Сүйүү саптары❤️‍🩹Поэзия❤️‍🔥

❤️‍🔥

Сен бар үчүн төрүндөмүн бакыттын, Сөздөрүңө, көз, демиңе ашыкмын! Асыл жаным, жанымда бол түбөлүк, Көңүлүңдөй ак сүйүүгө татыктуум. Каректериң– ак жылдызы өмүрдүн, Өзүңдү таап арзуу болуп төгүлдүм. Түбөлүккө түгөй болуп, бир басып, Келбейт такыр, келбейт сенден бөлүнгүм. Өзүң ээлеп жан дүйнөмдүн борборун, Жалгыз сага жетеледи жолдорум. Ханышасы болгум келет, татыктуум, Сен жараткан сезим толо ордонун. Ырларыңда махабаттын бар балы, Өзүң менен нурга толо таң жаңы. Окуганды ойго салып, арбаган, Болсом кана ар сабыңдын каарманы Үмүт болуп, бийик болуп сенде мен, Жашасам дейм, гүлдөй болуп жердеген. Ашыктыктын бар экенин көрсөтүп, Арзуу берсең мага эч ким бербеген Сага чындап арбалганмын, ашыкмын, Сезимдердин тазасына татыктуум…

Sezimder suilosun 😍 Сен сезбейсиң сен билбейсиң муңумду, Түшүнбөйсүң ызаа толгон бугумду. Күлүмсүрөп канча шайыр жүрбөйүн, Эт жүрөгүм көз жаштарга жуулду. Сагынычтан нечен жаштар төгүлдү, Санаалардан жүрөк жүзгө бөлүндү. Башка ниет менде жаным калган жок, Болгон үмүт бир сөзүңдөн сөгүлдү. Өзүң элең өмүрүмдүн ыгы да, Эч ким билбес туңгуюктун сыры да. Бактылуу бол кош бол эми сүйгөнүм, Эми калдың жалгыз гана ырымда. Эльмарт кызы Эльзада

Бакытым сенсиң чолпонум. Күнүм да айым, күн болуп тийген жарыгым. Көөдөндөн сен деп, өзүңө чыгат жаңы ырым. Кара жан сенсиң жүрөктөн түнөк тапканым, Кара каш сулуум болосуң менин жарымым. Карагым менин жанымда жүрсөң кубанам, Күн-түнү ойлойм, сенсиң го менин убарам. Көрөсүң бир күн катарлаш бирге учабыз, Кынап бир салган болосуң менин мунарам. Түгөйүм кылам, бир басып турмуш жолдорун, Түптөйлү бирге үй-бүлөө бакыт борборун. Тагдырым сага байланса болом ыраазы, Таалайым сенсиң, бакытым сенсиң чолпонум. 06.06.26 Руслан Бактыбаев.

*Акыркы үмүт* Күтүүсүз, сүйүүнүн билбеймин арзууларын, Тагдырдын сыноосу өтпөгөн каардуу жалын. А балким, менчелик сүйбөйт деп ойлосоңуз... Караңыз жүрөктүн жаралуу кандуу багын. Кыялды ойготкон бек экен сөздөрүңүз, Көп нерсе жашырган бар тура көздөрүңүз. Мейличи болуптур, батайын башка ойго... Бир азга ойлонтту мен үчүн өзгөрүүңүз. Сеземин үмүттүн үзүлбөй келгендигин, Сагынып жүрөктүн "дүрс" этип черткендигин. Кусадар болуштун таптакыр кереги жок, Билемин келечек колумда экендигин. Белгисиз бир сезим аяды аярсызды, Жүрөккө жактыруу бергенсип аянсынды. Сиздеги сезимдер түшүндүм менде да бар... Түбөлүк сүйгөнүм болууга даярсызбы?? Автор: Эльмарт кызы Эльзада

Толгон сырым барат калып ыйымда, Эч кечикпей жазсам деймин ырымда. Өкүнгөнум нечен күндү өткөрүп Айтпаганым болду окшойт чынында. Сагынычты катып келем ичкери, Айта албаган дартым да бар ичтеги. Таш боор жүрөк менде жалгыз бар эле, Багыныптыр махабатка сиздеги. Балким ооба жүрөттүрмүн үндөбөй, Тура албайм мен койбостон сүрдөбөй. Эт жүрөктү оорутпастан бул үчүн, Жүрүңүзчү эч кабакты бүркөбөй. Байлангандан бараткансыйм байланып, Күндөн күнгө барса керек байкалып. Издесениз жер жүзүнөн таппайсыз Бийиктикте мен жүрөмүн айланып. Олтурунуз жүрөгүмдүн төрүндө, Орун алган сиз болдунуз көңүлдө. Жакшы көрүп эми сизди түбөлүк, Бактылуу жан кылгым келди өмүрдө! Автор: Эльмарт кызы Эльзада 13.04.2021.

“ГҮЛҮҢ” Таандыгың болуп табылган гүлүң, Таң ырың сымал жаңырган гүлүң. Бирөөлөр билбес бийикте туруп, Бир өзүң үчүн багылган гүлүң. Дилиңе чырак жага алган гүлүң, Дүйнөңө түнөп, камалган гүлүң. Сабына салды сагын(ы)чын кайра, Сен үчүн гана жаралган гүлүң. Жароокер бакыт көшөгөң гүлүң, Жар болор антын өтөгөн гүлүң. Жоготуу үчүн кайгыңды сенин, Жолуңа жанын төшөгөн гүлүң. Жакшысын сөздүн жыйнаган гүлүң, Жат жанга сени кыйбаган гүлүң. Жакшылык тилеп Кудайдан жалгыз, Дубада сен деп ыйлаган гүлүң. Эш тутуп, барктын теңи деп гүлүң, Эркиңе көнөт, жеңилет гүлүң. Буйруган күнү жазмыштын сага, Белеги болуп берилет гүлүң. Өзүңдөн кубат, күч алат гүлүң, Өзгөрбөй сага тушалат гүлүң. Түндөсү Күндү күткөндөй элдер, Түбөлүк сени күтө алат гүлүң. ЭРКИНБЕК КЫЗЫ МЭЭРИМ

ӨЧҮРДҮМ СЕНИ ЖҮРӨКТӨН Көз алдымда калган сенин элесиң, Эмне мынча кыйнап жүрөк эзесиң? Эки жолго түшүп кеткен болсок да, Жан дүйнөмө тынчтык бербей келесиң. Түштөрүмдө ар күн сайын көрөмүн, Айла канча, айрылууга көнөмүн. Кол кармашып бирге баскан экөөбүз, Ээн калганын ошол узун көчөнүн. Сени ойлоп ыйлап далай түн өткөн, Көңүлүмдү тепсеп кеттиң гүл өскөн. Кыйнабайын эч жөнү жок өзүмдү, Мен өчүрдүм бүгүн сени жүрөктөн. автор : К.М

* * * Тагдырымдан сурап келем өзүңдү, Сагынычтан ичке катып сөзүмдү. Сүрөтүңдү сызып алып олтурам Унута албай мөлтүрөгөн көзүңдү. Баракчанды ачам күндө эртелеп, Сагынычым турат мени жетелеп. Сүрөтүңдү кечке тиктеп олтуруп, «Кандайсың?»- деп айткым келди эркелеп. -Аль-Мадина

СЕН КЕРЕКСИҢ Оор күнүндө турмуштун камчылаган, Учур болсо көздөн жаш тамчылаган. Жакшы сөзүн көп айтып жубатуучу, Сен керексиң жаныма, жакшы адам. Бакыт толгон күн болсо сүйүнүчтүү, Майрам болсо, шат болсо күүсү күчтүү. Кубанычым теңме-тең бөлүшүүгө, Сен керексиң жүрөктүн сүйүктүүсү. Сен керексиң түнүмдө, күндөрүмдө, Сен керексиң кайгырсам, күлгөнүмдө. Оо, сүйүктүүм, сүйгөнүм, асыл жарым, Сен керексиң жашоомдун түрмөгүндө. ✍️ Максат Дүйшөн уулу

ТҮШКӨН БЕЛЕҢ БАШКА ПЛАНЕТАДАН Өң-түс, келбет, укмуш мүчө, сының да, Өзгөчө ак-көңүл жансың чынында. Жасалмасыз, жөнөкөйлөр өзүңдөй, Жашагандыр жыйырманчы кылымда. Көздөрүңдөн күндүн нуру жайнаган, Кылыгың эх... Бүт кайгымды айдаган. Сендей чынчыл, куулугу жок, сулуу жан, Билбейм качан жаралаарын кайрадан. Адамдарды ылгабаган, танбаган, Ант-шертинен кайтпаган да, чанбаган. Төрт тарабы төп келишкен, ажайып, Дагы башка дал өзүңдөй барбы адам? Сени менен маектешсем эс алам, Тоюбузду кыялданам, эх анан. Бири белең Бейиштеги үрлөрдүн? Түштүңбү же башка планетадан? Автор: Дамир Кады уулу 14.05.2026-ж.

МАХАБАТТЫН КАДЫРЫНА ЖЕТЕЛИ Кубулжуган шыңгыр үнүң, коңгуроо, Кулагымдан такыр кетпес болду го. Күлүп түшкөн сүрөттөрүң эх чиркин, Көз алдымдан кетпей эле койду го. Кадалганда каректериң карагат, Кайра-кайра жүрөгүмдү жаралап. Күлкүң менен балдай ширин сөздөрүң, Кетти жаным, кан-тамырды аралап. Кыялың бар, бат таарынмай, эркелеп, Кармап калса жакалайт да, желкелейт. Күйгөнгөбү, сүйгөнгөбү Дамириң, Көңүлүңдү көтөрө албай темселейт. Бала кезден, көңүл коюп, сүйгөнмүн, Бирок сага жетпей канча сүйрөлдүм. Башкасына көнбөй такыр, жактырбай, Бир өзүңө келет эле үйлөнгүм. Ал учурда сен да мени сүйгөнсүн, Ак сүйүүнүн жалынына күйгөнсүн. Айга, күнгө, гүлгө дагы теңебейм, Ардагым сен менин ички дүйнөмсүн. Он жыл ашык күттүк окшойт эсеби, Оор тагдырдын жазмышы да, нетели? Мындан ары ар-сар кылбай жарыгым, Махабаттын кадырына жетели. Автор: Дамир Кадыр уулу. 15.05.2026-ж.

ЗАОЧНЫЙ СҮЙҮҮ Көз уялткан сулуулугуң сендеги, Жүрөк тандап , жалгыз гана сен дедим. Тарыхчаңдан көрүп жүрүп өзүңдү, Кучагыма бир басууну дегдедим. Ооба билем, тааныбайсың, билбейсиң, Эгер жазсам «тааныбадым, ким?» дейсиң. Жүрөкчөлөр бассам дагы кызарта, Сен эмнеге капарыңа илбейсиң? Инстаграмда, эх сулуу кыз татына, Кантип айтам сүйөмүн деп батына? Өздүгүңө жаза албай жүрсөмда , Кошом дайым ырларымдын сабына. ✍️ Максат Дүйшөн уулу

Кусалык жыты Fleur Narcotique Айсыз түндө олтурамын алсырап, Жытың эстеп, өз оюмда магдырап. Жарык күндө жүрсөм эгер жадырап, Түн түшкөндө калчу болдум алсырап Ал жыпар жыт — күч-кубатым, тирегим, Ал болбосо сокпочудай жүрөгүм. Кайра келип, кучагыңа алсаңчы, Калбасынчы муздап менин билегим. Таң аткыча кирпик какпай зарыгам, Тааныш жытың, илебиңе багынам. Жанымда эмес, жат болсоң да сен мага, Жалгыз сени, жаным, абдан сагынам. Сен белекке берген ошол ак аюу, Сагынычтын дарысына айланды. Сыртта жамгыр, ичте болсо кусалык, Сезимимдин баары сага байланды. Сен жок болсоң — ошол жытың тирегим, Сени эстетип согуп турат жүрөгүм. Ак аюуну бек кучактап жатсам да, Өзүңдү бир көрүүнү мен тилеймин. Сен себинген атырыңды таап алып, Сагынычтын отуна мен баттым жанып. Ак аюуну кучагыма бек кысып, Жытың менен дем аламын тынч алып. ✍️ Асанова Амина

ӨЗҮҢ ҮЧҮН КЕЛМЕКМИН Неге мынча сезимталсың, сергексиң, Сенек тарткан жүрөгүмдү терметтиң. Экинчи ирээт төрөлүүгө шарт болсо, Мен жашоого бир сен үчүн келмекмин. Мен жашоого өзүң үчүн келмекмин, Арнап кайра ырларымын берметин. Азыркыдай алсыз болбой тагдырга, Жетелесең ээрчип эле кетмекмин. Өмүргө мен өзүң үчүн келмекмин, Өзүң үчүн көп кыздарды жеңмекмин. Өзгөлөрдүн укпай туруп пикирин, Өзүңө окшош уул төрөп бермекмин… РАХАТ ЖУМАНАЗАРОВА

Мен коркомун сенсиз жалгыз калыштан, Сени издеп өзгөлөргө барыштан. Сага деген ак сезимдин чырагын, Аргасыздан өзгө жанга жагыштан. Корком сени түбөлүккө жоготуп, Өмүрүмдү өкүнүчкө оротуп. Бир өзүңө атап келген сүйүүмдү, Бөтөн жанга арнап салып тонотуп. Бөтөн колдор чачтарымдан сылаштан, Бөтөн көздөр мага тиктеп караштан. Корком жаным, сенин ордуң толтурбай, Жат бирөөнүн кучагында калыштан. Тагдыр бизди айры жолго салбасын, Таза сүйүүм бөтөн жанга калбасын. Корккондорум чындык болуп чыга албай, Кош жүрөктөр бакыт жолун тандасын. Автор : Асанова Амина

Сагынууда өтсө күндөр аралыктан, Көп ойлоном калса дагы агарып таң. Ойлоп анан таап алам мен өзүңдү, Тээ качанкы артта калган балалыктан. Көп ойлоном калган кезде күүгүм кирип, Ошол элес жүрөгүмдү кетет тилип. Сагынууда жүргөнүмдү сездиң бекен, Жүрөгүмдө жүргөнүңдү койсоң билип. Жалгыз өзүң жан дүйнөмдө бекиткеним, Бул жашодо сага жетпей кечикеним. А сен менин жүрөгүмдүн түпкүрндө, А мен азыр ызгаары суук эшиктемин. Руслан Бактыбаев.

САТУУЧУ КЫЗ Нан алганы дүкөнгө багыт алдым, Жакын болчу бат эле барып калдым. Эх сатуучу сулуу кыз, нанды берип, Жүрөгүмдү байкатпай алып калдың. Ой-пикирим тек сага бөлүнүүдө, Оңой эмес экен да көнүгүүгө. Ошол "Оомат дүкөнү" сен иштеген, Ордосундай сүйүүнүн көрүнүүдө. Акчам калбай калса да бара берем, Сүйлөшүүгө айла-амал таба берем. Сен ойлосоң керек ээ, кардарым- деп, Дүкөнгө эмес чынында сага келем. Мүчө-бою келишкен, татынайкам, Чийме каштуу, көздөрү бакырайган. Сатуучу кыз сүйдүрүп алды мени, Лайк бассаңар силерге атын айтам. Автор: Дамир Кадыр уулу. 04.05.2026-ж.

КЕЧИР МЕНИ ЖҮРӨГҮМ Арманымды камтыган, Айыкпаган дартынан. Жан дүйнөмдө жашаган, Жүрөгүмдөн тартынам. Үзбөй такыр үмүтүн, Мен- деп, соксо күнү-түн. Уят эмес,не анан? Менин мына жүрүшүм. Ыйласаң да аябай, Сыздасаң да карабай. Кайдыгер бир сулууну, Сүйө бердим тажабай. Акылга да сыйбаган. Жалаң арман жыйнаган, Жан экенмин боору таш, Жүрөгүмдү кыйнаган. Кунун кечип күнөөмдүн, Кечир мени жүрөгүм. Кадырыңа мен эми, Жеткен жанды сүйөмүн. Мээрим күтпөй өзгөдөн, Өзүң үчүн өзгөрөм. Сүйбөгөнгө сүйкөнбөйм, Сөз беремин, сөз берем. Өтсөм да так дүйнөдөн, Жашабаймын ый менен. Өзүмдү-өзүм сүйгөндү, Эми чындап үйрөнөм. Автор: Дамир Кадыр уулу. 04.05.2026-ж.