አቡቀለምሲስ በኢትዮጵያ ኦርቶዶክስ ተዋሕዶ ቤተ ክርስቲያን የሰሜን ሸዋ ሀገረ ስብከት ሚዲያ

ብፁዕ አቡነ ቀሌምንጦስ የሰኮሩ ልማት በር ደብረ ገነት ቅድስት ማርያም ቤተክርስቲያንን ጎበኙ። መስከረም ፲ ቀን ፳፻፲፱ ዓ.ም አቡቀለምሲስ ሚዲያ (ደብረ ብርሃን ++++ ++++ ++++ ++++ ++++ ++++ +++++ ብፁዕ አቡነ ቀሌምንጦስ በኢትዮጵያ ኦርቶዶክስ ተዋሕዶ ቤተክርስቲያን ጠቅላይ ቤተክህነት የሰንበት ትምህርት ቤቶች ማደራጃ መሞሪያና የሰሜን ሸዋ ሀገረ ስብከት ሊቀጳጳስ በሰሜን ሸዋ ሀገረ ስብከት ቡልጋ ሀገረማርያም ከሰም ወረዳ ቤተ ክህነት ሥር የምትገኘውን የሰኮሩ ልማት በር ደብረ ገነት ቅድስት ማርያም ቤተክርስቲያንን ጎብኝተዋል። ብፁዕነታቸው በጉብኝታቸው በሰበካው እየተሰጠ ያለውን አገልግሎት እንዲሁም በመከናወን ላይ ያለውን ልማት አስመልክተው አባታዊ ቃለበረከትና የሥራ መመሪያ ሰጥተዋል።

በሀገረማርያም ከሰም ወረዳ ቤተ ክህነት ዐዲስ ለሚገነባ ሕንጻ ቤተክርስቲያን የመሠረት ድንጋይ ተቀመጠ። መስከረም ፲ ቀን ፳፻፲፱ ዓ.ም አቡቀለምሲስ ሚዲያ (ደብረ ብርሃን) ++++ ++++ ++++ ++++ ++++ ++++ +++++ በሰሜን ሸዋ ሀገረ ስብከት ሀገረማርያም ከሰም ወረዳ ቤተ ክህነት ለንፋስ አምባ ደብረ ልዕልና ቅድስት አርሴማ ቤተክርስቲያን ዐዲስ ለሚገነባው ሕንጻ ቤተክርስቲያን የመሠረት ድንጋይ በብፁዕ አቡነ ቀሌምንጦስ በኢትዮጵያ ኦርቶዶክስ ተዋሕዶ ቤተክርስቲያን ጠቅላይ ቤተክህነት የሰንበት ትምህርት ቤቶች ማደራጃ መምሪያና የሰሜን ሸዋ ሀገረ ስብከት ሊቀጳጳስ ተቀምጧል። በመርሐ ግብሩ ላይ ክቡር መጋቤ ሐዲስ ነቅዐ ጥበብ አባቡ የሀገረ ስብከቱ ዋና ሥራ አስኪያጅ "የተወደደች የጌታ ዓመት"ሉቃ 4:19 በሚል ኃይለ ቃል መነሻነት ትምህርተ ወንጌል ሰጥተዋል። በዝርዝር እንመለሳለን

ብፁዕ አቡነ ቀሌምንጦስ የዘመን መለወጫ በዓልን አስመልክተው ለመላው ኢትዮጵያውያን የእንኳን አደረሳችሁ መልእክት አስተላለፉ! የብፁዕነታቸውን ሙሉ መልእክት እነሆ!! ++++++++++ +++++ ++++++ የተወደዳችሁና የተከበራችሁ በሀገራችን ኢትዮጵያ እና በመላው ዓለም የምትገኙ ወገኖቻችን በመጀመሪያ እንኳን ከዘመነ ማርቆስ ወደ ዘመነ ሉቃስ ከ2018 ወደ 2019 ዓ.ም በሰላምና በጤና አደረሰን አደረሳችሁ!! ​“ምድር እንተ ዘልፈ ይሔውጻ እግዚአብሔር አምላክከ ወአዕይንቲሁ ለእግዚአብሔር አምላክከ ላዕሌሃ እምርእሰ ዓመት እስከ ማኅለቅተ ዓመት” ​«አምላክህ እግዚአብሔር የሚጎበኛት አገር ናት፤ ከዓመቱ መጀመሪያ እስከ ዓመቱ መጨረሻ ድረስ የአምላክህ የእግዚአብሔር ዓይን ሁልጊዜ በእርሷ ላይ ነው።» ዘዳግም 11፥12 ​ይህ ቃል እስራኤል ወደ ተስፋይቱ ምድር ሲገቡ ሙሴ የነገራቸው ነው። የግብጽ ምድር ከሀገራቸው ከእስራኤል የተለየች ምድር መሆኗን ይገልጻል። የእስራኤል ምድር ከሰማይ የሚወርደው ጠል በረከቱን በመጠባበቅ የምትኖር ምድር ናት። የተወደዳችሁና የተከበራችሁ በሀገር ውስጥና በውጭው ዓለም የምትኖሩ ኢትዮጵያውያን!! ​«የእግዚአብሔር ዓይን ሁልጊዜ በእርሷ ላይ ነው» ማለት፤ እግዚአብሔር ቅድስቲቱን ሀገር የሚጠብቃት፣ የሚንከባክባት፣ የሚመራትና የሚመግባት መሆኑን ያሳያል። «ከዓመቱ መጀመሪያ እስከ ዓመቱ መጨረሻ» የሚለው ቃል ደግሞ እግዚአብሔር በጊዜ ውስጥ የሚለዋወጥ አምላክ እንዳልሆነ፤ ከመጀመሪያው እስከ ፍጻሜው ድረስ ታማኝ፣ መጋቢና ጠባቂ መሆኑን ያስተምረናል። የአንድ አገር ታላቅነት በተራሮቿ፣ በወንዞቿ፣ በማዕድኗ፣ በሕንፃዎቿ ወይም በሀብቷ ብቻ አይመዘንም። የአገር እውነተኛ ክብር በዜጎቿ ማንነት፣ በፍትሕ፣ በሰላም፣ በፍቅርና በሰብአዊነት ይገለጣል። «አምላክህ እግዚአብሔር የሚጎበኛት አገር ናት ሲል ቃሉን በጥልቀት ስንረዳው ምድር ለሰው አደራ የተሰጠች መሆኗን ለማስገንዘብ ነው። እግዚአብሔር ምድርን አይተዋትም፤ ይጎበኛታል። «መጎብኘት» የሚለው ቃል በምሕረት መጎብኘትን የሚያሳይ ሲሆን እስራኤል እግዚአብሔር የሚያወርሷቸው ቅድስት አገራቸው ከነዓን በጎ ፍሬ የምታፈራ አምላኳ የማይለያት የመንፈስ ቅዱስ ዙፋን የቃል ኪዳኑ እና የቅዱሱ ሕዝብ መኖሪያ መሆንዋን ለመግለጽ የተነገረው ቃል ነው። ​የተወደዳችሁና የተከበራችሁ በሀገር ውስጥና በውጭው ዓለም የምትኖሩ ኢትዮጵያውያንና ኢትዮጵያውያት!! ​ሀገር የምትከበረው ዜጎቿ ሲከበሩ ነው። ሕፃናት ሲጠበቁ፤ አረጋውያን ሲከበሩ፤ ወጣቶች ተስፋ ሲያገኙ፤ ሴቶች በክብር ሲኖሩ፤ ድሆች ሲረዱ፤ ባለሥልጣናትም በማስተዋል ለፍትሕ ፣ ለሰላም ሲቆሙ፤ ሰው በሰውነቱ ሲከበር፤ ያንጊዜ ሀገር ትከበራለች። የሰው ልጅ ዋጋው በሀብቱ፣ በዘሩ፣ በቋንቋው፣ በሥልጣኑ፣ በእውቀቱ ሳይሆን ሰው በመሆኑ ብቻ ክቡር ፍጥረት ነው። ቅዱሱ መጽሐፍ ስለ ሰው ክብር ሲናገር «እግዚአብሔርም ሰውን በመልኩ ፈጠረው፤ በእግዚአብሔር መልክ ፈጠረው።» ይላል ዘፍ 1፥27 ስለዚህ አዲሱን ዓመት 2019 ዓ.ም ስንቀበል «እኔ ምን አገኛለሁ?» ብቻ ሳይሆን፤ «እኔ ለሌላው ሰው ምን አደርጋለሁ?» የሚል አስተሳሰብ ሊኖረን ይገባል። ምክንያቱም የሰውን ጥቅም ባስቀደምን ቁጥር የሀገር ክብር ይገነባል። የሰው ልጅ ወደዚህ ዓለም የመጣው ለራሱ ብቻ ለመኖር አይደለምና ቅዱሳት መጻሕፍት እንደሚያስተምሩን፤ እግዚአብሔር ለሰው ጸጋን ሲሰጥ ለራሱ መጠቀሚያ ብቻ አይደለም። ሌላውን ለመጥቀም እንጂ። ዕውቀት ካለን እናስተምራለን፤ ሀብት ካለን እንረዳለን፤ ሥልጣን ካለን ለፍትሕና ለሰላም እንቆማለን፤ ብርቱዎች ስንሆን ደካማውን እንደግፋለን። “ጌታችን በወንጌል” «ከእናንተ ዘንድ ታላቅ ሊሆን የሚፈልግ አገልጋይ ይሁን» ይላል። ማቴ. 20፥26 "ታላቅነት ሌሎችን በማሳነስ አይመጣም፤ ይልቁንም ሌሎችን በማክበርና በማገልገል ነው"!! ​የተወደዳችሁና የተከበራችሁ ኢትዮጵያውያንና ትውልደ ኢትዮጵያዊያን ወገኖቻችን፤ እግዚአብሔር “የሚጎበኛት አገር ማለት ለእኛ ኢትዮጵያ ናት" ስለዚህም ሀገራችንን ኢትዮጵያን ከእግዚአብሔር አደራ እንደ ተሰጠችን ልናስተውል ይገባል። አገር የትውልድ ስፍራ ብቻ አይደለም፤ የልጆቻችን ቤት ናት። ዛሬ የምንዘራው ጥላቻ ነገ ልጆቻችን የሚሰበስቡት የጥፋት ውጤት ነው፤ ዛሬ የምንዘራው ፍቅር ግን ነገ ልጆቻችን የሚጠቀሙበት የሰላም ፍሬ ይሆናል። ስለሆነም አገርን እንውደድ፤ ሰላምን እንከተላት፤ ምክንያቱም ሰላም ከሌለ ልማት የለም፤ እውቀትም ጥቅም የለውምና፤ ሕፃናት የነገ ዕድላቸው ብሩህ ይሁን፤ ወጣቱም ተስፋ ይኑረው፤ ምክንያቱም ሀገር ነገ በሚያድጉ ወጣቶች ውስጥ አለችና!! ​የ2019 ዓ.ም የዘመን መለወጫ በዓልን ስናከብር ትኩረት ሊሰጠው የሚገባው አዲስ ዓመት አዲስ የልብ መታደስ ጉዞ ነው። 2018 ዘመነ ማርቆስ አልፏል። ብዙ ነገር ተመልከተናል፤ ብዙ ነገርም ሰምተናል፤ ደስታና ኀዘንን፤ ስኬትና ውድቀትን አስተናግደናል። አሁን ግን እግዚአብሔር አዲስ ዓመት ዘመነ ሉቃስን ሰጥቶናል። እኛም አዲስ ልብ ይዘን በተለወጠ ማንነት ልንቀበለው ያስፈልጋል። ​ይኸ ዘመን ሀገር የሚፈወስበት፤ እርስ በርስ መጨካከንን የምንጸየፍበት ፣ እስካሁን የፈሰሰው ንጹሕ የሰው ልጅ ደም የሚደርቅበት፤ የፈረሰው የፍቅርና የሰላም ድልድይ ዳግም የሚገነባበት ፤ ዘመን እንዲሆንልን ማንኛውም ኢትዮጵያውይ ነኝ የሚል በማንኛውም የሥልጣን እርከን የሚገኝ ሁሉ ለሕዝቦች ደህንነት፤ ለምድሪቱ ሰላም ሲባል እጁን ለሰላም የሚዘረጋበት ዘመን ፣ በማንኛውም ሁኔታ ውስጥ የሚገኝ የሰው ልጅ እደ ህሊናውንም እደ ሥጋውንም ወደ ፈጣሪ የሚያነሳበት ዘመን እንዲሆንልን አጽንኦት እየሰጠን!! ይህ አዲሱ ዘመን ዘመነ ሉቃስ የተሰጠን አዲስ ዕድል ስለሆነ የተራራቀውን አስተሳሰባችንን አቀራርበን የበደልነውን ይቅርታ የምንጠይቅበት፤ የተጎዳውን የምናጽናናበት፤ የምንኖርባት ቅድስት ኢትዮጵያ አገራችንንም ማንኛውም ዜጋ በፍቅርና በሰላም ለመኖር የድርሻውን የሚወጣበት ዘመን እንዲሆንልን እንመኛለን። በመጨረሻም ፈጣሪያችን ለሕዝባችን አንድነትና ፍቅር እንዲሰጥልን እየጸለይን ለሰዎች ሁሉ በጎውን በማሰብ፤ በመውደድና በመርዳት፤ ያለንን በማካፈልና በማገዝ፤ በየሆስፒታሉ የሚገኙ ሕሙማንንና በየማረሚያ ቤት ያሉ የሕግ ታራሚዎችን በመጠየቅ፤ አረጋዊያን አባቶቻችንንና እናቶቻችንን እንዲሁም ሕፃናትን በመርዳት በዓሉን ልናከብር ይገባል። ፈጣሪያችን ኢትዮጵያ ሀገራችንን ይጠብቅልን ፤ መልካም አዲስ ዓመት ይሁንልን። ​ “ወስብሐት ለእግዚአብሔር” አባ ቀሌምንጦስ በኢትዮጵያ ኦርቶዶክስ ተዋሕዶ ቤተ ክርስቲያን የሰንበት ትምህርት ቤቶች ማደራጃ መምሪያና የሰሜን ሸዋ ሀገረ ስብከት ሊቀ ጳጳስ!! ጳጉሜ 5 ቀን 2018 ዓ.ም ደብረ ብርሃን ፤ ኢትዮጵያ!!

፩ ቀን

፳፻፲፱

የእናታችን ቅድስት ክርስቶስ ሠምራ ዓመታዊ በዓል በሀገረ ማርያም ወረዳ ቤተ ክህነት ሥር በሚገኘውና የትውልድ ቦታዋ በሆነው በቅዱስጌ ቅድስት ክርስቶስ ሠምራ ቤተ ክርስቲያን በታላቅ ድምቀት ተከብሮ ውሏል።

ለሸዋሮቢት ደብረ ብሥራት ቅዱስ ገብርኤል ቤተክርስቲያን ለራስ አገዝ ፕሮጀክት ማስፈጸሚያ የሚሆን የገቢ ማሰባሰቢያ መርሐ ግብር ተካሄደ። ነሐሴ ፳፬ ቀን ፳፻፲፰ ዓ.ም(አቡቀለምሲስ ሚዲያ: ደብረ ብርሃን) +++++++++++++++++ በሰሜን ሸዋ ሀገረስብከት በሸዋሮቢት ወረዳ ቤተክህነት ሥር ለሚገኘው ደብረ ብሥራት ቅዱስ ገብርኤል ቤተክርስቲያን ለራስ አገዝ ፕሮጀክት ማስፈጸሚያ የሚሆን የገቢ ማሰባሰቢያ መርሐ ግብር በመንበረ ጸባዖት ቅድስት ሥላሴ ካቴድራል ሁለገብ አዳራሽ ተካሄዷል። መጋቤ ሐዲስ አድነው ወንድሙ "የተጠሩ ብዙዎች የተመረጡ ግን ጥቂቶች ናቸው" በሚል መጽሐፍ ቅዱሳዊ መነሻ ኃይለ ቃል ትምህርተ ወንጌል ሰጥተዋል። በመርሐ ግብሩ ላይ የተገኙት የሀገረስብከቱ ዋና ሥራ አሰኪያጅ ክቡር መጋቤ ሐዲስ ነቅዐ ጥበብ አባቡ "መልካም ነገር ለማድረግ አንታክት" በሚል የቅዱስ ጳውሎስ መልእክት መነሻ ኃይለ ቃል መልእክት አስተላልፈዋል። ክቡር ሥራ አስኪያጁ በመልእክታቸው ዛሬ እዚህ የተገናኘንው መልካም ነገርን ለማከናወን ብሎም በረከት እና በምድር የማይቀር ዋጋ የሚከፈልበትን ሥራ ለመሥራት ነው ብለዋል። የተጀመረው የልማት ሥራ የሚበረታታ እና የሕዝቡን አርቆ አሳቢነ፤ የልጆቹን፣ የወዳጆቹን ታታሪነት የሚያሳይ ትልቅ ሥራ ነው ያሉ ሲሆን ሁላችንም ተረባርበን ይህን የተጀመረውን ልማት ለፍጻሜ ማብቃት ይጠበቅብናል ሲሉ ገልጸዋል። በመላው ዓለም ለሚገኙ የቅድስት ቤተክርስቲያን ልጆች የመልአኩ ቅዱስ ገብርኤል ወዳጆች ሁሉም ለዚህ ትልቅ የበረከት ጥሪ የአቅሙን እንዲያደርግ አባታዊ መልእክት አስተላልፈዋል። በመርሐ ግብሩ ላይ የደብሩ አስተዳዳሪ መልአከ ብሥራት ዘካርያስ ሽቶ፣ የወረዳ ቤተክህነቱ የሥራ ሓላፊዎች ፣ ታላላቅ መምህራን፣ ዘማርያን እንዲሁም ጥሪ የተደረገላቸው ተጋባዥ እንግዶች ተገኝተዋል።

የብፁዕ አባታችን አቡነ ቀሌምንጦስ በሀገረ ስብከታቸው ያደረጓቸው የ፱ ዓመታት ዕረፍት አልባ ሐዋርያዊ አገልግሎት ከስር ያለውን ማስፈንጠሪያ በመጫን ያገኙታል!! https://youtu.be/dsp7e2NspqY?si=Ny5I4Jjjn8QRbO2c

የብፁዕ አባታችን አቡነ ቀሌምንጦስ በሀገረ ስብከታቸው ያደረጓቸው የ፱ ዓመታት ዕረፍት አልባ ሐዋርያዊ አገልግሎት ከስር ያለውን ማስፈንጠሪያ በመጫን ያገኙታል!! https://youtu.be/dsp7e2NspqY?si=Ny5I4Jjjn8QRbO2c