FastMereja.com

ለተከታታይ 4 ጊዜ እርግዝናዋ የተስጓጎለባት እናት፣ በ5ኛው እርግዝናዋ የአብራኳን ክፍያ ማቀፍ ቻለች። #FastMereja I ነዋሪነቷን በጅማ ከተማ ያደረገችው ወይዘሮ ሰሚራ መሰለ የአብራኳን ክፍያ ለማቀፍ ሽታ በተጋጋሚ ጸንሳለች። ዳሩ ግን እዳሰባችው ሳይሆን ቀርቶ በተከታታይ 4 ጊዜ ጸንሳ ባላዉቀችው የጤና እክል ምክንያት ጽንጽ ጠፍቶባታል። ተስፋ ያልቆረጠች እናት በሆድዋ የተጸነሰው 5 ኛው እርግዝና በጅማ ዩኒቨርስቲ ህክምና ማዕከል ተደረገላት የእርግዝና ክትትልና አስፈላጊው ህክምና የጓጓችለትን ልጇን እድታቅፍ ረድቷታል። እናት ለመሆን ጓጉታ በደጋጋሚ እርግዝናዋ የተስተጓጎለባት ሰሚራ የእርግዝና ክትትልና ምርመራ አለማድረጌ ለተደጋጋሚ ችግር ዳርጎኛል ትላለች። ጥንካሬና ተስፋ ያለመቁረጥን የሰነቀችው 13 አመታትን በስደት ያሳለፈችው እናት፣ ለነበረው የጤና ችግር በጊዜ ተመርምሮ ምፍቴ ያለማበጀትና የእርግዝና ክትትል ያለማድረግ ዋጋ እንደሚያስከፍል መገንዘቧን በመግለጽ ከኔ ተማሩ ብላለች። በመጨረሻም ባለቤቷ ከአቶ ረሻድ ከማል አስቅድመው ባላወቁት የሾተለይ የጤና እክል ምክንያት ጽንሱ እንዳይስተጓገል የጤና ባለሞያዎቹ ባደረጉላት ድጋፍ እና ህክምና አይኑን በአይኑ በማየቱ መደሰቱን ገልጿል። በጅማ ዩኒቨርስቲ ህክምና ማዕከል የማህጽን እና ጽንስ ሀኪም እንዲሁም የፔቶ ማተራል ሜዲስን ሰብ ስፔሻሊስት ዶ/ር ደጀኔ አሰፋ እናቲቱ ለተዳጋጋሚ እርግዝና መስተጓጎል የዳረገው በተለምዶው ሾተላይ በህክምናው (Rh-isoimmunization) የእናትና የልጅ የደም አይነት (Rh factor) አለመጣጣም የጤና እክል መሆኑን ያስረዳሉ። ይህን ችግር በመገንዘብ እደም አይነቷን በመለየት በሆዷ የለው ልጅ በደም ማነስ እንዳይጎዳ O- (O minus ) ደም በመስጠትና እናት አጋጥሟት ለነበረው የደም ግፊትን በማከም ጤናማ ልጅ እንድትገላገል መደረጉን ዶ/ር ደጀኔ ተናግረዋል። ሴቶች እርግዝና ከመፈጠሩ በፊት የደም አይነታቸውን ማወቅ ፣የእርግዝና ክትትል ማድረግ ሾተላይን ችግር እንዳይከሰት አስፈላጊውን ህክምና እና ክትባት በመስጠት አስቀድሞ መከላከል እንደሚያስችል ዶ/ር ደጀኔ አስረድረዋል። በወርቅአፈራው ያለው

ዘጸአት ጉዞ እና ጉብኝት ይፋዊ የስራ ማስጀመሪያ መርሃ ግብሩን አካሄደ ​ #FastMereja I ዘጸአት ጉዞ እና ጉብኝት ኃላፊነቱ የተወሰነ የግል ማህበር ዛሬ ጥቅምት 21 ቀን 2019 ዓ.ም ይፋዊ የስራ ማስጀመሪያ መርሃ ግብሩን በአዲስ አበባ በሚገኘው ክሪሰንት ኢንተርናሽናል ሆቴል በደማቅ ሁኔታ አካሂዷል። ድርጅቱ ዋነኛ ትኩረቱን የሀገር ውስጥ እና የውጭ ጉዞዎች ላይ በማድረግ ኢትዮጵያውያን እና የውጭ ሀገር ዜጎች ታሪካዊና መንፈሳዊ መዳረሻዎችን በዕውቀት፣ በምክንያት እና ለበረከት እንዲጎበኙ ለማስቻል የተቋቋመ መሆኑ ተገልጿል። በተጨማሪም ከመላው ዓለም የሚመጡ የውጭ ሀገር ጎብኝዎችን ወደ ኢትዮጵያ በማምጣት የሀገሪቱን ቅዱሳት መካናት፣ ገዳማት እና የቱሪዝም መዳረሻዎች የማስተዋወቅ ስራ እንደሚሰራ ተመላክቷል። ​ተጓዦች ወደተለያዩ መዳረሻዎች ለመጓዝ ፈልገው ሙሉ ክፍያ በአንድ ጊዜ ለመክፈል አቅም ለሚያንሳቸው ደንበኞች ታሳቢ ያደረገ የብድር የጉዞ አማራጭ ማዘጋጀቱ ተገልጿል። ይህም አሰራር ከፋይናንስ ተቋማትና ከባንኮች ጋር በተደረገ ስምምነት መሰረት የኢትዮጵያ ብሔራዊ ባንክን መመሪያ ተከተሎ የሚፈጸም መሆኑ ተብራርቷል። ​ከተለያዩ የሙያ መስኮች በተወጣጡ ባለሙያዎች የተመሰረተው ዘጸአት ጉዞ እና ጉብኝት፤ ድርጅቱን ለቀጣይ አንድ ዓመት እንድታስተዋውቅ አርቲስት ቃልኪዳን አበራን ብራንድ አምባሳደር አድርጎ የሾመ ሲሆን፣ ዘፀአት ከኢምፓየር ቢዝነስ ግሩፕ እና ከጎዶልያስ ጋር አብሮ ለመስራት የጋራ ስምምነት ተፈራርሟል። ​በመጨረሻም በመርሃ ግብሩ ላይ በሆቴል እና ቱሪዝም ዘርፍ ላበረከቱት ላቅ ያለ አስተዋፅኦ ለሻለቃ ኃይሌ ገብረስላሴ የክብር ሽልማት የተበረከተ ሲሆን፤ ለጋዜጠኛ ጥበቡ በለጠ፣ ለተጓዡ ጋዜጠኛ ሄኖክ ስዩም እንዲሁም ለይዘት ፈጣሪው አቤል ብርሃኑ (የወይኗ ልጅ) የእውቅናና የክብር ሽልማት ተበርክቶላቸዋል።

ፖወር ጂም ከአዲስ አበባ ከተማ አስተዳደር ወጣቶችና ስፖርት ቢሮ ጋር በመተባበር ያሰለጠናቸውን 30 የዘመናዊ የአካል ብቃት ባለ ፖወር ጂም ከአዲስ አበባ ከተማ አስተዳደር ወጣቶችና ስፖርት ቢሮ ጋር በመተባበር ያሰለጠናቸውን 30 የዘመናዊ የአካል ብቃት ባለሙያዎች በደማቅ ሁኔታ አስመረቀ #FastMereja I የአዲስ አበባ ከተማ አስተዳደር ወጣቶችና ስፖርት ቢሮ ከ«ፓወር ጂም» ጋር በመተባበር በከተማዋ የስፖርት ልማት ለማጠናከር፣ አትሌቶችን በአቅም ለመገንባት እና ለወጣቶች ሰፊ የስራ ዕድል ፈጠራን ለመፍጠር ያለመውን የትብብር ስራ ውጤት አስመዝግቦ 30 የዘመናዊ የአካል ብቃት ባለሙያዎችን በይፋ አስመረቀ። በፓወር ጂም እና በቢሮው መካከል የተደረገውን የመግባቢያ ሰነድና የትብብር ማዕቀፍ ተግባራዊ ለማድረግ የተከናወነው ይህ መርሃ ግብር፣ በከተማዋ የአካል ብቃት ዘርፍ የባለሙያ አቅምን ለማሳደግ ትልቅ ምዕራፍ የሚከፍት መሆኑ ተገልጿል። ለሦስት ወራት ያህል ሲሰጥ የቆየው እና በአጠቃላይ 63 ሰዓታት የፈጀው ጥልቅ ሥልጠና፤ የጽሁፍ እና የተግባር ክንውኖችን ያካተተ ነበር። የሥልጠናው ይዘት በዋናነት አናቶሚና ፊዚዮሎጂ፣ ፈርስት ኤይድ (የመጀመሪያ እርዳታ)፣ ኒውትሪሽን ሳይኮሎጂ እና ፊትነስ የመሳሰሉ ወሳኝ የሙያ ዘርፎችን የሸፈነ ሲሆን፣ ለአሰልጣኞች በዘርፉ ብቁና ዓለም አቀፍ ደረጃቸውን የጠበቁ እውቀቶችን እንዲጨብጡ ከፍተኛ ትኩረት ሰጥቷል። ሰልጣኞቹ ዓለም አቀፍ ደረጃውን የጠበቀ ሳይንሳዊ ዕውቀት እንድጨብጡ ለማድረግም 5 የሜዲካል ዶክተሮች እና የፒኤችዲ (PhD) ባለቤቶች ሥልጠናውን በመስጠት ከፍተኛ አስተዋጽኦ አበርክተዋል። የፓወር ጂም አስተዳደር እንደገለጸው፣ ተቋሙ በዘርፉ የንግድ አገልግሎት ከመስጠት ባለፈ ዘርፉን በብቁ ባለሙያዎች የማፍራት ማህበራዊ ኃላፊነቱን እየወጣ ይገኛል። ከከተማ አስተዳደሩ ወጣቶችና ስፖርት ቢሮ ጋር የተጀመረው ይህ አጋርነት የሙያ ዕውቀትን በስፋት ለማዳረስ እና የሰለጠነ የሰው ኃይል ለገበያ ለማቅረብ የተወሰደ ወሳኝ ተግባራዊ እርምጃ መሆኑ ተነግሯል። ለቀጣይ የስራ አፈፃፀምም ፖወር ጂምና የአዲስ አበባ ወጣቶችና ስፖርት ቢሮ የተፈራረሙትን የትብብር ማዕቀፍ በተሻለ መልኩ ለማስቀጠል በመደበኛ የክትትልና የግምገማ ሥርዓት በቅርበት አብረው እንደሚሠሩ ተረጋግጧል። የዚህ የመጀመሪያ ዙር 30 ሰልጣኞች ማጠናቀቅ በከተማዋ የሚገኙ የስፖርት ስልጠና ማዕከላትን ለማዘመን እና ዘመናዊ የአካል ብቃት አሰራርን ለማስፋፋት ትልቅ መሰረት የሚጥል መሆኑ ተነግሯል።

የአዋሽ ባንክ ጠቅላላ ሀብት ከ624 ቢሊዮን ብር ማለፉ ተገለጸ፤ ባንኩ ታሪካዊ የተባለ የ38.3 ቢሊዮን ብር ያልተጣራ ትርፍ አ የአዋሽ ባንክ ጠቅላላ ሀብት ከ624 ቢሊዮን ብር ማለፉ ተገለጸ፤ ባንኩ ታሪካዊ የተባለ የ38.3 ቢሊዮን ብር ያልተጣራ ትርፍ አግኝቷል #FastMereja I አዋሽ ባንክ እ.ኤ.አ. እስከ ሰኔ 30 ቀን 2026 በነበረው የሒሳብ ዓመት ጠቅላላ ሀብቱን ከ624 ቢሊዮን ብር በላይ ማድረሱን አስታወቀ። ባንኩ በሒሳብ ዓመቱ በግል ባንኮች ታሪክ ከፍተኛ የተባለውን 38.3 ቢሊዮን ብር ያልተጣራ ትርፍ ማስመዝገቡንም ገልጿል። ጥቅምት 21 ቀን 2019 ዓ.ም በአዲስ አበባ ስካይላይት ሆቴል በተካሄደው የባንኩ 31ኛ መደበኛ እና 19ኛ አስቸኳይ የባለአክሲዮኖች ጠቅላላ ጉባኤ ላይ የዳይሬክተሮች ቦርድ ሰብሳቢ አቶ ጉሬ ኩምሳ የዓመቱን አፈጻጸም ይፋ አድርገዋል። እንደ ሰብሳቢው ገለጻ፣ የባንኩ ጠቅላላ ሀብት ካለፈው ዓመት ተመሳሳይ ወቅት ጋር ሲነጻጸር የ181.4 ቢሊዮን ብር ወይም የ41 በመቶ ዕድገት በማሳየት በሀገሪቱ የግል ባንኮች ታሪክ ከፍተኛው ሆኖ ተመዝግቧል። በተመሳሳይ የባንኩ የተከፈለ ካፒታል 38.5 ቢሊዮን ብር የደረሰ ሲሆን፣ ይህም የብሔራዊ ባንክን መስፈርት በቀዳሚነት ማሟላቱንና በዘርፉ ቀዳሚ አድርጎታል። ባንኩ በበጀት ዓመቱ 84.6 ቢሊዮን ብር ጠቅላላ ገቢ ያገኘ ሲሆን፣ የተቀማጭ ገንዘብ መጠኑም በ41 በመቶ እድገት በማሳየት 469.3 ቢሊዮን ብር መድረሱ ተገልጿል። የብድር መጠን በ54.5 ቢሊዮን ብር በመጨመር 274.1 ቢሊዮን ብር የደረሰ ሲሆን፣ 2.6 ቢሊዮን የካናዳ/አሜሪካ ዶላር የውጭ ምንዛሪ መገኘቱም ተጠቅሷል። በሌላ በኩል አዋሽ ባንክ በ2018 የበጀት ዓመት 15.77 ቢሊዮን ብር የገቢ ግብር በመክፈል ከሀገሪቱ ከፍተኛ ግብር ከፋይ የግል ተቋማት አንዱ መሆኑ ተገልጿል። በተጨማሪም ባንኩ በግሎባል ፋይናንስ መጽሔት ለ5ኛ ጊዜ “የኢትዮጵያ ምርጥ ባንክ” ተብሎ የተመረጠ ሲሆን፣ በታይላንድ ባንኮክ በተካሄደው ሥነ-ሥርዓት ላይ የWSBI-ESBG የዘላቂ ልማት ግቦች (SDGs) ሽልማትን ለ2ኛ ጊዜ ተቀብሏል። ባንኩ ለማህበራዊ ኃላፊነት መወጫ ከግማሽ ቢሊዮን ብር በላይ ድጋፍ ማድረጉንም በሪፖርቱ አመላክቷል።

አዲስ የተሾሙት አመራሮች በሁርሶ ወታደራዊ ማሠልጠኛ ሥልጠና እየወሰዱ

ቅዱስ ሲኖዶስ በብፁዕ አቡነ ሩፋኤል ላይ ቀኖናዊ ውሳኔ አሳለፈ፤ አዳዲስ የሀገረ ስብከት ሹመቶችም ተሰጡ #FastMereja I የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ ምልአተ ጉባኤ ጥቅምት 20 ቀን 2019 ዓ.ም ባደረገው ስብሰባ፣ ቀደም ሲል በአጀንዳነት ሲመረመሩ የቆዩትን የጋምቤላ እና የቤንሻንጉል ጉምዝ አሶሳ ሀገረ ስብከቶች ጉዳይ መርምሮ የተለያዩ ውሳኔዎችን ማሳለፉን የቅዱስ ሲኖዶስ ጽሕፈት ቤት የኮሚዩኒኬሽን ኃላፊ መምህር ዳንኤል ሰይፈሚካኤል (ረ/ፕ) ገለጹ። እንደ መምህር ዳንኤል መግለጫ፣ በአጣሪ ልዑካን የቀረቡ የሰነድ ማስረጃዎችን፣ የሂሳብና ንብረት ቁጥጥር ሪፖርቶችን መሠረት በማድረግ ውይይት ተደርጓል። በወቅቱ የአህጉር ስብከቱ ሊቀ ጳጳስ የነበሩት ብፁዕ አቡነ ሩፋኤል ለተፈጠሩት ጥፋቶች በጉባኤው ፊት በአካል ቀርበው ይቅርታ የጠየቁ ሲሆን፣ የይቅርታ ጥያቄያቸውን በጽሑፍም አቅርበዋል። ምልአተ ጉባኤው የብፁዕነታቸውን የይቅርታ ደብዳቤ በንባብ ከመረመረ በኋላ በተነሱት የቀኖና ጥሰቶች፣ የአስተዳደርና የአሠራር ክፍተቶች ዙሪያ በሰፊው በመወያየት የቀኖና እና አስተዳደራዊ ውሳኔዎችን አሳልፏል። በዚህም መሠረት ብፁዕ አቡነ ሩፋኤል እስከ ግንቦት 2019 ዓ.ም የርክበ ካህናት ምልአተ ጉባኤ ድረስ በየትኛውም ሀገረ ስብከት ሳይመደቡ በደብረ ሊባኖስ ቅዱስ አቡነ ተክለሃይማኖት ገዳም በጸሎትና በሱባኤ እንዲቆዩ፣ ወደ ገዳም ከመሄዳቸው በፊት ለአህጉር ስብከት ማስረከብ የሚገባቸውን መኪኖች ለመንበረ ፓትርያርክ ጠቅላይ ቤተ ክህነት እንዲያስረክቡ፣ እንዲሁም ከሂሳብ ጋር የተያያዘው ጉዳይ እስከ ግንቦት ርክበ ካህናት እንዲጣራ ወስኗል። በተጨማሪም የቅዱስ ሲኖዶስ ምልአተ ጉባኤ ክፍት በሆኑ አህጉር ስብከቶች ላይ ብፁዓን አባቶችን መድቧል። በዚህ መሠረት ብፁዕ አቡነ ኤፍሬም የቄለም ወለጋ ሀገረ ስብከትን ደርበው እንዲመሩ፣ ብፁዕ አቡነ ኤዎስጣቴዎስ (ዶ/ር) የጋምቤላ ሀገረ ስብከትን ደርበው እንዲመሩ፣ እና ብፁዕ አቡነ ሰላማ የሰቲት ሁመራና ወልቃይት ጠገዴ ሀገረ ስብከትን ደርበው እንዲመሩ ተወስኗል። ምልአተ ጉባኤው በእለቱ የአዲስ አበባ ሀገረ ስብከትን የተመለከተ የአጣሪዎች ሪፖርት በማዳመጥ እና የብፁዕ አቡነ ሕርያቆስንና የአስተዳደር ጉባኤ አባላትን ምላሽ በመመልከት ውይይቱን መቀጠሉን የኢኦተቤ መገናኛ ብዙኃን አገልግሎት ሥርጭት ድርጅት ዘገባ አመልክቷል።

የትራንስፖርት ተቆጣጣሪ በመምሰል አንዲትን ሴት አሽከርካሪ ለማገት የሞከረ ግለሰብ በቁጥጥር ስር ዋለ #FastMereja I ተገኝ መውደድ የተባለ ተጠርጣሪ ወንጀሉን የፈፀመው ጥቅምት 17 ቀን 2019 ዓ.ም በኮልፌ ቀራንዮ ክ/ከተማ ወረዳ 7 ልዩ ቦታው አንፎ ኬላ አካባቢ በግምት ከጠዋቱ 2፡30 ሰዓት ገደማ ነው። የግል ተበዳይ የሰሌዳ ቁጥር ኮድ3-07482 ሱ/ማ የሆነ መኪና እያሽከረከሩ በነበረበት ወቅት ግለሰቡ አንፀባራቂ ልብስ ለብሶ የትራንስፖርት ተቆጣጣሪ ነኝ በማለት የግል ተበዳይን አስቁሞ የትራፊክ ደንብ ጥሰሻል በሚል የመንጃ ፍቃዳቸውን ከተቀበለ በኃላ ወደ ቢሮ ትሄጃለሽ በማለት መኪናው ውስጥ ገብቶ እንቅስቃሴ ይጀምራሉ። የተወሰነ መንገድ እንደተጓዙም ከዚህ ሰዓት ጀምሮ ታግተሻል እኔ ወደ ምልሽ ቦታ መኪናውን አሽከርካሪ በማለት ሽጉጥ አውጥቶ ያስፈራራቸዋል። የግል ተበዳይ ለጊዜው ሽጉጡን ሲያዩ ቢደናገጡም መኪናውን እያሽከረክሩ የፖሊስ አባላትን ሲመለከቱ ባሰሙት የድረሱልኝ ጥሪ ግለሰቡ ወደ ሰማይ አንድ ጥይት ተኩሶ ለማምለጥ ቢሞክርም በቁጥጥር ስር መዋሉን የክፍለ ከተማው ፖሊስ ዋና መምሪያ አስታውቋል። ተጠርጣሪው በቁጥጥር ስር ከዋለ በኋላ የፍርድ ቤት መበርበሪያ ትዕዛዝ በማውጣት የመኖሪያ ቤቱ ሲፈተሽ ለወንጀል መፈፀሚያ የሚጠቀምበት 1 ቱርክ ሰራሽ ሽጉጥ ከመሰል 14 ጥይት ጋር፣ አንፀባራቂ ልብስና 1 ሳንጃ እንዲሁም ብዛት ያላቸው የተሰረቁ የኤሌክትሪክ ገመዶች በተጨማሪ መገኘቱን ፖሊስ ገልጿል። ፖሊስ እንዳለው አንፀባራቂ ልብስ በመልበስና ህጋዊ በመምሰል ወንጀል የሚፈፅሙ ግለሰቦችን ለመከላከል ህጋዊነታቸውን የሚገልጽ መታወቂያና ባጅ እንዳላቸው ህብረተሰቡ ማረጋገጥ ይኖርበታል። ወንጀል ከተፈፀመም በአፋጣኝ ለፖሊስ ማሳወቅ እንደሚገባ መልዕክቱን አስተላልፏል። Via Addis Ababa Police

በኮዬ ፈጬ በ300 ሚሊዮን ብር ወጪ የተገነባው “ከንረቢ ጫላ” ሆቴልና መዝናኛ ለምርቃት ተዘጋጀ ​ #FastMereja I በኮይ ፈጬ እና በዙሪያው ባሉ አካባቢዎች የሚስተዋለውን የመዝናኛ ቦታዎች እጥረት ለመቅረፍ የሚያስችል፣ በ300 ሚሊዮን ብር በላይ ወጪ የተገነባው “ከንረቢ ጫላ” የተሰኘው ዘመናዊ ሆቴልና መዝናኛ ተጠናቆ ለምርቃት መዘጋጀቱን ባለቤቱ አቶ ጫላ ቱፋ (አባ ገዳ ጫላ ቱፋ) አስታወቁ። ባለቤቱ ቀደም ሲል በአርሶ አደርነትና በተለያዩ የንግድ ስራዎች ተሰማርተው ሲሰሩ እንደነበር ገልጸው፤ ከእርሻ ስራ ጎን ለጎን በዶሮ፣ እንቁላል፣ በግ እና ከብት እርባታና ንግድ በመሳተፍ ለአሁኑ ስኬት መብቃታቸውን ተናግረዋል። “ከንረቢ ጫላ” ማለት በኦሮምኛ “የእግዚአብሔር ይበልጣል” የሚል ፍቺ ያለው ሲሆን፣ የህንፃው ግንባታ ከአንድ ዓመት በፊት ተጀምሮ በፍጥነት መጠናቀቁ ተገልጿል። ​ህንፃው በቀጣይ እስከ 9 ፎቅ ለማሳደግ የታቀደ ሲሆን፣ በውስጡ ከ60 በላይ ዘመናዊ የመኝታ ክፍሎችን፣ የVIP እና VVIP አገልግሎቶችን እንዲሁም የመመገቢያ አዳራሾችን ያካተተ ነው። ከዚህ በተጨማሪም ከ60 በላይ ተሽከርካሪዎችን በአንድ ጊዜ ማስተናገድ የሚችል አስተማማኝ የመሬት ስር (ግራውንድ) ፓርኪንግ እና የጥበቃ ስርዓት የተዘጋጀለት ሲሆን፣ በሆቴሉ የሚቀርቡት እንደ ስጋ እና እንጀራ ያሉ ምግቦች ሙሉ በሙሉ ከአካባቢው እርሻ እና በአዳማ በሚገኘው የበረት ማደለቢያ ከደለቡ ከብቶች የሚዘጋጁ በመሆናቸው 100% ኦርጋኒክ እንደሆኑ ተገልጿል። ድርጅቱ በአሁኑ ወቅት በዚህ ቅርንጫፍ ለ150 ዜጎች፣ በሌላኛው ቅርንጫፍ ደግሞ ከ50 በላይ ለሚሆኑ ሰራተኞች (በአጠቃላይ ከ200 በላይ ለሆኑ ዜጎች) የቋሚ ስራ እድል መፍጠሩን የድርጅቱ መረጃ ያመላክታል። ​የሆቴሉ የምርቃት ስነ-ስርዓት ከጥቅምት 28 እስከ ህዳር 4 ቀን 2019 ዓ.ም ለተከታታይ 7 ቀናት በደመቀ ሁኔታ እንደሚካሄድ አቶ ጫላ ገልጸው፤ ለከተማው ማህበረሰብ፣ ለዘመድ ወዳጆችና ለደንበኞች ጥሪ አስተላልፈዋል። የሆቴሉ አድራሻ ከኮዬ አደባባይ ወደ ቱሉ ዲምቱ በሚወስደው መንገድ አዲስ አበባ ሳይንስና ቴክኖሎጂ ዩኒቨርሲቲ (AASTU) ፊት ለፊት ይገኛል። ​ባለቤቱ ማህበራዊ ሀላፊነታቸውን ለመወጣት በኮዬ አካባቢ ከ15 ሚሊዮን ብር በላይ ወጪ በማድረግ ሁለት የንጹህ መጠጥ ውሃ ጉድጓዶችን አስቆፍረው ለአካባቢው ነዋሪዎች አገልግሎት እንዲሰጡ ማድረጋቸውንም አክለው ገልጸዋል። በቀጣይም የመንግስትን የኢንቨስትመንት ፈቃድ በማስፋፋት ለህፃናት መጫወቻ ቦታዎችን፣ የመዋኛ ገንዳዎችን፣ የባህል ቤቶችን እና ሰፊ የህዝብ መዝናኛዎችን የመገንባት ትልቅ እቅድ እንዳላቸው አስታውቀዋል። #ቢዝነስ

የዘማሪ ጉቱ ሽፈራው 3ኛ የመዝሙር አልበም “ቁልቁሉ” እሁድ ይመረቃል። ​ #FastMereja I ዘማሪ ጉቱ ሽፈራው «ቁልቁሉ» የተሰኘውን 3ኛ የመዝሙር አልበሙን ሊያስመርቅ መሆኑን አስታወቀ። አልበሙን አስመልክቶ ዛሬ ጥቅምት 19 ቀን 2019 ዓ.ም በአዲስ አበባ ኢሊሊ ሆቴል ጋዜጣዊ መግለጫ የተሰጠ ሲሆን፣ የዝግጅቱ አጠቃላይ ዝርዝሮች ለህዝብ ይፋ ተደርገዋል። ​እንደ ጋዜጣዊ መግለጫው ማብራሪያ፣ ዘማሪ ጉቱ ሽፈራው ከዚህ ቀደም “ኦልቻ” የተሰኘ የመጀመሪያ የመዝሙር አልበም እና “ደጋ ጐሌ” የተሰኘ ሁለተኛ የመዝሙር አልበም ለህዝብ አድርሷል። ባለፈው የሥራ ዘመኑ ከፌኖ ሚኒስትሪ ጋር በመተባበር በቀጠና ሁለት ሙሉ ወንጌል ቤተክርስቲያን እንዲሁም በጉለሌ ቤተል ህይወት ብርሃን ቤተክርስቲያን ታላላቅ የመዝሙር ድግሶችን ያዘጋጀ ሲሆን፣ በእነዚያው መርሃ ግብሮች ላይ የ1970ዎቹን አርበኞችና አባቶች ዘማሪያን በመጋበዝ ተገቢውን እውቅና መስጠቱ ይታወሳል። ​አሁን ሶስተኛው “ቁልቁሉ” የመዝሙር አልበም የፊታችን እሁድ ጥቅምት 22 ቀን 2019 ዓ.ም በአዲስ ኪዳን ካህናት ኢንተርናሽናል ቤተክርስቲያን (አዲስ አበባ ገርጂ አጥቢያ) በድምቀት እንደሚመረቅ ተገልጿል። ለታዳሚዎች ምቹ ሁኔታን ለመፍጠርም ከአራቱም አቅጣጫዎች ወደመርሃ ግብሩ ማዕከል የሚያደርስ የትራንስፖርት አገልግሎት መዘጋጀቱ በመግለጫው ተመላክቷል። ​አዘጋጆቹ እና ዘማሪው በመርሃ ግብሩ ላይ ጥሪ የተደረገላቸው አካላት፣ የወንጌል አማኞች እና አጠቃላይ ምዕመናን በሰዓቱ በመገኘት የበረከቱ ተካፋይ እንዲሆኑ ጥሪያቸውን አስተላልፈዋል። #ኹነት

ታላቁ የኢትዮ ዶሮ እና የእንስሳት ሀብት ኤክስፖ በይፋ ተከፈተ! #Fastmereja:-16ኛው የኢትዮ ዶሮ ኤክስፖ (ኢትዮፔክስ) እና 11ኛው የአፍሪካ የእንስሳት ሀብት አውደ ርዕይና ጉባኤ (አሌክ)ን ጨምሮ በርካታ ዓለም አቀፍ የንግድ ትርዒቶች ዛሬ በአዲስ ኢንተርናሽናል ኮንቬንሽን ሴንተር (AICC) በይፋ ተከፈቱ። ከዛሬ ጥቅምት 19 እስከ 21 ቀን 2019 ዓ.ም ለሦስት ተከታታይ ቀናት የሚቆየው ይህ ታላቅ ኩነት፤ 14 ሀገራትን የሚወክሉ ከ130 በላይ ተሳታፊ ድርጅቶችን ያሰባሰበ ሲሆን፣ ከ4,000 በላይ የንግድ ጎብኚዎችና ባለሀብቶች ይገበኛሉ ተብሎ ይጠበቃል። በፕራና ኤቨንትስ ከኤክስፖ ቲም ፎር ሰርቪስ ጋር በመተባበር የተዘጋጀው ይህ መድረክ፤ የኢትዮ ዶሮ ኤክስፖ፣ የአፍሪካ የእንስሳት ሀብት አውደ ርዕይ፣ 6ኛው የኢትዮጵያ የማር ኤክስፖ፣ የኢትዮጵያ የአሳ ኤክስፖ እንዲሁም የባዮ ኢነርጂ ቴክኖሎጂዎችን በአንድ ጣሪያ ስር አያይዞ አቅርቧል። የመድረኩ ዋና ዓላማ በእንስሳት ሀብት እሴት ሰንሰለት ውስጥ የሚገኙ አምራቾችን፣ የቴክኖሎጂ አቅራቢዎችን፣ ባለሙያዎችንና የልማት አጋሮችን በማገናኘት የንግድ ትስስርን፣ የዕውቀትና የቴክኖሎጂ ልውውጥን ማጠናከር መሆኑን አዘጋጆቹ ገልጸዋል። በዘንድሮው ዝግጅት የኔዘርላንድስ ኤምባሲ በብሔራዊ ፓቪሊዮን የተሳተፈ ሲሆን፣ የሀገሪቱ ኩባንያዎች በመኖ እና የወተት ማቀነባበሪያ ቴክኖሎጂዎች ላይ ያሏቸውን መፍትሔዎች በማቅረብ ላይ እንደሚገኙ ተገልጿል። የግብርና ሚኒስቴር መረጃ እንደሚጠቁመው በ2018 የበጀት ዓመት በአገሪቱ ከ15.8 ቢሊዮን ሊትር በላይ ወተት እና 11.7 ቢሊዮን እንቁላል የተመረተ ሲሆን፣ የዚህ ዓይነቱ አውደ ርዕይ የ”ሌማት ትሩፋት” መርሃ ግብርን በመደገፍ የእንስሳት ምርትና ምርታማነትን ለማሳደግ ትልቅ ሚና እንደሚጫወት ታምኖበታል። ከኤግዚቢሽኑ ጎን ለጎን የዘርፉ ጉባኤዎች፣ የቢዝነስ ለቢዝነስ (B2B) የንግድ ትስስር ውይይቶች እና የመንግስትና የግሉ ዘርፍ የምክክር መድረኮች በሚቀጥሉት ቀናት እንደሚካሄዱ ተገልጻል።

በአርሲ ዞን በተፈጸመው ጥቃት የህንድ ማላንካራ ኦርቶዶክስ ሶሪያን ቤተክርስቲያን ፓትሪያርክ የተሰማቸውን ጥልቅ ኀዘን ገለጹ #FastMereja I በኦሮሚያ ክልል አርሲ ዞን በኢትዮጵያ ኦርቶዶክስ ተዋሕዶ ቤተክርስቲያን ምዕመናን ላይ በተፈጸመው ጥቃት ወደ 45 የሚጠጉ ሰዎች ሕይወታቸው ማለፉን የሚገልጹ ዘገባዎችን ተከትሎ የህንድ ማላንካራ ኦርቶዶክስ ሶሪያን ቤተክርስቲያን ፓትሪያርክ ብፁዕ አቡነ ባሴሊዮስ ማርቶማ ማቴዎስ 3ኛ ጥልቅ ኀዘናቸውን ገልጸዋል። ብፁዕነታቸው ለኢትዮጵያ ኦርቶዶክስ ተዋሕዶ ቤተክርስቲያን ፓትሪያርክ ለብፁዕ ወቅዱስ አቡነ ማትያስ፣ ለቤተክርስቲያኗ እና ለተጎጂ ቤተሰቦች የተሰማቸውን ጥልቅ መፅናናትና ጸሎት የላኩ ሲሆን፣ ድርጊቱንም በጽኑ ኮንነዋል። “የንጹሐን ሰዎችን ሕይወት ማጥፋት የሕይወትን ቅድስና፣ የሰብዓዊ ክብርን፣ የሃይማኖት ነፃነትን እና የአብሮ መኖር መርሆዎችን የሚጥስ አሰቃቂ ድርጊት ነው” ሲሉ ገልጸዋል። የማላንካራ ኦርቶዶክስ ሶሪያን ቤተክርስቲያን የሕዝብ ግንኙነት ክፍል ያወጣውን መግለጫ መሠረት በማድረግ እንደተገለጸው፣ ፓትሪያርኩ በሚመለከታቸው አካላት በኩል የንጹሐን ዜጎችን ደህንነት የመጠበቅ፣ ፍትሕን የማረጋገጥ እና ተጨማሪ ጥቃቶችን የመከላከል እርምጃዎች በአስቸኳይ እንዲወሰዱ አሳስበዋል። በሁለቱ አህጉረ አብያተ ክርስቲያናት መካከል ያለው ታሪካዊ እና ሐዋርያዊ የእምነት አንድነት የጠበቀ መሆኑን ያመለከቱት ፓትሪያርኩ፣ ለተጎዱ ቤተሰቦች፣ ለቆሰሉት እና ለጠቅላላው የኢትዮጵያ ሕዝብ መፅናናትንና ሰላምን ተመኝተዋል።

የታሸጉ ውሀዎችን በተመጣጣኝ ዋጋ ለህብረተሰቡ ለማቅረብ ከውሀ አምራቾች ማህበር ጋር ስምምነት ተደረሰ። #FastMereja I የአዲስ አበባ ንግድ ቢሮ ከውሀ አቅራቢዎች ማህበር አመራሮች ጋር በመዲናችን አዲስ አበባ የታሸጉ ውሀዎች በተመጣጣኝ ዋጋ በሚቀርብበት ሁኔታ ላይ የውይይት መድረክ አካሂዷል። በውይይት መድረኩ ከታሸጉ ውሀዎች አቅርቦት ጋር ተያይዞ ከዋጋና ከጥራት አንፃር የተካሄደ የዳሰሳ ውጤት ቀርቦ ውይይት ተካሂዶበታል። በመድረኩ የውሀ አቅራቢዎች ማህበር አመራሮች የከታሸገ ውሀን ከማምረት ጀምሮ በግብይት ሂደት ይታያሉ ያሏቸውን ችግሮች በተለይም የማምረቻ ጥሬ ዕቃ ላይ ያለውን የደላላ ጣልቃ ገብነት አንስተው በመንግስት በኩል መፍትሄ እንዲሰጥበት ጠይቀዋል። የአዲስ አበባ ንግድ ቢሮ ኃላፊ ክብርት ወ/ሮ ሀቢባ ሲራጅ የመድረኩን ዓላማ ሲገልፁ ከቅርብ ጊዜ ወዲህ ከታሸጉ ውሀዎች ጋር ተያያይዞ የታየውን የዋጋ ጭማሪ ምክንያት ከባለቤቶቹ አንደበት በመስማት የመፍትሄ አቅጣጫ ለመተለም ነው ብለዋል። በመጨረሻም ከውሀ ምርት ጋር በተያያዘ ፋብሪካዎች ለአከፋፋዮችና ለቸርቻሪዎች የሚሸጡበትን ዋጋ በየግላቸው ወስነው በማህበራቸው አማካይነት በአጭር ጊዜ ለአዲስ አበባ ንግድ ቢሮ ለማሳወቅ የጋራ መግባባት ላይ ተደርሷል።

አርትስ ቴሌቪዥን ከቴክኒካዊ ችግር በኋላ ስርጭቱን በድጋሚ ጀመረ #FastMereja I በተለያዩ ቴክኒካዊ ጉዳዮች ምክንያት ለተወሰኑ ቀናት ስርጭቱን አቋርጦ የነበረው አርትስ ቴሌቪዥን ከዛሬ ጀምሮ መደበኛ ስርጭቱን በድጋሚ መጀመሩን አስታወቀ። ጣቢያው ለተመልካቾቹ ባስተላለፈው ኦፊሴላዊ መልዕክት፣ ስርጭቱ ተቋርጦ በነበረባቸው ቀናት ተመልካቾች ያሳዩትን ፍቅር፣ ድጋፍና ከጎኑ የመቆም ቁርጠኝነት በአክብሮት አመስግኗል። አርትስ ቴሌቪዥን አያይዞም፤ ከአሁን ጀምሮ የሚወዷቸውን ነባር ፕሮግራሞች ይበልጥ በማጠናከር እና አዳዲስና አጓጊ ይዘቶችን በልዩ ሁኔታ በማዘጋጀት ለአድማጭ ተመልካቾቹ ለማድረስ ዝግጅቱን ማጠናቀቁን ገልጿል። “የአፍሪካ ህዳሴ ድምፅ” ለመሆን የሰነቀውን ራዕይ አጥብቆ እንደሚቀጥል የገለጸው ጣቢያው፣ ትውልድን በእውቀት የሚያበለጽጉ፣ ማኅበረሰብን በመረጃ የሚያጠናክሩ እንዲሁም የኢትዮጵያን ባህል፣ እሴትና ትውፊቶች የሚያንጸባርቁ ይዘቶችን ማቅረብ የቀጣይ ጉዞው ዋነኛ ተልዕኮ መሆኑን አጽንኦት ሰጥቷል። የጣቢያው አስተዳደር ህብረተሰቡ ከዚህ ቀደም ከጀመረው የትብብርና የድጋፍ ጎዳና ጋር አሁንም አብሮ እንደሚቀጥል ሙሉ እምነት እንዳለው ገልጾ፣ በድጋሚ ወደ ስርጭት መመለሱን በደስታ አብስሯል።

ዘምዘም ባንክ ከ1.56 ቢሊዮን ብር በላይ ከግብር በፊት ማትረፉን ገለጸ! #Fastmereja:-ዘምዘም ባንክ አ.ማ በ2025/26 በጀት ዓመት ከዕቅድ አንጻር አጠቃላይ የስራ አፈጻጸሙ የላቀ ውጤት ማስመዝገቡን ገለጸ። ባንኩ በበጀት ዓመቱ ከግብር በፊት ከ1 ነጥብ 56 ቢሊዮን ብር በላይ ትርፍ ማግኘቱን አስታውቋል። ባንኩ ይህንን የገለጸው በዛሬዉ እለት በአድዋ ድል መታሰቢያ ሙዚየም ባካሄደው የባለአክሲዮኖች 6ኛ መደበኛ እና 5ኛ አስቸኳይ ጠቅላላ ጉባዔ ላይ ነው። በጉባኤው ላይ የባንኩ የዳይሬክተሮች ቦርድ ሰብሳቢ ዶ/ር ናስር ዲኖ እንደገለፁት ፤ በበጀት ዓመቱ የባንኩ አጠቃላይ ገቢ ከ3 ቢሊዮን ብር በላይ መድረሱን ገልፀዉ የባንኩ የተቀማጭ ገንዘብ መጠን የ144 በመቶ ጭማሪ በማሳየት 20.4 ቢሊዮን ብር የደረሰ ሲሆን፣ ጉባኤው በተካሄደበት ዕለትም ከ22.2 ቢሊዮን ብር በላይ መሻገሩ ተመላክቷል። የባንኩ የተከፈለ ካፒታል በ112 ነጥብ 5 በመቶ ዕድገት አሳይቶ ከነበረበት 2 ነጥብ 64 ቢሊዮን ብር ወደ 5 ነጥብ 64 ቢሊዮን ብር ከፍ ማለቱ ተገልጿል፤ አጠቃላይ የሀብት መጠኑም 76 በመቶ አድጎ 29 ነጥብ 24 ቢሊዮን ብር መድረሱም ነዉ የተገለፀዉ። በሌላ በኩል፣ የኢትዮጵያ ካፒታል ማርኬት ባለሥልጣን የዘምዘም ባንክን የምዝገባ መግለጫ (Registration Statement) ማጽደቁን ተከትሎ፤ ባንኩ አክሲዮኖቹን ለህዝብ ክፍት ከማድረግ ሂደቱን ያጠናቀቀ የመጀመሪያው ሙሉ በሙሉ ወለድ አልባ ባንክ ለመሆን መቻሉም ነዉ የተገለፀዉ። በዲጂታል ባንክ አገልግሎቶች ላይ ሰፊ ኢንቨስትመንት ማድረጉን ያስታወቀው ባንኩ፤ የዲጂታል ተጠቃሚዎችን ቁጥር ከ106 በመቶ በላይ ማሳደግ የቻለ ሲሆን፣ “አንሳርዲጂታል ፋይናንሲንግ” በተባለ መድረክ ለአነስተኛና ጥቃቅን ሥራ ተሰማሪዎች ያለምንም ማስያዣ ከ10,000 ለሚበልጡ ደንበኞች 1 ነጥብ 07 ቢሊዮን ብር የዲጂታል ፋይናንሲንግ አቅርቦት አከፋፍሏል። የደንበኞችን ቁጥር በ56 በመቶ በማሳደግ ከ973 ሺህ በላይ ማድረስ የቻለው ዘምዘም ባንክ፤ በ130 ቅርንጫፎቹ እና ከ2,115 በላይ ቋሚና ኮንትራት ሠራተኞች አማካኝነት አገልግሎቱን እየሰጠ የሚገኝ ሲሆን ባንኩ በበጀት ዓመቱ የGIFA ሻምፒዮንሺፕ፣ የIIFCA ምርጥ ኢስላሚክ ባንክእና የEFICA ዓለም አቀፍ ፈጠራ ሽልማቶችን መቀዳጀቱም ነዉ የተገለፀዉ።

የመሶብ የአንድ ማዕከል አገልግሎት አድናቆት አተረፈ #FastMereja I ሰሞኑን በማህበራዊ ሚዲያ የመሶብ የአንድ ማዕከል አገልግሎትን አስመልክቶ በርካታ የህብረተሰብ ክፍሎች እና የአገልግሎቱ ተጠቃሚዎች ከፍተኛ አድናቆታቸውን እየሰጡ ይገኛሉ። አብዛኛዎቹ የመንግስት መስሪያ ቤቶች በተወሳሰበ አሰራር እና በእንቅስቃሴ መዘግየት በሚታሙበት በዚህ ወቅት፣ መሶብ የሚሰጠው የተቀላጠፈ እና ዘመናዊ አገልግሎት አርአያነት ያለው መሆኑን አገልግሎቱን ያገኙ ዜጎች ገልጸዋል። የአገልግሎቱ ተጠቃሚዎች በሰጡት አስተያየት፣ በማዕከሉ የሚያጋጥማቸው ፈጣን አስተናጋጅነት እና ቅንጅታዊ አሰራር የሚያስመሰግን መሆኑን ጠቅሰው፤ ተቋሙ የጀመረውን ጥራት ያለው አገልግሎት አጠናክሮ እንዲቀጥል እና ሌሎች የመንግስት ተቋማትም ይህንን አሰራር አብነት አድርገው እንዲከተሉ ጥሪ አቅርበዋል። ይህንን በሀገር አቀፍ ደረጃ ትልቅ ትኩረት ያገኘውን የመሶብ የአንድ ማዕከል አገልግሎት እየመራ የሚገኘው ወጣቱ አመራር ዮናስ አለማየሁ እንደሆነ ታውቋል። ዮናስ ቀደም ሲል በአዲስ አበባ ከተማ የሲቪል ምዝገባ እና ነዋሪዎች አገልግሎት ኤጀንሲ ውስጥ ባሳየው የላቀ የአመራር ብቃት እና አሰራርን በማዘመን ሂደት ያስመዘገበውን ስኬት፣ አሁን ደግሞ በመሶብ የአንድ ማዕከል አገልግሎት ላይ በድጋሚ እያሳየ ይገኛል።

በ12ኛ ክፍል ፈተና ከፍተኛ ውጤት ላመጡት ተማሪ ሕዳሴ ዘመኑ እና ተማሪ ሙባረክ ሙሐመድ እውቅናና ሽልማት ተሰጠ #FastMereja I በአማራ ክልል አስቸጋሪ ወቅቶች ተቋቁመው በ2018 የትምህርት ዘመን በ12ኛ ክፍል ሀገር አቀፍ ፈተና ከፍተኛ ውጤት ላስመዘገቡ ተማሪዎች በክልል ደረጃ የእውቅናና የሽልማት መርሐ-ግብር አካሂዷል። በዚሁ መርሐ-ግብር ላይ በክልሉ ከፍተኛውን ውጤት ያስመዘገበው ተማሪ ሙባረክ ሙሐመድ (587 ያመጣ) እና በሀገር አቀፍ ደረጃ ከሴቶች ከፍተኛ ውጤት ያስመዘገበችው ተማሪ ሕዳሴ ዘመኑ (583 ያመጣች) የክልሉ መንግሥት ያዘጋጀውን ሽልማት ተረክበዋል። ተማሪ ሙባረክ ሙሐመድ ስለተሰጠው እውቅና ሲናገር «የተበረከተልን ሽልማት ለወደፊቱ ትልቅ ኃላፊነት የጣለብን ነው» ያለ ሲሆን፤ በቀጣይ የዩኒቨርሲቲ ቆይታው በሜካኒካል ኢንጂነሪንግ ትምህርቱን በመከታተል በኢትዮጵያ የቴክኖሎጂ መፍትሔዎች ላይ ትኩረት አድርጎ ሀገሩን ማገልገል እንደሚፈልግ ገልጻል። በተመሳሳይ ተማሪ ሕዳሴ ዘመኑ የተደረገላት እውቅና የሚያስደስትና ለቀጣይ ትምህርቷ የበለጠ የሚያበረታታት መሆኑን ገልጻለች። ሕዳሴ በዩኒቨርሲቲ ቆይታዋ በሶፍትዌር ኢንጂነሪንግ በመማር ለማኅበረሰቡ ችግር ፈጣሪ በሆኑ የቴክኖሎጂ ዘርፎች ላይ አስተዋጽኦ ለማበርከት ማቀዷን ተናግራለች። በ2018 የትምህርት ዘመን የ12ኛ ክፍል ሀገር አቀፍ ፈተና ከተፈተኑት ተማሪዎች መካከል 500 እና ከዚያ በላይ ያስመዘገቡት 659 ተማሪዎች ሲሆኑ፣ ከእነዚህ ውስጥ 540 እና ከዚያ በላይ ያመጡ 193 ተማሪዎች የምስክር ወረቀት፣ የገንዘብ፣ የዋንጫ እና የላፕቶፕ ኮምፒውተር ሽልማት ተበርክቶላቸዋል።

ቴምር ፕሮፐርቲስ በጋርመንት ሳይት የገነባቸውን የንግድ ሱቆች ለባለቤቶቻቸው አስረከበ! #Fastmereja:- ቴምር ፕሮፐርቲስ በጋርመንት ሳይት ያስገነባቸዉን 56 ዘመናዊ የንግድ ሱቆች በዛሬዉ እለት ለባለቤቶቹ አስረከበ። በስነ-ስርዓቱ ላይ የድርጅቱ አመራሮች፣ የንግድ ቤቶቹ ባለቤቶች እና ጥሪ የተደረገላቸው እንግዶች በተገኙበት ነው የእርክክብ መርሃ-ግብሩ የተከናወነው። የቴምር ፕሮፐርቲስ ዋና ስራ አስፈፃሚ አቶ ጃፋር መሀመድ በርክክብ ስነ-ስርዓቱ ላይ ባደረጉት ንግግር፤ ድርጅቱ በገባው ቃል መሰረት ጥራቱን የጠበቀና ለንግድ ምቹ የሆነ ዘመናዊ የንግድ ማዕከል ገንብቶ ለአገልግሎት ማብቃቱን ገልፀዋል። በ1,498 ካሬ ሜትር ቦታ ላይ ያረፈው ይህ ዘመናዊ ህንፃ ሁለት የከርሰ-ምድር (Basement) ወለሎች፣ የይዞታው ምድር ወለል 19 ሱቆች፣ የመጀመሪያ ወለል 19 ሱቆች እንዲሁም ሁለተኛ ወለል 18 ሱቆችን ጨምሮ በጠቅላላው 56 የንግድ ሱቆችን አካትቶ የተገነባ ስለመሆኑም ነዉ የተገለፀዉ። ህንፃው ከአፍሪካ ሲዲሲ (Africa CDC) ዋና መስሪያ ቤት እና ከአዲስ አበባ አዳማ ፈጣን መንገድ መግቢያ አካባቢ የሚገኝ በመሆኑ ለንግድና ለኢንቨስትመንት ከፍተኛ አማራጭ እንደሚሆን ተመልክቷል። ህንፃው ዘመናዊ የሊፍት አገልግሎት፣ አስተማማኝ የመብራት ትራንስፎርመር እና የንፅህና መስመሮች የተገጠሙለት መሆኑም ተገልጻል። በአጠቃላይ ህንፃዉ 136 የመኖሪያ አፓርትመንቶችን እና 56 የንግድ ሱቆችን በውስጡ የያዘ ሲሆን ለአካባቢው የንግድና የኑሮ ትስስር የበኩሉን አስተዋጽዖ ያበረክታል ተብሎ ይጠበቃል።

በአዲስ አበባ የ«ሪፖርታዥ ታወርስ» የመኖሪያ ቤቶች ግንባታ የመሠረት ድንጋይ ተቀመጠ ​ #FastMereja I በዓለም አቀፍ ደረጃ በሪል እስቴት ልማት ዘርፍ ስመጥር የሆነው ሪፖርታዥ ግሩፕ ከኢትዮጵያ መከላከያ ሠራዊት ፋውንዴሽን ጋር በመተባበር በአዲስ አበባ የሚገነባው “ሪፖርታዥ ታወርስ” የተሰኘው የቤት ልማት ፕሮጀክት የመሠረት ድንጋይ የማስቀመጥና የቁፋሮ ማስጀመሪያ ሥነ-ሥርዓት ተካሂዷል። በሳር ቤት አፍሪካ ሕብረት ፊት ለፊት በሚገኘው ቦታ ላይ የሚገነባው ይህ ፕሮጀክት፡ ከ1,000 በላይ ዘመናዊ የመኖሪያ ክፍሎችን፣ የመዋኛ ገንዳ፣ የስፖርት ማዕከላትንና ሌሎችንም ዘመናዊ የአገልግሎት መስጫዎችን ያካተተ ሲሆን፤ ምቹ የክፍያ አማራጮችንም ይዞ ቀርቧል ተብሏል። በአጠቃላይ 55ሺ ቤቶች የሚገነቡ ይሆናል። ​በስነ-ሥርዓቱ ላይ እንደተገለጸው፡ በመዲናችን አዲስ አበባ ፈጣን የሕዝብ ቁጥር እድገት ጋር ተያይዞ ያለውን ከፍተኛ የቤት ፍላጎትና ክፍተት የመንግሥት አቅም ብቻውን መሸፈን ስለማይችል፣ የሕዝብና የግል አጋርነትን በማጠናከር ረገድ ፕሮጀክቱ ትልቅ ሚና ይጫወታል። ይህ የጋራ አልማት በኢትዮጵያና በተባበሩት ዓረብ ኤምሬቶች (UAE) መካከል ያለውን የሁለትዮሽ ግንኙነት በቤት ግንባታ፣ በቴክኖሎጂ ሽግግርና በአቅም ግንባታ ዘርፎች የበለጠ የሚያጠናክር መሆኑ ተመላክቷል። ​በ2014 እ.ኤ.አ በአቡ ዳቢ የተመሠረተውና በ25 ሀገራት ውስጥ ከ116 በላይ ፕሮጀክቶችን የገነባው ሪፖርታዥ ግሩፕ ያለውን ሰፊ ዓለም አቀፍ ልምድ በመጠቀም ግንባታውን በከፍተኛ ጥራትና በተቀመጠለት ጊዜ ገደብ አጠናቆ ለሕዝብ ጥቅም ያውላል ተብሎ ይጠበቃል። ሚኒስቴር መሥሪያ ቤቱና ፋውንዴሽኑም የሀገርንና የሕዝብን ጥቅም ባስጠበቀ መልኩ የግንባታውን ሂደት በቅርበት እንደሚከታተሉና አስፈላጊውን ድጋፍ እንደሚያደርጉ አስታውቀዋል።

ዳቦ በተመጣጣኝ ዋጋ ለማቅረብ ከዳቦ አምራቾች ጋር መግባባት ላይ ተደረሰ #FastMereja I የአዲስ አበባ ከተማ አስተዳደር ንግድ ቢሮ ከአዲስ አበባ እና ዙሪያዋ የዳቦ አምራቾች ማህበር አመራሮችና አባላት ጋር በዳቦ አቅርቦት፣ ዋጋ እና ጥራት ዙሪያ ተወያይቷል። በተካሄደው የውይይት መድረክ ከ70 ግራም የዳቦ አቅርቦት ጋር ተያይዞ የተካሄደ የዳሰሳ ጥናት ውጤት የቀረበ ሲሆን፣ አምራቾቹ ከስንዴ ዱቄት አቅርቦትና ከብልሹ አሰራር ጋር ተያይዞ ያሉባቸውን ችግሮች ለቢሮው ኃላፊ ለወ/ሮ ሀቢባ ሲራጅ አቅርበዋል። የንግድ ቢሮ ኃላፊዋ ወ/ሮ ሀቢባ ሲራጅ በበኩላቸው፤ የከተማ አስተዳደሩ የህብረተሰቡን የመግዛት አቅም ያገናዘበ የዳቦ አቅርቦት እንዲኖር ለማስቻል ለዳቦ ፋብሪካዎች ለ10 ዓመታት የሚሆን መሬት በነፃ ከመስጠት ጀምሮ በሸገር ዳቦ በኩል ድጎማ በማድረግ ገበያውን ሲያረጋጋ መቆየቱን ገልፀዋል። አምራቾችም ማህበራዊ ሀላፊነታቸውን በመወጣት 70 ግራም ዳቦ በብዛትና በተመጣጣኝ ዋጋ ለህብረተሰቡ ማቅረብ እንዳለባቸው አሳስበዋል። በተጨማሪም የከተማ አስተዳደሩ በቂ የስንዴ ዱቄት አቅርቦት እንዲኖር በትኩረት እንደሚሰራ የጠቆሙት ወ/ሮ ሀቢባ፤ በአሰራር ላይ የመልካም አስተዳደር ችግር የሚፈጥሩ አካላት ሲያጋጥሙ ህብረተሰቡና አምራቾች በ8588 ነፃ ጥቆማ መስጫ መስመር እንዲጠቁሙና ፈጣን እርምጃ እንደሚወሰድ አስታውቀዋል። በስብሰባው ማጠቃለያም የዳቦ አምራች ማህበራት አመራሮችና አባላት የህብረተሰቡን የመግዛት አቅም ያገናዘበ 70 ግራም ዳቦ በተመጣጣኝ ዋጋ ለማቅረብና ዝርዝሩን በአጭር ጊዜ ውስጥ ለከተማ አስተዳደሩ ለማሳወቅ የጋራ መግባባት ላይ መድረሳቸውን ከንግድ ቢሮው ያገኘነው መረጃ ያመለክታል።

የወላይታ ድቻው ዋና አሰልጣኝ መሳይ ተፈሪ የ10 ጨዋታዎች ቅጣት ተላልፎባቸዋል። #FastMereja I አሰልጣኙ ይህ ቅጣት የተላለፈባቸው በሲቢኢ የኢትዮጵያ ፕሪሚዬር ሊግ 3ኛ ሳምንት መርሐግብር ወላይታ ድቻ በሀላባ ስታዲየም በባህርዳር ከተማ 3 ለ 1 በተሸነፈበት ጨዋታ ባሳዩት ባህሪ ምክንያት መሆኑ ተገልጿል። አሰልጣኝ መሳይ ተፈሪ በጨዋታው 90+4ኛው ደቂቃ ላይ ዳኛን አፀያፊ ስድብ በመሳደብ በቀይ ካርድ ከጨዋታ ሜዳ ስለመውጣታቸው ሪፖርት መቅረቡን የኢትዮጵያ ፕሪሚዬር ሊግ አክሲዮን ማህበር አሳውቋል። አሰልጣኙ ለፈፀሙት ጥፋት 6 ጨዋታ እንዲታገዱ እና በተጨማሪም 5 ሺህ ብር የገንዘብ ቅጣት እንዲከፍሉ የውድድር እና ስነስርዓት ኮሚቴ ውስኗል። እንዲሁም አሰልጣኝ መሳይ ተፈሪ በዚሁ ጨዋታ በቀይ ካርድ ከሜዳ በተወገዱት ወቅት የዕለቱን 4ኛ ዳኛ ለመማታት መጋበዛቸውን ተከትሎ ጨዋታው ለ3 ደቂቃ እንዲዘገይ ማድረጋቸውን የሚገልጽ ሪፖርት እንዲሁ እንደቀረበባቸው አክሲዮን ማህበሩ ገልጿል። አሰልጣኙ ለፈፀሙት ጥፋት ተጨማሪ የ4 ጨዋታዎች በድምሩ 10 ጨዋታዎች እንዲቀጡ እና 10 ሺህ ብር የገንዘብ ቅጣት እንዲከፍሉ የውድድር እና ስነስርዓት ኮሚቴ መወሰኑ ታውቋል። #ስፖርት