ሰላም ካቶሊክ ቴሌቪዥን - PAX Catholic TV

መተማመን ማይክሮ ፋይናንስ አ.ማ 18ኛ የሞባይል ባንኪንግ አገልግሎትን በይፋ አስጀምረ። ‎ ‎መተማመን ማይክሮ ፋይናንስ አ.ማ ጥቅምት 14 ቀን 2019 ዓ.ም 18ኛ መደበኛ ጠቅላላ ጉባኤውን እና 12ኛ አስቸኳይ ጉባኤ በአዲስ አበባ ዓድዋ የድል መታሰቢያ የስብሰባ አዳራሽ ባካሄደበት ወቅት የሞባይል ባንኪንግ አገልግሎትን በይፋ አስጀምሯል። ‎ ‎ለማህበራዊ ፍትሕና ለሁለንተናዊ እድገት የተመሰረተው የመተማመን ማይክሮ ፋይናንስ አ.ማ ከዘመኑ የቴክኖሎጂ ሂደት ጋር የተጣጣመ እና የዲጂታል ሽግግር የፋይናንስ አገልግሎትን ለደንበኞቹ ተደራሽ ለማድረግ የሞባይል ባንኪንግ አገልግሎት ማስጀመሩ ተገልጿል። ‎ ‎በማስጀመሪያ መረሐግብሩ ላይ የተገኙት ብፁዕ ካርዲናል አቡነ ብርሃነኢየሱስና ብፁዕን ጳጳሳት ለእዚህ ተቋም እዚህ ደረጃ መድረስ አስተዋፅኦ ያበረከቱ የቀድሞ እና የአሁን የተቋሙ አመራሮች ምስጋናቸውን በማቅረብ እንኳን ደስ አላችሁ ብለዋል።

የሞጆ ቅዱሳን ጴጥሮስና ጳውሎስ ቤተ ክርስቲያን እድሳት ተጠናቆ የምስጋና መሥዋዕተ ቅዳሴ በመካሔድ ላይ ይገኛል በኢትዮጵያ ካቶሊካዊት ቤተክርስቲያን በአዲስ አበባ ሀገረ ስብከት በኮንሶላታ ገዳም አባቶች የሚመራው የሞጆ ቅዱሳን ጴጥሮስና ጳውሎስ ቤተ ክርስቲያን እድሳት ተጠናቆ፣ ጥቅምት 7 ቀን 2019 ዓ.ም. የምስጋና መሥዋዕተ ቅዳሴ በመካሔድ ላይ ይገኛል። በግንቦት ወር 2018 ዓ.ም. የተጀመረው የቤተ ክርስቲያኑ እድሳት መጠናቀቁን ተከትሎ ብፁዕ ካርዲናል አቡነ ብርሃነ ኢየሱስ ቤተ ክርስቲያኑን በመባረክና ሪቫን በመቁረጥ መርሐ ግብሩን ያስጀመሩ ሲሆን፣ የምስጋና መሥዋዕተ ቅዳሴውንም በመምራት ላይ ይገኛሉ። በምስጋና መሥዋዕተ ቅዳሴው ላይ የዓለም አቀፉ የኮንሶላታ ገዳም የበላይ አለቃ ክቡር አባ ጀምስ ሌንጋሪን፣ በአፍሪካና በሌሎች የዓለም ክፍሎች የሚገኙ የኮንሶላታ ገዳም አለቆች፣ በኢትዮጵያ የኮንሶላታ ገዳም አለቃ ክቡር አባ ታመነ አሳሮ፣ ካህናት፣ መነኮሳት፣ የሃይማኖት እህቶች፣ ወጣት መዘምራንና ምዕመናን ተገኝተዋል። የቤተ ክርስቲያኑ እድሳት ሕንፃውን ከጉዳት በመጠበቅና ለአምልኮ ተስማሚ በማድረግ ብቻ ሳይወሰን፣ ምዕመናን በአንድነት የሚሰበሰቡበትን ቦታ ለትውልድ ለማስጠበቅም ያስችላል። በዚህም የሞጆ ቅዱሳን ጴጥሮስና ጳውሎስ ቤተ ክርስቲያን እድሳት መጠናቀቅ ለምዕመናኑ የደስታና የምስጋና አጋጣሚ ከመሆኑም በላይ፣ የቤተ ክርስቲያኑን መንፈሳዊ አገልግሎት ለማጠናከር አዲስ ምዕራፍ ከፍቷል።

ለከፍተኛ የትምህርት ተቋማት መሪ ካህናት ስልጠና ተሰጠ፡፡ በኢትዮጵያ ካቶሊካዊት ቤተክርስትያን በአዲስ አበባ ሀገረስብከት መስከረም 26/2019ዓ.ም በቅዱስ ፍራንችስኮስ የፍልስፍና እና የነገረ መለኮትተቋም ከተለያዩ አገረ ስብከቶች ለመጡ የከፍተኛ የትምህርት ተቋማት መሪ ካህናት፣ ወጣቶች እና ዩኒቨርሲቲ ተማሪዎችን “ውጤታማ የወጣቶች ተሳትፎ” በመጨመር ረገድ ሲኖዳዊ የሆነ ጉዞን ከወጣቶች ጋር ለማድረግ የሚረዳ ስልጠና እይተካሄደ ይገኛል፡፡    የስልጠናው ዓላማ በእያንዳንዱ ከፍተኛ የትምህርት ተቋም የሚያገለግሉ ካህናት ከተለያዩ ሀገረስብከቶች የመጡ ወጣት እና ካቶሊክ የዩኒቨርሲቲ ተማሪዎችን በመንፈሳዊ፣ በማኀበራዊ ሕይወታቸው እንዴት ማደግ እንደሚችሉ እንዲሁም ራስን መምራት፣ በመንፈሳዊነታቸው እና በትምሕርታቸው እንዴት መታነጽ እንዳለባቸው የሚያስተምር ስልጠና ነው፡፡ በኢትዮጵያ ካቶሊካዊት ቤተክርስትያን የጳጳሳት ጉባኤ ጠቅላይጽ/ቤት የሐዋርያዊ ሥራዎች ኃላፊ ክቡር አባ አብርሃም ገብረማርያም ወጣቶች በቤተክርስትያን ውስጥ ቦታ ሊኖራቸው እንደሚገባ ገልጸው ከዚህ ስልጠና በኋላ በከፍተኛ የትምሕርት ተቋም ውስጥ ለሚገኙ የተማሪ ተወካዮች ስልጠና እንደሚዘጋጅ እና በቀጣይም በተቀናጀ መልኩ በጋራ ወጣቶችን ለማብቃት መሰራት እንድሚገባ አሳሰበዋል፡፡   ይህ ስልጠና በኢትዮጵያ ካቶሊክ ቤተክርስቲያን ጳጳሳት ጉባኤ ጠቅላይ ጽህፈት ቤት ሐዋርያዊ ቢሮ ማስተባበርያ ሥር በሚገኘው የዩኒቨርሲቲ ተማሪዎች አስተባባሪ ቢሮ እና  ከቅርብ ምስራቅ ካቶሊክ የበጎ አድራጎት ማህበር (CNEWA) ጋር በመተባበር የተዘጋጀ መሆኑም ተገልጿል።