News Of Myanmar

မဟုတ်မမှန် လုပ်ကြံဖန်တီးထားသော သတင်းမှားဖြန့်ချိခဲ့ သည့် Fake New အားထိရောက်စွာအရေးယူသွားမည် NOM၊နိုဝင်ဘာ၁၀၊၂၀၂၆ ဧရာဝတီတိုင်းဒေသကြီး၊ ပုသိမ်မြို့၊ အမှတ်(၁၃)ရပ်ကွက်၊ စက်မှုဇုန်ရှိ ဟာကာ အထည်ချုပ်စက်ရုံ အနောက်ထောင့်ဘက် အမှိုက်ပုံးအတွင်း၌ သေဆုံးနေသည့် အမျိုးသမီးအလောင်းတစ်လောင်း တွေ့ရှိရသည်ဆိုသော သတင်းမှာ လုံးဝ ဖြစ်ပွားခဲ့ခြင်းမရှိဘဲသတင်းမှားဖြန့်ချိခဲ့ Fake New အားထိရောက်စွာအရေးယူသွားမည်ဟု ယနေ့(နိုဝင်ဘာ၁၀ရက်)နေ့တွင် ဧရာဝတီတိုင်းအစိုးရအဖွဲ့မှထုတ်ပြန်ထား ကြောင်းသိရသည်။ ပုသိမ်မြို့၊ အမှတ် (၁၃) ရပ်ကွက်၊ စက်မှုဇုန်ရှိ ဟာကာ အထည်ချုပ်စက်ရုံ အနောက် ထောင့်ဘက် အမှိုက်ပုံးအတွင်း၌နိုဝင်ဘာလ ၇ ရက်နေ့တွင်အမျိုးသမီး အလောင်းတစ်လောင်း တွေ့ရှိနေသည့်ဟု Fake Newမှ မဟုတ်မမှန် လုပ်ကြံဖန်တီးထားသော သတင်းမှားဖြန့်ချိခဲ့ကြောင်းသိရသည်။ အထက်ဖော်ပြပါ သတင်းအားစစ် ဆေးစုံစမ်းမေးမြန်းခဲ့ရာ အဆိုပါဖြစ်စဉ်ဖြစ်ပွားခဲ့ခြင်း မရှိပါကြောင်း စုံစမ်းသိရှိခဲ့ရပါသဖြင့် အများပြည်သူများ စိုးရိမ်ထိတ်လန့်ဖွယ်ရာသတင်းများ ရေးသားဖြန့်ဝေနေမှုအား ထိရောက်စွာအရေးယူသွားမည်ဖြစ်ပါကြောင်းထုတ်ပြန်ထားသည်။

ပြည်သူ့လွှတ်တော်ဥက္ကဋ္ဌ ဦးခင်ရီ ပြည်သူ့လွှတ်တော်သို့လာရောက်လေ့လာသည့် ပြည်ထောင်စုနယ်မြေ ဇေယျာသီရိမြို့နယ်နှင့် ပုဗ္ဗသီရိမြို့နယ်တို့မှ ဒေသခံများ အားလက်ခံတွေ့ဆုံ NOM၊နိုဝင်ဘာ၁၀၊၂၀၂၆ ပြည်သူ့လွှတ်တော်ဥက္ကဋ္ဌ ဦးခင်ရီသည် တတိယအကြိမ် ပြည်သူ့လွှတ် တော် အစည်းအဝေးသို့လာရောက်လေ့လာသည့် ပြည်ထောင်စုနယ်မြေ နေပြည်တော် ဇေယျာသီရိမြို့နယ်နှင့် ပုဗ္ဗသီရိမြို့နယ်တို့မှ ဒေသခံပြည်သူများအားနိုဝင်ဘာ၉ရက်မွန်း လွဲပိုင်းတွင် နေပြည်တော်ရှိ လွှတ် တော်အဆောက်အအုံ သဘင်ဆောင် ၌ လက်ခံတွေ့ဆုံသည်။ တွေ့ဆုံစဉ် ပြည်သူ့လွှတ်တော်ဥက္ကဋ္ဌ ဦးခင်ရီက ပြည်ထောင်စုနယ်မြေဇေယျာသီရိမြို့နယ်နှင့် ပုဗ္ဗသီရိမြို့နယ်များမှ ပြည်သူများအနေဖြင့် လွှတ်တော်ကိုယခုလိုလာရောက်လေ့လာသည့်အတွက် ဝမ်းမြောက်စွာကြိုဆိုပါကြောင်း၊ မိမိသည် ဇေယျာသီရိမဲဆန္ဒနယ်မှ ရွေးကောက်တင်မြှောက်ခြင်းခံရသည့် လွှတ်တော်ကိုယ်စားလှယ်တစ်ဦးလည်းဖြစ်ပါကြောင်း၊ မိမိကိုဇေယျာသီရိမြို့နယ် ၏ လွှတ်တော်ကိုယ်စားလှယ်အဖြစ် ရွေးကောက်တင်မြှောက်ပေးခဲ့သည့်အတွက်လည်း အထူးပင်ကျေးဇူးတင်ရှိပါကြောင်းပြောကြားခဲ့သည်။ အလားတူ လွတ်တော်တွင်ရေးဆွဲသည့်ဥပဒေများပြဋ္ဌာန်းရာတွင် ပြည်သူများအား အကာအကွယ်ပေးနိုင်ရေးအတွက် ဦးစားပေးဆောင်ရွက်လျက်ရှိပါကြောင်း၊ ထို့ကြောင့်ယနေ့ပြည်သူများကြုံတွေ့နေရသည့် အွန်လိုင်းလိမ်လည်မှုများနှင့်စပ်လျဉ်း ၍ ကျူးလွန်သူများအားထိရောက်စွာ အရေးယူဆောင်ရွက်နိုင်ရေး အွန်လိုင်းလိမ်လည်မှုဆိုင်ရာ တိုက်ဖျက်ရေးဥပဒေကို ပြဋ္ဌာန်းနိုင်ခဲ့ပါကြောင်း၊ မိမိတို့လွှတ်တော်က ဆောင်ရွက်နေမှုများသည်ပြည်သူကို ဗဟိုပြုလျက်ရှိပါကြောင်း၊ ထို့ကြောင့်ယနေ့လွှတ်တော်သို့ လာရောက်လေ့လာသည့် ပြည်သူများအနေဖြင့်လည်း လွှတ်တော်များသည် ပြည်သူကိုကိုယ်စားပြုသည့်နေရာ၊ ပြည်သူ့အသံကိုဖော်ဆောင် ပေးသည့်နေရာဟု မှတ်ယူရမည်ဖြစ်ပါကြောင်းပြောကြားခဲ့သည်။ ထို့နောက် တက်ရောက်လာသူများက သိရှိလိုသည်များကို မေးမြန်းကြရာပြည်သူ့လွှတ်တော် ဥက္ကဋ္ဌက အသေးစိတ်ရှင်းလင်းပြောကြားခဲ့သည်။ တွေ့ဆုံပွဲသို့ ပြည်သူ့လွှတ်တော်ဥက္ကဋ္ဌဦးခင်ရီနှင့်အတူ ပြည်သူ့လွှတ် တော်ဒုတိယဥက္ကဋ္ဌ ဦးမောင်မောင်အုန်း၊ ပုဗ္ဗသီရိမြို့နယ်မဲဆန္ဒနယ်မှ ပြည် သူ့လွှတ်တော် ကိုယ်စားလှယ်ဦးလှဆွေနှင့် ပြည်သူ့လွှတ်တော်ရုံးမှ တာ ဝန်ရှိသူများတက်ရောက်ခဲ့ကြသည်။

ပြီးခဲ့သည့် သီတင်းပတ်များအတွင်း အီရန်သည် အက်စ်-ဆာလာမာ ကျွန်းစု (As-Salamah Archipelago) ရှိ အိုမန်နိုင်ငံ၏ "ဒီဒါးမား ကျွန်း" (Didamar Island) ကို အီရန်က တာဝေးပစ် ပဲ့ထိန်း ဒုံးကျည်များဖြင့် တိုက်ခိုက်ခဲ့သည်။ ထိုကျွန်းပေါ်တွင် ဟော်မုဇ် ရေလက်ကြားအတွင်း တရားမဝင် ရေကြောင်း သွားလာမှုများကို စောင့်ကြည့်ကူညီပေးနေသည့် အမေရိကန်နှင့် အိုမန်တို့၏ ရေဒါစခန်းများနှင့် ရေကြောင်း စောင့်ကြည့်ရေး ကိရိယာများဆောက်လုပ်ထားရှိသည်။

စစ်ကိုင်းတိုင်းဒေသကြီး ဝန်ကြီးချုပ် ဦးကိုလေး တိုင်းဒေသကြီးအဆင့် ဝက်သက်၊ ဂျိုက်သိုးရောဂါကာကွယ်ဆေး ထပ်ဆောင်းထိုးနှံခြင်းလုပ်ငန်း စတင်ဆောင်ရွက်ခြင်းနှင့် အသိပေးဆွေးနွေးပွဲ အထိမ်းအမှတ်အခမ်းအနား တက်ရောက် နိုဝင်ဘာ ၁၀၊ ၂၀၂၆   စစ်ကိုင်းတိုင်းဒေသကြီးအဆင့် ဝက်သက်၊ ဂျိုက်သိုးရောဂါကာကွယ်ဆေး ထပ်ဆောင်းထိုးနှံခြင်းလုပ်ငန်း စတင်ဆောင်ရွက်ခြင်းနှင့် အသိပေးဆွေးနွေးပွဲ အထိမ်းအမှတ် အခမ်းအနားကို ယမန်နေ့နံနက်ပိုင်းတွင် မုံရွာမြို့၊ ချင်းတွင်းခန်းမတွင် ကျင်းပပြုလုပ်ရာ အခမ်းအနားသို့ တိုင်းဒေသကြီးဝန်ကြီးချုပ် ဦးကိုလေးနှင့်ဇနီး၊ တိုင်းဒေသကြီးလွှတ်တော်ဥက္ကဋ္ဌ၊ တိုင်းဒေသကြီး တရားသူကြီးချုပ်နှင့်ဇနီး၊ တိုင်းဒေသကြီးအစိုးရအဖွဲ့ ဝင်များနှင့်ဇနီးများ၊ တိုင်းဒေသကြီး/ ခရိုင်/ မြို့နယ်အဆင့် ဌာနဆိုင်ရာများ၊ ပြည်သူ့ကျန်းမာရေးဦးစီးဌာနမှ တိုင်းဒေသကြီးဦးစီးမှူးနှင့် ဝန်ထမ်းများ၊ မုံရွာမြို့ပေါ်ရှိ မူလတန်းကြိုကျောင်းများမှ ကျောင်းသား၊ ကျောင်းသူများနှင့် မိဘများတက်ရောက်ကြသည်။   ဦးစွာ တိုင်းဒေသကြီးဝန်ကြီးချုပ် ဦးကိုလေးက မိမိတို့တိုင်းဒေသကြီးအတွင်းရှိ အသက်(၉)လမှ (၅၉)လအတွင်းရှိ ကလေးငယ်များအားလုံးကို ယခင်ကာကွယ်ဆေး ထိုးဖူးသည်ဖြစ်စေ၊ မထိုးဖူးသည်ဖြစ်စေ သတ်မှတ်လမ်းညွှန်ချက်များနှင့်အညီ ကာကွယ်ဆေး ထပ်ဆောင်းထိုးနှံပေးခြင်းဖြင့် ရောဂါကူးစက်ပြန့်ပွားမှုအား ထိရောက်စွာတားဆီးသွားကြရန် လိုအပ်ပါကြောင်း၊ မိမိတို့တိုင်းဒေသကြီးအနေဖြင့် ဝက်သက်-ဂျိုက်သိုး ရောဂါကာကွယ်ဆေး ထပ်ဆောင်းထိုးနှံခြင်းလုပ်ငန်းအား(၂၀၂၆)ခုနှစ်၊ နိုဝင်ဘာလဒုတိယအပတ်တွင် ဆောင်ရွက်သွားမည်ဖြစ်ပါကြောင်း၊ လုပ်ငန်းစဉ်များ အဆင်ပြေချောမွေ့စွာ အကောင်အထည်ဖော်နိုင်ရေးအတွက် ကာကွယ်ဆေးမထိုးမီကာလတွင် မိဘပြည်သူများထံ ဆေးထိုးစုရပ်နှင့် အချိန်ဇယားများ မှန်ကန်စွာရောက်ရှိရေး၊ အဓိကသတင်းစကားများ အသိပေးနိုင်ရေးနှင့်‌ ဆေးထိုးပြီးနောက် ကျန်ရှိကလေးများအား ပြန်လည်ရှာဖွေ၍ ထိုးနှံပေးနိုင်ရေးအတွက်လည်း တာဝန်ရှိအားလုံးမှ ဝိုင်းဝန်းပူးပေါင်းဆောင်ရွက်သွားကြရန် လိုအပ်ပါကြောင်း၊ တိုင်းဒေသကြီး ပြည်သူ့ကျန်းမာရေးဦးစီးဌာနမှ ရည်မှန်းထားသည့် အသက်(၉)လမှ (၅၉)လအထိ ကလေးငယ်များအားလုံးကို ကာကွယ်ဆေးထိုးနှံပေးနိုင်ရေး မိမိတို့တိုင်းဒေသကြီး အစိုးရအဖွဲ့အနေဖြင့် လိုအပ်သည့်ပံ့ပိုးကူညီမှုများ ပံ့ပိုးပေးသွားမည် ဖြစ်ပါကြောင်းနှင့် နှီးနွယ်ဌာနများ၊ မိတ်ဖက်အဖွဲ့အစည်းများ၊ ခရိုင်၊ မြို့နယ်၊ ကျန်းမာရေး ဝန်ထမ်းများအားလုံးမှလည်း အားသွန်ခွန်စိုက် ပူးပေါင်းဆောင်ရွက်သွားကြရန် လိုအပ်ပါကြောင်း ပြောကြားသည်။   ယင်းနောက် တိုင်းဒေသကြီး ပြည်သူ့ကျန်းမာရေးဦးစီးဌာနမှ တိုင်းဒေသကြီးဦးစီးမှူးက ဝက်သက်၊ ဂျိုက်သိုးရောဂါကာကွယ်ဆေး ထပ်ဆောင်းထိုးနှံခြင်းလုပ်ငန်း စတင်ဆောင်ရွက်ခြင်းနှင့် အသိပေးဆွေးနွေးပွဲ အထိမ်းအမှတ်အခမ်းအနား ကျင်းပရခြင်းနှင့် ပတ်သက်၍ ရှင်းလင်းပြောကြားသည်။   ထို့နောက် တိုင်းဒေသကြီးဝန်ကြီးချုပ်နှင့် အခမ်းအနားသို့ တက်ရောက်လာသူများမှ “ဝက်သက်၊ဂျိုက်သိုးရောဂါ ကာကွယ်ဆေးထိုးကြစို့” အထိမ်းအမှတ် Video တေးသီချင်းအား ကြည့်ရှုအားပေးကြသည်။   ဆက်လက်၍ တိုင်းဒေသကြီးဝန်ကြီးချုပ်နှင့်ဇနီး၊ တိုင်းဒေသကြီးလွှတ်တော်ဥက္ကဋ္ဌ၊ တိုင်းဒေသကြီး တရားသူကြီးချုပ်နှင့်ဇနီး၊ တိုင်းဒေသကြီး အစိုးရအဖွဲ့ဝင်များနှင့် ဇနီးများမှ အသက်(၉)လမှ (၅၉)လအတွင်းရှိ ကလေးငယ်များအား ဝက်သက်၊ ဂျိုက်သိုး ရောဂါကာကွယ်ဆေး ထပ်ဆောင်းထိုးနှံပေးနေမှုများအား ကြည့်ရှုအားပေးကြပြီး တာဝန်ရှိသူများနှင့်အတူ ကလေးငယ်များအား အမှတ်တရ လက်ဆောင်ပစ္စည်းများ ပေးအပ်ခဲ့ကြောင်း သိရသည်။    

အီရန်၏ ခြိမ်းခြောက်မှုကြောင့် ဗြိတိန်ရှိ ဒုတိယမြောက် လေတပ်စခန်းဖြစ်သည့် RAF Mildenhall မှ အမေရိကန် ဗုံးကြဲလေယာဉ်များနှင့် ဝေဟင်စက်သုံးဆီဖြည့် လေယာဉ်များကို အမြန်ဆန် ဆုတ်ခွာရွှေ့ပြောင်း လွန်ခဲ့သည့် သီတင်းပတ်အနည်းငယ်ကလည်း RAF Fairford လေတပ်စခန်းမှ ဆုတ်ခွာခဲ့ပြီး အမေရိကန်၏ B-1 နှင့် B-52 ဗုံးကြဲလေယာဉ်များကို အမေရိကန်ပြည်ထောင်စုသို့ ပြန်လည်ရွှေ့ပြောင်းခဲ့ရသည်။

ပြင်သစ်က ရေခဲသေတ္တာများ ဆိုက်ဘာတိုက်ခိုက်မှုအတွက် အီရန်ကို ပြစ်တင်ရှုတ်ချပြီး သံအမတ်ကို ဆင့်ခေါ် ပြီးခဲ့သည့်လက တစ်နိုင်ငံလုံးရှိ စီးပွားရေးလုပ်ငန်းသုံး ရေခဲသေတ္တာများကို အဝေးမှနေ၍ အပူချိန်လွန်ကဲအောင် ပြုလုပ်ခဲ့သည့် ကြီးမားသော ဆိုက်ဘာတိုက်ခိုက်မှုအတွက် အီရန်တော်လှန်ရေးအစောင့်တပ်ဖွဲ့တွင် တာဝန်ရှိကြောင်း ပြင်သစ်တာဝန်ရှိသူများက တရားဝင် စွပ်စွဲလိုက်သည်။ အချို့သော ရေခဲသေတ္တာများမှာ မီးလောင်ကျွမ်းခဲ့ရပြီး စူပါမားကတ်များတွင်လည်း ပုပ်သိုးသွားသည့် အသားများနှင့် ပျော်ကျသွားသည့် ရေခဲမုန့် တန်ချိန်ပေါင်းများစွာကို စွန့်ပစ်ခဲ့ရသည်။ ပါရီ မြို့တော်သည် အီရန်သံအမတ်ကို ဆင့်ခေါ်ထားပြီး ဥရောပသမဂ္ဂ (EU) ၏ ပိတ်ဆို့အရေးယူမှုအသစ်များဖြင့် အရေးယူမည်ဟု ခြိမ်းခြောက်ထားသည်။ တစ်ချိန်တည်းမှာပင် ပြင်သစ်တွင် ကုန်ဈေးနှုန်းကြီးမြင့်မှုကြောင့် ဆန္ဒပြမှုများမှသည် အကြမ်းဖက်ရုန်းရင်းဆန်ခတ်မှုများအဖြစ်သို့ ကူးပြောင်းသွားခဲ့ပြီး နိုင်ငံအား နိုင်ငံရေးနှင့် စီးပွားရေး ကပ်ဘေးအတွင်းသို့ ကျရောက်စေခဲ့သည်။ ပြင်သစ်အစိုးရသည် ယခုဆောင်းရာသီတွင် စံချိန်တင် လျှော့နည်းသွားသည့် ထောက်ခံမှုနှုန်း၊ ကျယ်ကျယ်ပြန့်ပြန့် ဖြစ်ပွားနေသည့် သပိတ်မှောက်မှုများနှင့် ပြင်းထန်သော စွမ်းအင်မလုံလောက်မှု ပြဿနာများကို ရင်ဆိုင်ဖြေရှင်းနေရသည်။

မိုးကုတ်ဒေသခံ လီဆူတိုင်းရင်းသား လက်နက်ကိုင်အဖွဲ့ဝင် ၂၀၀ တပ်မတော်ထံ အလင်းဝင် နိုဝင်ဘာ ၁၀၊ ၂၀၂၆ TNLA နှင့် ပူးပေါင်းကာ ဒေသကာကွယ်ရေးအမည်ဖြင့် အစိုးရတပ်များကို တိုက်ခိုက်ခဲ့သည့် မိုးကုတ်ဒေသခံ လီဆူတိုင်းရင်းသား လက်နက်ကိုင်အဖွဲ့ဝင် ၂၀၀ သည် တပ်မတော်ထံ အလင်းဝင်ရောက်ခဲ့ကြောင်းသိရသည်။ အလင်းဝင်ရောက်ခြင်းအခမ်းအနားကို ယနေ့ နိုဝင်ဘာ ၁၀ ရက် နံနက်ပိုင်းတွင် မိုးကုတ်မြို့ရှိ ပတ္တမြားမြေ မိုးလုံလေလုံအားကစားခန်းမ၌ ကျင်းပခဲ့သည်။ အဆိုပါအဖွဲ့ဝင်များနှင့်အတူ ပစ္စတို ၃ လက်၊ AK-47၊ M22၊ Type 81 သေနတ်များနှင့် ကျည်အိမ် စုစုပေါင်း ၈၄ လက်အပါအဝင် 7.62 mm ကျည် ၁,၄၆၀ တောင့်နှင့် 9 mm ကျည် ၇ တောင့်တို့ကိုလည်း လွှဲပြောင်းပေးအပ်ခဲ့ကြောင်းသိရသည်။ အလယ်ပိုင်းတိုင်းစစ်ဌာနချုပ်အတွင်း လက်နက်ကိုင်အဖွဲ့အသီးသီးမှ အလင်းဝင်ရောက်လာသူအင်အားမှာ ၂,၀၀၀ ကျော်ရှိခဲ့ပြီး ယခုအဖွဲ့ဝင် ၂၀၀ အပါအဝင် စုစုပေါင်း ၂,၅၀၀ ဝန်းကျင်ရှိလာပြီဖြစ်ကြောင်း သိရသည်။ အဆိုပါ လီဆူလက်နက်ကိုင်အဖွဲ့သည် မိုးကုတ်မြို့ကို ကာကွယ်ရန်အတွက် "လီဆူအမျိုးသား ငြိမ်းချမ်းရေးနှင့် ကာကွယ်ရေးအဖွဲ့" အဖြစ် တပ်မတော်နှင့် ဆက်လက်လက်တွဲဆောင်ရွက်သွားမည်ဖြစ်ကြောင်း သိရသည်။

ထိုသို့တိုက်ခိုက်သိမ်းပိုက်နိုင်ရေးဆောင်ရွက်ခဲ့ရာ အကြမ်းဖက်သောင်းကျန်းသူများနှင့် ထိတွေ့တိုက်ပွဲ ၄ ကြိမ် ဖြစ်ပွားခဲ့ပြီး NUG၊ CRPH အကြမ်းဖက်အဖွဲ့၏ အထူးတိုင်းစစ်ဌာန ချုပ်အပါအဝင် KNU၊ KNLA အဖွဲ့များ၏ အကြမ်းဖက်စခန်းနေရာ ၁၁ နေရာတို့အား တိုက်ခိုက်သိမ်းပိုက်နိုင်ခဲ့ကာ အကြမ်းဖက်သောင်းကျန်းသူများထံမှ လက်နက်မျိုးစုံ ၉၇ လက်၊ ကျည်မျိုးစုံ ၁၂၂၈၅ တောင့်၊ Drop Bomb ၃၆၂ လုံး၊ မိုင်းမျိုးစုံ ၁၃၉ လုံး၊ (4x4) ကား ၂ စီး၊ ဒရုန်းများ၊ လက်ပစ်ဗုံးများ၊ ဗုံးသီးများ၊ ဒီတိုနေတာများ၊ ဆက်သွယ်ရေးစက်များ၊ ပစ်ကျင်းများ၊ ဘန်ကာများ၊ လူနေတဲများ၊ အကြမ်းဖက်ဖောက်ခွဲဖျက်ဆီးရာတွင် အသုံးပြုသည့် ဆက်စပ်ပစ္စည်းများ၊ ရိက္ခာပစ္စည်း များ၊ ကွန်ပျူတာအပါအဝင် ရုံးလုပ်ငန်းသုံးပစ္စည်းများ၊ သောင်းကျန်းသူများ၏ ပြောက်ကျား ဝတ်စုံများ၊ ကျည်ကာအင်္ကျီ၊ ဦးထုပ်များ၊ ဆေးဝါးများနှင့် ဆေးပစ္စည်းများ၊ အခြားအသုံးဆောင်ပစ္စည်း အများအပြား သိမ်းဆည်းရမိခဲ့ပြီး အကြမ်းဖက်သောင်းကျန်းသူများအနေဖြင့် ထိခိုက်ဆုံးရှုံး မှုများစွာဖြင့် ဦးတည်ရာမဲ့ ဖရိုဖရဲဆုတ်ခွာထွက်ပြေး သွားကြောင်းသိရှိရသည်။ တပ်မတော်အနေဖြင့် နိုင်ငံတော်တည်ငြိမ်အေးချမ်းရေးနှင့် ဒေသဖွံ့ဖြိုးတိုးတက်ရေးကို နည်းမျိုးစုံ နှောင့်ယှက်ဖျက်ဆီးနေသည့် လက်နက်ကိုင်အကြမ်းဖက်သောင်း ကျန်းသူများကို မည်သည့် ဒေသတွင်မျှ အခြေချနေထိုင်၍ အကြမ်းဖက်လုပ်ရပ်များအား ယုတ်မာရိုင်းစိုင်းစွာ ဥပဒေမဲ့ကျူးလွန် ခြင်းမရှိစေရန် အကြမ်းဖက်ချေမှုန်းမှု စစ်ဆင်ရေး (Counter-Terrorism Operation) ကို တာဝန်သိဒေသခံပြည်သူများနှင့် ပူးပေါင်း၍ဆောင်ရွက်လျက်ရှိရာ အဆိုပါ သိမ်ဇရပ်-ကျိုက်ထို ဒေသများအတွင်း အကြမ်းဖက်သောင်းကျန်းသူများ ခိုအောင်းနေထိုင်နိုင်ခြင်းမရှိစေရေးအတွက် လိုအပ်သည့် နယ်မြေလုံခြုံရေးလုပ်ငန်းများကို အရှိန်အဟုန်မြှင့် ဆက်လက်ဆောင်ရွက်သွားမည်ဖြစ်ကြောင်း သတင်းရရှိသည်။

တပ်မတော်စစ်ကြောင်းများက မွန်ပြည်နယ်နှင့် ပဲခူးတိုင်းဒေသကြီး နယ်စပ်ဒေသတစ်ဝိုက် အခြေပြု၍ အကြမ်းဖက်လုပ်ရပ်များ လုပ်ဆောင်လျက်ရှိသည့် NUG၊ CRPH အကြမ်းဖက်သောင်း ကျန်းသူများ၏ အထူးတိုင်းစစ်ဌာနချုပ်အပါအဝင် KNU၊ KNLA ပူးပေါင်းအဖွဲများ၏ အခြေပြုစခန်းများအား တိုက်ခိုက်ချေမှုန်း နိုဝင်ဘာ ၉၊ ၂၀၂၆ မွန်ပြည်နယ်နှင့် ပဲခူးတိုင်းဒေသကြီးတို့၏ နယ်စပ်ဖြစ်သော ကျိုက်ထိုမြို့နယ်နှင့် ရွှေကျင်မြို့နယ်အတွင်း ခိုအောင်း၍ အဖျက်အမှောင့် လုပ်ရပ်များလုပ်ဆောင်လျက်ရှိသည့် KNU၊ KNLA အပါအဝင် CRPH ၊ NUG နှင့် ၎င်းတို့၏ လက်ဝေခံ PDF အမည်ခံ အကြမ်းဖက်သောင်းကျန်း သူပူးပေါင်းအဖွဲ့များ၏ အခြေပြုနေထိုင်ရာ စခန်းများအား တပ်မတော်စစ်ကြောင်းများက စနစ်တကျ ချီတက်တိုက်ခိုက်ချေမှုန်းခဲ့ကြောင်းသိရှိရသည်။ KNU၊ KNLA အပါအဝင် CRPH ၊ NUG နှင့် ၎င်းတို့၏ လက်ဝေခံ PDF အမည်ခံအကြမ်းဖက် သောင်းကျန်းသူများအနေဖြင့် မွန်ပြည်နယ်၊ သိမ်ဇရပ်-ကျိုက်ထိုဒေသနှင့် ပဲခူးတိုင်းဒေသကြီး နယ်မြေအစပ်တို့ရှိ သွားလာရေးခက်ခဲသော တောတောင်များအတွင်း အခြေပြုနေထိုင်၍ တရားဥပဒေမဲ့ မသမာသောနည်းလမ်းမျိုးစုံမှ ရရှိလာသောအကျိုးအမြတ်များဖြင့် အဖျက်အမှောင့် လုပ်ရပ်များ လုပ်ဆောင်ရာတွင်အသုံးပြုသော လက်လုပ်စိန်ပြောင်းများ၊ လက်လုပ်သေနတ်များ၊ ခဲယမ်းများနှင့် ဖောက်ခွဲရေးသုံးပစ္စည်းများကိုပြုလုပ်ပြီး လက်နက်အားကိုးဖြင့် ရိုးသားစွာ အသက်မွေးဝမ်းကြောင်းပြုနေကြသည့် ဒေသခံတိုင်းရင်းသားပြည်သူများအား အနိုင်ကျင့် ဗိုလ်ကျကာ ကျေးရွာများအတွင်းနှင့် အနီးဝန်းကျင်တို့တွင် ယာယီအခြေပြုစခန်းများ တည်ဆောက် နေထိုင်လျက်ရှိကြကြောင်းသိရသည်။ အကြမ်းဖက်သောင်းကျန်းသူ ပူးပေါင်းအဖွဲ့များအနေဖြင့် အဆိုပါဒေသများ၌ ယာယီစိုးမိုးအခြေပြု စဉ်ကာလအတွင်း ဒေသခံပြည်သူများ၏နေအိမ်များ၊ ဘာသာရေးဆိုင်ရာ အဆောက်အအုံများ၊ စာသင်ကျောင်းများ၌ သဲအိတ်များဖြင့် ဘန်ကာများ တည်ဆောက်ခြင်း၊ ဆက်ကြေးကောက်ခြင်း၊ လူသစ်စုဆောင်းခြင်း၊ ၎င်းတို့အပေါ် ထောက်ခံအားပေးမှုမရှိသောကျေးရွာများမှ ဒေသခံပြည်သူများ၊ ရဟန်းသံဃာများနှင့် သစ္စာရှိနိုင်ငံ့ဝန်ထမ်းများအား “ဒလန်” ခေါင်းစဉ် တပ်စွပ်စွဲပြီး ဖမ်းဆီး၊ နှိပ်စက်၊ သတ်ဖြတ်ခြင်းများကို တရားဥပဒေမဲ့ကျူးလွန်လျက်ရှိသည်။ ထို့ပြင် ၎င်းဒေသအတွင်းရှိ ဒေသခံပြည်သူလူထု၏ ကုန်စည်ပို့ဆောင်မှုများ လုပ်ဆောင်လျက်ရှိသည့် ကုန်တင်ကားများနှင့် ခရီးသွားမော်တော်ယာဉ်များအား ဆက်ကြေးကောက်ခံခြင်း၊ ဆက်သွယ်ရေးလမ်းကြောင်းများအား မိုင်းထောင်ခြင်း၊ လမ်းတံတားများအား ဖောက်ခွဲဖျက်ဆီးခြင်း၊ ခရီးသွားပြည် သူများအားအကြောင်းမဲ့ ဖမ်းဆီးသတ်ဖြတ်ခြင်းစသည့် အကြမ်းဖက်လုပ်ရပ်များကို ယုတ်မာရိုင်း စိုင်းစွာ လုပ်ဆောင်လျက်ရှိသဖြင့် ဒေသခံတိုင်းရင်းသား ပြည်သူများ၏ လူမှုစီးပွားဘဝများများစွာ ထိခိုက်နစ်နာခဲ့ရသည်။ NUG၊ CRPH တို့အနေဖြင့် KNU၊ KNLA အဖွဲ့များနှင့် ပူးပေါင်းကာ မွန်ပြည်နယ်၊ ကျိုက်ထိုမြို့နယ်၊ သိမ်ဇရပ်မြို့၏ အရှေ့မြောက်ဘက်၊ ပဲခူးတိုင်းဒေသကြီး၊ ရွှေကျင်မြို့နယ်အတွင်း NUG ၏ အထူးတိုင်းစစ်ဌာနချုပ်ဖွင့်လှစ်၍ အကြမ်းဖက်လုပ်ငန်းများ လုပ်ဆောင်မှုကို ကွပ်ကဲလျက်ရှိကြောင်း ဒေသခံတာဝန်သိပြည်သူများ၏ တိကျသောသတင်းပေးပို့မှုအရ တပ်မတော်စစ်ကြောင်းများက အကြမ်းဖက်ချေမှုန်းမှုစစ်ဆင်ရေး (Counter-Terrorism Operation)ဖြင့် တိုက်ခိုက်ချေမှုန်းရန် သိမ်ဇရပ်မြို့၌ လိုအပ်သည့် ပြင်ဆင်စုဖွဲ့မှုများ ဆောင်ရွက်ခဲ့သည်။ ထို့နောက် နိုဝင်ဘာလ ၃ ရက်မှစ၍ စစ်ကြောင်းများခွဲကာ နယ်မြေလုံခြုံရေးလုပ်ငန်းများကို အဆင့်ဆင့်ဆောင်ရွက်ခဲ့ရာ နိုဝင်ဘာလ ၅ ရက်တွင် သိမ်ဇရပ်မြို့၏ အရှေ့မြောက်ဘက် ကော်ကတ်ကျေးရွာအနီး အကြမ်းဖက်သောင်းကျန်းသူများ ယာယီအခြေပြုနေထိုင်လျက်ရှိသည့် စခန်း ၁ ခုအား လည်းကောင်း၊ နိုဝင်ဘာလ ၆ ရက်တွင် သိမ်ဇရပ်မြို့၏ အရှေ့မြောက်ဘက်ကော်ထီးထကျေးရွာအနီးရှိ အကြမ်းဖက်သောင်းကျန်းသူများ ယာယီအခြေပြု နေထိုင်လျက်ရှိသည့် စခန်း ၁ ခုအား လည်းကောင်း၊ နိုဝင်ဘာ လ ၇ ရက်တွင် သိမ်ဇရပ်မြို့၏ အရှေ့မြောက်ဘက် ကော်ထီးထ ကျေးရွာအနီး KNU၊ KNLA တပ်မဟာ(၁)၊ ရင်း(၃) ဌာနချုပ်အပါအဝင် အကြမ်းဖက်သောင်း ကျန်းသူများ ယာယီအခြေပြုနေထိုင်လျက်ရှိသည့် စခန်း ၄ ခုတို့အား သိမ်းပိုက်ရရှိခဲ့ကြောင်း သိရှိရသည်။ ဆက်လက်၍တပ်မတော်စစ်ကြောင်းများအနေဖြင့် အကြမ်းဖက်သောင်းကျန်းသူများ ခိုအောင်းနေ ထိုင်နိုင်ခြင်းမရှိစေရေး လိုအပ်သည့် နယ်မြေလုံခြုံရေးလုပ်ငန်းများကို နေ့မနားညမအား ဆက်လက်ကြိုးပမ်းဆောင်ရွက်ခဲ့ရာ နိုဝင်ဘာလ ၈ ရက်တွင် မွန်ပြည်နယ်၊ သိမ်ဇရပ်မြို့၏ အရှေ့မြောက်ဘက်၊ ပဲခူးတိုင်းဒေသကြီး ရွှေကျင်မြို့နယ် အတွင်းရှိ ပွိုင့် ၄၈၀ တောင်ကုန်းအနီး ထီးကလာချောင်းဝန်းကျင်တစ်ဝိုက်၌ NUG၊ CRPH အကြမ်းဖက်သောင်းကျန်းသူများ၏ အထူးတိုင်းစစ်ဌာနချုပ် အပါအဝင်စခန်း ၅ ခု အားထပ်မံ၍ အသီးသီး တိုက်ခိုက်သိမ်း ပိုက်နိုင်ခဲ့ကြောင်း သိရှိရသည်။

တပ်မတော်စစ်ကြောင်းများက မွန်ပြည်နယ်နှင့် ပဲခူးတိုင်းဒေသကြီး နယ်စပ်ဒေသတစ်ဝိုက် အခြေပြု၍အကြမ်းဖက်လုပ်ရပ်များ လုပ်ဆောင်လျက်ရှိသည့် NUG၊ CRPH အကြမ်းဖက်သောင်းကျန်းသူများ၏ အထူးတိုင်းစစ်ဌာနချုပ်အပါအဝင် KNU၊ KNLA ပူးပေါင်းအဖွဲ့များ၏အခြေပြုစခန်းများအား တိုက်ခိုက်ချေမှုန်း နိုဝင်ဘာ ၉၊ ၂၀၂၆

ဒုတိယသမ္မတ ဦးညိုစော ပြည်ထောင်စုသမ္မတမြန်မာနိုင်ငံတော်အစိုးရ ၂၀၂၆ ခုနှစ် ကထိန်သင်္ကန်း ဆက်ကပ်လှူဒါန်းပွဲအခမ်းအနားကျင်းပရေးဦးစီးကော်မတီ ညှိနှိုင်းအစည်းအဝေးသို့ တက်ရောက်အမှာစကားပြောကြား

နဗီးဒီးယား (Nvidia) စီအီးအို CEO ၏ အိမ်ထောင်ရေးဖောက်ပြန်မှုနှင့် သူလျှိုလုပ်ရပ်ဆိုင်ရာ စွပ်စွဲချက်များကြောင့် စုံစမ်းစစ်ဆေးမှုများစတင်ခဲ့ပြီး ကုမ္ပဏီရှယ်ယာဈေးနှုန်းများ ထက်ဝက်မက ထိုးဆင်းသွားခဲ့ မိုက်ခရိုချစ်ပ်ထုတ်လုပ်သည့် ကုမ္ပဏီကြီးဖြစ်သော နဗီးဒီးယား Nvidia ၏ အမှုဆောင်အရာရှိချုပ် (CEO) ဂျန်ဆန် ဟွမ် (Jensen Huang) သည် ၎င်း၏ဇနီးဖြစ်သူအပေါ် သစ္စာဖောက်ခဲ့ကြောင်း ဝန်ထမ်းများထံ ပေးပို့သည့် ကုမ္ပဏီတွင်းမက်ဆေ့ဂျ်၌ ဝန်ခံတောင်းပန်ခဲ့ပြီးနောက် ရင်းနှီးမြှုပ်နှံသူများကို ရိုက်ခတ်သွားစေသည့် ခေါင်းဆောင်ပိုင်းဆိုင်ရာ အကျပ်အတည်းတစ်ခုနှင့် ရင်ဆိုင်နေရကြောင်း Bloomberg သတင်းတွင် ဖော်ပြထားသည်။ ယခု အရှုပ်တော်ပုံ၏ ဗဟိုချက်ဖြစ်သူ အမျိုးသမီးမှာ Megaspeed International မှ အမှုဆောင်ဟောင်းတစ်ဦးဖြစ်သူ အဲလစ်စတာ ဟွမ် (Alice Huang) ဆိုသူဖြစ်သည်။ သတင်းများ၏ စွပ်စွဲချက်အရ အမေရိကန် ထောက်လှမ်းရေးအေဂျင်စီများက ၎င်းအား တရုတ်နိုင်ငံအတွက် သူလျှိုလုပ်ပေးနေသည်ဟု သံသယရှိနေကြပြီး၊ ယင်းပေါက်ကွဲအားပြင်းသည့် စွပ်စွဲချက်ကြောင့် ကုမ္ပဏီနှင့် အမျိုးသားလုံခြုံရေးဆိုင်ရာ ဂယက်ရိုက်ခတ်မှုများ ကြီးမားစွာ ဖြစ်ပေါ်လျက်ရှိသည်။ ကုမ္ပဏီဘုတ်အဖွဲ့က ပြည်တွင်းစုံစမ်းစစ်ဆေးမှုများကို ချက်ချင်းစတင်လိုက်သလို စျေးကွက်အတွင်း တုံ့ပြန်မှုမှာလည်း လျင်မြန်ခဲ့ပြီး ဥရောပတွင် အစောပိုင်း စျေးကွက်အရောင်းအဝယ်များတွင် ရှယ်ယာဈေးနှုန်းများ ၆ ရာခိုင်နှုန်းနီးပါး ထိုးဆင်းသွားခဲ့သည်။ နဗီးဒီးယား ဘုတ်အဖွဲ့က အမျိုးသားလုံခြုံရေး သို့မဟုတ် ကုမ္ပဏီ၏ လျှို့ဝှက်သတင်းအချက်အလက်များ ပေါက်ကြားသွားခဲ့သည်ဟု ယူဆစရာအကြောင်းမရှိကြောင်း အခိုင်အမာဆိုကာ ရင်းနှီးမြှုပ်နှံသူများကို အလျင်အမြန် စိတ်အေးစေခဲ့သည်။ အမေရိကန်သမ္မတ ဒေါ်နယ်ထရမ့်ကလည်း ဂျန်ဆန်ဟွမ် ဘက်မှ လူသိရှင်ကြား ရပ်တည်ပေးခဲ့ပြီး ၎င်းအနေဖြင့် ရာထူးတွင် ဆက်လက်ရှိနေသင့်သည်ဟု အကြံပြုပြောကြားခဲ့သည်။ ယခု စုံစမ်းစစ်ဆေးမှုများသည် အောက်ပါအခြေအနေများနှင့်အတူ ပေါ်ပေါက်လာခြင်း ဖြစ်သည်- နည်းပညာကုမ္ပဏီကြီးများ၏ ဧရာမ AI အသုံးစရိတ်များကို ထောက်ပံ့ပေးနိုင်စွမ်းအပေါ် ရင်းနှီးမြှုပ်နှံသူများ စိုးရိမ်နေကြသဖြင့် နဗီးဒီးယား ၏ ရှယ်ယာများသည် အောက်တိုဘာလ စံချိန်တင်မြင့်မားခဲ့သည့် ဈေးနှုန်းထက် ၂၂ ရာခိုင်နှုန်းခန့် ကျဆင်းသွားခဲ့သည်။ နိုဝင်ဘာ ၁၇ ရက်တွင် သုံးလပတ် ဘဏ္ဍာရေးအစီရင်ခံစာ ထုတ်ပြန်ရန် ရှိနေပြီး ရင်းနှီးမြှုပ်နှံသူများက AI ချစ်ပ်များ၏ ဝယ်လိုအားသည် ကုမ္ပဏီ၏ တိုးတက်မှုကို ဆက်လက်ထိန်းထားနိုင်ပါ့မလားဆိုသည်ကို အနီးကပ် စောင့်ကြည့်နေကြသည်။ ဂျန်ဆန်ဟွမ် ၏ ရှေ့ရေးနှင့်ပတ်သက်၍ မရေမရာဖြစ်နေသည့် မသေချာမှုများသည် နဗီးဒီးယား ရှယ်ယာများအပေါ် ပိုမိုဖိအားပေးလာနိုင်ကြောင်း လေ့လာဆန်းစစ်သူများက သတိပေးထားသည်။ တရုတ်နိုင်ငံကမူ ဂျန်ဆန်ဟွမ် ကို သူလျှိုလုပ်ခဲ့သည်ဆိုသည့် စွပ်စွဲချက်များကို ငြင်းဆိုထားသည်။ "တရုတ်သူလျှိုဆိုတဲ့ ရေးသားဖော်ပြချက်ဟာ လုံးဝအခြေအမြစ်မရှိတဲ့ စွပ်စွဲမှုနဲ့ အပုပ်ချမှု သက်သက်ပဲဖြစ်ပါတယ်" ဟု တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Guo Jiakun က ပုံမှန်သတင်းစာရှင်းလင်းပွဲတစ်ခုတွင် ပြောကြားခဲ့သည်။

နည်းပညာကုမ္ပဏီကြီးများ ၏ AI တည်ဆောက်ရေး စီမံကိန်းကြီးများ အမေရိကန် မဲဆန္ဒရှင်များ၏ ဆန့်ကျင်မှုနှင့် ရင်ဆိုင်နေရ AI နည်းပညာ တဟုန်ထိုး တိုးတက်လာမှုကို ထောက်ပံ့ရန် ဒေတာစင်တာများစွာ တည်ဆောက်နေသည့် လုပ်ငန်းစဉ်သည် အပြင်းအထန် ဆန့်ကျင်မှုများနှင့် ရင်ဆိုင်နေရကြောင်း Politico သတင်းဌာနက ဖော်ပြခဲ့သည်။ လှုပ်ရှားတက်ကြွသူများသည် ၎င်းတို့၏ ဆန့်ကျင်မှုကို ဒေသခံအသိုင်းအဝိုင်းများမှတစ်ဆင့် ပြည်နယ်ဥပဒေပြုလွှတ်တော်များအထိ တိုးမြှင့်လုပ်ဆောင်ရန် ပြင်ဆင်နေကြသည်။ ဒေတာစင်တာများ လျင်မြန်စွာ တိုးပွားလာမှု၊ ၎င်းတို့၏ စွမ်းအင်နှင့် ရေအလွန်အကျွံ သုံးစွဲမှုနှင့် သဘာဝပတ်ဝန်းကျင် ညစ်ညမ်းမှုဆိုင်ရာ စိုးရိမ်ပူပန်မှုများကို ဒီမိုကရက်တစ်ပါတီက အသုံးချနိုင်ခဲ့သဖြင့် ကြားဖြတ်ရွေးကောက်ပွဲ အနိုင်ရရှိမှုများက ဆန့်ကျင်သူများအတွက် အရှိန်အဟုန်သစ်တစ်ရပ် ဖြစ်စေခဲ့သည်။ အိုဟိုင်းယိုး (Ohio) ပြည်နယ်ရှိ ဒေသ ၁၁ ခုတွင် မဲဆန္ဒရှင်များက အကြီးစား ဒေတာစင်တာများ တည်ဆောက်ခြင်းကို ပိတ်ပင်ရန် အတည်ပြုခဲ့ကြသည်။ ထို့ပြင် ဒေတာစင်တာ တိုးချဲ့မှုကို ဆန့်ကျင်သည့် အဆိုပြုချက်များ မဲလက်မှတ်တွင် ပါဝင်ခဲ့သည့် မြို့ ၁၀ မြို့လုံး၌ မဲအရေအတွက် နှစ်ဆကျော် ကွာခြားချက်ဖြင့် အနိုင်ရအတည်ပြုနိုင်ခဲ့သည်။ ကန်ဆက်စစ်(Kansas)၊ မိန်း (Maine) နှင့် ဖလော်ရီဒါ (Florida) ပြည်နယ်တို့တွင်လည်း အလားတူ ဆန့်ကျင်မှုများ တွေ့ရှိနေရပြီး၊ တစ်နိုင်ငံလုံးအတိုင်းအတာဖြင့် ဒေသဆိုင်ရာ ပိတ်ပင်မှုနှင့် ဆိုင်းငံ့မှုပေါင်း ၄၀၀ ကျော်အထိ တိုးပွားလာနေသည်။ ကာလီဖိုးနီးယား (California) ပြည်နယ်၊ လော့စ်အိန်ဂျလိစ်မြို့အစွန်ဖျားရှိ အယ်လ်ဟမ်ဘရာ (Alhambra) မြို့တွင် မဲဆန္ဒရှင် ၈၂ ရာခိုင်နှုန်းက ဒေတာစင်တာများ ပိတ်ပင်ရေးအတွက် ထောက်ခံမဲ ပေးခဲ့ကြသည်။ တက်ဆက်စစ် (Texas) ပြည်နယ်တွင်လည်း ရွေးကောက်ခံ အုပ်ချုပ်ရေးမှူး ဂျီနာ ဟီနိုဟိုဆာ (Gina Hinojosa) က စီမံကိန်း ၁၇၀ ကျော်ကို စိစစ်ရန်အတွက် စီးပွားဖြစ် ဒေတာစင်တာ ဆောက်လုပ်ရေးများကို ချက်ချင်း ဆိုင်းငံ့ထားရန် တောင်းဆိုထားသည်။ အိမ်များနှင့် စာသင်ကျောင်းများ ဘေးကင်းရေး၊ လျှပ်စစ်နှင့် ရေအလွန်အကျွံ သုံးစွဲမှု၊ ညစ်ညမ်းမှုနှင့် ဆူညံသံများ စသည့် AI အခြေခံအဆောက်အအုံများကြောင့် ၎င်းတို့၏ အသိုင်းအဝိုင်းပေါ် သက်ရောက်လာမည့် အန္တရာယ်များကို ပြည်သူများ စိုးရိမ်လာကြသည့်အတွက် ဤဆန့်ကျင်မှုများသည် နိုင်ငံရေးပါတီ အစွဲမရှိဘဲ ဖြစ်ပေါ်နေခြင်းဖြစ်သည်။

မကွေးတိုင်းဒေသကြီးဝန်ကြီးချုပ် ဦးတင်ကိုကို ဝက်သက်၊ ဂျိုက်သိုးရောဂါကာကွယ်ဆေး ထပ်ဆောင်းထိုးနှံခြင်းလုပ်ငန်းဆောင်ရွက်ရန်အတွက် အသိပေးဆွေးနွေးခြင်းနှင့် စတင်ဆောင်ရွက်ခြင်း အထိမ်းအမှတ် အခမ်းအနား တက်ရောက် နိုဝင်ဘာ ၉၊ ၂၀၂၆ ကျန်းမာရေးဝန်ကြီးဌာန၊ မကွေးတိုင်းဒေသကြီး ပြည်သူ့ကျန်းမာရေးဦးစီးဌာနမှ ဦးစီးကျင်းပသည့် “ဝက်သက်-ဂျိုက်သိုးရောဂါကာကွယ်ဆေး ထပ်ဆောင်းထိုးနှံခြင်း အသိပေးဆွေးနွေးခြင်းနှင့် စတင်ဆောင်ရွက်ခြင်းအထိမ်းအမှတ် အခမ်းအနားကို ယနေ့ နံနက်ပိုင်းက မကွေးမြို၊ မြိုတော်ခန်းမ၌ကျင်းပရာ အခမ်းအနားသို့ မကွေးတိုင်းဒေသကြီးဝန်ကြီးချုပ် ဦးတင်ကိုကို၊ နယ်မြေခံတပ်နယ်မှတာဝန်ရှိသူများ၊ တိုင်းဒေသကြီးအစိုးရအဖွဲ့ဝင်ဝန်ကြီးများ၊ ဌာနဆိုင်ရာတာဝန်ရှိသူများ၊ မိခင်နှင့်ကလေးစောင့်ရှောက်မှုကြီးကြပ်ရေးအဖွဲ့မှ တာဝန်ရှိသူများ၊ မြန်မာနိုင်ငံကြက်ခြေနီအဖွဲ့မှ တာဝန်ရှိသူများ၊ ကျန်းမာရေးဝန်ထမ်းများနှင့် ဖိတ်ကြားထားသော ဧည့်သည်တော်များ တက်ရောက်ကြသည်။ ဦးစွာ မကွေးတိုင်းဒေသကြီးဝန်ကြီးချုပ် ဦးတင်ကိုကိုက “မကွေးတိုင်းဒေသကြီးတွင် ဝက်သက်၊ ဂျိုက်သိုးရောဂါကာကွယ်ဆေး ထပ်ဆောင်းထိုးနှံခြင်းလုပ်ငန်းဆောင်ရွက်ရန်အတွက် အသိပေးဆွေးနွေးခြင်းနှင့် စတင်ဆောင်ရွက်ခြင်းအထိမ်းအမှတ် အခမ်းအနား” ဖြစ်ပြီး ကာကွယ်ဆေးထိုးနှံခြင်းလုပ်ငန်းသည် လွန်ခဲ့သည့် နှစ်ပေါင်း (၅၀)အတွင်း ကမ္ဘာတစ်လွှား လူဦးရေသန်း(၁၅၀) ကျော်၏ အသက်ကို ကယ်တင်ပေးနိုင်ခဲ့သည့် ကျန်းမာရေးစောင့်ရှောက်မှု၏ အောင်မြင်မှုပြယုဂ်တစ်ခုဖြစ်သော်လည်း၊ ကမ္ဘာ့ကျန်းမာရေးအဖွဲ(WHO)၏ စောင့်ကြပ်ကြည့်ရှုရေးအချက်အလက်များအရ ကမ္ဘာတစ်ဝန်းနှင့် အိမ်နီးချင်းနိုင်ငံအချိုတွင် ဝက်သက်ရောဂါပြင်းထန်စွာဖြစ်ပွားလျက်ရှိသဖြင့် ရောဂါခုခံနိုင်စွမ်းအား ကွာဟချက်(Immunity Gap) များကို အမြန်ဆုံးဖြည့်ဆည်းရန် လိုအပ်နေခြင်းကြောင့် မိမိတိုမြန်မာနိုင်ငံတွင်လည်း ကိုဗစ်-၁၉ ကာလ နောက်ဆက်တွဲ ကာကွယ်ဆေးလွှမ်းခြုံမှုလျော့နည်းခဲ့သည့် ကလေးငယ် ခန့်မှန်းခြေ(၁.၈)သန်းနီးပါးအတွက် ကာကွယ်ဆေးထပ်ဆောင်းထိုးနှံခြင်းလုပ်ငန်းစဉ်များအား Phase(1)အဖြစ် အောက်တိုဘာလတွင် တိုင်းနှင့်ပြည်နယ်(၄)ခု၌ ဆောင်ရွက်ခဲ့ပြီးဖြစ်ပါကြောင်း၊ ယခု Phase (2) အဖြစ် မကွေးတိုင်းဒေသကြီးအပါအဝင် ကျန်တိုင်းဒေသကြီးနှင့် ပြည်နယ်များတွင် နိုဝင်ဘာ (၉) ရက်မှ (၁၃) ရက်အထိ ဆက်လက်အကောင်အထည် ဖော်ဆောင်ရွက်သွားမည်ဖြစ်ရာ အဆိုပါလုပ်ငန်းစဉ်အတွက် WHO၊ UNICEF၊ GAVI အဖွဲ့တို့နှင့်ပူးပေါင်း၍ ဘဏ္ဍာရေးနှင့်နည်းပညာပံ့ပိုးမှုများရယူခဲ့သည့်အပြင် နိုင်ငံတော်မှလည်း ကာကွယ်ဆေးတန်ဖိုး၏ (၅.၂%) ထည့်ဝင်ကျခံထားပြီးဖြစ်သည့်အတွက် ဆေးထိုးစုရပ်နှင့် အချိန်ဇယားများ ပြည်သူထံမှန်ကန်စွာရောက်ရှိရေး၊ သတင်းစကားများ အသိပေးရေးနှင့်ကျန်ရှိကလေးများအား ပြန်လည်ရှာဖွေထိုးနှံပေးနိုင်ရေးတိုတွင် ဒေသအုပ်ချုပ်ရေးအဖွဲ့များ၊ ကြက်ခြေနီနှင့်လူမှုရေးအဖွဲ့အစည်းများ၊ စေတနာ့ဝန်ထမ်းများအနေဖြင့် လုံခြုံစိတ်ချရသော ကာကွယ်ဆေးထိုးလုပ်ငန်း လမ်းညွှန်ချက်များနှင့်အညီ တက်ညီလက်ညီ ဝိုင်းဝန်းပူးပေါင်းဆောင်ရွက်ပေးကြပါရန် တိုက်တွန်း ပြောကြားသည်။ ဆက်လက်၍ တိုင်းဒေသကြီး ပြည်သူ့ကျန်းမာရေးနှင့် ကုသရေးဦးစီးဌာနမှူးက ဝက်သက်-ဂျိုက်သိုးရောဂါ ကာကွယ်ဆေးထပ်ဆောင်းထိုးနှံခြင်းလုပ်ငန်းစဉ်များနှင့်ပတ်သက်၍ Power Point ဖြင့် အသေးစိတ်ရှင်းလင်းတင်ပြသည်။ ထိုနောက် ဝက်သက်-ဂျိုက်သိုးရောဂါ ကာကွယ်ဆေးထပ်ဆောင်းထိုးနှံခြင်းလုပ်ငန်း(၂၀၂၆) စတင်ထိုးနှံခြင်း အထိမ်းအမှတ်ဖွင့်ပွဲ အခမ်းအနား Video Clip ပြသသည်။ ယင်းနောက် တိုင်းဒေသကြီး ဝန်ကြီးချုပ်နှင့်တာဝန်ရှိသူများသည် အခမ်းအနားသို့ တက်ရောက်လာသည့် ကလေးငယ်(၂၀) ဦးအား ဝက်သက်-ဂျိုက်သိုးကာကွယ်ဆေးထပ်ဆောင်းထိုးနှံပေးနေမှုကို ကြည့်ရှုအားပေးကာ ကလေးငယ်များအား အမှတ်တရလက်ဆောင်ပစ္စည်းများ ပေးအပ်ခဲ့ကြောင်း သိရသည်။

မုဒုံမြို့နယ်၌ အကြမ်းဖက်အဖွဲ့ (စိစစ်ဆဲ) က သေနတ်ဖြင့် ပစ်ခတ်ခဲ့မှုကြောင့် အပြစ်မဲ့အရပ်သားပြည်သူတစ်ဦးထိခိုက်ဒဏ်ရာရ NOM နိုဝင်ဘာ ၉၊ ၂၀၂၆ မွန်ပြည်နယ်၊ မော်လမြိုင်မြို့နယ် ပြည်သူ့ဆေးရုံသို့ နိုဝင်ဘာ ၈ ရက်နေ့ ည ၇ နာရီအချိန်၌ ကျည်ထိမှန်ဒဏ်ရာဖြင့် အမျိုးသားတစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေး၍ ဖြစ်စဉ်အား စိစစ်ခဲ့ရာ ညနေ ၆ နာရီခွဲတွင် မုဒုံမြို့နယ်၊ ဝက်တဲကျေးရွာနေ ကိုထက်မြတ်ဝင်း (ခ) စနေဦး (၂၂) နှစ်သည် မွန်ပြည်နယ်၊ မုဒုံမြို့နယ်၊ နိုင်လှုံကျေးရွာမှ ကရင်ပြည်နယ်၊ ကြာအင်းဆိပ်ကြီးမြို့နယ်၊ ကနာလိုကျေးရွာသို့ မော်တော်ဆိုင်ကယ်ဖြင့် သွားရောက်စဉ် နိုင်လှုံကျေးရွာ၏အရှေ့ဘက် ၄ မိုင်ခန့် အရောက်၌ အကြမ်းဖက်အဖွဲ့ (စိစစ်ဆဲ) က သေနတ်ဖြင့် ပစ်ခတ်ခဲ့သဖြင့် ၎င်းတွင်ကျည်ထိမှန်ဒဏ်ရာ ရရှိခဲ့ခြင်းဖြစ်ကြောင်း သိရသည်။

သီပေါမြို့နယ်အတွင်းရှိ ကျင်သီတံတား ပြုပြင်မည်ဖြစ်၍ မော်တော်ယာဉ်များ ဖြတ်သန်းမှုယာယီပိတ်မည် NOM၊နိုဝင်ဘာ၉၊၂၀၂၆ မန္တလေး-လားရှိုး ပြည်ထောင်စုလမ်းမကြီး၊ သီပေါမြို့နယ်အတွင်းရှိ ကျင်သီတံတားအားနိုဝင်ဘာ၁၀ရက် ညနေ ၄နာရီမှစပြီး ပြုပြင်တည်ဆောက်ခြင်းလုပ်ငန်းများ ဆောင်ရွက်မည်ဖြစ်ပါသဖြင့် အဆိုပါလုပ်ငန်းများ ဆောင်ရွက်နေစဉ်ကာလအတွင်း မော်တော်ယာဉ်များ ဖြတ်သန်းသွားလာမှုများကိုပိတ်ထားမည်ဖြစ်ကြောင်း သီပေါမြို့နယ်အုပ်ချုပ်ရေးအဖွဲ့မှ ထုတ်ပြန်ထားကြောင်းသိရသည်။ သို့ဖြစ်ပါ၍ အဆိုပါလမ်းပိုင်းကို အသုံးပြုသွားလာကြမည့် ခရီးသွားပြည်သူများ၊ ခရီးသည်တင်ယာဉ်များ၊ ကုန်တင်ကားများအနေဖြင့် ယင်တံတားအနီးတွင်ဖောက်လုပ်ထားသည့် ယာယီတံတား (လမ်းလွှဲ) မှတစ်ဆင့် ပုံမှန်အတိုင်း ဖြတ်သန်းသွားလာနိုင်ကြောင်းသိရသည်။ “ကျင်သီတံတားပြုပြင်နေတဲ့အချိန်မှာလမ်းလွဲတံတားကနေကားတွေသွားလာလို့ရပါတယ် ဒါပေမယ့်ဖြက်သန်းဖို့အတွက်တန်ချိန်ကိုတော့သက်မှတ်ထားတယ် ၅တန်အထက် ကားကြီးများသွားခွင့်ပိတ်ထားတယ်အိမ်စီးကားငယ်တွေ၊ ဆိုင်ကယ်တွေနဲ့၅ တန်အောက် ကားတွေကတော့ဖြက်သန်ခွင့်ရပါတယ်”ဟု ပြည်သူ့လွှတ်တော်ကိုယ်စားလှယ်သီပေါမဲဆန္ဒနယ် စိုင်းကောင်း သက်စံကပြောသည်။ ကျင်သီတံတားသည် ရှမ်းပြည်နယ်မြောက်ပိုင်း ကျောက်မဲမြို့ နှင့် သီပေါမြို့တို့ကို ဆက်သွယ်ပေးထားသည့် မန္တလေး-လားရှိုး ပြည်ထောင်စုလမ်းမကြီးပေါ်ရှိ အဓိကကျသော တံတားတစ်စင်း ဖြစ်ပြီး ယင်တံတား မှာတိုက်ပွဲများကြောင့် မိုင်းခွဲဖျက်ဆီးခံခဲ့ရပြီးနောက် ယာယီတံတားဖြင့် ဖြတ်သန်းသွားလာနေရသည့်မှာလက်ရှိအချိန်ထိဖြစ်ကြောင်းသိရသည်။ ကျောက်မဲ-သီပေါ လမ်းပိုင်းကို အသုံးပြု၍ ခရီးသွားမည်ဆိုပါက မထွက်ခွာမီ သက်ဆိုင်ရာ ခရီးသည်တင်ယာဉ်လိုင်းများနှင့် ကုန်စည်ပို့ဆောင်ရေးဂိတ်များသို့ ကြိုတင်ဆက်သွယ် မေးမြန်းသင့်ပသည့်ဟုအကြံပြုထားသည်။

လေးကြိမ်မြောက်  Myanmar Pet Expo 2026 ပွဲကိုအောင်မြင်စွာကျင်းပပြီးစီးခဲ့ NOM၊နိုဝင်ဘာ၉၊၂၀၂၆ လေးကြိမ်မြောက်  Myanmar Pet Expo 2026 ပွဲကြီးကို ရန်ကုန်မြို့၊သာကေတမြို့နယ်ရှိ Fortune Plaza တွင်စည်ကားသိုက်မြှိုက်စွာကျင်းပပြုလုပ်ခဲ့သည်။ အဆိုပါပွဲကို နိုဝင်ဘာ ၇ ရက် မှ ၈ရက်အထိ နှစ်ရက်တိုင်တိုင် ကျင်းပပြုလုပ်ခဲ့တာဖြစ်ပြီး ပထမနေ့တွင် မြန်မာနိုင်ငံမွေးမြူရေးလုပ်ငန်းအဖွဲ့ချုပ် ဥက္ကဌ ဒေါက်တာမြဟန် ၊ ဒုဥက္ကဌ ဒေါက်တာခင်လှိုင် ၊ မြန်မာနိုင် တိရစ္ဆာန် ဆေးကုဆရာဝန်များအသင်း ဥက္ကဌ ဒေါက်တာခင်ဇော် နှင့် တာဝန်ရှိ လူကြီးမင်းများ သည် အဖွင့်အမှာစကားပြောကြားခဲ့ကြသည်။  “ဒီ Myanmar Pet Expo ကလုပ်တာတော့ဒီနှစ်နဲ့ဆိုရင်တော့ဒါလေးကြိမ်မြောက်ပါ။လေးကြိမ်မြောက်ထဲမှာတော့ကျွန်တော်ထင်တယ်။ဒီနှစ်ကအစည်ဆုံးပဲ နောက်နှစ်နောက်နှစ်တွေလည်းပိုပိုပြီးတော့စည်လာပြီးတော့ကျွန်တော်တို့ဒီတိရ စ္ဆာန်လောကပေါ့နော်။ဒီမွေးမြူတဲ့သူတွေ ရော၊အစာတွေ ရောင်းဝယ်ဖောက်ကားတဲ့သူတွေ‌ရောတော်တော်ကြီးနောက်ပိုင်းမှာ develop ဖြစ်လာမယ်လို့တော့ထင်တယ်ဗျ။ကျွန်တော် ကပွဲ joinဖြစ်တာ ဒုတိယမြောက်ပါ။ကျွန်တော်က 2024 တုန်း MCC မှာ Dr.THZ ဆေးခန်း အနေနဲ့တစ်ခါပါဖူးတယ်။အခုလည်း ဆေးခန်းအနေနဲ့ပါဖြစ်ပြီးလူအင်အားကပိုတောင့်လာတာပေါ့”ဟု Dr.THZ- Small Animals Medical Center မှဒေါက်တာသန်းထက်ဇော်ကပြောသည်။ အဆိုပါပွဲတွင် International dog show၊Fashion show ၊ငါးပြခန်း၊Exotic Pet နဲ့ Amazing Exotic အစရှိတဲ့ပြခန်းတွေလည်းစုံလင်စွာခင်းကျင်းပြသခဲ့ပါတယ်။လာရောက် လေ့လာကြသည့် တိချစ်သူတွေမှဆိုင်ခန်းများကိုလှည့်လည်ကြည့်ရှူပြီး တိ‌လေးများနဲ့အမှတ်တရဓာတ်ပုံများကိုလည်းရိုက်ကူးခဲ့ကြသည်။

ဒုတိယဝန်ကြီး ဒေါက်တာအောင်ဇေယျ ရန်ကုန်မြို့ရှိ ဓာတုပစ္စည်းစီမံခန့်ခွဲရေးဗဟိုဌာန ကြည့်ရှုစစ်ဆေး နိုဝင်ဘာ ၈၊ ၂၀၂၆   ရန်ကုန်မြို့ အင်းစိန်မြို့နယ်ရှိ စက်မှုပူးပေါင်းဆောင်ရွက်ရေးဦးစီးဌာန၊ ဓာတုပစ္စည်းစီမံခန့်ခွဲရေးဗဟိုဌာနကို ယမန်နေ့မွန်းလွဲပိုင်းက စက်မှုနှင့် အသေးစား၊ အငယ်စားနှင့် အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေးဝန်ကြီးဌာန ဒုတိယဝန်ကြီး ဒေါက်တာအောင်ဇေယျ သွားရောက်ကြည့်ရှုစစ်ဆေးသည်။   ကြည့်ရှုစစ်ဆေးစဉ် နိုင်ငံ့စက်မှုစီးပွားကဏ္ဍ ဖွံ့ဖြိုးတိုးတက်အောင် ဆောင်ရွက်ရာတွင် ဓာတုပစ္စည်းစီမံခန့်ခွဲရေးဗဟိုဌာနက ဓာတုပစ္စည်းနှင့် ဆက်စပ်ပစ္စည်းများကို အကျိုးရှိထိရောက်အောင် ထိန်းချုပ်စီမံခန့်ခွဲခြင်းဖြင့် ပြည်သူများအား စက်မှုလုပ်ငန်းများမှ ဓာတုပစ္စည်းဆိုင်ရာ ဘေးအန္တရာယ်ဆိုးကျိုးများမှ ကာကွယ်ရန်၊ နိုင်ငံ့ သဘာဝပတ်ဝန်းကျင်၊ ရာသီဥတုနှင့် ဂေဟစနစ်တို့အပေါ် မလိုလားအပ်သည့် ထိခိုက်မှုများလျော့နည်းပပျောက်အောင် အလေးထားဆောင်ရွက်ကြရန်၊ ဓာတ်ခွဲခန်းများကို အရည်အသွေးမြင့်မားကာ စံချိန်စံညွှန်များနှင့် ကိုက်ညီမှုရှိစေရေးတို့အတွက် စဉ်ဆက်မပြတ် စစ်ဆေးကြပ်မတ်ဆောင်ရွက်သွားရန်၊ ကွင်ဆင်းစစ်ဆေးသူများအနေဖြင့် သတ်မှတ်အရည်အသွေး အသိအမှတ်ပြုလက်မှတ်များရရှိရေး ဆောင်ရွက်ရန်၊ ဓာတ်ခွဲခန်းအား ISO/ IEC 17025 ရရှိရေးအတွက် ဆောင်ရွက်သွားရန်၊ နည်းပညာမြင့်စက်ပစ္စည်းများအား စီမံချက်အတိုင်း ဖြည့်တင်းပြီး လိုအပ်သည့် လူ့စွမ်းအားအရင်းအမြစ်များအား ပျိုးထောင်ဆောင်ရွက်သွားရန်၊ ပုဂ္ဂလိကစက်မှုနှင့် MSMEs လုပ်ငန်းရှင်များ သင်တန်းများဖွင့်လှစ်ခြင်း၊ အသိပညာပေးပွဲများ ကျင်းပခြင်းနှင့် နိုင်ငံတကာ သုတေသနလုပ်ငန်းများကို ဆက်စပ်ဌာနများနှင့်ပူးပေါင်းပြီး အရှိန်အဟုန်မြှင့်တင်ဆောင်ရွက်သွားရန် တိုက်တွန်းမှာကြားသည်။   ဆက်လက်၍ တာဝန်ရှိသူများက ရှင်းလင်းတင်ပြမှုများအပေါ် ဒုတိယဝန်ကြီးက လုပ်ငန်းဆိုင်ရာများ မှာကြားပြီး ဓာတ်ခွဲခန်းများနှင့် Chemical Reagent Storage၊ Waste Management System (Chemical Management Center) တွင် ကြည့်ရှုစစ်ဆေးကာ သတ်မှတ် SOP များအတိုင်း ဆောင်ရွက်ရန်၊ ဓာတ်ခွဲခန်းများအား အဆင့်မြှင့်တင်ဆောင်ရွက်သွားရန်မှာကြားခဲ့ကြောင်း သိရသည်။

နိုင်ငံတော်တည်ငြိမ်ရေးနှင့် နယ်မြေအေးချမ်းသာယာရေးအတွက် စစ်ဆင်ရေးတာဝန်များကို ရဲဝံ့စွန့်စားစွာ ထမ်းဆောင်ခဲ့သည့် ရှေ့တန်းပြန် နိုင်ငံ့သားကောင်းတပ်မတော်သားများအား ဂုဏ်ပြုကြိုဆို နိုဝင်ဘာ ၈၊ ၂၀၂၆   နိုင်ငံတော်တည်ငြိမ်ရေးနှင့် နယ်မြေအေးချမ်းသာယာရေးအတွက် နယ်မြေလုံခြုံရေးတာဝန်များကို သက်စွန့်ကြိုးပမ်းထမ်းဆောင်ခဲ့သည့် ရှေ့တန်းပြန် နိုင်ငံ့သားကောင်းတပ်မတော်သားများအား ဂုဏ်ပြုကြိုဆိုခြင်းအခမ်းအနားကို ယနေ့နံနက်ပိုင်းတွင် နေပြည်တော်ကောင်စီနယ်မြေ ဇေယျာသီရိမြို့နယ်ရှိ နယ်မြေခံတပ်ရင်း၌ ပြုလုပ်ရာ နေပြည်တော်တိုင်းစစ်ဌာနချုပ် တိုင်းမှူး ဗိုလ်မှူးချုပ် ကျော်စိုးလင်းနှင့်တာဝန်ရှိသူများ၊ အရာရှိ၊ စစ်သည်၊ မိသားစုဝင်များ၊ ဌာနဆိုင်ရာတာဝန်ရှိသူများ၊ ကျောင်းသား ကျောင်းသူများနှင့် ဒေသခံပြည်သူများ တက်ရောက်ကြသည်။   တိုင်းဒေသကြီးနှင့် ပြည်နယ်အသီးသီးရှိ တိုင်းရင်းသားပြည်သူများ စိတ်အေးချမ်းသာစွာ နေထိုင်လုပ်ကိုင် စားသောက်နိုင်ရေး၊ အသက်အိုးအိမ်စည်းစိမ်ဥစ္စာ လုံခြုံမှုရှိစေရေး၊ နယ်မြေအေးချမ်းသာယာရေးတို့အတွက် အမျိုးဘာသာသာသနာကို ကာကွယ်စောင့်ရှောက်လိုသည့် စိတ်ဓာတ်များဖြင့် ရှေ့တန်းစစ်မျက်နှာများတွင် စစ်ဆင်ရေးတာဝန်များကို ရဲဝံ့စွန့်စားစွာ ထမ်းဆောင်ခဲ့သော ရှေ့တန်းပြန် တပ်မတော်သားများအား တိုင်းမှူးနှင့် တက်ရောက်လာကြသူများက အောင်သပြေခက်ကမ်း၍လည်းကောင်း၊ အိုးစည်ဒိုးပတ် အတီး၊ အမှုတ်၊ အက၊ အခုန်များဖြင့်လည်းကောင်း ဝမ်းမြောက်စွာ သောင်းသောင်းဖြဖြ ဂုဏ်ပြုကြိုဆိုကြသည်။ ယင်းနောက် တိုင်းမှူးက အောင်ပွဲရရှေ့တန်းပြန် တပ်မတော်သားများအား ဂုဏ်ပြုအမှာစကားပြောကြားပြီး ဂုဏ်ပြုချီးမြှင့်ငွေများပေးအပ်ခဲ့ကြောင်း သတင်းရရှိသည်။