နေ့မှာမရယ် ညမှာငို

ဝဋ်ကြွေးရှိတဲ့အခါ စိန်ပြေးတမ်းကစားချင်တယ်။ မင်းကသူ့ဆီပြေးရင် ငါကမင်းကိုမမီအောင် ဖမ်းပေးပါ့မယ်။ -အံ့လွန်းပျို

ကိုယ် မလွန်ဆန်နိုင်တဲ့အရာ ငါးခု ရှိတယ် တိမ်တွေရယ် တောင်တန်းတွေရယ် စာအုပ်တွေရယ် ကော်ဖီ ပူပူလေးရယ် ပီးတော့ သိပ်ချစ်ရတဲ့ “မင်း” ရယ်

မေတ္တာတရား ကို သယံဇာတလို့ သဘောထားတယ် ပိုက်ဆံတွေ နေကောင်းပါစေ စိန်ရွှေငွေရတနာတွေ ပျော်ရွှင်ပါစေ မှောင်မိုက်နေတဲ့အခါ သက်သာရဲ့လား ဆိုတဲ့ မိတ်ဆွေတစ်ယောက်သာ အလိုရှိပါတယ် လမ်းမီးများ လင်းခါစ ။ -ကြည်ဇော်အေး

သဘာဝကို ချစ်တယ်။ သဘာဝအတိုင်း ညိုနေတဲ့ အသားညိုညိုလေးကို ချစ်သလို သဘာဝအတိုင်းပါတဲ့ ပါးချိုင့်ခွက်လေးကိုလဲ ချစ်တယ်။ -အံ့လွန်းပျို

အမေ့ကမ္ဘာမှာ အရာရာဖြစ်ခဲ့တဲ့ကောင်က သူ့ကမ္ဘာမှာတော့ မမွေးလာသင့်တဲ့ လူတစ်ယောက်ပါတဲ့ အမေ...။ -အံ့လွန်းပျို

ကဗျာအမည် - သို့သော် ချစ်ပါသည် ရေးသားသူ - အံ့လွန်းပျို ရွတ်ဖတ်သူ - လင်းဧနူ

ချစ်သည်းကျော်ဖို့

မင်းသာ ကိုယ့်ကိုပြန်ချစ်ခဲ့ရင် ကိုယ်ကမင်းအတွက် ကြယ်တွေကို ကြိုးသီပေးမှာပေါ့။ မင်းသာ ကိုယ့်ကိုမေတ္တာမျှခဲ့ရင် ကိုယ်ကမင်းအတွက် သမုဒ္ဒရာကို အိုင်ဖြစ်စေမှာပေါ့။ မင်းသာ ကိုယ့်လက်ကိုရဲရဲကိုင်ခဲ့ရင် ကိုယ်ကမင်းအတွက် ကမ္ဘာကြီးကို မင်းလက်ခုပ်ထဲ ထာဝရထည့်ပေးမှာပေါ့။ ကိုယ်သာ မင်းကို‌လွမ်းဆွတ်ခဲ့ရင် မင်းကကိုယ့်အတွက် မီးကို နှလုံးတိုက်သွင်းမှာပေါ့။ ကိုယ်သာ မင်းကိုမြတ်နိုးခဲ့ရင် မင်းကကိုယ့်အတွက် နိ‌ဗ္ဗာန်ကို ငရဲဖြစ်စေမှာပေါ့။ ကိုယ်သာ မင်းဘဝထဲဝင်ခဲ့ရင် မင်းကကိုယ့်အတွက် စကြဝဠာကိုပါ ကိုယ့်ဆီက အပြီးတိုင်ယူဆောင်သွားမှာပေါ့။ -အံ့လွန်းပျို

လူတစ်ယောက်ယောက်ကို လက်သီးနဲ့ထိုးဖို့ဆိုတာက ကိုယ့်မှာမေးရိုးရှိရတယ်တဲ့... -မောင်ချောနွယ်

ချစ်တယ်မဆိုသာရုံ နွေးထွေးမှုမှာ ကိုယ်ဟာ အသက်မပါသွားရုံ မျှော်လင့်ချက်ကို ရင်းခဲ့ပါတယ်။ -အံ့လွန်းပျို

ငယ်ရွယ်မှုက ဘာနဲ့မှတုလို့ မရပါဘူး ဒါကြောင့် သူတို့ သူတို့ အရူးအမူး ချစ်ကြပါစေ။                                        -အောင်ချိမ့်

အနှစ်နှစ် အလလ စိတ်ကူးယဉ်ခဲ့တာကိုမှ လက်လွှတ်ရတဲ့အခါ ကျွန်တော် အိပ်မက်တွေကို မုန်းခဲ့တယ်...။ -အံ့လွန်းပျို

မျှော်လင့်ချက်တွေဟာ လုပ်ကြံခံလိုက်ရတယ် အနာဂတ်ကတော့ အသက်ငင်နေဆဲ ။ -လှသန်း

အမည်မဲ့ ဖြစ်ရပုံများ အိပ်မက်ထဲမှာတောင် အဆင်မပြေ အလကားရတဲ့ ဖိနပ်မတော် ကောင်းကင်က ခေါင်းနဲ့မလွတ် ။ ဖြစ်ရပုံများ ကိုယ့်လဘက်ရည်ခွက် အရောက်မှာမှ ရုတ်တရက်မလိုင်ကုန်သွားရ ။ ဖြစ်ရပုံများ ထီမပေါက်တဲ့အပြင် ထီပေါက်စဉ်ကလဲ မှားသေး ။ ဖြစ်ရပုံများ လက်မှတ်ဝယ်ထားပြီးသား ရထားက တစ်စီးလုံးပျောက်သွားတယ်တဲ့ ။ ဖြစ်ရပုံများ တံထွေးကို မြိုချလိုက်တာ ကမ္ဘာတစ်ခုလုံး ပါသွားတယ်တဲ့ ။ ကဲ. . . ဘာလိုသေးလဲ လက်ကပတ်ထားတဲ့နာရီမှာ ဓါတ်ခဲကုန်ဖို့ပဲ လိုတော့တယ် ။ -သစ္စာနီ

ကဗျာအမည် - ကျောက်သားအဖြစ် ရေးသားသူ - ခင်ဇော်မြင့် ရွတ်ဖတ်သူ - လင်းဧနူ

ကျွန်မကတော့ ကိုယ့်ကိုယ်ကိုယ် ယုံတာတစ်ခုက ကောင်းကောင်းချစ်တတ်တဲ့ နှလုံးရှိတယ်လို့ပဲ။ ချစ်စရာရှိရင် ကျွန်မကပဲ ချစ်ချင်တယ်။ -ကြည်အေး

မင်းကို အားမကိုးချင်သလို ငါ့မှာလဲ အားကိုးစရာဘာမှမရှိ။ ဒါတောင် ကိုယ်ခြေထောက်ပေါ် ကိုယ်ရပ်တည်ချင်သူပါတဲ့လေ။ ခက်ပါရဲ့။ -အံ့လွန်းပျို

လူဆန်ခြင်း ဘဝမှာ မရခဲ့တာတွေ အများကြီးအတွက် တစ်ဝက်နောင်တနဲ့ နေထိုင်တယ် ။ စိတ်မကုန်နိုင်သေးသော ကမ္ဘာကြီး မိုက်လုံးကြီးမှုတွေအတွက် ခွင့်လွှတ်ပါ ။ -လှသန်း

ပညာဟူသည်၊ နတ္တမည်ပင် တည်တံ့ဉာဏ်ဦး၊ ထည်ဝါထူးလည်း အရူးစကား၊ ယုံကြည်ထားမူ အလားတူဟန် ဉာဏ်မဲ့တည်း။ -အံ့လွန်းပျို

ပွဲတော်တွေဟာလည်း ပျော်စရာမကောင်းတော့ပါဘူး။ ဒို့ခေါင်းပေါ်မှာ ကောင်းကင်ကြီးဟာ လွတ်လွတ်လပ်လပ်မှမဟုတ်တာ ။ -မောင်ချောနွယ်

အလွမ်း တမ်းတမ်းတတ လွမ်းနာကျ ဘဝအစဉ် လွမ်းမိပင်။ -အံ့လွန်းပျို