Сагыныч❤️‍🔥Сүйүү💞Өкүнүү❤️‍🩹❤️‍🔥

Сени күтөм - таңда күндү күткөндөй... Кечте көрсөм - айдын нуру түшкөндөй... Күндүз жүрсөк ээрчигенсийт күн жандап... Дарак, чөптөр сага кошо күлгөндөй... Бирок дүйнөң сыр бербеген мейкиндик... Суроо келет кээде ичте: "сен кимдик?" Эшик ачып ээсин күткөн үй сымал, Ичим азыр - сени эңсеген бош, кеңдик... Туюмдарың туйлагансыйт мен жакка... Бирок бардай жеңден тарткан бир башка... Сүйүүмдү жерге ыргытпа, өтүнөм! Ансыз деле азам толо бул жашта... Автору Ы.Шергазы .

Сага болгон ак сүйүүмдү өчүрсөм, калем дагы өлүм жибин аттайбы? Ойлорумду чек кылсам да чым сымал, сезим дале суудай ташып жатпайбы? Ашыктыктан толгон -токой ыр жазган, азыр менде калем гана бактылуу! Ак сүйүүдөн калбагандай үмүтү, өмүр, жүрөк жаны жоктой убактылуу! Ойдо жүрөт көйгөйлөрдүн жарышы, сени ойлосом токтойт анын баарысы! Сага умтулган дымагы күч сезимим, а сен үчүн ойлордун эң тайызы! Кагып өтүп оттой көзү башканын, өрттөйт мени сага жетип жатышы! Дүйнөмдөгү жүз пайызы күтүүнүн, а сен үчүн нөл пайызы сүйүүнүн! Автору. Ы. Шергазы.

Көзүмдүн жоосун алып сулуулугуң, Көөдөндү жылытууда жылуулугуң. Кара көз, чийме кашың, эх (..........), Өзүңө тартып турат сындуулугуң. Суктанам айдай жарык сымбатыңа, Атыңды кошуп жаздым ырга мына. Көрсөтпөй жан адамга кызганычтан, Катып бир алсам деймин кымкабыма. Арбады мени өзүңө кымча белиң, Жүз буруп, тетир карап кыспа демим. Сүйүүмдү арнап сага турган кезде, Жообу жок калтырбачы сезимдерим. Искесем сепкен сенин атырыңдан, Мас болом, айрыламын акылымдан. Бир сүйсөм, арманым эч калбас эле, Аңкыган атыр жыттуу алкымыңдан. ✍️ Максат Дүйшөн уулу

УБАЙЫМ....... Ойлосом ойдо карааның Ооруулуу кылды жамалың Дартыма болоор арачы Дарыгер кайдан табамын... Кусадан көңүл калганда Кубанчым өттү арманга Жоолукпай койсок не болмок Жомоктой ушул Жалганда... Жылдызы болбой жанымдын Жыл өтпөй туруп сагындым Жакындык бизге бербеген Жашоого келет таарынгым... Эстесем эсте карааның Эсимди алды жамалың Дарманым деле калган жок Дарысын кайдан табамын... Дартыма болоор арачы Дарыгер кайдан табамын... Элмирбек Иманалиев.

ӨЗҮҢДҮ ЭСТЕП... Жанып бир отко, өрттөнсөм бекен? Үмүткө түшүп, өкчөлсөм бекен? Өмүрдү ушул муң жутуп алып, Өзүңдү күтүп өткөрсөм бекен? Бир дербиш болуп күн көрсөм бекен? Тушалган бутта сүйрөлсөм бекен? Эстеген сайын кыйналбаш үчүн, Унутуу жолун үйрөнсөм бекен? Жүрөктү эзип, кыйнасам бекен? Тамтыгым чыгып, кыйрасам бекен? Өзөктү өрттөп кеткенде күйүт, Өзүңдү эстеп ыйласам бекен? Тагдыр деп ушул багынсам бекен? Унутуп, селдей агылсам бекен? Болбосо баарын кайрадан эстеп, Бүгүн да сени сагынсам бекен? Арген Болушов

ӨМҮР Ооба, өмүр... сенден калбайт көңүлүм, Ырларың бар жазып жүргөн өзүңдүн. Жаа тартпастан узарта тур кичине, Жандай сүйгөн ата-энемдин өмүрүн. Ырас, өмүр... мөлтүр көлдүн өзүсүң, Ыйга таштайт бир күн келип көбүгүң. Бүчүр байлап, сабагынан күбүлтпөй, Бир туугандын узартып тур өмүрүн. Чындык тура... конок болуп келерим, Кези келсе келбес жайга кетемин. Суранаарым өлбөс кана болсунчу, Менин ырым, элим жана мекеним. Арген Болушов

​КӨЗҮҢҮЗ Сиздей жанга жолукпадым, издедим, Ичимдеги ырга чыгып, дилдегим. Ырга салгым келип турат жарыктык ай, Көзүңүздүн ар бир жумган ирмемин. Бул жактыруу, балким сүйүү, билбедим. Таптым бекен жүрөгүмдүн адамын? Оңой эмес азыр менин абалым. Көрсөм дагы мейли турмуш кыйынын ай, Көзүңүздүн тартпайынчы азабын. Көрбөйүнчү эми сүйүү мазагын. Өзүңүзгө тартат экен көзүңүз, Жетпей жүрөт окшойбуз го көбүбүз. Жаксам эгер, анда мени унчукпай, Көзүңүздүн карегине көмүңүз. Көпчүлүктөн мага көңүл бөлүңүз. Арген Болушов

ЧЫН ДИЛИМДЕН Жармы кулап, жармы асылып калган ай, Жашоом менин качан толот, арман ай?! Мелт-калт болгон учсуз жарык дүйнөдө. Мекен издеп таппай келем жанга жай. Баш көтөрүп басарымда басындым, Баш катырып далай таңды атырдым. Аралынан ажыраган казактай, Азыр мен да армандуумун, такырмын. Жаза басып жыгыларда таярга, Жандап жүрүп, сырым билип аярга, Музыкадай муң-шаттыкты бөлүшөр, Муктаж экем мен бир жакшы аялга. Канат болчу кайкып учар жыргалда, Кайрат болчу карек эзген ыйларда. Өктөм жанып, бир кылчайып алармын, Өмүрүмдөн өтүп кеткен жылдарга. Жаш көбөйүп баратканы күнөөмбү, Жарыгыңды чаччы мага күн өңдүү. Өмүрүмдө баалабадым бакытты, Өлүп калсам андан бетер күмөндүү Автору Дуйшон Жапаров.

Уйку келбей... Уйку бербей элесиң, Уктаарымда сен оюма келесиң. Сага арнап ыр жазаарда дайыма, Сансыз эргүү бир жылуулук бересиң. Сезим мени сага байлап койгондой, Түшкө кирсең жатам түндө ойгонбой. Адат мага: сен жөнүңдө ыр жазмай, таңдан кечке сен жөнүңдө ойлонмой. Үнсүз тиктейм, кайра-кайра үңүлөм, Уялам да сүрөтүңдүн сүрүнөн. Капыс сенден келип калса билдирүү, Карбаластап жаш балача сүйүнөм. Арген Болушов

ӨМҮРДҮ СҮРҮП ЖҮРӨМ!!! Өмүрдү сүрүп жүрөм, Өкүнүч жектөө менен, Өткөндү эстөө менен. Өрт кечкен жаштыгымды, Өзгөртүү, эңсөө менен. Өмүрдү сүрүп жүрөм, Кечеки күндү жектеп, Келеке күндү эстеп. Кыйналып азап тартам, Келечек күндү көксөп. Өмүрдү сүрүп жүрөм, Баардыгын бийик коюп, Жүрөктү тилип коюп. Башкалар сөз кылышса, Мыйыктан күлүп коюп. Өмүрдү сүрүп жүрөм, Өзгөчө күлүп жүрөм, Өзүмдү сүйүп жүрөм!!! Бекмырза Шукурали уулу 16.10.2026/12:13