምርት ብክነት እንዳይከሰት መረባረብ እንዳለበት ተገለጸ። ‎ ‎ህዳር 2/2019 ዓ.ም(ወልቂጤ)‎በጉራጌ ዞን በአበሽጌ ወረዳ ወቅታዊ የግብርና እንቅስቃሴዎችን፣ የጤፍና የበቆሎ ምርት አሰባሰብን እንዲሁም በጸደይ ወቅት የሚከናወኑ ልማቶችን አስመልክቶ የወረዳው ግብርና ጽ/ቤት ኃላፊዎችና ባለሙያዎች በየደረጃው ከሚገኙ አርሶ አደሮች ጋር በመቀናጀት ሰፊ የክትትልና የምልከታ ሥራ አካሂደዋል። ‎ ‎በምልከታው ወቅት የወረዳው ግብርና ጽ/ቤት ኃላፊ አቶ አብዱልከሪም ናስር እንደተናገሩት፣ በአሁኑ ወቅት የደረሱ ሰብሎችን ከብክነት ተከላክሎ በአጭር ጊዜ ውስጥ መሰብሰብ ቀዳሚውና ዋናው ተግባር ነው። በተለይም በአሁኑ ወቅት ያልተጠበቀ ዝናብ እየጣለ በመሆኑ ሰብሉ እንዳይበላሽና ብክነት እንዳይከሰት አርሶ አደሩ ያለምንም መዘናጋት የራሱንና የቤተሰቡን ጉልበት አቀናጅቶ በመጠቀም የደረሱ ሰብሎችን ከማሳ ፈጥኖ መሰብሰብ እንዳለበት አሳስበዋል። የምርትና አሰባሰቡን ውጤታማ ለማድረግ ከምንጊዜውም በላይ ሕዝቡን በየደረጃው ማስተባበር እንደሚገባ የጠቆሙት ኃላፊው፣ በየደረጃው የሚገኙ የግብርና ባለሙያዎች ከአርሶ አደሩ ማሳ ሳይርቁ የቅርብ ሙያዊ ድጋፍና ክትትል እንዲያደርጉ አሳስበዋል። ‎ ‎በሌላ በኩል የእርሻ ዘርፍ ኃላፊው አቶ ነብዩ በበኩላቸው፣ በወረዳው የበቆሎ ምርት አሰባሰብ ሥራ በጥሩ ሁኔታ እየተከናወነ እንደሚገኝና በተሰበሰቡ ማሳዎች ላይ በጸደይ ወቅት የሽምብራ እርሻ ሽፋን ሥራ ተጀምሮ በማከናወን ላይ እንደሚገኝ ገልጸዋል። አክለውም በተለይ ውሃ ገብ መሬቶችና የመስኖ አቅሞች ወደ መስኖ ልማትና ወደ ጸደይ ሽምብራ ሰብል አግሮኖሚ እየተቀየሩና እየተገቡ እንደሚገኙ ገልጸው፣ ይህ የሽምብራ ልማት እስከ ሕዳር ወር መጨረሻ ድረስ ተጠናክሮ እንደሚቀጥልና እንደ በቆሎው ሁሉ ሰፊ መሬት በሽምብራ የሚሸፈን መሆኑን ጠቁመዋል። በተጨማሪም በኩታ ገጠም የለማው የጤፍ ማሳ በአሁኑ ወቅት በጣም ተስፋ ሰጪ በሆነ የማሳ ቁመና ላይ እንደሚገኝ ጠቅሰው፣ ይህንን አመርቂ ምርት ከዝናብ ጉዳት በመጠበቅ ያለ ምንም ብክነት በአግባቡ አጭዶ ለመሰብሰብ ልዩ ትኩረት ተሰጥቶ እየተሠራ መሆኑን አስረድተዋል። ‎ በ2018/19 ግብርናው በሰው ሰራሽና በተፈጥሮ በብዙ መልኩ የተፈተነ መሆኑን ገልፀው በዚህ ተግዳሮት አልፎ የመጣው ግብርና ምርቱ እንዳይባክን መሠራት አለበት ብለዋል። ዘገባው የአበሽጌ ወረዳ የመንግስት ኮሚኒኬሽን ጽ/ቤት ነው።

በጉራጌ ዞን ያሉ የተፈጥሮ ጸጋዎችን በመጠቀምና አዳዲስ መሬቶች በማልማት ግብርናው ለአርሶ አደሮችና ለወጣቶች የኢኮኖሚ ምንጭ ሆኗል፦አቶ አበራ ወንድሙ ህዳር 1/2019 ዓ.ም(ወልቂጤ) የጉራጌ ዞን የስራ ኃላፊዎች በምሁር አክሊል ወረዳ በመኸር ወቅት የተሰሩ እና ወቅታዊ የግብርና ልማት ስራዎች ተዟዙረው ምልከታ አድርገዋል። የጉራጌ ዞን ምክትል አስተዳዳሪና የግብርና መምሪያ ኃላፊ አቶ አበራ ወንድሙ በዞኑ ያሉ የተፈጥሮ ጸጋዎችንና አዳዲስ መሬቶች በማልማት ግብርናው ለአርሶ አደሮችና ለወጣቶች የኢኮኖሚ ምንጭ ሆኗል ጉራጌ ከንግድ ስራው በተጨማሪ በግብርናው ዘርፍ የ"ይቻላል"እሳቤን በተግባር ያረጋገጠ መሆኑ በቅርብ አመታት ከዞን እስከ ፌደራል ድረስ የታዩ ሞዴል ስራዎችን ምሳሌ የሚሆኑ ናቸው ብለዋል። ለዚህም የግብርና ሜካናይዜሼን በመጠቀም እርሻን በትራክተር ማረስና ሰብልን በኮምፓይነር መሰብሰብ መቻሉ ገልጸዋል። አቶ አበራ አክለውም በዘንድሮ አመትም ከ2 ሺ ሄክታር መሬት በላይ በወጣቶች መታረሱ ገልጸው በዘርፉ ለተሰማሩ ወጣቶች የግብአት፣የብድር አቅርቦት፣የመሬትና የቁሳቁስ ድጋፍ መደረጉ ተናግረዋል። በጉራጌ ዞን ለዘመናት ያልታረሱ እና በባህርዛፍ የተሸፈኑ መሬቶች ወደ ምርት በማስገባት ማህበረሰቡ ከድህነት እንዲላቀቅ አስችሏል ነው ያሉት። ዛሬም በምሁር አክሊል ወረዳ የታዩ የግብርና ልማት ስራዎች የዞኑ የግብርና ስኬታማነት አንዱ አካል ሲሆኑ በቀጣይም ተጠናክረው መቀጠል እንዳለባቸው ተናግረዋል። ወቅቱ የአየር ለውጥ እየተስተዋለ በመሆኑ የደረሱ ሰብሎችን በአፋጣኝ በመሰብሰብ የምርት ብክነት መቀነስ እንደሚያስፈልግ አቶ አበራ መልእክት አስተላልፏል። የጉራጌ ዞን ረዳት የመንግስት ተጠሪ አቶ ደሳለኝ ፈቀደ በበኩላቸው በዞኑ በፓርቲው ኢኒሼቲቭ የተያዙ የግብርና እቅዶች በአግባቡ በመተግብር ውጤት ተመዝግቧል። ለዚህም ከተረጂነት ወደ ምርታማነት ለመሸጋገር በተሰሩ የግብርና ልማት ስራዎች ኢትዮጵያ ከጠባቂነት እሳቤ ተላቃ ከተረጂነት ወደ ረጂነት ተሸጋግራለች ብለዋል። በጉራጌ ዞን ሰፊ እርሻ በማረስ የእህል ክምችት እና የሰብል አሰባሰብ ስራ ተሰርቷል ሲሉ ገልጸዋል። የጉራጌ ዞን ግብርና ከጊዜ ወደ ጊዜ እያደገ በመምጣቱ ለኢንድስትሪ የሚሆኑ እቃዎች ማቅረብ፣ለወጣቶች የስራ እድል መፍጠር፣ከውጭ የሚገቡ ምርቶች ማስቀረትና የቤተሰብ ብልጽግናና ማረጋገጥ መቻሉ አስገንዝበዋል። በምሁር አክሊል ወረዳ አሲዳማ መሬቶችን በማከም፣ ለወጣቶች የስራ እድል በመፍጠር ፣የአትክልትና ፍራፍሬ ችግኞች አፍልቶ በማስረከብና የእንሰት ዘር ብዜት በማከናወን አበረታች ስራዎች አይተናል ብለዋል አቶ ደሳለኝ። የምሁር አክሊል ወረዳ ዋና የመንግስት ተጠሪ አቶ አሰፋ ወልዴ እንደገለፁት በወረዳው የአርሶ አደሩና የወጣቱ አመለካከት በመቀየር የምርት እድገቱ በጥራትም ሆነ በብዛት እንዲጨምር ተደርጓል። አሲዳማ መሬቶች በኖራ መታከማቸው ፣አዳዲስ መሬቶች መታረሳቸው፣ግብአት እና የሙያ ድጋፍ መደረጉ፣የአረም ክትትልና የኬሚካል እርጭት ለግብርና ዘርፉ ውጤታማነት ጉልህ ሚና ተጫውቷል ነው ያሉት አቶ አሰፋ። የምሁር አክሊል ወረዳ ግብርና ጽሕፈት ቤት ኃላፊ አቶ መኑር ጀማል በዘንድሮው የመኸር ምርት ዘመን በስድስት የሰብል ዓይነቶች 8 ሺህ 350 ሄክታር በማልማት ከ150 ሺህ ኩንታል በላይ ምርት እንደሚጠበቅ ገልጸዋል። ‎ በተለይም በኤቸነ ቀበሌ በ35 ወጣቶች ተደራጅተው በየመናሷ አካባቢ ያለሙት 15 ሄክታር የስንዴ ማሳና በውቅየ ቀበሌ በ5 ወጣቶች የለማው 15 ሄክታር የስንዴ ማሳ ለምልከታው ከቀረቡት ሥራዎች መካከል ይገኙበታል። ‎ ከሰብል ልማት በተጨማሪ የእንሰት፣ የአትክልትና የፍራፍሬ ልማትም ትኩረት በመስጠት በደንገዝ ችግኝ ጣቢያ ከ1ሺ በላይ የአሚቾ ችግኞች በመትከል ለማከፋፈል ዝግጁ መደረጉ አስታውቋል። አቶ መኑር አክለውም በ16 ቀበሌዎች ከ140 ሄክታር በላይ ፖም፣ ሙዝና አቮካዶ እየለማ ሲሆን በደጋማ ቀበሌዎች ከ2 ሺህ 900 ሄክታር በላይ አትክልት እየለማ መሆኑን ገልጸዋል። በወረዳው በደንገዝ ሁለገብ ችግኝ ጣበያ አግኝተን ያነጋገርናቸው አርሶ አደር ታደሰ አንቄ በችግኝ ጣበያው የአቮካዶ፣የእንሰት የሮዝመሪ፣የቡና፣የኮረሪማና የሙዝ ችግኞችን ለአርሶ አደር ያከፋፍላሉ። በዚህም የአካባቢው አርሶ አደሮች የምግብ ፍጆታቸው ከማሟላት በተጨማሪ ምርት ሽጠው ኢኮኖሚያዊ ተጠቃሚ መሆናቸው ተናግረዋል። ወጣት አለማየሁ ባዘዘው እና ወጣት ታደሰ ናማጋ በኤቸነ ቀበሌ ከ35 ወጣቶች ጋር በማህበር በመደራጀት ስንዴ ማምረታቸው ገልጸው ምርቱ በጥሩ ቀሙና ላይ እንደሚገኝ አመላክቷል። የወረዳው መንግስት ግብአት፣መሬት እና ብደር በመስጠት ላደረገላቸው ድጋፍ አመስግነው በቀጣይ በድለባ፣ንብ በማነብና በመስኖ ዘርፍ ለመስራት እቅድ ያላቸው በመሆኑ መንግስት ድጋፉ እንዲያጠናክርላቸው ጠይቀዋል።

በዞኑ የተማሪዎች ውጤትና ስነምግባር ለማሻሻል የንቅናቄና ሌሎችም ተግባራት በተገቢው መፈጸም ላይ ሁሉም ርብርብ ማድረግ እንዳለበት የጉራጌ ዞን ትምህርት መምሪያ ገለጸ። ህዳር 1/2019 ዓ.ም(ወልቂጤ) የጉራጌ ዞን ትምህርት መምሪያ የ2019 ዓ.ም የጎልማሶች፣ የስራና ተግባር ትምህርት፣ የኦላይን ፈተና፣ በ6ቱ ኢንሼቲቮችና በሌሎችም ተግባራት ላይ የንቅናቄና የምክክር መድረክ በወልቂጤ ከተማ አካሂዷል። የጉራጌ ዞን ትምህርት መምሪያ የመምህራን ልማት ዳይሬክቶሬትና የኃላፊ ተወካይ አቶ ባቂ በሰማ እንዳሉት በዞኑ በየአመቱ በትምህርት ለትውልድ ንቅናቄ በርካታ ሀብት በመሰብሰብ የትምህርት ቤቶች ደረጃ ለማሻሻል እየተሰሩ ያሉ ስራዎችን የበለጠ ማስቀጠል ይገባል። የ11ኛና 12ኛ ክፍል የሙያና የተግባር ትምህርት አተገባበርና በሁሉም ትምህርት ቤቶችና እርከን የሂሳብና የእንግሊዘኛ ክበብና ማዕከል በማቋቋም ኢንሼቲቩ ተግባራዊ ማድረግ ይገባል ብለዋል። በዞኑ በዘንድሮ አመት በ23 ሁለተኛ ደረጃ ትምህርት ቤቶችና በ7 ቴክኒክና ሙያ ኮሌጆች እንደሚሰጥ ያነሱት አቶ ባቂ ለዚህም ዲጂታል ቴክኖሎጂና ኦንላይን ፈተና አተገባበር ላይ በትኩረት መስራት እንደሚገባም አመላክተዋል። በዞኑ የመምህራንና የሁለተኛ ደረጃ ትምህርት ቤት የመጽሀፍት እጥረት መኖሩን ጠቁመው፣ ከዚህም ባለፈ የ12ኛ ክፍል ሀገር አቀፍ የኦላይን ፈተና ለመስጠት በትምህርት ቤቶች የኮምፒውተር እጥረትና የኢንተርኔት ችግር እንዳለም አመላክተዋል። እነዚህ ችግሮችን በመቅረፍ የትምህርት ጥራት ለማረጋገጥ የሚመለከታቸው ተቋማት፣ ባለሀብቶችና ሌሎችም አካላት ርብርብ እንዲያደርጉም ጠይቀዋል። የትምህርት ክፍለ ጊዜ ብክነት መከላከል፣ የቤተመጽሀፍትና ቤተሙከራ አደረጃጀት፣ አተገባበርና አጠቃቀም እንዲሁም የተማሪዎች ውጤት ማሻሻያ ልዩ እቅድ ትግበራ ላይ በትኩረት መሰራት እንዳለበትም ጠቁመዋል። በቀጣይ የመምህራን አቅም ግንባታ፣ 6ቱ ኢንሼቲቬችንና የ100 ቀናት እቅድ ውጤታማ ማድረግ እንደሚገባም ገልጸዋል። እነዚህ የንቅናቄና ሌሎችም ተግባራት በተገቢው በመተግባር የተማሪዎች ውጤትና ስነምግባር ማሻሻል ላይ ሁሉም ርብርብ ማድረግ እንዳለበትም አስገንዝበዋል። የውይይቱ ተሳታፊዎች እንዳሉት በዞኑ በትምህርት ዘርፍ የተጀማመሩ የንቅናቄና ሌሎችም ተግባራ ውጤታማ ለማድረግ እንደሚሰሩም ገልጸዋል። በተለይም የተጀማመሩ 6ቱ ኢንሼቲቮችና የተማሪ ውጤት ማሻሻያ ልዩ እቅድ ተግባራዊ ማድረግ ይገባል ብለዋል። አክለውም የመምህራን እጥረትና የ2ኛ ደረጃ ትምህርት ቤት የመጽሀፍት እጥረት ለመቅረፍ ሁሉም የበኩሉን እንዲወጣም ጠይቀዋል። የተማሪዎች ውጤትና ስነምግባር ለማሻሻል የትምህርት አመራርና ወላጆች ድጋፍና ክትትል ማድረግ እንደሚጠበቅባቸውም ተናግረዋል።